Ahıllar günü qeyd edilmişdir

Zaqataladakı “Büllur” şadlıq sarayında 1 oktyabr — Beynəlxalq Ahıllar günü münasibəti ilə bayram tədbiri keçirilmişdir. Tədbirdə rayon icra hakimiyyətinin başçısı Mübariz Əhmədzadə çıxış edərək ahılları əlamətdar gün münasibətilə təbrik etmiş, ölkəmizdə yaşlı vətəndaşların, tənha və kimsəsizlərin daim diqqət və qayğı ilə əhəta olunduqlarını, onların sosial müdafiəsinin gücləndirilməsi, sağlamlıqlarının qorunması sahəsində ardıcıl tədbirlərin həyata keçirildiyini bildirmişdir.

Daha sonra icra hakimiyyətinin başçısı Zaqatalanın sosial-iqtisadi inkişafı üçün görülməsi nəzərdə tutulan işlərdən danışmış, bu işlərin həyata keçirilməsində veteran və yaşlı nəslin nümayəndələrinin hər zaman məsləhət və təkliflərinə böyük ehtiyac olduğunu xüsusilə qeyd etmişdir.

Tədbirdə rayon ictimaiyyətinin nümayəndələri və ahıllar çıxış edərək, ahılların sosial müdafiəsinin gücləndirilməsi və hüquqlarının təmin edilməsi sahəsində həyata keçirilən tədbirlər barədə danışmış, diqqət və qayğıya görə Azərbaycan Respublikasının Prezidenti İlham Əliyevə öz dərin təşəkkürlərini bildirmişlər.

Tədbirin sonunda rayon Əhalinin Sosial Müdafiəsi Mərkəzinin himayəsində olan və uzun müddət təhsil sistemində çalışmış 90 nəfər ahıl vətəndaşa bayram sovqatı verilmişdir.

İ.MUSAOĞLU,

“Xalq qəzeti”nin bölgə müxbiri

Xalq qəzeti.- 2009.- 1 oktyabr.- S. 7.