Sumqayıt: qarşıda duran vəzifələr müəyyənləşmişdir

 

Cari ildə ölkə miqyasında əldə olunmuş sosial-iqtisadi nailiyyətlərdə Sumqayıtın da özünəməxsus rolu olmuşdur. Prezident İlham Əliyevin imzaladığı sərəncama əsasən geniş qeyd olunan Sumqayıtın 60 illik yubileyi yalnız ictimai-mədəni hadisələrlə məhdudlaşmamış, şəhər iqtisadiyyatının gücləndirilməsi, əhalinin rifah halının yaxşılaşdırılması tədbirləri də ardıcıl həyata keçirilmişdir.

 

Doqquz ay ərzində Sumqayıt şəhərində ümumi məhsul buraxılışının həcmi 250 milyon manat təşkil etmiş, məhsul istehsalında qeyri-dövlət sektorunun payı 81,2 faizə çatmışdır. Son 6 ildə ümumilikdə şəhər üzrə məhsul buraxılışı və sənaye xarakterli xidmətlərin həcmi 2 milyard 300 milyon manatdan çox olmuşdur.

Bütün sahələrdə çalışan işçilərin orta aylıq əmək haqqı 250 manat həddini ötmüş, son 6 il ərzində bu göstərici şəhər üzrə 3,6 dəfə artmışdır. Əhalinin sosial təminatının gücləndirilməsi məqsədilə cari ildə daha beş min ailəyə ünvanlı sosial yardım təyin edilmişdir.

Doqquz ayda qeyri-dövlət sektoruna aid sənaye müəssisələrinin məhsul buraxılışında 101 faizlik artıma nail olunmuşdur. Ötən ilin eyni dövrü ilə müqayisədə “Azərbaycan Məişət Malları”, “Uretan LTD”, “Seyfulla və Kövsər”, “Ağac Emalı” və “Kiş San Parket LTD” müəssisələrində məhsul istehsalının həcmi xeyli artmışdır.

Bununla yanaşı, iri diametrli şüşə liftli boru istehsalı zavodu “Azkompozit” MMC-də, biskvit-makaron, “Bismak” Qida Sənayesi Kompleksində və qənnadı məmulatları istehsal edən “Elitar” MMC-də yeni məhsul çeşidləri mənimsənilmiş, istehsal həcmi artmışdır.

Vaqif Əliyev sonra qeyd etdi ki, enerji təhlükəsizliyinin təmin olunmasında mühüm yer tutan 517 meqavat gücündə Sumqayıt Elektrik Stansiyasında tikinti-quraşdırma və avadanlıqların tənzimləmə işləri tam başa çatdırılmışdır, ərazi abadlaşdırılır. Cari ilin üçüncü rübündə stansiyada 250 milyon kilovat-saatdan çox elektrik enerjisi istehsal edilmişdir.

Digər iri infrastruktur layihəsi — gücü sutkada 200 min kubmetr olan təmizləyici qurğunun inşası həlledici mərhələyə çatmış, inzibati binanın tikintisi başa çatmaq üzrədir.

Sahibkarlıq fəaliyyətinin dəstəklənməsi və əlverişli biznes mühitinin yaradılması nəticəsində yeni ticarət, xidmət və iaşə obyektləri fəaliyyətə başlamışdır. Hazırda şəhər ərazisində 2000-ə yaxın hüquqi və 8400 nəfərdən çox fiziki şəxs fəal sahibkarlıq fəaliyyəti ilə məşğul olur. Cari ildə Sumqayıt şəhərində 2000-dən çox iş yeri açılmışdır. Ümumilikdə, son 6 ildə şəhər üzrə 38480 iş yeri yaradılmışdır ki, bunun da yarıdan çoxu daimidir.

Prezident İlham Əliyev tərəfindən 1 oktyabr 2009-cu il tarixdə Sumqayıt şəhərində abadlıq işlərinin sürətləndirilməsi haqqında imzalanmış sərəncam bu sahədə görülən tədbirlərin gücləndirilməsi üçün əlavə stimul yaratmışdır.

Sumqayıt sakinləri uzun illər payız-qış mövsümündə dam örtüklərinin yararsız vəziyyətdə olmasından əziyyət çəkmişlər. 2003-cü ildən etibarən bu problemin həllində kəskin dönüş yaradılmış, 750-dən çox yaşayış binasının dam örtüyü təmir edilmişdir. Cari ilin 9 ayı ərzində daha 226 mənzildə dam örtüyünün təmiri başa çatdırılmışdır. Prezident sərəncamı ilə Sumqayıt şəhərinə ayrılmış vəsait hesabına hazırda Heydər Əliyev prospekti və Sülh küçəsi boyunca yaşayış binalarının dam örtüklərinin şiferlə yenidən qurulması işləri aparılır.

Hesabat dövründə 12 yaşayış binasında aşağı şəbəkə üzrə içməli su və kanalizasiya xətləri təmir edilmiş, daha 16 binada zirzəmilər qurudulmuşdur.

Ötən müddətdə daha 50 yaşayış binasının fasad divarları əsaslı təmir edilərək rənglənmişdir. Son illər 260-dan çox binanın xüsusi layihəyə əsasən zövqoxşayan rənglərlə boyanması şəhərin memarlıq görkəminə yaraşıq gətirmişdir.

Doqquz ayda şəhərin məhəllə, mikrorayon və küçələrində 100 min kvadratmetrədək yeni asfalt örtüyü qoyulmuşdur.

Şəhərin küçələrində yağıntı sularını axıdan 550 paqonometr uzunluğunda yeni xətlərin çəkilməsi qarlı-yağışlı hava şəraitində sakinlərin maneəsiz hərəkəti və asfalt örtüyünün davamlılığının təmin edilməsi baxımdan vacib addımlardandır.

Son illər əhalinin sıx məskunlaşdığı yaşayış massivlərində, xüsusilə mikrorayonlarda salınmış 14 yeni park və abadlaşdırılmış xiyabanlar sakinlərin rahat istirahətinə şərait yaratmışdır. 13-cü mikrorayonda Babək küçəsi boyu, 10-cu mikrorayonda Qarabağ kinoteatrının yanında, 47-ci məhəllə ərazisində istirahət guşələri yenidən qurulmuş, 17 və 21-ci mikrorayonlarda yeni parkların salınması üzrə hazırlıq işlərinə başlanılmışdır.

Yaxın müddətdə N.Nərimanov küçəsi ilə H.Əliyev prospektinin kəsişməsində yerləşən sahədə istirahət guşəsinin salınması üzrə əsaslı təmir işləri başa çatdırılacaq, fəvvarə quraşdırılacaq. Hacı Zeynalabdin qəsəbəsinin girişində yeni park salınmış, müasir işıqlandırma sistemi quraşdırılmış, oturacaqlar qoyulmuş, hazırda son tamamlama işləri aparılmaqdadır. Şəhərin girişindəki Tərəqqi parkının bərpası yekunlaşmışdır.

Son 6 ildə 100 minə yaxın ağac əkilmişdir. Hazırda Sumqayıtda adambaşına düşən yaşıllıq sahəsi 26 kvadratmetr təşkil edir ki, bu da respublika şəhərlərinin orta göstəricisindən yüksəkdir. Nazirlər Kabinetinin geniş iclasında Prezident tərəfindən gələn ilin “Ekologiya ili” elan olunması təşəbbüsünü əsas götürərək, şəhər ərazisində yaşıllıq sahələrinin artırılması və onlara qulluq göstərilməsi ilə bağlı tədbirlər planı yenidən nəzərdən keçiriləcək.

İlin əvvəlindən fəaliyyətə başlayan Sumqayıt şəhər Təmizlik Departamenti tərəfindən şəhərin əhalinin sıx məskunlaşdığı mərkəzi hissəsində 220 stasionar məntəqə, fərdi yaşayış evlərinin üstünlük təşkil etdiyi ərazilərdə isə siqnal sistemi vasitəsilə xidmət şəbəkəsi qurulmuşdur.

Nəqliyyat sisteminin təkmilləşdirilməsi üzrə əsas tədbirlərdən biri şəhərdə yeni avtobus dayanacaqlarının quraşdırılmasıdır. Cari ilin sonuna kimi 65 belə dayanacağın qoyulması nəzərdə tutulub ki, bu həm nəqliyyat vasitələrinin hərəkətinin tənzimlənməsinə, həm də sərnişinlərin rahatlığına xidmət edəcək.

Müşavirədəki çıxışlarda görülən işlərdən konkret faktlarla ətraflı bəhs edilmiş və ili uğurla başa vurmaq üçün qarşıda duran vəzifələr müəyyənləşmişdir.

 

 

Əli NƏCƏFXANLI

 

Xalq qəzeti.- 2009.- 25 oktyabr.- S. 3.