Hacıqabul: sosial-iqtisadi inkişaf davam edir

Dövlət başçısı İlham Əliyevin sədrliyi ilə Nazirlər Kabinetinin geniş iclasında cari ilin ötən 9 ayının sosial-iqtisadi inkişaf dinamikası təhlil olundu, qarşıda duran mühüm məsələlər müzakirə edildi. Hacıqabul rayonunda da 2009-cu ilin 9 ayının nəticələrinə həsr olunmuş tədbir keçirildi. Rayon icra hakimiyyətinin başçısı Əhməd Muxtarov iştirakçıların diqqətinə çatdırdı ki, möhtərəm Prezidentimiz İlham Əliyevin zamanı qabaqlayan addımlar atması nəticəsində Azərbaycan Respublikası son illərdə olduğu kimi “böhran ili” kimi tarixə yazılan 2009-un 9 ayını da nailiyyətlərlə başa vurdu. O dedi:

— Hesabat dövrünə təsadüf edən sentyabr ayının 3-ü heç vaxt hacıqabulluların xatirəsindən silinməyəcək əlamətdar bir gün kimi tarixə yazılmışdır. Belə ki, həmin gün ölkə Prezidenti cənab İlham Əliyev rayonumuza ikinci dəfə səfər edərək ulu öndərin abidəsi önünə gül dəstəsi qoymuş, Heydər Əliyev muzeyinə baş çəkib xatirə kitabına ürək sözlərini yazmışdır.

Cənab Prezident 2006-cı ilin 23 avqustunda təməlini qoyduğu Hacıqabul Uşaq Tibb Mərkəzinin açılışında iştirak etmiş, Mədəniyyət evinə baxış keçirmiş və rayonun Atbulaq kəndində müasir standartlara cavab verən kərpic zavodunun açılışında iştirak etmişdir.

Ə.Muxtarov əlavə etdi: “Hacıqabul rayonunun təsərrüfatlarında bu ilin 9 ayında kənd təsərrüfatı məhsullarının istehsalında bütün göstəricilər üzrə artım qeydə alınmışdır. 2009-cu ildə taxıl istehsalı 37160 ton olmuşdur ki, bu da ötən ilin müvafiq dövrü ilə müqayisədə 7550 ton çoxdur. Bitkiçilik üzrə digər məhsulların da nəticələri ürəkaçandır. Tərəvəz istehsalı 18826 ton və ya ötən ilin müvafiq dövrünə nisbətən 54 ton çox, bostan məhsulları istehsalı 23548 ton və ya ötən ilin müvafiq dövrü ilə müqayisədə 42 ton çox, meyvə istehsalı 5552 ton və ya ötən ilin müvafiq dövrü ilə müqayisədə 2 ton çox olmuşdur. Günəbaxan, qarğıdalı istehsalında da artım qeydə alınmışdır.

Bu il 50 hektar əraziyə pambıq əkilmiş və 52 ton məhsul yığılmışdır.

“Kənd təsərrüfatı məhsulları istehsalçılarına dövlət dəstəyi” haqqında” Azərbaycan Respublikası Prezidentinin 2007-ci il 23 yanvar tarixli sərəncamına əsasən əkin sahəsinin becərilməsində istifadə etdikləri yanacaq və mühərrik yağlarına görə 2749 nəfər 598.542,80 manat dövlət yardımı almışdır. Bundan əlavə, torpaq mülkiyyətçilərinə güzəştli qiymətlərlə mineral gübrələrin verilməsi kənd təsərrüfatı məhsulları istehsalçılarına dövlət dəstəyinin bariz nümunəsidir. Rayonun fermerlərinə və torpaq mülkiyyətçilərinə 2009-cu ildə 100 ton azot gübrəsi güzəştli qiymətlərlə satılmışdır.

Hazırda Dövlət Proqramı çərçivəsində rayonumuzda aqrar sektorun inkişafına xidmət göstərəcək bir sıra mühüm əhəmiyyətli obyektlərin tikintisi aparılır. Bunlardan Padar, Qarasu kəndlərinə və Muğan qəsəbəsinə Ağsu rayonu ərazisindən çəkilən uzunluğu 55 kilometr olan Baş Şirvan kanalını və Pirsaat çayı üzərindəki su anbarının lildən təmizlənərək, yenidən qurulmasını göstərmək olar. Bu iki nəhəng tikinti istifadəyə verildikdən sonra rayonda 15 min hektara yaxın torpaq sahəsi əkin dövriyyəsinə qatılacaqdır ki, bu da kənd təsərrüfatı məhsullarının həcminin 2 dəfə artması deməkdir. Bu tədbirlərin həyata keçirilməsi ilə rayonda minlərlə yeni iş yerləri açılmış olacaqdır.

Natiq vurğuladı ki, şəhərin H.Həmidov küçəsinə 5 santimetr qalınlığında 350 metr, S.Vurğun küçəsinə 5 santimetr qalınlığında 670 metr, M.Ə.Rəsulzadə küçəsinə 5 santimetr qalınlığında 290 metr məsafəyə asfalt-beton örtüyü döşənmiş, S.Vurğun, M.Ə.Rəsulzadə küçələrinə ümumilikdə 300 ton asfalt-beton örtüyündən hamarlayıcı qat verilmiş, çalalar təmir olunmuşdur. Bakı, D.Ağamalıyev, Nizami, M.Ə.Rəsulzadə küçələrində 2350 metr qum-çınqıl qarışığından əsas qoyulmuşdur. Bakı, Nizami, M.Əsədov küçələri ilə kəsişmələrə 6 santimetr qalınlığında asfalt-beton örtüyü vurulmuşdur. İ.Qayıbov, M.Əsədov, S.Vurğun küçələrinə giriş yolları üzrə qalınlığı 4 santimetr olan 6111 kvadratmetr, Bakı küçəsinə 6 santimetr qalınlığında 2237 kvadratmetr sahəyə xırda dənəli asfalt-beton örtüyü döşənmiş, İ.Qayıbov küçəsində 60 kubmetr qum-çınqıl tökülərək səkiyə hamarlayıcı qat verilmişdir.

Heydər Əliyev, M.Əsədov, İ.Qayıbov küçələrində, xəstəxanaya gedən yolda, dağüstü massivdə mişar daşından 470 paqonometr bardür hörülmüş, 350 kvadratmetr bardür sement məhsulu ilə suvanmışdır. Mişar daşından 20 santimetr qalınlığında 319 kvadratmetr divar hörülmüş, 260 kvadratmetr divar ağlay daşı ilə üzlənmişdir. Hasar divarın 2120 kvadratmetrinə emusiya çəkilmiş, 590 kvadratmetr bardür yağlı boya ilə rənglənmişdir. 240 kvadratmetr divar qaya daşı ilə üzlənmiş, 270 paqonometr surahi qurulmuşdur, 214 kvadratmetr surahi sement məhlulu ilə suvanaraq 100 kvadratmetrə emulsiya çəkilmişdir. 150 kvadratmetr sahə isə tamet tavalarla döşənmişdir. Mişar daşından 40 santimetr qalınlığında 200 kvadratmetr divar, 40x40 santimetr ölçüdə 64 metr uzunluğunda sütunlar hörülmüşdür.

Dağüstü massivdə milli rəmzli 1,79 ton çəkidə metal dayaqları quraşdırılmış, 360 kvadratmetr metal konstruksiya rənglənmiş, 63 kvadratmetri alkaponla üzlənmiş, üçbucaq şəkilli sahəyə torpaq daşınaraq ətrafına bardür düzülüb, abadlıq və yaşıllaşdırma işləri tamamlanmışdır. 18 kvadratmetr ölçüdə metal hissələrdən təşviqat stendi quraşdırılmış, 54 kvadratmetr sahə fanera ilə üzlənmişdir. 200 metr elektrik kabeli borudan keçməklə çəkilmişdir, 14,5 kubmetr beton bünövrə, 0,9 ton metal sədd quraşdırılmış, 18,6 kubmetr sütunlar mərmər tavanla üzlənmişdir, 12 dəst işıq dayaqları quraşdırılmışdır.

Şəhərdə sərnişinlərin rahatlığı üçün 3 ədəd avtomobil dayanacağı quraşdırılaraq istifadəyə verilmişdir. 50 kommersiya ticarət mağazasının fasad hissəsi rənglənmiş və 1500 kvadratmetr sahə sahibkarların hesabına asfaltlaşdırılmışdır.

Atbulaq kəndində 600, Meyniman kəndində 500, Kolanı kəndində 550, Qarasu kəndində 300 metr, Muğan qəsəbəsində 480 metr, Navahı kəndində 4000, Qubalıbaloğlan kəndində 600 metr, Udullu kəndarası avtomobil yollarına 10 kilometr, Talış kəndinin 500 metr avtomobil yoluna qum-çınqıl qarışığından əsas qoyulmuşdur.

Meyniman kəndində 800 metr uzunluğunda 1,5 metr eni və 2 metr dərinliyi olan arx qazılmışdır.

12 kilometr uzunluğunda, 4 metr enində Ağacanlı Bürvənd kənd yolundan Şirvan şəhərinə çıxış yolu qreyderlə hamarlanmış, Muğan qəsəbəsində R.Hüseynov və Ş.Qurbanov küçələrində 350 metr uzunluğunda kanalizasiya sistemi təmizlənmiş, T.İsmayılov küçəsində 170 metr məsafədə yolun çala hissəsi təmir olunmuşdur. Rəncbər kəndində kəndarası yolun 200 metri qum-çınqılla hamarlanmışdır. Padar qəsəbəsində 120 metr yola 15 santimetr qalınlığında qum-çınqıl qarışığından əsas qoyulmuşdur. Atbulaq kəndində eni 80 metr, uzunluğu 130 metr olan idman meydançası və idman qurğuları, EATS-nin inzibati binası tikilmişdir.

Ötən dövrdə rayonda ümumi sahəsi 6067 kvadratmetr yaşayış sahəsi olan fərdi yaşayış evləri tikilmişdir. İşlərin davamı olaraq rayon təhsil şöbəsinin, Dövlət Sosial Müdafiə Fondu rayon şöbəsinin, Xüsusi Dövlət Mühafizə Xidməti İdarəsinin əməkdaşları üçün yataqxana binasının, rayon Prokurorluğunun inzibati binasının, Atbulaq kəndində “R-Turan” MMC tərəfindən inşa edilmiş kərpic zavodunun tikinti işləri başa çatmışdır. Həmçinin Tava kəndində 260 şagird yerlik orta məktəb binası istismara qəbul olunmuşdur”.

İcra başçısı xüsusi vurğuladı ki, Heydər Əliyev Fondunun prezidenti, Azərbaycanın birinci xanımı, millət vəkili, YUNESKO-nun və İSESKO-nun xoşməramlı səfiri Mehriban xanım Əliyevanın “Hərəmiz bir ağac əkək” çağırışına həvəslə qoşulan hacıqabullular bu mövsümdə 10,8 min ağac və 8,5 min gül kolu əkmişlər. Təkcə şəhərdə 5,6 minə yaxın ağac və 5,2 min ədəd gül kolu əkilmişdir. Yaşıllığın salınması və ona qulluq bu gün də davam etdirilir.

2009-cu ilin 9 ayı ərzində Hacıqabul şəhəri üzrə ayrı-ayrı məhəllələrdə, magistral su xətlərində və məhəllədaxili küçələrdə bir sıra təmir-bərpa işləri aparılmışdır. Muğan qəsəbəsində əhalinin içməli suya tələbatını yaxşılaşdırmaq məqsədilə köhnə boru yenisi ilə əvəz olunmuşdur. Bundan başqa, 2 ədəd magistral su xətti üzərindəki diametri 200 millimetr olan siyirtmə təmir edilmişdir. Xilə magistral su xəttində diametri 219 millimetrlik dəmir borunun müəyyən hissəsi və xətt üzərindəki siyirtmə təmir edilmişdir.

Hacıqabul şəhərinin giriş hissəsindəki yaşıllaşma zolağına diametri 50 millimetrlik 770 metr uzunluğunda su xətti çəkilib istifadəyə verilmişdir.

Rayonda təhsilin qazandığı nəticələrə toxunan Ə.Muxtarov məlumat verdi ki, 2009-cu ildə ümumtəhsil məktəblərini 544 şagird bitirmiş, onlardan 277-si müxtəlif ali məktəblərə sənəd vermişdir. Sənəd verənlərdən 104-ü ali məktəblərə daxil olmuşdur ki, bu da ötən ildəkindən 50 faiz çoxdur. Orta ixtisas məktəblərinə bu il 99 nəfər qəbul olmuşdur ki, bu da ötən illə müqayisədə 20 nəfər artıqdır.

Şəhər 5 saylı orta məktəbin məzunu Əlheydər Heydərli 604 bal, Muğan qəsəbə orta məktəbinin məzunu Vüqar Aslanzadə 645 bal, Rəncbər kənd orta məktəbin məzunu Günay Məmmədova 665 bal toplayaraq ali məktəblərə qəbul olmuşlar.

Rayonun tarixində ilk dəfə olaraq Azərbaycan Respublikası Prezidentinin sərəncamı ilə Rəncbər kənd orta məktəbinin məzunu Günay Məmmədova Prezident təqaüdünə layiq görülmüşdür.

2009-cu ilin sentyabrın 3-də Hacıqabul Uşaq Tibb Mərkəzinin açılışı səhiyyə işçilərinə böyük töhfə olmuşdur. Müasir tibb avadanlığı ilə təchiz olunmuş Hacıqabul Uşaq Tibb Mərkəzinin istifadəyə verilməsi rayonun körpə sakinlərinə göstərilən tibbi xidmətin keyfiyyətini xeyli artırmışdır.

2009-cu ilin 9 ayı ərzində Hacıqabulda görülmüş işlərin respublikada aparılan genişmiqyaslı abadlıq-quruculuq prosesinin tərkib hissəsi olduğunu deyən Əhməd Muxtarov rayonun bundan sonra da sosial-iqtisadi inkişaf yolunda olacağını xüsusi vurğuladı.

Səməd HÜSEYNOĞLU,

“Xalq qəzeti”nin bölgə müxbiri

Xalq qəzeti.- 2009.- 27 oktyabr.- S. 4.