Gələcəyimizi düşünməsək...

Azərbaycan Respublikasının Prezidenti İlham Əliyevin sərəncamı ilə 2009-cu il respublikamızda “Uşaq ili” elan olunmuşdur. Bununla əlaqədar ölkəmizin müxtəlif regionlarında və Bakıda bir sıra tədbirlər keçirilir. Uşaqlara qayğı çərçivəsində ən fəal işlər görən təşkilatlar sırasında Heydər Əliyev Fondu xüsusi yer tutur. Azərbaycanın birinci xanımı, Heydər Əliyev Fondunun prezidenti, millət vəkili Mehriban Əliyevanın şəxsi təşəbbüsü sayəsində Azərbaycanın hər yerində gələcək nəslin sağlam böyüməsi, tərbiyəsi və təhsili ilə bağlı mütəmadi tədbirlər həyata keçirilir, yeni, müasir məktəb binaları tikilərək istifadəyə verilir. Təsadüfi deyil ki, Mehriban xanımın bu sahədə gördüyü işlər həm ölkə səviyyəsində, həm də onun hüdudlarından kənarda yüksək qiymətləndirilir.

Heydər Əliyev Fondunun fəaliyyəti respublikada mövcud olan bir sıra təşkilatları uşaqlara diqqət və qayğını artırmağa istiqamətləndirib. Belə təşkilatlardan biri də “Uşaqların Xoşbəxt Gələcəyi” İctimai Birliyidir. Birlik öz işləriylə, keçirdiyi tədbirlərlə “Uşaq ili”nə öz töhfələrini verməkdə davam edir. Növbəti belə tədbirdə – “Xoşbəxtliyə aparan yol...” adlı gecədə “Uşaqların Xoşbəxt Gələcəyi” İctimai Birliyinin sədri Nərgiz Kərimova öncə həyata keçirdiyi bütün xeyriyyə işləri ilə onlara nümunə olan Mehriban Əliyevanın xidmətlərini yüksək qiymətləndirdi. Qeyd etdi ki, onlar diqqətdən uzaq qalan bəzi sahələrlə bağlı layihələr həyata keçirmişlər. Bu sırada ürək qüsuru olan uşaqlar, dul qadınlar, körpələr evi özünəməxsus yer tutur.

Birliyin sədrinin fikrincə, məhz Azərbaycanın birinci xanımının xeyirxah təşəbbüsləri onları cəmiyyətin qayğıdan uzaq olan təbəqəsinə yardım göstərməyə ruhlandırıb. “Xoşbəxtliyə aparan yol...” adlı tədbirin də keçirilməsinin əsas məqsədi iştirakçılarda xüsusi qayğıya və yardıma ehtiyacı olanlara qarşı mərhəmət hissi oyatmaq, onlara köməklik göstərilməsinə vasitəçi olmaq idi. Tədbirdə 7 yaşlı balaca rəssamın və ürək qüsurlu uşağın rəsmlərinin hərracı keçirildi və əldə edilən gəlir ürək qüsurlu uşaqların əməliyyat olunmasına sərf ediləcək.

N.Kərimova onu da vurğuladı ki, onlar Ukraynadan olan həkimlər briqadası – Kiyevdəki müasir “Ürək” klinikasının baş həkimi Boris Todurov, klinikanın reanimasiya şöbəsinin rəhbəri Aleksandr Dovqan və Lyudmila Mixaylovna ilə yaxından əməkdaşlıq edirlər. Məhz bunun nəticəsidir ki, avqust-sentyabr ayı ərzində 89 nəfər ürək qüsuru olan uşaq əməliyyat olunmuşdur. Bunlardan da 18 nəfəri məhz Ukraynada əməliyyat keçmişdir. Boris Todurov Kiyevə gedərkən özü ilə bərabər təcili ürək əməliyyatına ehtiyac duyan 1 körpəni aparmışdı və 29 oktyabr tarixində həmin körpə üzərində uğurlu əməliyyat həyata keçirildi. Noyabrın 4-də isə daha 4 nəfərin Kiyevə göndərilməsi nəzərdə tutulur.

Qeyd edək ki, bu sahəyə diqqətin artmasında “Uşaqların Xoşbəxt Gələcəyi” İctimai Birliyinin təsisçisi Səbinə Rəhimovanın çox böyük rolu vardır. Səbinə xanım belə düşünür ki, uşaqlara qayğı onlara maliyyə yardımından tutmuş mənəvi dəstəyə qədər bütün sahələri əhatə etməlidir. Xüsusən, indiki gənc nəsil müasir dövrün zərərli vərdişlərindən uzaqlaşaraq gələcəyimiz olan uşaqların qorunması istiqamətində görülən işlərdə fəal iştirak etməlidirlər.

Nərgiz Kərimova hesab edir ki, onun həyatını tamamlayan qayğıya ehtiyacı olan insanlara yardım əlini uzatmaq və xeyriyyə işləri ilə məşğul olmaqdır.O, qeyd edir ki, bu iş olmasaydı, onun həyatının da mənası olmazdı. Onlar gələcəkdə xeyriyyə sahəsində daha iri layihələr həyata keçirmək, ehtiyacı olan insanların problemləri ilə daha yaxından maraqlanmaq fikrindədirlər. “Uşaqların sağlam və xoşbəxt gələcəyi naminə hər kəs əlindən gələn yardımı əsirgəməməlidir. Azərbaycanın birinci xanımı Mehriban Əliyevanın xeyriyyəçilik fəaliyyəti, xüsusən də qayğıya ehtiyacı olan uşaqlara göstərdiyi ana nəvazişi bizim üçün örnəkdir. Bundan başqa, xeyriyyəçilik həm də hər bir insanın, müsəlmanın vətəndaşlıq borcudur. Biz ailəmizdə aldığımız tərbiyənin təsiri altında 4 il ərzində öz gücümüz hesabına bir çox xeyriyyə işləri həyata keçirmişik.

“Mən də, Səbinə də öz valideynlərimizə bizi bu ruhda tərbiyə etdikləri üçün dərin minnətdarlığımızı bildiririk, onların əllərindən öpürük. Bu işdə məqsədimiz odur ki, dövlətin uşaqlara qayğı siyasətində bizim də müəyyən rolumuz olsun” – deyən İctimai Birliyin sədri artıq bu sahədə çox böyük işlər görməyə nail olduqlarını vurğulayır.

Qeyd edək ki, cari ildə əsası qoyulan “Uşaqların Xoşbəxt Gələcəyi” İctimai Birliyi uşaqların sağlamlıq və sosial ehtiyaclarını qarşılamaq üçün xəstəxanalar, klinikalar, sağlamlıq və reabilitasiya mərkəzləri ilə sıx əməkdaşlıq edir. Təşkilat cəmiyyətdə tez-tez rast gəlinən, sosial güvənc və ailə qayğısından məhrum olmuş, qayğıya və müdafiəyə ehtiyacı olan, qeyri-sağlam mühitdə çalışdırılan, küçədə yaşayan və işləyən, tibbi qüsuru olan, təhsil almağa ehtiyacı olan, bir sözlə, gələcəkdə sağlam və xoşbəxt həyatı təhlükə altında olan uşaqların təhsil və mədəniyyət, sağlamlıq və ictimai fəaliyyətindəki ehtiyaclarını müəyyənləşdirib layihələr hazırlayır və həyata keçirməyə çalışır.

Bu baxımdan oktyabrın 24-də Gömrük Xəstəxanasında keçirilən tədbiri xüsusi qeyd etmək olar. Tədbirdə uşaqların sağlamlığı ilə bağlı mühazirələr oxunub. Mərasimdə iştirak edən Kiyev müasir “Ürək” klinikasının baş həkimi Boris Todurov 52 uşağı müayinə etmişdir. Ümumiyyətlə isə müayinə edilən bütün uşaqlar təşkilat tərəfindən siyahıya alınıb və onlara mütəmadi olaraq hər cür yardım edilir. Nərgiz Kərimova həmçinin bildirir ki, onların əməkdaşlıq etdiyi xarici tərəfdaşlar tək Ukrayna deyil, İctimai Birlik iranlı tərəfdaşları ilə də əlaqələr yaradıb və birgə proqramlar həyata keçirmək niyyətindədir.

2008-2009-cu illər ərzində “Uşaqların Xoşbəxt Gələcəyi” İctimai Birliyi bir çox tədbir təşkil edib və bu zaman yüzlərlə uşağa, dul qadına və körpələr evinə yardımlar göstərilib. Onların bəzilərini diqqətə çatdırırıq.

Bu il sentyabrın 16-da Ramazan ayı ərəfəsində təşkilat kar uşaqlar üçün 3 saylı respublika xüsusi internat məktəbində olub, uşaqlarla görüşüb, bayram süfrəsi təşkil edib. Ramazan bayramı münasibətilə Bakı SOS Uşaq Kəndində uşaqlarla görüş keçirilib, onlara iftar süfrəsi açılıb. Eyni zamanda, onların su problemi həll olunub, müasir istilik sistemi quraşdırılıb, avtobus alınıb. Bununla yanaşı, 7 uşağın illik təhsil haqqı ödənilib.

Kiyevdə “Ürək” mərkəzində əməliyyat olunmuş uşaqlar reabilitasiya olunmaq üçün Heydər Əliyev Fondu tərəfindən təmir-tikinti və abadlıq işləri aparılmış “Şirin” uşaq bağçasının nəzdindəki “Məslək” istirahət düşərgəsində yerləşdirilib. Bundan başqa, uşaq evləri və internat məktəbləri arasında rəqs müsabiqəsini də həyata keçirilən layihələr sırasına daxil etmək olar.

“Uşaq ili” çərçivəsində 1 İyun Uşaqların Müdafiə Günü münasibətilə təşkil olunan xeyriyyə gecəsində müxtəlif beynəlxalq və yerli təşkilatların nümayəndələri, millət vəkilləri, dövlət qurumlarının rəsmiləri iştirak ediblər. Onlar fiziki və əqli cəhətdən qüsuru olan uşaqlar üçün mütəmadi qaydada bu tip tədbirlərin keçirilməsini vacib saymaqla yanaşı bu təbəqənin həmişə diqqətə ehtiyacı olduğunu vurğulayıblar, “Uşaqların Xoşbəxt Gələcəyi” İctimai Birliyinin gördüyü işləri isə yüksək qiymətləndiriblər. Birliyin yardım göstərdiyi insanlar tək uşaqlar deyil, övladları tərəfindən atılan və Qocalar evində yaşamaq məcburiyyətində qalan ağsaqqal və ağbirçəklər də bu qayğıdan kənar qalmırlar. Təşkilatın üzvləri Əmək və Əhalinin Sosial Müdafiəsi Nazirliyinin Qocalar evində bayram süfrəsi təşkil edib, onlara hədiyyələr təqdim ediblər. Doğrudan da, övladları tərəfindən valideyn qayğısı görməyən qocalara belə bir sevincin bəxş olunması hər birimiz üçün mənəvi borcdur.

Bu gün uşaq evləri, təlim-tərbiyə mərkəzləri ilə birgə uşaqlar üçün sağlıq və sosial xidmət sahələri açmaq və onlara yardım etmək, uşaqların tibbi müayinəsini həyata keçirmək hər bir Azərbaycan vətəndaşının insani borcu olmalıdır. “Uşaqların Xoşbəxt Gələcəyi” bu müqəddəs vəzifəni başa düşür və bütün fəaliyyətini onun yerinə yetirilməsi üzərində qurur. Elə yüzlərlə ürək qüsuru, böyrək çatışmazlığı, uşaq siribral iflici və digər xəstəliklərdən əziyyət çəkən və sağlamlığa qovuşmaq üçün maddi imkanı olmayan uşaqların əməliyyat və ya müalicələrinin həyata keçirilməsi bu deyilənlərin bariz nümunəsidir.

Nərgiz xanımın sözlərinə görə, indiki dövrdə təhsil hər bir uşağın formalaşmasının əsasını təşkil edir. Ona görə də uşaqlara təhsil verməklə yanaşıı, onların öz imkanlarını, bacarıqlarını üzə çıxarmasına köməklik etmək lazımdır. Çünki bu gün istedadı və qabiliyyəti üzə çıxarılan və inkişaf etdirilən uşaq gələcəkdə uyğun peşə sahibi olmaq imkanını qazanacaq. Bu da bizim cəmiyyətə, millətə ən böyük xeyrimiz, töhfəmiz olacaq. Buna isə təkcə “Uşaqların Xoşbəxt Gələcəyi” kimi təşkilatlar, həm də biznes adamları, mesenatlar, maliyyə qurumları, beynəlxalq uşaq təşkilatları can atmalıdırlar. Çünki həmişə deyildiyi kimi, uşaqlar bizim gələcəyimiz, bizim sevincimizdir. Biz də onların üzündə hər zaman bu sevinci görmək üçün əlimizdən gələni əsirgəməməliyik.

Mahir QABİLOĞLU

Xalq qəzeti.- 2009.- 31 oktyabr.- S. 6.