Nəsimi rayonunda 2009-cu ilin 9 ayına yekun vurulub

Nəsimi rayonunda 2009-cu ilin 9 ayının sosial-iqtisadi inkişafının yekunlarına həsr olunmuş iclas keçirilmişdir.

Tədbiri rayon icra hakimiyyətinin başçısı Nəsib Məhəməliyev açaraq məruzə ilə çıxış etmişdir. Natiq bildirmişdir ki, bu ilin 9 ayı respublikamiız üçün uğurlu olmuş və iqtisadiyyatımızda dinamik inkişaf davam etmişdir. 2009-cu ilin 9 ayı ərzində ölkəmizdə ümumi daxili məhsul 6,1 faiz artmışdır. Bu dövrdə sənayedə artım 5, kənd təsərrüfatında isə 3 faiz olmuşdur. Hesabat dövründə əhalinin pul gəlirləri 8 faiz artmışdır. Dünyada iqtisadi və maliyyə böhranının hökm sürdüyü bir vaxtda bu çox böyük uğurdur.

İlin doqquz ayı ərzində ölkəmizdə sosial məsələlərin həllinə böyük diqqət göstərilmiş, minimum əmək haqqı, pensiyaların baza hissələri artırılmış, ünvanlı sosial yardım alan vətəndaşların sayı çoxalmışdır. Hazırda Azərbaycanda orta əmək haqqı 370 dollar səviyyəsindədir. Ölkəmizdə iri infrastruktur layihələrinin icrası uğurla davam etdirilir. 2003-cü ildən bu günə qədər Azərbaycanda 824 min yeni iş yeri yaradılmışdır. Hərbi potensialımız getdikcə artır və bu gün Azərbaycan bölgədə ən güclü Silahlı Qüvvələrə malikdir.

Azərbaycan hazırda dünyanın inkişaf etmiş dövlətlərindən biridir və buna səbəb ulu öndərimiz Heydər Əliyevin əsasını qoyduğu və bu gün möhtərəm Prezidentimiz İlham Əliyev tərəfindən uğurla davam etdirilən irimiqyaslı islahatlar və böyük inkişaf strategiyasıdır.

N.Məhəməliyev demişdir ki, ölkəmizin hər yerində olduğu kimi 2009-cu ilin 9 ayında Nəsimi rayonunda da bir çox sahələrdə uğurlar qazanılmışdır. Bu dövrdə əhalinin sosial-rifah halının daha da yaxşılaşdırılmasına yönəlmiş tədbirlər həyata keçirilmiş, irimiqyaslı tikinti, yenidənqurma və abadlıq işləri həyata keçirilmişdir.

Natiq bildirmişdir ki, 2009-cu ilin yanvar-sentyabr aylarında rayonda 113,5 milyon manatlıq sənaye məhsulu istehsal edilmiş və xidmətlər göstərilmişdir. Sənaye istehsalının 14,9 faizi dövlət, 85,1 faizi özəl sektorun payına düşmüşdür.

Bu dövrdə istehlak bazarı dinamik inkişafını davam etdirmiş və əhaliyə 661,3 milyon manatlıq istehlak malları satılmış və pullu xidmətlər göstərilmişdir. Bu, keçən ilin müvafiq dövrü ilə müqayisədə 22,9 faiz çoxdur.Nəqliyyat sektorunda 202,3 milyon manatlıq xidmətlər göstərilib ki, bu da əvvəlki ilə nisbətən 2,2 faiz çoxdur.

İlin 9 ayında əvvəlki illə müqayisədə işçilərin orta aylıq əmək haqqının səviyyəsi 24,6 faiz artaraq 330,3 manat təşkil etmişdir. Bu dövr ərzində rayonda 1523 yeni iş yeri açılmışdır. İşsizliyə görə 119 nəfərə müavinət verilmişdir ki, bu da keçən ildəkindən 14 nəfər azdır.

2008-2009-cu tədris ilində rayon ümumtəhsil məktəblərini 2170 şagird bitirmiş, onlardan 1120-si ali məktəblərə qəbul olunmuşlar. Bu tələbələrdən ikisi Prezident təqaüdünə layiq görülüb.

42 nömrəli orta məktəbdə əsaslı təmir işləri başa çatdırılmış və burada 3 mərtəbəli əlavə korpus inşa edilir. İ.Əfəndiyev adına Elitar Gimnaziyada əsaslı təmir işləri başa çatdırılmış, Tibb Universitetindəki Tədris Terapiya Korpusunun və Ə.Qarayev adına Uşaq Xəstəxanasındakı cərrahiyyə korpusunun tikintisi davam edir. Bu dövrdə Elmi-Tədqiqat Travmotologiya və Ortopediya İnstitutu əsaslı təmir edilmişdir.

Dekabr ayında keçiriləcək bələdiyyə seçkiləri ilə əlaqədar dairə və məntəqə seçki dairələri yerləşdiyi binalarda cari təmir işləri aparılmışdır. Bu qurumlar lazımi avadanlıqlarla təmin edilmiş, namizədlərin seçicilərlə görüşlər keçirmələri üçün qapalı və açıq yerlər müyyənləşdirilmiş, təbliğat vasitələri üçün stendlər təmir olunmuşdur.

Əhaliyə göstərilən xidmət növlərinin səmərə və keyfiyyətinin yüksəldilməsi rayon icra hakimiyyəti rəhbərliyi tərəfindən daim diqqət mərkəzində saxlanılır və hesabat dövründə bu sahədə də nailiyyətlər əldə edilmişdir.

Nəsimi rayon Qaz İstismarı İdarəsi tərəfindən bu dövrdə 92016,1 min manatlıq təbii qaz satılmışdır. “Azərsu” ASC Nəsimi rayon filialı istehlakçılara 2177,7 min manatlıq su satmışdır. Abonentlərin 69,7 faizi sayğacla təmin olunmuşdur. 2009-cu ilin 9 ayı ərzində rayonda elektrik enerjisi haqlarının ödənilməsi 87 faizə yüksəlmişdir. Nəsimi rayon elektrik enerjisi satışı və istismarı sahəsi üzrə 53755 (97,1 faiz) sayğac quraşdırılmışdır.

Nəsimi Rayon İcra Hakimiyyəti başçısının təşəbbüsü və birbaşa nəzarəti ilə rayon ərazisində başlanılmış genişmiqyaslı abadlıq və yenidənqurma işləri davam etdirilməkdədir. Belə ki, Azadlıq və Vaqif prospektlərinin kəsişməsində yerləşən parkda tamamlanma işləri başa çatdırılmışdır. Hazırda Vaqif prospekti ilə S.Vurğun və Xan Şuşinski küçələrinin kəsişməsində və R.Behbudov və A.Bakıxanov küçələrinin kəsişməsində yerləşən parklarda yenidənqurma və abadlıq işləri başa çatmaq üzrədir. Bundan başqa Heydər Əliyev adına Sarayın ətrafında, 2-ci mikrorayon ərazisindəki “Heydər parkı”nda təmir-bərpa və təmizlik işləri aparılmış, S.Vurğun, Ü.Hacıbəyov, R.Məmmədov, H.Seyidzadə, M.Kazımovski küçələrində, Tbilisi, Azadlıq və Bülbül prospektlərində yeni yaşıllıq zolaqları salınmış, müxtəlif növ ağac və dekorkativ kollar əkilmişdir.

Rayon icra hakimiyyəti başçısının sərəncamı ilə oktyabr-noyabr ayları yaşıllıq ayları elan edilmiş və bu məqsədlə hər həftənin şənbə və bazar günləri ümumrayon iməcilikləri keçirilir. Həmin iməciliklər zamanı indiyədək 1220 ağac əkilmiş, Azadlıq prospektində isə genişmiqyaslı yenidənqurma və abadlıq işlərinə başlanılmışdır. Rayonda qış mövsümünə hazırlıqla bağlı zəruri tədbirlər həyata keçirilir və bu istiqamətdə qarşıya çıxan bütün problemlər operativ həllini tapır.

Dövlət başçımızın tövsiyə və göstərişlərinə uyğun olaraq rayon rəhbərliyi vətəndaşların müraciətlərinin heç birini cavabsız qoymur və bu sahədə mütəmadi olaraq işlər həyata keçirilir.

Sonra rayon icra hakimiyyəti başçısının müavini Zahid Xəlilov, Nəsimi rayon Mənzil-Kommunal Təsərrüfat Birliyinin rəisi Laçın Mustafayev, Nəsimi Rayon Enerji Təchizatı və Satışı İdarəsinin rəisi Azad Mustafayev, Nəsimi Rayon Qaz İstismar sahəsinin rəisi Bəhram Qarayev, Su Kəməri Qurğuları üzrə Nəsimi rayon İstehsalat və İstismar zonasının rəisi Eyvaz Budaqov, İstilik Sistemlərinin İstismarı sahəsinin rəisi Qadir Əliyevin çıxışları dinlənildi. Onlar görülmüş işlərdən və qarşıda duran məsələlərdən danışdılar.

Nəsimi Rayon İcra Hakimiyyətinin başçısı Nəsib Məhəməliyev iclasa yekun vurdu.

Ayaz Həmidoğlu

Xalq qəzeti.- 2009.- 23 oktyabr.- S. 6.