Nizami rayonunda cari ilin doqquz ayına yekun vurulmuşdur

Dünən Bakı şəhəri Nizami Rayon İcra Hakimiyyətində 2009-cu ilin doqquz ayında rayonun sosial-iqtisadi inkişafının yekunlarına və qarşıda duran vəzifələrə həsr olunmuş hesabat yığıncağı keçirildi. Rayonun sənaye, təhsil, səhiyyə, mədəniyyət, xidmət sahələrinin, hüquq-mühafizə orqanlarının, eləcə də ictimaiyyət nümayəndələrinin iştirak etdikləri yığıncağı Nizami Rayon İcra Hakimiyyətinin başçısı Tahir Budaqov açdı.

Natiq oktyabrın 16-da Prezident İlham Əliyevin sədrliyi ilə keçirilən Nazirlər Kabinetinin 2009-cu ilin birinci yarısının sosial-iqtisadi inkişafının yekunları və qarşıda duran vəzifələrə həsr olunmuş iclasında dövlət başçısının proqram xarakterli nitqinin bəzi məqamları üzərində geniş dayandı. Qeyd olundu ki, ölkə Prezidenti cənab İlham Əliyev cari ilin ötən dövründə Nizami rayonunda bir sıra yeni obyektlərin açılışında və təməlqoyma mərasimlərində iştirak etmiş, rayonun abadlaşdırılması ilə bağlı göstəriş və tövsiyələrini vermişdir.

Nizami Rayon İcra Hakimiyyəti başçısının müavini İldırım Mehdiyev 2009-cu ilin yanvar-sentyabr ayları ərzində rayonun sosial-iqtisadi inkişafının yekunlarına və qarşıda duran vəzifələrə həsr olunmuş geniş hesabat məruzəsi ilə çıxış etdi. Natiq ulu öndər Heydər Əliyev tərəfindən əsası qoyulmuş sosial-iqtisadi islahatların Prezident İlham Əliyev tərəfindən uğurla davam etdirilməsi nəticəsində cari ilin doqquz ayında ölkəmizdə ümumi inkişafın davam etdiyini diqqətə çatdırdı. Azərbaycanda sosial-iqtisadi sahələrdə həyata keçirilən bütün islahatların əsas məqsədinin vətəndaşların rifahının yaxşılaşdırılmasına yönəldiyini vurğulayan məruzəçi ümumi inkişafı xarakterizə edən makroiqtisadi göstəricilərin getdikcə yaxşılaşdığını və bunun Azərbaycanı regionun lider dövlətinə çevrilməsinə imkan yaratdığını bildirdi.

Cari ilin doqquz ayının Azərbaycan Respublikası üçün kifayət qədər uğurlu və yüksək nailiyyətlərlə zəngin bir dövr olduğunu qeyd edən natiq dedi ki, oktyabr ayının 16-da Prezident Sarayında dövlət başçısı cənab İlham Əliyevin sədrliyi ilə keçirilən Nazirlər Kabinetinin 2009-cu ilin yanvar-sentyabr aylarının sosial-iqtisadi inkişafının yekunlarına həsr olunmuş iclasında son illər ərzində ölkə iqtisadiyyatında müşahidə olunan iqtisadi artımın hazırda da davam etməsi müsbət hal kimi qiymətləndirilmişdir. Belə ki, Prezident İlham Əliyev statistik göstəricilər əsasında Azərbaycanda sosial vəziyyətin, sənaye istehsalının, özəl bölmənin, neft-qaz sektorunun, qeyri-neft bölməsinin, o cümlədən kənd təsərrüfatının və digər bütün sahələr üzrə istehsalın yüksəlməsini və inkişafını təhlil edərək dünyada davam edən maliyyə böhranına baxmayaraq, cari ilin 9 ayında ölkədə ümumi daxili məhsulun 6,1 faiz artdığını, sənayedə 5 faiz, kənd təsərrüfatında isə 3 faizlik inkişafın baş verdiyini bildirmişdir. Dövlət başçısı ölkədə sosial proqramların uğurla icra olunduğunu vurğulayaraq ötən 9 ayda ölkə üzrə inflyasiyanın 2,1 faiz təşkil etdiyini, əhalinin pul gəlirlərinin 10 faiz, orta aylıq əmək haqqının 15 faizdən çox artdığını, Azərbaycanda 2003-cü ildən bəri 824 min yeni iş yerinin açıldığını bəyan etmişdir.

Son illər ölkəmizin sosial-iqtisadi həyatında baş verən tərəqqi paytaxtın Nizami rayonunda da aydın hiss olunur. Bu barədə məlumat verən rayon icra hakimiyyəti başçısının müavini İ.Mehdiyev bildirdi ki, ölkə iqtisadiyyatında baş vermiş sürətli inkişaf Nizami rayonunun sosial-iqtisadi həyatını daha da canlandırmış, rayon sakinlərinin qarşılaşdığı sosial problemlərin həlli istiqamətində konkret addımlar atılmış, xidmət sahələrinin fəaliyyəti yüksəlmiş, çoxsaylı yeni iş yerləri açılmışdır.

Natiq bildirdi ki, 2009-cu ilin 9 ayında Nizami rayonunda sənaye sahəsi üzrə istehsalın həcmi 1 milyard 158 milyon manat təşkil etmişdir ki, bununda 34,7 faizi qeyri-dövlət sektorunun payına düşmüşdür. Məhsul istehsalında artım, əsasən, ət və ət məhsulları, saflaşdırılmış günəbaxan yağı, şərabçılıq, əczaçılıq məhsullarının istehsalı, elektrik enerjisi, qaz, buxar istehsalı və bölüşdürülməsi sahələrində qeydə alınmışdır. Həmin dövrdə istehsal olunmuş məhsulun 103 faizi istehlakçılara göndərilmişdir. Məruzəçi qeyd etdi ki, rayon üzrə ümumi inkişafın əldə olunmasında Heydər Əliyev adına Bakı Neft Emalı Zavodunun, “Evropean Tobacco Baku” ASC-nin, “Neftqaztikinti” trestinin, “NJT-2000" firmasının, ”Azərsun Holdinq" şirkətinin, “Bakı Şərab-1" və ”Zəhmət — Ruzi" açıq səhmdar cəmiyyətlərinin böyük xidmətləri olmuşdur.

2009-cu ilin doqquz ayında rayonun nəqliyyat və rabitə müəssisələrinin uğurlu fəaliyyətini qeyd edən natiq həmçinin iqtisadiyyatın və sosial sahələrin inkişafı üçün bütün maliyyə mənbələri hesabına əsas kapitala 63,9 milyon manat həcmində investisiya yönəldildiyini, bunun da 57,9 milyon manatının dövlət, 6 milyon manatının isə qeyri-dövlət müəssisələrinin payına düşdüyünü diqqətə çatdırdı. Qeyd olundu ki, hesabat dövründə əsas kapitala yönəldilmiş investisiyanın 37,8 milyon manatı, yəni 59,2 faizi istehsal təyinatlıdır. Cari ilin doqquz ayında rayon üzrə pərakəndə əmtəə dövriyyəsi və pullu xidmətlərin həcmi 5,2 faiz artaraq 520,5 milyon manat olmuş, özəl müəssisələr tərəfindən əhaliyə 502,6 milyon manatlıq istehlak malları satılaraq pullu xidmətlər göstərilmişdir. Həmçinin bildirildi ki, 9 ayın yekununa görə, rayon üzrə işçilərin orta aylıq nominal əmək haqları 13 faiz artaraq 283,7 manat olmuşdur. Orta aylıq əmək haqqı sənayedə 18,8 faiz, nəqliyyat sahəsində 24,7 faiz, rabitədə 22,3 faiz, ticarətdə 7,6 faiz, tikintidə isə 15,1 faiz artmışdır.

2009-cu ilin yanvar-sentyabr aylarında Nizami rayonunda 999 yeni iş yerinin açıldığını diqqətə çatdıran məruzəçi bildirdi ki, iş yerlərinin 58-i yeni yaradılmış müəssisələrin, 68-i mövcud müəssisələrin, 873-ü isə fiziki şəxslərin payına düşmüşdür. Bütövlükdə isə 2003-cü ilin oktyabr ayından 2009-cu ilin müvafiq ayının 1-dək rayonda 14668-i daimi olmaqla 14765 yeni iş yeri yaradılmışdır. Cari ilin ötən dövründə rayon əhalisinin sosial müdafiəsinin gücləndirilməsi sahəsində görülmüş işlər barədə məlumat verən natiq onu da dedi ki, ölkə başçısı tərəfindən imzalanmış fərman və sərəncamların məhz əhalinin sosial rifahının yüksəldilməsinə yönəldilməsinin nəticəsidir ki, əvvəlki dövrlərlə müqayisədə vətəndaşların maddi-rifah halı getdikcə yaxşılaşır.

Məruzəçi cari ilin dekabr ayının 23-də yerli özünüidarəetmə orqanlarına keçiriləcək seçkilərə hazırlıqla bağlı görülən işlərdən, eləcə də 2009-2010-cu illərin payız-qış mövsümü ilə əlaqədar həyata keçirilən tədbirlərdən söhbət açdı. Sakinlərin işıq, qaz, istilik və içməli su ilə təminatının yaxşılaşdırılması ilə bağlı görülən işlər sadalandı. Bundan əlavə, rayonun səhiyyə və təhsil müəssisələrinin işinin əsaslı şəkildə yaxşılaşdırılması məqsədilə həyata keçirilən tədbirlər cari ilin ötən dövründə də davam etmişdir.

Məruzə ətrafında çıxış edən digər natiqlər rəhbərlik etdikləri sahələrin cari ilin doqquz ayı ərzindəki fəaliyyəti ilə bağlı hesabat verdilər, ölkənin sosial-iqştisadi inkişafı yolunda bundan sonra da səylə çalışacaqlarını bildirdilər.

Hesabat yığıncağına yekun vuran Nizami Rayon İcra Hakimiyyətinin başçısı Tahir Budaqov Nazirlər Kabinetinin 2009-cu ilin doqquz ayının yekunlarına həsr olunmuş iclasında ölkə prezidenti İlham Əliyevin proqram xarakterli yekun nitqindən irəli gələn vəzifələrin icrası ilə bağlı görüləcək işlərdən söhbət açdı, bununla bağlı müvafiq qurumların rəhbərlərinə konkret tapşırıqlar verdi.

Yığıncağın sonunda iclasın qərar layihəsi oxundu, Azərbaycan Respublikasının Prezidenti cənab İlham Əliyevə rayon ictimaiyyəti adından müraciət qəbul olundu.

Mirbağır YAQUBZADƏ

Xalq qəzeti.- 2009.- 25 oktyabr.- S. 4.