Texniki peşə təhsili yeniləşmə yolunda

4 saylı Bakı Peşə Liseyində islahatın nəticələri aydın hiss olunur

Bu təhsil ocağında üç il əvvəl olmuşdum. Əslində, o vaxt bu məktəbin tezliklə bağlanacağı qənaətinə gəlmişdim. Burada məskunlaşan qaçqın ailələri, Zəngilan 13 saylı, Ağdam 76 saylı məktəbləri onun fəaliyyətini demək olar ki, məhdudlaşdırmışdı, əsaslı təmirə ehtiyac olduğu isə aydın hiss edilirdi. Məktəbin həyəti bərbad vəziyyətdə idi. Söhbət Bakı şəhəri 4 saylı Peşə Liseyindən gedir.

Bu günlərdə yenidən həmin peşə liseyinə baş çəkdim. Məktəb yenidən qurulmuşdu. İlkin olaraq həyətdə yaradılan səliqə-sahman göz oxşayırdı. Məktəb yenidən hasara alınmış, stadion yenidən qurulmuş, qaçqın məktəbləri isə əsas korpusdan ayrılmışdı. Onlar üçün əlverişli şərait yaradılmışdı. Liseyin otaqları təmir olunmuş, emalatxanalar üçün yeni avadanlıqlar alınmış, kommunikasiya xətləri yeniləşmişdi.

Liseyin direktoru Alik Allahverdiyev də iki ildir təyin olunub. Deyir ki, Prezident İlham Əliyevin ölkədə peşə təhsilinin inkişafı üzrə Dövlət Proqramının (2007-2012-ci illər) qəbul edilməsi ilə bağlı imzaladığı sərəncam bu sahədə islahatın başlanmasına bir növ start verdi. Bunun da real səbəbləri vardır. Belə ki, son illər ölkədə gedən quruculuq işləri, Azərbaycan iqtisadiyyatındakı sürətli tərəqqi, yeni sənaye müəssisələrinin yaradılması ixtisaslı fəhlə kadrlarına tələbatı xeyli artırmışdır. Çox hörmətli Prezidentimiz dəfələrlə öz çıxışlarında Azərbaycanda bundan sonra da yeni iş yerlərinin açılacağını, ixtisaslı fəhlə kadrlarına ehtiyacın getdikcə artacağını bildirmişdir. Ona görə də peşə təhsilinə diqqət ilbəil artmaqdadır. Təhsil naziri Misir Mərdanov da təhsilin bu pilləsinin inkişafını daim diqqət mərkəzində saxlayır.

Bu yaxınlarda peşə təhsili işçilərinin konfransı keçirildi. Nazirliyin texniki peşə təhsili şöbəsinin müdiri Namiq Məmmədov məruzəsində son illər qazanılan nailiyyətlər, qarşıda duran problemlər geniş əks olunmuşdu.

Doğrudan da, ölkədə peşə təhsili islahatı sürətli inkişaf yolundadır. Bu gün Prezidentin imzaladığı Dövlət Proqramı böyük uğurla həyata keçirilir. Artıq bir vaxtlar yararsız vəziyyətə düşmüş məktəblər əsaslı təmir olunmuş, onlar yeni avadanlıqlarla təchiz edilmişdir. Hətta yeni, müasir tipli peşə liseyləri tikilib istifadəyə verilir.

Alik müəllimlə liseyin binasını gəzirik. Sinif otaqları, ayrı-ayrı fənn kabinetləri ilə tanış oluruq. Doğrusu, bu liseylə bağlı əvvəlki təəssüratlarım tamamilə dəyişir. Təmiz, səliqəli hər cür avadanlıq və əyani vəsaitlərlə təmin olunmuş sinif otaqlarında dərslər müasir üsullarla keçilir. Məktəbin yeni kitablarla komplektləşdirilən zəngin kitabxanası şagirdlərin mütaliəsi üçün imkan yaradıb.

Emalatxanalarda isə vəziyyət qənaətbəxşdir. Burada ustalar şagirdlərə seçdikləri peşə üzrə əyani olaraq ixtisas dərsləri keçirlər.

Sonra direktor liseyin fəaliyyəti barədə məlumat verdi. Dedi ki, bizim lisey 1956-cı ildə Binəqədi rayonunda “Fabrik-zavod şagirdliyi” adı ilə fəaliyyətə başlayıb. Sonra Nərimanov rayonunda 19 saylı şəhər orta texniki peşə məktəbi kimi ixtisaslı fəhlələr hazırlamışdır. 1985-ci ildən Nizami rayonuna köçürülən 19 saylı texniki peşə məktəbinə 1996-cı ildən 4 saylı Bakı Peşə Liseyi adı verilmişdir.

Liseyin direktoru bildirdi ki, son iki ildə məktəbdə yenidənqurma işləri aparılmışdır. Həyət neçə illərdən bəri yığılıb qalmış zibillərdən təmizlənmiş, yaşıllıqlar salınmış, fontonlar quraşdırılmışdır. Stadion yenidən qurulmuş, zirzəmilər çirkab sulardan təmizlənmiş, binaların fasadları bütövlüklə rənglənmişdir.

Liseydə təmirçi-çilingər, qaynaqçı, dülgər, xarrat, parket ustası, mühasib-fərdi kompyuter operatoru, kompyuter üzrə operator, radio-televiziya aparatlarının (videotexnikanın) təmiri və xidməti üzrə mexanik ixtisasları üzrə mütəxəssislər hazırlanır. 9-cu sinfi bitirmiş oğlan və qızlardan 3 il müddətində ixtisaslı fəhlə kadrları hazırlanır. Liseyə şagird qəbulu planı 90 nəfərdir. Şagirdlərin təlim-tərbiyəsi ilə 18 müəllim və 12 istehsalat təlimi ustası məşğul olur.

Liseyin yardımçı binalarında, inzibati korpusda, tədris korpusunun 1-ci mərtəbəsində 24 qaçqın ailəsi məskunlaşmışdır. Prezidentimizin imzaladığı Dövlət Proqramına uyğun olaraq yaxın gələcəkdə onlar abad evlərlə təmin olunacaq, yaxud öz doğma torpaqlarına köçürüləcək. O zaman liseyimizin imkanları daha da genişlənəcək.

Alik müəllim onu da xatırlatdı ki, bu yaxınlarda ölkə Prezidentinin sərəncamı ilə peşə təhsilinin inkişafına 2 milyon manat vəsait ayrılmışdır. Bu dövlət başçımızın peşə təhsilinin inkişafına göstərdiyi qayğının bariz nümunəsidir. Biz peşə təhsili işçiləri bu məsuliyyəti yaxşı başa düşürük və çalışırıq ki, ya bu qayğıya öz əməli işimizlə cavab verək.

M.MÜKƏRRƏMOĞLU

Xalq qəzeti.- 2009.- 30 sentyabr.- S. 8.