Gün o gün olsun, Qarabağda təbrikləşək

— 2008-ci il yalnız başa vurduğumuz təqvim deyil, həm də uğurlu illərin sırasında ən təqdirəlayiqidir. Ölkənin bu ilki uğurları barədə qısa danışmaq mümkün deyil. Statistik məlumatlar kiçik təbrik müsahibəsinə, əlbəttə ki, sığan deyil. Lakin yığcam demək istərdim ki, ümummilli lider Heydər Əliyevin qurmuş olduğu inkişaf strategiyası 2008-ci ildə daha böyük nailiyyətlərlə həyata keçirilmiş, bu isə sosial-iqtisadi tərəqqinin daha da sürətlənməsi ilə müşahidə olunmuşdur. Bu mənada qeyd edim ki, təhsil ocaqları, xəstəxanalar, mədəniyyət mərkəzləri və s. müəssisələrin açılması, tikinti, energetika və nəqliyyat sahələrində böyük layihələrin reallaşdırılması neft ölkəsi olan Azərbaycanın inkişaf reallıqlarının bir hissəsidir. Məhz bu inkişafın nəticəsidir ki, 2008-ci ildə xeyli iş yerləri açılmış, pensiya, təqaüd və əməkhaqları artırılmış, bölgələrdə elektrik, qaz və su problemlərinin aradan qaldırılması istiqamətində əhəmiyyətli işlər görülmüşdür. Bunlar əhalinin rifahının yaxşılaşdırılması və sosial problemlərin həlli istiqamətində görülmüş önəmli işlər kimi yüksək qiymətləndirilməlidir.

Ümumiyyətlə, başa vurduğumuz ilin inkişaf prosesinə nəzər yetirdikdə aydın olur ki, ölkənin əsas gəlir mənbəyi olan neft sənayesi qeyri-neft sektorunun da inkişafına böyük təkan vermişdir. Rəsmi dövlət qəzetlərinin birindən oxumuşdum ki, bu ilin doqquz ayı ərzində qeyri-neft sektoru üzrə büdcəyə 1 milyard 737 milyon manat vəsait daxil olmuşdur ki, bu da 2007-ci ilin müvafiq dövrünün göstəricisindən 566,8 milyon manat və ya 48,4 faiz çoxdur. Hesab edirəm ki, bu, çox fərəhli bir faktdır.

Ölkəmizin inkişafı idman sahəsində də özünü göstərir və 2008-ci il Yay Olimpiya oyunlarında 1 qızıl, 2 gümüş və 4 bürünc medalla bunun bir daha şahidi olduq.

Ordumuzun da sürətli inkişafı göz qabağındadır. Bunu Azərbaycan Silahlı Qüvvələrinin yaradılmasının 90 illiyinə həsr edilmiş hərbi paradı böyük fəxrlə seyr etdik.

Aydındır ki, elmsiz inkişaf ola bilməz. Ona görə də, mənim üçün, o cümlədən bütün elm adamları üçün daha bir uğur ondan ibarətdir ki, möhtərəm Prezident İlham Əliyev Azərbaycan elmində islahatların aparılması ilə bağlı Dövlət Komissiyasının yaradılması haqqında sərəncam imzaladı. Hesab edirəm ki, bu addım elmimizin daha da inkişaf etməsinə təkan verəcək və gələcək illərdə ölkənin daha sürətli tərəqqisinə töhfə olacaq. Elmdən söz açmışkən, 2008-ci il Geologiya İnstitutunun kollektivi üçün həm də onunla yadda qaldı ki, institutun 70 illik yubileyi qeyd edildi, yubileylə əlaqədar olaraq, cənab Prezident tərəfindən 44 əməkdaşımız Prezidentin fərdi təqaüdünə, fəxri ad və medallara layiq görüldü.

İlin ən böyük uğuru isə İlham Əliyevin yenidən prezident seçilməsidir. İnanıram ki, bu uğur növbəti 5 il ərzində Azərbaycana daha böyük nailiyyətlər və sevinclər qazandıracaq, çiçəkləndirəcək və ölkəmiz regionda lider olaraq qalacaq.

Uğurlara baxmayaraq, 2008-ci ili bir təəssüf hissi ilə də başa vururuq. Bu, Ermənistan tərəfindən işğal edilmiş torpaqlarımızın hələ də geri qaytarılmamasıdır. Lakin XX əsrin birinci yarısında Hindistan milli-azadlıq hərəkatının rəhbərlərindən biri Mahatma Qandinin bir deyimini yada salmaq istərdim: “Bizim üçün ən böyük qələbə uğur qazanacağımızı rəqiblərimizə hiss etdirməkdir”. Fikrimcə, bu baxımdan nəzərə alsaq ki, Azərbaycan Ermənistandan qat-qat çox inkişaf edib və bu, nəinki ermənilərə, hətta, bütün dünyaya məlumdur, deməli, Dağlıq Qarabağ münaqişəsinin ölkəmizin xeyrinə həll olunacağına inanmaq olar.

Bir sözlə, mən bütün dünya azərbaycanlılarını Həmrəylik Günü münasibəti ilə təbrik edir, can sağlığı, uzun ömür və milli mənafelər ətrafında daim həmrəy olmağı arzulayıram. Xalqımızın həmrəylik sayəsində görəcəyi hələ çox işlər var. Yeni ildə isə Tanrıdan müstəqil Azərbaycanımızın inkişafı naminə yeni uğurlar diləyirəm.

Azərbaycan Milli Elmlər Akademiyasının vitse-prezidenti,

Geologiya İnstitutunun direktoru,

akademik Akif ƏLİZADƏ

Xalq qəzeti.-2009.-1 yanvar.- S.4.