55 il idmanda

Özünün dediyi kimi, Səməd Şahniyarov ömrünün təxminən 55 ilini idmana həsr etmişdir. Bir vaxtlar yarış meydanlarında çıxışını izləyənlər indi onu həm də məşqçi və hakim kimi tanıyırlar. Gəncədə sambo və cüdonun inkişafında böyük xidmətləri olmuş Səməd müəllim uzun illərdi ki, şəhər Cüdo Federasiyasına başçılıq edir. Səmərəli fəaliyyətinə görə müxtəlif illərdə respublikanın əməkdar məşqçisi, fəxri bədən tərbiyəsi və idman işçisi, beynəlxalq dərəcəli hakim adlarına layiq görülmüş, həmçinin idman ustası adını daşıyır.

S.Şahniyarov istər yunan-Roma güləşi və sərbəst güləş, istərsə də sambo üzrə yarışlarda fərqlənmiş, məşqçi və hakim kimi də özünü göstərə bilmişdir. Doğma şəhərdə güləşin hər iki növünün daha da inkişafına yönəldilmiş bir sıra tədbirlərin təşəbbüsçüsü olmuşdur. Bir çox il əvvəl belə tədbirlərdən birində moskvalı qonaqlar - SSRİ-nin sərbəst güləş üzrə yığma komandasının baş məşqçisi P.Preobrejenski, yunan-Roma güləşi üzrə dünya çempionu V.Yurkeviç və bir sıra başqa məşhur mütəxəssislər iştirak etmişlər.

Səməd müəllim Daxili İşlər Nazirliyinin Gəncə şəhər idman cəmiyyətinə rəhbərlik edərkən burada güləşin inkişafını diqqət mərkəzində saxlamış və onunla məşğul olanlar üçün zəruri şərait yaradılmasına qayğı ilə yanaşmışdır. Məhz belə şərait sayəsində Gəncə güləş, sambo və cüdo məktəbinin yetirmələrindən bir çoxu mötəbər yarışlarda respublikamızın şərəfini layiqincə qorumuşdur. O, SSRİ, Avropa və dünya çempionatlarında mükafatçılar sırasında yer tutmuş Eldar Məmmədov, Namiq Əliyev, Qriqori Kleşov, Ziyabil Abbasov, Şahmuraz Qasımov, Mövlud Mirəliyev, Ramil Qasımov və başqalarının adlarını fəxrlə çəkir.

Artıq bildiyiniz kimi, Mirəliyev bir il əvvəl Pekində keçirilən XXIX Yay Olimpiya Oyunlarında da yüksək ustalıq nümayiş etdirərək cüdo yarışlarında bürünc mükafat qazanmaqla ölkəmizin idman ictimaiyyətinə, bütün xalqımıza böyük sevinc bəxş etmişdir. Həmin Olimpiadanın iştirakçıları arasında Ramil Qasımov da olmuşdur. Səməd müəllimin fikrincə, bu perspektivli cüdoçu 2012-ci ildə Londonda təşkil ediləcək növbəti Olimpiya oyunlarına da lisenziya qazanıb İngiltərə paytaxtında Olimpiadanın medalları uğrunda mübarizənin ən fəal iştirakçılarından biri ola bilər.

Bir vaxtlar S.Şahniyarovun rəhbərliyi altında məşğul olan idmançılardan dörd nəfərinin əməkdar məşqçi adına layiq görüldüyünü də qeyd etmək olar. Onun yetirmələrindən bir çoxu bu gün həyatın müxtəlif sahələrində yüksək fəallıq və işgüzarlıq göstərir. Səməd müəllimin özü isə Xocalının işğalından sonra Hacıkənddə xocalılar üçün dörd məktəbin yaradılmasına yaxından köməklik göstərmiş, gənclər arasında hərbi-vətənpərvərlik işini fəal surətdə təbliğ edir. O, Gəncə Şəhər Təhsil İdarəsində, Kəpəz Rayon Təhsil Şöbəsində çalışarkən də bir sıra təklifləri maraqla qarşılanmışdır.

Səməd müəllim bizimlə söhbət zamanı həmçinin bildirdi ki, onun yetirməsi, Gəncə şəhər 34 saylı orta məktəbi bitirmiş sambo və cüdo üzrə idman ustası Qriqori Kleşov o zaman Ümumittifaq yarışlarından birində Sankt-Peterburq şəhəri komandasının baş məşqçisi Aleksandr Çernicinin diqqətini cəlb etmiş və o, həmyerlimizi öz komandasına dəvət etmişdir.

S.Şahniyarov bir faktı da xüsusi qeyd etdi ki, ötən ilin oktyabrında Bakıda keçirilmiş cüdo üzrə beynəlxalq turnirdə Rusiya nümayəndə heyətinə başçılıq etmiş Anatoli Raxlin hazırda bu ölkənin Baş naziri, sambo və cüdo üzrə idman ustası Vladimir Vladimiroviç Putinin məşqçisi olmuşdur. Rusiya Güdo Federasiyası tərəfindən onlara həsr edilmiş xüsusi jurnal da buraxılmışdır.

Şəkildə (soldan sağa): əməkdar məşqçi Firdovsi Tağıyev, Anatoli Raxlin və Səməd Şahniyarov.

Oqtay BAYRAMOV

Xalq qəzeti.- 2009.- 13 sentyabr.- S. 5.