Regional inkişafın yeni hüdudları

Ölkəmizin sosial-iqtisadi inkişafı ilə bağlı cari ilin 9 ayında qazanılmış uğurlar, qarşıdakı ayların həllivacib məsələləri bu günlərdə bölgələrdə keçirilən müzakirə və diskusiyaların başlıca mövzusudur. Azərbaycan Prezidenti İlham Əliyevin sədrliyi ilə keçirilən Nazirlər Kabinetinin respublikanın 9 aylıq sosial-iqtisadi yekunlarına həsr olunan iclasında söylənmiş mülahizələrin, qarşıya qoyulmuş vəzifələrin müzakirəsi ümumi inkişaf prosesində işgüzarlığı, adamlarda sabaha inam hissini artırmışdır. Zərdab, Kürdəmir, Laçın və Goranboy rayonlarında keçirilən toplantılarda da ölkədə qazanılmış ciddi uğurların fonunda bu bölgələrdə əldə olunmuş nailiyyətlər, görülən işlər təhlil olundu, son rübü də yüksək göstəricilərlə başa vurmaq əzmi ifadə olundu.

Zərdab

Ümumrayon toplantısında Prezident İlham Əliyevin rəhbərliyi ilə aparılan uğurlu quruculuq işlərindən ətraflı söz açan Zərdab Rayon İcra Hakimiyyətinin başçısı Lütfəli Babayev bildirdi ki, ilin 9 ayında rayon iqtisadiyyatının bütün sahələrində müsbət irəliləyişlər baş vermişdir. Makroiqtisadi göstəricilər rayonun həm iqtisadi, həm də sosial sahələrinin daha dinamik və sürətlə inkişaf etdiyini göstərir. İstehsalın həcmi artmış, xidmət sahələrinin fəaliyyəti genişləndirilmiş, əhalinin gəlirləri xeyli yüksəlmişdir.

İlin əvvəlindən iqtisadiyyatın əsas sahələrinə 42 milyon 516 min manatlıq məhsul istehsal edilmiş, əvvəlki ilin müvafiq dövrü ilə müqayisədə fiziki həcm indeksi 105 faiz təşkil etmişdir. Məhsul və xidmətlərin 69,1 faizi kənd təsərrüfatının, 18,3 faizi ticarət və xidmət sahələrinin, 9 faizi tikintinin, 1,8 faizi sənayenin, 1,3 faizi nəqliyyatın, 0,5 faizi poçt və rabitə xidmətlərinin payına düşmüşdür. Ötən ilin müvafiq dövrünə nisbətən ümumi artım 2 milyon 736 min manat və ya 0,9 faiz təşkil etmişdir. 9 ayda rayonda 196 daimi iş yeri yaradılmışdır. Yerli büdcə əhəmiyyətli dərəcədə artmışdır.

Rayonda çoxsaylı müasir tipli ticarət və ictimai iaşə obyektləri tikilib istifadəyə verilmişdir. Ticarət şəbəkəsində 25 milyon 810 min manatlıq və ya əvvəlki ilin eyni dövrü ilə müqayisədə 5,7 faiz çox istehlak malları satılmışdır. Adambaşına düşən birgünlük əmtəə dövriyyəsi 2,73 manat olmuşdur. Əhaliyə göstərilən pullu xidmətlərin həcmi 5 milyon 336 min manat və ya ötən illə müqayisədə 1 milyon 769 min manat çox olmuşdur.

Kənd təsərrüfatında da 9 ayda müsbət irəliləyişlər baş vermiş, məhsul istehsalı üçün münbit şərait yaradılmışdır. Hazırda əkin altında 33971 hektar torpaq sahəsi var ki, bu da 2008-ci ilə nisbətən 2482 hektar çoxdur. 189 hektarda kartof, 243 hektarda tərəvəz, 290 hektarda bostan, 13 hektarda qarğıdalı əkilmişdir. 19163 hektar payızlıq taxıl sahəsindən 40486 ton buğda, 11896 ton arpa olmaqla 52382 ton məhsul istehsal edilmişdir. Hər hektardan 27,3 sentner taxıl toplanmış, məhsul istehsalı ötən ildən 12255 ton çox olmuşdur. Rayonda adambaşına orta hesabla 774 kiloqram buğda düşür ki, bu da respublika üzrə ən yüksək göstərici hesab olunur. Bu rekord göstəricidə dövlətin istehsalçılara yanacaq və motor yağlarına görə subsidiyalar verməsinin xüsusi rolu olmuşdur. İndiyədək 103304 ton qaba yem, 3228 ton kartof, 3399 ton tərəvəz, 8026 ton bostan məhsulu istehsal edilmişdir. Hazırda məhsul toplanışı davam edir.

Torpaqların münbitliyinin artırılması üçün pay torpaqlarına 8 min tondan çox üzvü gübrə verilmişdir. “Aqrolizinq” ASC-nin Zərdab filialı mülkiyyətçilərə 143 ton azot gübrəsi satmış, onları herbsidlərlə təmin etmişdir. Mütəxəssislər məhsul istehsalçıları ilə görüşlər keçirmiş, onlara bitkiçilik məhsulları istehsalının intensiv artırılmasına nail olmaq üçün tarladaxili növbəli əkin sisteminin tətbiq edilməsi, yerli əkin sisteminə uyğun olaraq sələf bitkilərin düzgün seçilməsi barədə məsləhətlər vermişlər.

Həyətyanı torpaq sahələrindəki 471 hektar bağlardan 296 ton meyvə və 31 ton üzüm istehsal edilmişdir. Taxılçıları yüksək reproduksiyalı toxum materialı ilə təmin etmək məqsədilə rayonda 16 özəl toxumçuluq təsərrüfatı yaradılmış, ötən payız 770 hektar sahədə yüksək reproduksiyalı arpa və buğda toxumu əkilmişdi. Bu il 2111 ton toxum istehsal edilmiş, məhsuldarlıq 33,3 sentner — rayon göstəricisindən 6,1 sentner çox olmuşdur.

İri mal 784 baş artaraq 52469-a, qoyun-keçilər 2464 baş artaraq 106090-a, quşlar isə 3500 baş artaraq 173500-ə çatmışdır. Keçən ilə nisbətən ət istehsalı 16,2 ton artaraq 2491, süd 195 ton artaraq 16127 ton, yumurta 76 min ədəd artaraq 5 milyon 840 min olmuşdur. Yun istehsalı 157,8 ton olmuşdur ki, bu da keçən ilə nisbətən 3,4 ton çoxdur.

Dövlət Proqramında Zərdab rayonunda suvarma-drenaj şəbəkələrinin bərpası və yenidən qurulması işlərinə başlanmış və indiyədək 1 milyon 470 min manatlıq iş görülmüşdür.

Kür çayı boyunca Sarıqaya kəndi ərazisində 300 metr məsafədə bəndin yeri dəyişdirilmiş, Lələağacı kənd ərazisində 500 metr məsafədə yeni mühafizə bəndi tikilmiş, Əlibəyli kəndi ərazisində 400 metr məsafədə bəndin yamacı əsaslı təmir olunmuşdur. Həmin bəndlərdə qayakəsmə işləri aparılmış, Sarıqaya kəndi ərazisində beton sahilbərkitmə işləri görülmüşdür. Siləyli, Alıcanlı kəndləri ərazisində Türyançay çayının sol-sağ sahilində 20 kilometr məsafədə çayın məcrası təmizlənmiş və bəndlər təmir edilmişdir. Bu ilin sentyabr-oktyabr aylarında yağan leysan yağışları, Kür, Türyançay və Göyçay çaylarında suyun səviyyəsinin normadan artıq qalxması ilə əlaqədar görülən bəndbərkitmə işləri nəticəsində rayonda kənd təsərrüfatına və əhalinə heç bir ziyan dəyməmişdir.

Başçı daha sonra vurğuladı ki, 2009—2013-cü illəri əhatə edəcək Dövlət Proqramında növbəti 5 ildə Zərdab rayonunda analoqu olmayan işlərin görülməsi planlaşdırılmışdır. Sənaye və kənd təsərrüfatı istehsalının genişləndirilməsi, yol təsərrüfatı və nəqliyyat, elektrik enerjisi, istilik və qaz təchizatı, rabitə, su və kanalizasiya xidmətlərinin yaxşılaşdırılması, meliorasiya və irriqasiya, səhiyyə, mədəniyyət, idman və təhsil müəssisələrinin inkişafı və yenidənqurulması ilə bağlı tədbirlər nəzərdə tutulmuşdur. Bu diqqət və qayğıya görə zərdablılar ölkə başçısı İlham Əliyevə dərin minnətdarlığını bildirirlər.

Başçı payız-qış mövsümünə hazırlıqla bağlı həyata keçirilən tədbirlərdən, əhalinin zəruri ehtiyaclarının dolğun ödənilməsi üçün görülən işlərdən də ətraflı söz açdı. Natiq bildirdi ki, abadlıq-quruculuq işlərinin də həcmi və sürəti artmış, sosial-mədəni sahələrdə sevindirici uğurlar qazanılmışdır.

Məruzə və çıxışlarda mövcud nöqsanlara da toxunuldu, həllivacib məsələlərə diqqət yetirildi. Toplantıda rayon ictimaiyyətinin yekdil rəyi belə ifadə olundu: zərdablılar respublikamızda hərtərəfli yüksəliş üçün yaradılmış şəraitdən bacarıqla istifadə edərək qarşıdakı aylarda da ciddi uğurlar qazanacaq, 2009-cu ili yüksək göstəricilərlə başa vuracaqlar.

Kürdəmir

Rayon fəallarının 9 aylıq sosial-iqtisadi inkişafın yekunlarına və qarşıda duran vəzifələrə həsr olunmuş toplantısında qazanılmış uğurlar və növbəti hədəflər diqqət mərkəzində oldu. Kürdəmir Rayon İcra Hakimiyyətinin başçısı Fəxrəddin Məlikov hesabat mfəruzəsində 9 ayın iqtisadi göstəricilərindən və əhaliyə göstərilən xidmətlərdən ətraflı söz açdı. O bildirdi ki, 2009—2013-cü illərdə regionların sosial-iqtisadi inkişafı Dövlət Proqramı üzrə rayonda kənd təsərrüfatı məhsullarının istehsalının genişləndirilməsi, yerli əhəmiyyətli avtomobil yollarının təmiri, körpülərin tikintisi, küçələrin asfaltlaşdırılması, elektrik şəbəkəsinin yenidən qurulması, qaz təchizatının yaxşılaşdırılması, su təchizatının, kanalizasiya sisteminin yenidən qurulması və meliorasiya-irriqasiya tədbirlərinin həyata keçirilməsi nəzərdə tutulmuşdur.

Ötən müddətdə iqtisadiyyatın yüksəldilməsi, aqrar sektorda məhsuldarlığın artırılması, istehsalda sənaye həcminin gücləndirilməsi, yeni iş yerlərinin açılması rayon icra hakimiyyətinin diqqət mərkəzində olmuşdur. Doqquz ayda 397 yeni iş yeri açılmışdır ki, bunun da 257-si daimidir. İlin əvvəlindən sənaye müəssisələrində 16 milyon 63 min manatlıq və ya 2008-ci ilin müvafiq dövründən 34,4 faiz çox məhsul istehsal edilmiş və xidmətlər göstərilmişdir. Ötən ilin müvafiq dövrü ilə müqayisədə ümumi daxili məhsul istehsalı 13,5 faiz olmuşdur. ÜDM-nin 75 faizi istehsal sahələrində — 12,7 faizi sənayedə, 12,2 faizi inşaat kompleksində, 50,1 faizi kənd təsərrüfatında yaradılmışdır.

Elektrik enerjisi, təbii qaz, içməli su ilə təminatın yaxşılaşdırılması məqsədilə bir sıra təxirəsalınmaz tədbirlər həyata keçirilmişdir. 9 transformator yarımstansiyası əsaslı təmir olunmuşdur. 15 transformatorda əsaslı, 24-də isə cari təmir aparılmışdır. Təbii qazla təminatın yaxşılaşdırılması sahəsində də bir sıra tədbirlər həyata keçirilmişdir. Xırdapay kəndi ərazisində 350 metr qaz xətti işlək vəziyyətə gətirilmişdir. Kürdəmir şəhərinin M.Hadi və A.Şakir küçəsində, Sığırlı və Xırdapay kəndində qaz tənzimləyicisi quraşdırılmışdır. Sığırlı kəndində 1200 metr, Şıxımlı kəndində isə 50 metr qaz xətti çəkilmişdir. 631 yeni qaz sayğacı quraşdırılmış, abonentlərin sayı 8098-ə çatdırılmışdır. Rayonun magistral su xətlərində, eləcə də şəbəkədaxilində itkinin qarşısını almaq məqsədi ilə bir sıra tədbirlər görülmüşdür. I və II Külüllü—Kürdəmir mərkəzi su xətlərində, su qülləsində təmir işləri aparılmışdır. Kəndlərin içməli su təchizatı ilə bağlı məqsədyönlü işlər aparılır. Şüşün, Sovla, Köhünlü, Carlı, Beyi, Mollakənd, Şıxımlı, Pirili, Muradxan kəndlərində modul tipli sutəmizləyici qurğular tikilmiş, 95 bulaq inşa edilmişdir. “bp” şirkətinin maliyyə dəstəyi ilə Sığırlı, Karrar, Karrar qəsəbə, Çöhranlı, Atakişili kəndlərində də sutəmizləyici qurğular işə salınmışdır. Bütövlükdə bu qurğular 15 min nəfərdən çox əhalini içməli su ilə təmir edir.

Başçı daha sonra qeyd etdi ki, fermerlər bu il 35 min 583 hektardan 67 min 496 ton taxıl toplamışlar. Bu əvvəlki ilə nisbətən 7 min ton çoxdur. Mal-qaranın sayı ilbəil artmaqdadır. İri malın sayı 60649 başa, qoyunların sayı 124735 başa çatmışdır. Ötən ilə nisbətən iri mal 1742 baş, qoyun-keçilər isə 1000 baş artmışdır. İlin əvvəlindən 206 min sentner süd, 10 milyon 72 min ədəd yumurta istehsal edilmişdir.

Əkin sahələrinin suvarma suyu ilə təchizatını yaxşılaşdırmaq və torpaqların münbitliyini artırmaq üçün mühüm işlər aparılır. Daxili imkanlar hesabına Qarasu kəndində 7 kilometr, Sığırlı kəndində isə 6 kilometr yeni torpaq kanallar çəkilmişdir. Ümumilikdə, 74 kilometr yeni torpaq kanal çəkilmiş, 1700 kilometrdən çox kanal lildən təmizlənmişdir. 7 nasos kompleksi və 45 hidrotexniki qurğu quraşdırılmışdır. 32 kilometr suaparıcı latok, 220 kilometr beton kanal, 450-dən çox hidrotexniki qurğu təmir olunmuşdur.

Dövlət Proqramına uyğun olaraq, Muradxan kəndində 10 otaqlı, Qarasaqqal kəndində isə 5 otaqlı həkim məntəqələri əhalinin istifadəsinə verilmişdir. Rayon icra hakimiyyətinin məktəb tikintiləri ilə bağlı qaldırdığı məsələlər müsbət həllini tapır. Yeni məktəb binalarının tikintisi, əsaslı təmir edilməsi müvəffəqiyyətlə davam etdirilir. Şüşün kənd orta məktəbinin 220 şagird yerlik yeni binası tikilərək sentyabr ayında istifadəyə verilmişdir.

Son illərdə rayonda tikinti-abadlıq və yenidənqurma istiqamətində ardıcıl və məqsədyönlü iş aparılmış və nəticədə xeyli obyektin tikintisi tamamlanmışdır. Bu il Maliyyə İdarəsinin yeni, inzibati binası istifadəyə verilmişdir. Avtomagistralların kənarlarında yerləşən ərazilərin müasir tələblər səviyyəsində abadlaşdırılması məqsədi ilə tədbirlər planı hazırlanmış, obyektlərin əsaslı təmir işləri gündəlik nəzarətə götürülmüşdür.

Başçı sonda bildirdi ki, Kürdəmirlilər sabitliyin qorunması, iqtisadiyyatın inkişaf etdirilməsi, əhalinin həyat səviyyəsinin yaxşılaşdırılması üçün bütün qüvvə və səylərini bundan sonra da əsirgəməyəcəklər.

Laçın

Laçınlılar da ümumrayon toplantısında ilin əvvəlindən bəri qazanılmış uğurlara, keçilmiş yola nəzər saldılar, Prezident İlham Əliyevin qarşıya qoyduğu vəzifələri geniş müzakirə etdilər. Laçın Rayon İcra Hakimiyyətinin başçısı Ramiz Cəbrayılov hesabat məruzəsi ilə çıxış etdi. O bildirir ki, ötən dövr rayonun icra strukturlarının yerləşdiyi Taxtakörpü qəsəbəsində və məcburi köçkünlərin sıx məskunlaşdığı digər ərazilərdə xeyli işlər görülmüş, sakinlərin yaşayış şəraitinin yaxşılaşdırılması istiqamətində bir çox tədbirlər həyata keçirilmişdir. 9 ayda respublikanın 38 rayon və şəhərində 117 səyyar qəbul keçirilmiş, 1313 məcburi köçkün qəbul edilmişdir. Qaldırılmış problemlər dərindən təhlil edilərək müvafiq tədbirlər planı hazırlanmışdır. 906 məsələ müsbət həll olunmuş, bəzi müraciətlərlə bağlı aidiyyəti orqanlar qarşısında məsələ qaldırılmışdır.

Hesabat dövründə Taxtakörpü qəsəbəsi və məcburi köçkünlərin sıx məskunlaşdıqları digər ərazilərdə 2,3 milyon manat dəyərində abadlıq, tikinti-quraşdırma işləri görülmüşdür. Bu, ötən ilin müvafiq dövrü ilə müqayisədə 419 min manat və ya 22 faiz çoxdur. Taxtakörpü qəsəbəsində Dövlət Sosial Müdafiə Fondunun rayon şöbəsi, Əhalinin Sosial Müdafiəsi və Məşğulluq mərkəzləri üçün yeni inzibati binalar tikilmişdir. Taxtakörpü qəsəbəsində qənnadı, çörəkbişirmə, dülgər sexləri, ticarət və ictimai iaşə müəssisələri istifadəyə verilmiş, 50 məcburi köçkünə iş yeri açılmışdır.

Taxtakörpüdə və respublikanın digər ərazilərində məskunlaşmış məcburi köçkünlərin elektrik enerjisi ilə bağlı problemlərinin həll olunması məqsədilə 3 transformator qupraşdırılmış, 9,5 kilometr elektrik xətti yenisi ilə əvəz olunmuşdur. Daxili imkanlar hesabına 33 transformator, 25 kilometr elektrik hava xətləri əsaslı və cari təmir edilmiş, 28 dayaq yenisi ilə əvəz olunmuşdur.

Taxtakörpü ərazisində müvəqqəti məskunlaşmış məcburi köçkünlərin təsərrüfat suyuna olan tələbatının ödənilməsi məqsədilə zəruri işlər görülmüş, 36 kilometr kanal lildən təmizlənmişdir. Taxtakörpü ərazisində içməli su təminatının yaxşılaşdırılması məqsədilə 1840 metr xətt yenisi ilə əvəz olunmuş, 2 nasos stansiyasında əsaslı təmir işləri aparılmışdır. Mişni, Alxaslı, Qarıqışlaq və Qarakeçdi obalarında modul sutəmizləyici qurğuların quraşdırılması nəzərdə tutulur.

55 saylı Yol istismar İdarəsi Taxtakörpü ərazisində 6 kilometr çınqıl örtüklü yolu təmir etmiş, ərazidəki avtomobil yolunun 60 kilometr hissəsində cari təmir işləri həyata keçirilmişdir. Taxtakörpüdə küçə və meydanlarda 4750 kvadratmetr sahəyə asfalt örtük salınmışdır.

9 ay ərzində imkansız 1490 nəfər məcburi köçkünə rayon icra hakimiyyəti maddi kömək göstərmişdir. Qızıl Aypara Cəmiyyəti 400 ailəyə ərzaq bağlamaları çatdırmış, həmkarlar təşkilatları 215 ailəyə yardım etmişdir. “Dünyaya Baxış” Beynəlxalq Humanitar Təşkilatı Taxtakörpü ərazisində məskunlaşmış 1500 ailəyə uşaq paltarları vermişdir. Vergilər Nazirliyi bayram ərəfələrində Taxtakörpü ərazisindəki bütün ailələrə ərzaq paylamışdır.

Taxtakörpü ərazisində telefon rabitəsindən və internet xidmətlərindən istifadənin yaxşılaşdırılması məqsədilə Ağcabədi – Taxtakörpü fibro-optik kabelin çəkilişinə başlanılmışdır. Yanvar ayından “Kapital Bank” Açıq Səhmdar Cəmiyyətinin Laçın rayon filialı fəaliyyətə başlamışdır.

2008-ci ildə 3026 hektar sahədən 9532,6 ton taxıl əldə olunmuşdur ki, bu da ötən ilin müvafiq dövrünə nisbətən 405 ton çoxdur. 1098 nəfərə yanacaq və motor yağlarına görə kompensasiyaların verilməsi təmin olunmuşdur. Taxtakörpü ərazisindəki fermer və imkanlı şəxslərin verdiyi 36 ton taxıl 17 rayonda məskunlaşmış 700-dən artıq imkansız və şəhid ailələrinə paylanılmışdır.

Başçı daha sonra qeyd etdi ki, bu il təhsil sahəsində də xeyli tədbirlər görülmüş, ümumtəhsil məktəblərində təhsilin keyfiyyətinin yaxşılaşdırılması üçün ciddi addımlar atılmışdır. 19 məktəbdə büdcə vəsaiti hesabına əsaslı və cari təmir işləri görülmüş, 39 məktəb zəruri inventar və avadanlıqlarla təmin olunmuşdur. Bərdə rayonunda fəaliyyət göstərən 127 nömrəli Texniki Peşə Məktəbində təmir işləri görülmüşdür. Maddi-texniki bazanın möhkəmləndirilməsi, əmək intizamının gücləndirilməsi üçün lazımi tədbirlər həyata keçirilmişdir.

Başçı daha sonra dedi ki, qarşıda duran əsas vəzifələr Taxtakörpü ərazisində qamış evlərdə məskunlaşmış 3400 məcburi köçkün ailəsi üçün, istismar müddəti başa çatmış fin qəsəbəsinin yerində yeni qəsəbələrin salınmasının sürətləndirilməsidir. Ərazidə torpaqların şoranlaşmasının qarşısının alınaraq yararlı hala gətirilməsi üçün meliorasiya tədbirlərinin davam etdirilməsi və işsizliyin aradan qaldırılması üçün müəyyən istehsal sexləri yaradılmalıdır.

Məruzə və çıxışlarda mövcud nöqsanlar da gündəmə gətirildi, onların ən qısa müddətdə aradan qaldırılması zəruriliyi vurğulandı. Bildirildi ki, dövlət başçısının məcburi köçkünlərin vəziyyətlərinin yaxşılaşdırılması, problemlərinin həlli ilə bağlı qarşıya qoyduğu vəzifələr təxirə salınmadan həyata keçirilməli, məsul şəxslərin cavabdehliyi artırılmalıdır.

Goranboy

Rayon fəallarının, idarə, müəssisə və təşkilat rəhbərlərinin iştirakı ilə keçirilən toplantıda 2009-cu ilin 9 ayının başlıca yekunlarına nəzər salındı. Uğurları qoruyub saxlamaq və artırmaq yolları araşdırıldı.

Goranboy Rayon İcra Hakimiyyətinin başçısı Nizaməddin Quliyev hesabat məruzəsində bildirdi ki, respublikamızda olduğu kimi, rayonda da bütün sahələrdə sürətli inkişaf gedir.

“Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı”nda abadlıq-quruculuq işləri, əhalinin içməli və suvarma suyuna olan tələbatının daha da yaxşılaşdırılması, infrastrukturun yeniləşdirilməsi, təhsil, səhiyyə, mədəniyyət sahəsində maddi-texniki bazanın möhkəmləndirilməsi, sənayenin inkişaf etdirilməsi ilə bağlı bir sıra məsələlər nəzərdə tutulmuşdur.

İlin sonunadək Rus Borisi kəndində 180 şagird yerlik məktəb binasının tikintisinə başlanacaq. Növbəti illərdə Mərkəzi Xəstəxana təmir ediləcək, avadanlıq və inventarla təchiz olunacaq. Gigiyena və Epidemiologiya Mərkəzi, Əzizbəyov, Qaradağlı, Muzdurlar, Aşağı Ağcakənd həkim məntəqəsi, Balakürd, Qasımbəyli, Yeniyol, Hacallı, Qaramusalı və Qırıxlı tibb məntəqəsi, 17 kənddə sahə baytarlıq məntəqəsi üçün inzibatı binalar tikiləcək. İlin sonunadək Goranboy şəhərinin su təchizatı və kanalizasiya sistemlərinin yenidən qurulması işlərinə başlanacaq.

İlin ötən doqquz ayında rayon iqtisadiyyatının bütün sahələrində dinamik artım müşahidə edilmişdir. Ötən ilin müvafiq dövrünə nisbətdə ümumi məhsul buraxılışı 5,7 milyon manat artaraq, 111,5 milyon manata, adambaşına düşən gəlir isə 15 manat artaraq 1157 manata çatmışdır. Əhalinin bütün mənbələrdən pul gəlirləri 112,1 milyon manat təşkil etmişdir ki, bu da ötən ilin müvafiq dövrünə nisbətdə 2,4 milyon manat çoxdur. Adambaşına düşən gəlir 1163,9 manat, orta aylıq nominal əmək haqqı isə 185,3 manat təşkil etmişdir.

Son aylarda rayonun bütün problemləri bir daha təhlil edilmiş, həlli vacib məsələlər önə çəkilmişdir. Bütün yaşayış məntəqələrində aparılan tikinti-təmir, abadlıq və quruculuq işləri keyfiyyətcə yeni mərhələyə keçmişdir. Goranboy şəhərinin Gəncə istiqamtindən çıxışda 1300 kvadratmetr əraziyə yaşıl ot örtüyü salınmış, 600 metr piyada yolunun tikintisinə başlanılmışdır. C.Cabbarlı küçəsində çirkab suları axıdılan kanallara dəmir borular salınmış, səkilərin kənarına 2400 kubmetr torpaq tökülmüşdür. V.Bayramov küçəsi ilə S.Vurğun küçəsinin kəsişməsidəki 2 mərtəbəli binanın ətrafında, Tarix Muzeyinin daxilində və ətrafında geniş tikinti-abadlıq işlərinə, Polis Şöbəsinin həyətinə müasir üslubda hasarın tikintisinə başlanmışdır.

Heydər Əliyev prospektində qaz xətləri səliqəyə salınmış, V.Bayramov küçəsində 1500 metr piyada yolunun tikintisinə başlanılmışdır. Şəhərin görkəminə xələl gətirən 2 inzibati binanın dam örtüyü dəyişdirilmişdir. Goran—Goranboy istiqamətindəki yolun müasir üslubda tikintisi üçün layihə sənədləri hazırlanmışdır. Quruculuq işlərinə digər yaşayış məntəqələrində də başlanmışdır.

Goranboy şəhərinə Qızılhacılı tərəfdən girişdə ümumi görünüşə xələl gətirən elektrik yarımstansiyası 500 metr kənarda yenidən quraşdırılmışdır. Qızılhacılı qəsəbəsində yol kənarı çınqıl örtüklə təmir edilmişdir. Qəsəbə daxilində geniş abadlıq, quruculuq işlərinə başlanılmışdır. Cinli Boluslu kəndində abadlıq-quruculuq işləri davam etdirilir. Xan Qərvənd kəndində qaz xətləri qaydaya salınmışdır. Kəndə Tərtər istiqamətində girişdə geniş abadlıq işləri aparılır. Balakürd kəndində şəhidlərin xatirəsinə ucaldılmış abidənin ətrafında abadlıq işləri aparılmışdır. Dəliməmmədli şəhərində Bakı—Qazax yolunda gedən yolun sağ və sol tərəfində təmir işləri görülmüş, 3 küçəyə çınqıl tökülərək hamarlanmışdır.

Baxçakürd kəndində də yollara çınqıl tökülmüş, hamarlanmışdır. İki dəfə Sosialist Əməyi Qəhrəmanı Bəsti Bağırovun büstü təmir edilmiş, ətrafı abadlaşdırılmışdır. Ağamalıoğlu—Dəliməmmədli avtomobil yolunun asfalt örtüyü təmir edilmiş, yol kənarında çınqıl tökülərək hamarlanmışdır. Kənddə təbii qaz verilməsi məqsədi ilə iş davam edir. Nadirkənd kəndi ərazisində nümayəndəliyin inzibati binasının dam örtüyü dəyişdirilmişdir.

Rəhimli, Tatarlı, Qazanbuluq, Nərimanlı, Kələk, Xoylu, Tap Qaraqoyunlu, Qaşaltı Qaraqoyunlu, Hazırəhmədli, Quşçular, Dəyirmanlar, Alpoud, EKO qəsəbəsi və digər yaşayış məntəqələrində genişmiqyaslı abadlıq-quruculuq işlərinə başlanmışdır. Bütün bu işlər yaşayış məntəqələrinə səliqə-sahman, adamlara ruh yüksəkliyi, qurub-yaratmaq həvəsi gətirir.

Toplantıda bildirildi ki, rayonun sosial-iqtisadi sahədə uğurlarını artırmaq üçün dövlət yardımından və daxili potensialdan bundan sonra da səmərəli istifadə olunacaq, goranboylular ilin son rübünü də samballı nailiyyətlərlə başa vuracaqlar.

Ziyəddin SULTANOV,

“Xalq qəzeti”nin bölgə müxbiri

Xalq qəzeti.- 2009.- 28 oktyabr.- S. 5.