Goranboydan gəlirəm...

Ötən il bütün sahələrdə əldə edilmiş yüksək nəticələrdən, cari ildə nəzərdə tutulmuş genişmiqyaslı tədbirlərdən doğan böyük fərəh və qürur hissi , zəngin təəssürat və düşüncələrlə

...bir də yanar ürək

— Yola saldığımız il Goranboy üçün daha çox nə ilə yadda qaldı?

Rayon icra hakimiyyətinin başçısı Elşən Abasov elə bil bizdən məhz bu sualı gözləyirdi:

— 2008-ci il təkcə Goranboy rayonu üçün yox, ümumiyyətlə, ölkəmiz, xalqımız üçün, hər şeydən əvvəl, yüksək siyasi səviyyədə və böyük mütəşəkkilliklə keçən növbəti prezident seçkiləri ilə yaddaqalan və əlamətdar oldu. Özü də buna sadəcə prezident seçkiləri kimi baxmaq olmaz. 2008-ci ildə keçirilən növbəti prezident seçkilərinə 1969-cu ildən başlayan misli görünməyən inkişaf və tərəqqinin, milli-mənəvi dəyərlərin, azərbaycançılıq fəlsəfəsinin yeni şəraitdə davamı, inkişafı, daha da zənginləşməsi kimi baxmaq lazımdır. Xalqımızın böyük oğlu, ulu öndərimiz Heydər Əliyevin siyasi kursunun ən layiqli davamçısı İlham Əliyevin müdrik və qətiyyətli daxili və xarici siyasət xətti ölkəmizin beynəlxalq nüfuzunu daha da artırmış, Azərbaycan regionda həlledici söz sahibi olmuşdur. Bölgələrin sosial-iqtisadi inkişafı, ümumdaxili məhsul istehsalının artım sürəti, yeni müəssisələrin açılması, iş yerlərinin yaradılması isə hər birimizin gözü qarşısındadır. Bu dediklərimizi Goranboy rayonunun timsalında da aydın şəkildə görmək mümkündür.

— Sizi daha çox iş üstündə, müxtəlif kollektivlərdə, adamlar arasında görmək olar...

— Başqa cür də ola bilməz. Adamlarla ardıcıl və sistemli iş aparmadan, onların sosial ehtiyaclarını maksimum ödəmədən, iş üslubunu, təşkilat-idarəetmə məsələlərini təkmilləşdirmədən hər hansı sahədə uğur qazanmaq mümkün deyil.

— Bura əldə edilmiş yüksək iqtisadi nəticələri, əhalinin həyat şəraitinin, maddi gəlirlərinin artmasını da əlavə etmək olar. Ona görə ki, Goranboyda bu məsələlər 2008-ci ildə əvvəlki illərlə müqayisədə çox yüksəkdir...

— Orası elədir. Ancaq nəzərə alın ki, yuxarıda sadaladığım məsələləri həll etmədən yüksək iqtisadi göstəricilərdən, əhalinin həyat səviyyəsinin, gün-güzəranının yaxşılaşdırılmasından, ümumiyyətlə, danışmağa dəyməz. Axı, insan robot deyil. Gərək əvvəlcə şərait yaradasan, tədbir görəsən, sonra iş tələb edəsən. Mən sizə bu dəqiqə yüzlərlə rəqəm, fakt sadalaya bilərəm. Bunlar, əlbəttə, öz-özünə əmələ gəlməyib.

Həqiqətən, Azərbaycan xalqı xoşbəxtdir. Bir də ona görə ki, bizim bütün zamanlar üçün parlaq örnək, canlı nümunə, əsl məktəb ola biləcək liderimiz — Heydər Əliyev kimi tarixi şəxsiyyətimiz var. Ulu öndərimiz həyatın bütün sahələrində olduğu kimi, iş üslubu və metodları, təşkilat-idarəetmə məsələləri barədə də dahiyanə fikirlər söyləmiş, konkret istiqamət vermişdir. Həmin ölməz fikir və ideyalar bizim hər birimiz üçün həyat məktəbi, uğurlu fəaliyyət üçün əsas stimuldur. Mən bu sözləri deyərkən ümummilli lider Heydər Əliyevin respublikamızın müxtəlif bölgələrinə olan tarixi səfərlərini, keçirdiyi unudulmaz görüş və söhbətləri, adamlara göstərdiyi diqqət, qayğı və həssaslığı xatırlayıram.

Olduqca fərəhlidir ki, həmin müdrik siyasət bu gün daha böyük uğurla davam etməkdədir. Respublika Prezidenti İlham Əliyevin qlobal, qətiyyətli və uzaqgörən fəaliyyətinin digər cəhətləri ilə yanaşı, əsas məna və mahiyyəti insan amili, onun vacib sosial ehtiyaclarının daha dolğun ödənilməsi, həyat səviyyəsinin yüksəldilməsidir. Özünüz təsəvvür edin: təkcə 2008-ci ildə ölkə rəhbəri respublikanın, demək olar ki, bütün bölgələrinə səfər etmişdir. Yüzlərlə iri sənaye müəssisəsi açılmış, parklar, xiyabanlar yaradılmış, on minlərlə yeni iş yeri açılmışdır. Ölkəmizin elə bir rayonu yoxdur ki, orada təbii qaz alovlanmasın. İndi elektrik enerjisinin verilməsində heç bir problem yoxdur və s.

— Rayon icra hakimiyyətindən bizə verilən arayışda göstərilir ki, son 2 ildə Goranboy rayonu ərazisində 143 yöndəmsiz köşk və tikili götürülmüşdür...

— Başqa cür də ola bilməz. Bu, zamanın tələbidir. Müasir arxitektura, yüksək zövq və səliqə-sahman inkişafın ayrılmaz tərkib hissəsidir. Söhbət təkcə küçəyə asfalt döşəməklə, yaxud yeni bina tikməklə bitmir. Tikilən hər ev, salınan yol, səki, park və xiyaban ən əvvəl insanın zövqünü oxşamalı, ona rahatlıq, sakitlik gətirməlidir. İndiyə qədər bu istiqamətdə görülən işləri başlanğıc hesab edirik. Biz Goranboyu daha abad, gözəl və yaraşıqlı görmək istəyirik.

— Əvvəllər belə bir deyim vardı: kadrlar hər şeyi həll edir...

— Əslinə qalanda, bu deyim bütün zamanlara, bütün cəmiyyətlərə aiddir. Həqiqətən, hər hansı bir sahədə işin uğurlu təşkili kadrların düzgün seçilib yerləşdirilməsindən çox asılıdır.

Bu gün Goranboyda öz işini günün tələbləri səviyyəsində quran, təşəbbüskar və yaradıcı, yüksək mənəvi keyfiyyətləri ilə fərqlənən kadrlar çoxdur. Belələrini vaxtında görüb üzə çıxartmaq bizim borcumuzdur. Burada, əlbəttə, məsələnin başqa tərəfləri də var. Əvvəllər əksər hallarda oturub, necə deyərlər, yuxarıdan göstəriş gözləyirdilər, müstəqil hərəkət, təşəbbüs arxa plana keçmişdi. İndi isə əksinə, yuxarıda sadaladığımız ön plandadır. Mən yeri gəlmişkən, bura bir cəhəti də əlavə edərdim: yanar ürək. Öz xalqı, milləti, Vətəni üçün yanar ürək. Ulu öndərimiz Heydər Əliyevin ölməz ideya və əməllərinə sonsuz sədaqət həlledici olmalıdır. Biz işimizi məhz bu vacib prinsiplər üzərində qurmağa çalışırıq.

Rəqəmlərin dili ilə...

Bu gün qətiyyətlə demək olar ki, Goranboy respublikamızın sürətlə inkişaf edən bölgələrindən birinə çevrilmişdir. Biz bu sözləri deyərkən, hər şeydən əvvəl, sənaye və kənd təsərrüfatı məhsulları istehsalını, yeni emal müəssisələrinin yaradılmasını, bütün sahələri əhatə edən genişmiqyaslı tikinti-abadlıq və quruculuq işlərini nəzərdə tuturuq. Gəlin, faktlara müraciət edək. 2008-ci ildə əvvəlki ilə nisbətən əmtəə dövriyyəsi 18,5 milyon manat, pullu xildmətin dəyəri 12,2 milyon manat, orta aylıq əmək haqqı 42 faiz artmışdır. İqtisadiyyatda baş verən artım tempi rayon əhalisinin sosial rifah halının yaxşılaşdırılmasına, mövcud problemlərin operativ həll edilməsinə xidmət etmişdir. Məhz bunun nəticəsidir ki, rayona gələnlərin sayı ilə gedənlərin sayı arasında kəskin fərq yaranmışdır. Belə ki, 2008-ci ildə rayona gələnlərin sayı 384 nəfər, gedənlərin sayı isə 22 nəfər olmuşdur.

Rayonda özəl bölmənin inkişafına verilmiş geniş meydan bu sahənin sürətli inkişaf etdirilməsinə gətirib çıxarmışdır. Məsələn, ötən ilin yekunlarına görə yerli büdcə daxilolmasında özəl bölmənin xüsusi çəkisi 75,5 faiz təşkil edir. Ötən il rayona yönəldilən investisiyaların həcmi kəskin şəkildə artmışdır. Əsas kapitala yönəldilən investisiyaların həcmi 2003-cü ilə nisbətən 37,2 milyon manat artaraq, 41,5 milyon manata çatmışdır. Kapital qoyuluşunun 22,7 milyon manatı istehsal təyinatlı sahələrə, qalan 18,7 milyon manatı isə qeyri-istehsal sahələrinə yönəldilmişdir. Bunun da 43 faizi daxili potensialın hərəkətə gətirilməsi hesabına əldə edilmişdir.

2008-ci ildə iqtisadiyyatın əsasını təşkil edən aqrar bölmə diqqət mərkəzində saxlanılmışdır. Bu sahəyə olan dövlət qayğısı kənd əməkçilərinin marağını xeyli artırmışdır. Təsadüfi deyildir ki, ötən ildə istehsal olunan kənd təsərrüfatı məhsullarının dəyəri əvvəlki ilə nisbətən 3,6 milyon manat artmışdır. Ət istehsalı əvvəlki ilə nisbətən 160 ton artaraq 2720 tona, süd istehsalı 12 ton çoxalaraq 6770 tona, yun istehsalı 53 ton çoxalaraq 740 tona çatmışdır. Rayon üzrə cəmi əkin sahəsi 5,6 min hektar artaraq 35,4 min hektar olmuşdur. İri malın sayı 1575 baş artaraq 38715-ə, qoyun-keçilərin sayı isə 5682 baş artaraq 217638-ə çatmışdır.

Tikdim ki, izim qala...

Mütəxəssislər kiçik bir hesablama apardılar: tikinti-abadlıq və quruculuq işlərinin həcminə görə 2008-ci il rayon tarixində ən yüksək yer tutur. Bu, həqiqətən, bütün sahələri əhatə edən genişmiqyaslı tikinti-abadlıq işləri nəticəsində Goranboy və Dəliməmmədli şəhərləri, qəsəbə və kəndlər öz simasını əsaslı şəkildə dəyişmiş, daha gözəl və yaraşıqlı olmuşdur.

Goranboy şəhərinin mərkəzində yerləşən və ulu öndərimiz Heydər Əliyevin adını daşıyan parkda insanların mənalı və məzmunlu istirahət etmələri üçün hər cür şərait yaradılmış, Ana-uşaq kafesi, Ağsaqqallar evi istifadəyə verilmişdir. 2008-ci ildə Gənclər parkında da işlər başa çatmışdır. Burada müasir üslubda ikimərtəbəli Gənclər evi və Rəsm qalereyası, habelə gənclərin asudə vaxtının səmərəli təşkili üçün kafe və əyləncə mərkəzi yaradılmışdır. Parkın kənarında yerləşən tikililərin fasad hissəsinə alkapon üzlük çəkilmişdir.

Şəhərə xüsusi gözəllik verən ikimərtəbəli uşaq musiqi məktəbinin yeni binasının, Heydər Əliyev prospekti boyunca piyada yolunun tikintisi də başa çatmışdır. Heydər Əliyev prospektində, V.Bayramov küçəsində yerləşən 2 ədəd ikimərtəbəli 12 mənzilli evin fasad hissəsi təmir edilmiş, dam örtükləri dəyişdirilmişdir. Bundan başqa, şəhərin arxitektura görkəminə xələl gətirən, əvvəllər mehmanxana kimi fəaliyyət göstərmiş ikimərtəbəli binanın müasir görkəmdə bərpası, Dəliməmmədli şəhərində ikimərtəbəli məişət evinin tikintisi davam etdirilmişdir. Goranboy şəhər ticarət mərkəzinin, Telekommunikasiya qovşağının təmiri başa çatdırılmışdır. Heydər Əliyev prospektində və V.Bayramov küçəsində müasir işıqlandırma sistemi quraşdırılmışdır.

Ötən müddətdə Goran istiqamətində şəhərə gələn yolun kənarında 4,5 hektar ərazidə mehmanxana tipli istirahət zonasının, məişət evinin və üzgüçülük hovuzunun tikintisi davam etdirilmişdir. Trikotaj fabrikinin tikintisi başa çatmış, yeni avadanlıqlar alınmışdır. Bakı— Qazax magistral yolunun rayon ərazisindən keçən hissəsində müasir üslubda ticarət və iaşə obyektlərinin tikintisi davam etdirilmişdir. Həmin obyektlərdən 45-nin tikintisi artıq başa çatdırılmış, ətrafında abalıq işləri aparılmışdır.

Ümumiyyətlə, 2008-ci ildə Goranboy şəhərində uzunluğu 3145 metr olan müxtəlif küçələrdə 17900 kvadratmetr, “Goran - dördyol” ərazisində 1350 kvadratmetr beton üzlük salınmışdır. Avtovağzal ərazisi, yol kənarları və meydan yenidən asfaltlanmışdır. Nizami, C.Cabbarlı, E.Bayramov, B.Bağırova küçələrinə beton örtük salınmışdır. Heydər Əliyev muzeyinin qarşısına 450 kvadratmetr mərmər örtük döşənmişdir. Çernobıl faciəsi qurbanlarının xatirəsinə ucaldılmış abidənin ətrafı tanınmaz dərəcədə dəyişmiş, burada 4500-dən çox dekorativ ağac və gül kolu əkilmiş, yeni yaşıllıq örtüyü salınmışdır. C.Cabbarlı meydanı tamamilə yenidən qurularaq, 2800 kvadratmetr üzlük daş döşənmişdir. Şəhərdən Qızılhacılı istiqamətinə gedən yolun kənarları genişləndirilərək yenidən qurulmuşdur.

Ötən il yeni istehsal müəssisələrinin açılması, iş yerlərinin yaradılması istiqamətində aparılan işlər daha da sürətləndirilmişdir. “Gilan-Holdinq”in gips-karton zavodunun və gips zavodunun tikintisi artıq başa çatmışdır. Kürəkçay üzərində yeni qum-çınqıl istehsalı müəssisəsinin tikintisində isə işlər davam etdirilir.

Şəhid ailələri, Qarabağ müharibəsi, 20 Yanvar və Çernobıl əlilləri üçün 2 mərtəbəli 16 mənzilli yaşayış evi, əhalinin sosial müdafiə mərkəzi üçün inzibati bina, Respublika Bankının və Muğanbankın rayon filialları, maliyyə idarəsinin, musiqi məktəbinin yeni binaları da 2008-ci ilin “yadigarlarıdır”.

Sosial problemlər diqqət mərkəzindədir

Yola saldığımız ildə əhalinin vacib sosial ehtiyaclarının, xüsusilə elektrik enerjisi, təbii qaz və içməli su ilə fasiləsiz təminatı diqqət mərkəzində saxlanılmış, bu sahədə ardıcıl və sistemli iş qurulmuşdur. “Əhalinin elektrik enerjisi, qaz və su təchizatının yaxşılaşdırılması sahəsində təşkilati tədbirlərin gücləndirilməsi barədə” rayon icra hakimiyyəti başçısının müvafiq sərəncamı ilə yaradılmış qərargah işlərin gedişini daim nəzarətdə saxlamışdır. İstehlakçılar tərəfindən ödənişlərin tam aparılması istiqamətində təbliğati tədbirlər gücləndirilmişdir. Hazırda əhali qrupu üzrə orta ödəniş 85 faizə çatdırılmışdır. Əhalinin normal elektrik enerjisi ilə təmin edilməsi məqsədilə 8 ədəd transformator əsaslı, 7-si isə cari təmir edilmişdir.

Məlumdur ki, 1990-cı illərdən rayona təbii qaz verilişi dayandırılmışdır. İndi isə rayon mərkəzinə və 32 yaşayış məntəqəsinə təbii qaz verilir. Bundan başqa, 7 kəndə təbii qaz verilməsinə hazırlıq işləri davam etdirilir. Ümumiyyətlə, 7129 təbii qaz istehlakçısının 95,4 faizində qaz sayğacı quraşdırılmış, orta ödəniş isə 94,3 faiz olmuşdur.

Ötən müddətdə əhalinin içməli su ilə təminatı da yaxşılaşdırılmışdır. Murov — Goranboy su xəttinin 5 kilometr, Ağcakənd — Gurzallar su xəttinin 1,2 kilometr hissəsində əsaslı təmir işləri aparılmışdır. Goranboy və Dəliməmmədli səhərlərində istismar müddəti başa çatmış yeraltı su xətləri yenisi ilə əvəz edilmişdir. Murov — Goranboy su kəmərindən Hacallı kəndlinə gedən içməli su xəttinin çəkilişi başa çatmış, subartezian quyularında əsaslı təmir aparılmışdır. İstehlak olunan suya görə orta ödəniş isə 102 faizdir.

Təhsil, səhiyyə, mədəniyyət

2008-ci ildə rayon təhsil, səhiyyə və mədəniyyət müəssisələrinin fəaliyyəti xüsusilə gücləndirilmiş, əvvəlki illərlə müqayisədə ciddi irəliləyiş əldə edilmişdir. Ən əsası isə odur ki, sahənin maddi-texniki bazası daha da möhkəmləndirilmişdir. Məsələn, təkcə ötən il 5 yeni məktəb binası, 24 sinif otağı tikilib istifadəyə verilmişdir. Bura rayon təhsil şöbəsinin inzibati binasını, şəhər 1 saylı, Səfirkürd kənd orta məktəblərinin əsaslı təmirini də əlavə etmək olar.

Ötən il diaqnostika mərkəzinin, o cümlədən Yuxarı Sarovlu və Xınalı kənd həkim ambulatoriyası üçün yeni binaların tikintisi başa çatdırılmışdır. Rayon mərkəzi xəstəxanasının qəbul və reanimasiya şöbələrində, Qızılhacallı qəsəbə və Xan Qərvənd kənd xəstəxanalarında cari təmir işləri aparılmışdır. Dəliməmmədli şəhər xəstəxanasının isə əsaslı bərpasına başlanılmışdır.

Rayon mədəniyyət və turizm şöbəsinin fəaliyyəti xüsusilə təqdirəlayiqdir. Əvvəllər bu sahədə müşahidə olunan nöqsan və kəm-kəsirlər qətiyyətlə aradan qaldırılmış, tələbkarlıq artırılmışdır. Nəticədə, bir-birindən zəngin və maraqlı tədbirlər, proqramlar hazırlanıb həyata keçirilmişdir. Təmir və bərpa işləri rayonunun, demək olar ki, bütün mədəniyyət müəssisələrini əhatə etmişdir. 310 yerlik uşaq incəsənət məktəbi, rəsm qalereyası, ana və uşaq kafesi, gənc istedadlar məktəbi, Qızılhacallı qəsəbəsində modern kitabxana və mədəniyyət mərkəzi, Səfirkürd kəndində musiqi məktəbi və s. məhz bu sıradandır.

Qar yağır... deməli, bolluq olacaq

— Axırıncı səfərimiz zamanı Goranboya güclü qar yağmışdı. Küçələr, evlər, ağaclar qəribə, təkrarsız bir görkəm almışdı — hər tərəf ağappaq idi. Sözün düzü, düşünürdük ki, yəqin, havaların kəskin dəyişməsi, güclü külək və qar işin ahəngini pozar, işığın, qazın, suyun verilməsində müəyən çətinliklər yaranar. Ancaq belə olmadı. Həyat həmişəki axarı ilə davam edirdi, adamlar gündəlik qayğıları ilə yaşayırdı: işə tələsən də vardı, təbiətin bu ağ dünyasına heyranlıqla tamaşa edən də.

Murovdan soyuq dağ küləyi əsirdi. Ancaq üşüyən təkcə əllərimiz, üz-gözümüz oldu. İsti, rahat, gözəl şəhər bizi mehriban ana kimi öz sinəsinə sıxdı...

Ziyəddin SULTANOV

Xalq qəzeti.-2009.- 6 yanvar.- S.6.