Azərbaycan bayrağı Yerevanda Avropa çempionatında dördüncü dəfə dalğalandı!

Yerevanda keçirilən gənclər arasında cüdo üzrə Avropa çempionatında dünən, yarışların ikinci günü Azərbaycan təmsilçilərindən Ramin Qurbanov tatami üzərinə çıxmış və həmvətənimizin 81 kq çəki dərəcəsində qazandığı bürünc medalın şərəfinə idman sarayında ölkəmizin milli bayrağı bir daha dalğalanmışdır.

Çempionatın açılışı günü fəxri kürsüyə yüksələn komanda yoldaşları – gümüş mükafatçı İlqar Muşkiyevin (55 kq), bürünc medalçılar Rasim Əsədullayev (60 kq) və Fəqan Eminoğlunun (66 kq) uğurlarından ruhlanıb dostlarının müvəffəqiyyətini bir qədər də inkişaf etdirən Qurbanov mübarizəyə səkkizdəbir finaldan başlayaraq bu mərhələdə Qreyq Stüarta (Böyük Britaniya) qalib gəlmişdir. Dörddəbir finalda Ramin gürcüstanlı Avtandil Tsirikaşviliyə uduzsa da, bürünc medal uğrunda mübarizə aparmaq imkanını itirməmişdi. Fəxri kürsüdə təbrikləri qəbul etmək üçün idmançımız iki təsəlliverici görüşdən qalib ayrılmalı idi.

Bu görüşlərdən birincisində Azərbaycan cüdoçusunun rəqibi polşalı Yakob Kubinets olmuşdur. Qurbanov ona inamla qalib gəlmişdir. Sonra isə Ramin ukraynalı Aleksandr Derkaçı məğlubiyyətə uğradaraq bürünc mükafat qazanmış və Avropa çempionatında Azərbaycanın medallarının sayını dördə çatdırmışdır.

İndi cüdoçularımızın hesabında 1 gümüş və 3 bürünc mükafat vardır. Komandamızın sonuncu üzvü - Elmar Qasımov (100 kq) isə bu gün yarış meydanına dəvət olunacaqdır.

Oqtay BAYRAMOV

Xalq qəzeti.- 2009.- 13 sentyabr.- S. 3.