Dövlət müstəqilliyinin yetirməsi olan ali təhsil ocağı

Bu il Azərbaycan Respublikasının Prezidenti yanında Dövlət İdarəçilik Akademiyasının yaradılmasının 10 ili tamam olur. Ümummilli lider Heydər Əliyevin yadigarı olan akademiya bu gün Azərbaycanın dövlətçilik tarixində müasir təfəkkürlü, hərtərəfli biliyə malik kadrların yetişdirilməsində ən yüksək reytinq qazanmış ali təhsil müəssisəsidir. Məhz buna görə də Azərbaycan Prezidenti İlham Əliyevin 5 sentyabr 2009-cu il tarixli sərəncamı ilə Dövlət İdarəçilik Akademiyasının bir qrup əməkdaşı fəxri adlar və “Tərəqqi” medalı ilə təltif olunmuşdur.

Sentyabrın 18-də Dövlət İdarəçilik Akademiyasında bu ali təhsil ocağının yaradılmasının 10 illiyi ilə əlaqədar təntənəli mərasim keçirildi. Tədbiri giriş sözü ilə akademiyanın rektoru, əməkdar elm xadimi, professor Seyfəddin Qəndilov açdı. Sonra Azərbaycanın dövlət himni səsləndirildi.

Təntənəli mərasimdə çıxış edən təhsil naziri Misir Mərdanov akademiyanın professor-müəllim heyətini təbrik etdikdən sonra bir qrup müəllimin fəxr fərman və “Qabaqcıl təhsil işçisi” döş nişanı ilə təltif olunması münasibətilə qərarı elan etdi. Sonra rektor S.Qəndilov Dövlət İdarəçilik Akademiyasının fəaliyyəti barədə ətraflı məlumat verərək dedi:

— Əsası ümummilli liderimiz Heydər Əliyev tərəfindən qoyulmuş, bu böyük şəxsiyyətin diqqət və qayğısı ilə ərsəyə gəlmiş Azərbaycan Respublikasının Prezidenti yanında Dövlət İdarəçilik Akademiyasının on ili tamam olur. Respublikamızda dövlət idarəçiliyi sahəsində ilk yeganə təhsil ocağı olan akademiya bu illər ərzində dövlətimiz üçün müasir təfəkkürlü gənclərdən ibarət, dövlət strukturlarını dövrün, zamanın tələbləri səviyyəsində idarə edə biləcək mütəxəssis kadrlar hazırlamaq, mövcud kadrlar və dövlət məmurlarının ixtisaslarının artırılması istiqamətində səmərəli fəaliyyət göstərmiş, mühüm müvəffəqiyyətlər qazanmaqla, beynəlxalq aləmdə tanınmaq istiqamətində də xeyli irəliləyişə nail olmuşdur.

Xalqımızın ümummilli lideri Heydər Əliyev milli dövlət idarəçiliyinin təkcə bu gününü deyil, həm də onun gələcəyini də düşünürdü. O, dövlət idarəçiliyi sahəsində beynəlxalq təcrübəni öyrənməyimizlə yanaşı, Azərbaycanın yerli şəraitinin, milli xüsusiyyətlərinin də nəzərə alınmasını zəruri sayırdı. Heydər Əliyev tərəfindən dövlət idarəçiliyinə aid qəbul edilən qərarlar, tövsiyələr, verdiyi fərmanlar təkcə bu gün üçün yox, Azərbaycan dövlətçiliyinin gələcəyi üçün də çox əhəmiyyətlidir. Odur ki, Azərbaycan Respublikasının Prezidenti yanında Dövlət İdarəçilik Akademiyasının yaradılması böyük öndərin bu istiqamətdə həyata keçirdiyi tədbirlər sırasında xüsusi əhəmiyyətə malik idi. Bu müasir elm və təhsil müəssisəsinin yaradılması Heydər Əliyevin dövlət orqanlarına rəhbərlik sahəsində peşəkarlığın, səriştəliliyin artırılması, dövlət xidməti işinə daha istedadlı, bacarıqlı, yüksək mənəviyyatlı yeni gənc kadrların cəlb olunması məqsədinə hesablanmışdır.

Ümummilli lider Heydər Əliyev Azərbaycan Respublikasının Prezidenti yanında Dövlət İdarəçilik Akademiyasını adi elm-tədris mərkəzi kimi yox, məhz dövlət quruculuğu prosesində, dövlətçiliyin möhkəmlənməsində çox gərəkli bir elm-tədris müəssisəsi kimi, müstəqil Azərbaycana layiqli kadrlar yetişdirəcək çox mühüm struktur kimi formalaşdırmışdı. Akademiyanın yaranmasından artıq 10 il keçmişdir. Bu illər ərzində böyük öndərin qarşımıza qoyduğu vəzifələri yerinə yetirmək üçün akademiyanın kollektivi böyük səylə çalışmışdır.

Bu illər ərzində Dövlət İdarəçilik Akademiyası mükəmməl inkişaf yolu keçərək “İnzibati idarəetmə”, “Dövlət və bələdiyyə idarəçiliyi” sahəsində Azərbaycanın əsas elm və təhsil ocağına çevrilmiş, ölkə üçün idarəçi kadrların hazırlanması sahəsində təşəbbüsü öz üzərinə götürmüşdür. Akademiyada dövlət idarəçiliyinin müxtəlif sahələri üçün inzibati idarəetmə, dövlət və bələdiyyə idarəetməsi, menecment, hüquqşünaslıq, politologiya və beynəlxalq münasibətlər üzrə bakalavr, dövlət və bələdiyyə idarəetməsi, iqtisadiyyatın hüquqi tənzimlənməsi, dövlət hüququ, diplomatiya, beynəlxalq siyasət, milli təhlükəsizlik və siyasi strategiya, Azərbaycanda siyasi proseslər, konfliktologiya, dünya siyasi proseslər və beynəlxalq münasibətlər nəzəriyyəsi ixtisasları üzrə magistr hazırlığı aparılır. Bu təhsil ocağında Böyük Elmi Şura, ixtisaslaşdırılmış müdafiə və elmi-metodik şuralar, kafedralar, fakültələr, şöbələr, həmçinin “Heydər Əliyev Dövlət İdarəçilik Universiteti”, Sorğu Mərkəzi, zəngin elmi kitabxana, kompyuter mərkəzi, geostrateji araşdırmalar mərkəzi, insan hüquqları, sülh və demokratiya problemləri mərkəzi fəaliyyət göstərir.

Kafedralarda çalışan professor-müəllim heyətindən bir çoxları həm təcrübəyə, həm də nəzəri professionallıqlarına görə müasir Azərbaycan elminin aparıcı simalarındandırlar. Burada təhsil alan tələbələrin valideynləri övladları üçün yaradılmış şəraitdən razılıq edərək onların yüksək təhsil almalarından, imtahan zamanı müəllimlər tərəfindən mehribanlıq və qayğı ilə qarşılandıqlarından, mükəmməl biliklərə yiyələndiklərindən öz razılıqlarını bildirirlər. Sevindirici haldır ki, ötən il respublika üzrə Prezident təqaüdünə layiq görülmüş 100 nəfər gəncdən 25 nəfəri akademiyanın tələbəsidir. Bü fakt özlüyündə Dövlət İdarəçilik Akademiyasının gənclərin böyük maraqları olduğunu göstərir. Hazırda Akademiyada 80 nəfərə yaxın Prezident təqaüdçüsü təhsil alır. Akademiyada ümummilli liderimiz Heydər Əliyevin siyasi irsi və idarəçilik təcrübəsinin öyrənilməsinə də ciddi fikir verilir.

Rəhbər kadrların ixtisasartırması və İnzibati idarəetmə fakültələrində “Heydər Əliyevin dövlət idarəçiliyi təcrübəsi” xüsusi fənn kimi tədris olunur. Akademiyanın müəllimləri respublikada və xarici ölkələrdə keçirilən konfranslarda və digər görüşlərdə iştirak edir .

10 il ərzində akademiyanın strukturu müasir tələblərə uyğun şəkildə qurulmuş, yeni tədris planları tərtib edilmiş, işin səmərəliliyini artırmaq üçün müxtəlif səpgidə təşəbbüslər göstərilmişdir. Bu müddətdə Azərbaycanda, eləcə də dünyada gedən mühüm proseslərin elmi-nəzəri tədqiqata cəlb edilməsi sahəsində də nəzərə çarpacaq işlər görülmüş, həmin proseslərlə bağlı elmi polemikaların təşkili məqsədilə ən müxtəlif mövzular ətrafında konfranslar, seminarlar, debat və diskussiyalar təşkil edilmişdir. Elmi araşdırmaların ardıcıllığının, intevsivliyinin təminatı məqsədilə akademiyada müxtəlif elmi mərkəzlər, laboratoriyalar təşkil edilmişdir. Aparılmış elmi araşdırmaların yekunları akademiyanın “Dövlət idarəçiliyi: nəzəriyyə və təcrübə” jurnalında və digər elmi nəşrlərdə geniş oxucu kütləsinə təqdim olunur.

2003-cü ildən Dövlət İdarəçilik Akademiyasında “Dövlət idarəçiliyi: nəzəriyyə və təcrübə” adlı elmi jurnal buraxılır. Jurnalda Prezidentin gündəlik fəaliyyətinin qısa xronikası, rəsmi qəbulları, səfərləri haqqında məlumat və şərh verilir, tanınmış dövlət xadimlərinin, nazirlərin, icra başçılarının, görkəmli alimlərin, dövlət quruculuğuna, idarəçiliyə, eləcə də dövlət və özünüidarəetmənin nəzəri-metodoloji əsaslarına, dövlət qulluğu, sosial, siyasi-hüquqi problemlərə, Heydər Əliyevin dövlətçilik, dövlət idarəçiliyi sahəsində zəngin nəzəri irsinin, dövlət idarəçiliyi sahəsində qabaqcıl təcrübəsinin təhlili, ümumiləşdirilməsi və təbliğinə dair məqalələr çap olunur.

Bu gün Azərbaycan Respublikasının Prezidenti yanında Dövlət İdarəçilik Akademiyasının kadrların ixtisasartırması və yenidən ixtisaslaşdırılması fakültəsində müxtəlif istiqamətlər üzrə ali təhsilli mütəxəssislərlə yanaşı, aspirantura və doktorantura xətti ilə elmi kadrlar hazırlanması, təcrübəli professor-müəllim heyətinin formalaşması işinə də ciddi fikir verilir. Hazırda akademiyada böyük elmi potensial cəmləşmişdir. Əvəzçiliklə çalışanlara birlikdə bunlardan da 1 nəfər AMEA- nın müxbir üzvü, 38 nəfər elmlər doktoru, professor, 79 nəfər elmlər namizədi və dosentlərdir. Akademiyada siyasi elmlər, beynəlxalq münasibətlər və tarix üzrə müdafiə şurası fəaliyyət göstərir. Burada respublikanın müxtəlif ali məktəbləri, yaxın və uzaq xaricdən olan mütəxəssislər qeyd olunan ixtisaslar üzrə namizədlik və doktorluq dissertasiyaları müdafiə edirlər.

S.Qəndilov daha sonra dedi ki, elmin, təhsilin böyük himayədarı olan Prezident İlham Əliyevin həyatımızın bütün sahələri kimi, elmimizə, təhsilimizə göstərdiyi böyük qayğı təbiidir ki, Dövlət İdarəçilik Akademiyasının tələbə və müəllim heyyətini də ruhlandırır, onları daha səmərəli fəaliyyətə səfərbər edir. Rektor dedi ki, fürsətdən istifadə edərək bu əlamətdar gündə Akademiyamıza yüksək diqqət yetirdiyinə, böyük qayğı göstərdiyinə, aldığımız yüksək təltiflərə görə bütün kollektivimiz adından və şəxsən öz adımdan böyük razılığımızı bildirir, eyni zamanda təhsilimizin böyük himayədarı olan çox hörmətli xanım Mehriban Əliyevaya, xalqımızın rifahı, respublikamızın inkişafı və dövlətçiliyimizin möhkəmlənməsi yolunda Prezident İlham Əliyevə göstərdikləri birgə fəaliyyətlərində yeni uğurlar arzu edirəm. Qoy Azərbaycanın siyasi səmasındakı bu qoşa qanadın kölgəsi Azərbaycanımızın başı üstündən heç bir zaman əskik olmasın.

Bakı Dövlət Universitetinin rektoru, akademik Abel Məhərrəmov, Azərbaycan Tibb Universitetinin rektoru, akademik Əhliman Əmiraslanov, Azərbaycan İqtisad Universitetinin rektoru, Milli Məclisin elm və təhsil komitəsinin sədri, professor Şəmsəddin Hacıyev, Azərbaycan Müəllimlər İnstitutunun rektoru Aqiyə Naxçıvanlı, Milli Məclisin sədr müavini Bahar Muradova və Prezident Administrasiyasının ictimai-siyasi məsələlər şöbəsinin müdiri, professor Əli Həsənov akademiyanın professor-müəllim heyətin təbrik etdilər.

Sonra Azərbaycan Prezidenti İlham Əliyevə Dövlət İdarəçilik Akademiyasının kollektivi adından göndərilmiş təbrik məktubu oxundu.

Əliqismət BƏDƏLOV

Xalq qəzeti.- 2009.- 19 sentyabr.- S. 7.