İndoneziyada yüzlərlə adam sulara qərq oldu

Ötən gün İndoneziyanın Sulavesi adası yaxınlığında bərə batıb. Hadisə baş verən zaman bərədə 250 adamın olduğu bildirilib. Yüzlərlə sərnişin itkin hesab olunur.

Bu arada xarici informasiya agentliklərinin verdiyi ən son məlumatlara görə artıq 19 nəfər xilas edilib. Xilas edilənlər arasında bərənin kapitanının da olduğu vurğulanır.

Yerli hakimiyyət orqanları hadisənin hansı səbəbdən baş verdiyi barədə heç bir məlumat verməyib. Lakin ilkin ehtimallara görə gəmi-bərənin qəzaya uğramasına onun həddindən artıq yüklənilməsi səbəb olub. Belə ki, adıçəkilən bərə maksimum iki yüz sərnişin daşımaq üçün nəzərdə tutulsa da ona azı iki yüz əllidən çox adam minib.

Qeyd edək ki, gəmi — bərə Cənubi Sulavesi əyalətinin Perepare limanından Şimali Kalimantandakı Samarinda şəhərinə hərəkət edirmiş. Lakin gəmi-bərə bir neçə saatdan sonra radarlardan itib. Deyilənlərə görə buna həmin vaxt dənizdə güclü fırtınanın baş verməsi səbəb olub. Xilas edilən kapitan da qəzanın pis hava şəraiti ucbatından baş verdiyini qeyd edib.

Məlumat üçün deyək ki, İndoneziya sularında oxşar qəzalar tez-tez müşahidə olunur. Məsələn, təkcə 2007-ci ilin oktyabrında həmin Sulavesi adası yaxınlığında sərnişin bərəsinin qəzaya uğraması 29 nəfərin həyatına son qoymuşdu. Daha sonra həmin ilin fevralında gəmi-bərənin yanması nəticəsində 17 nəfər həlak olmuşdu.

Ümumiyyətlə, bərə İndoneziyada fəaliyyət göstərən ən iri nəqliyyat sistemidir. Bərə bu ölkədə ən ucuz nəqliyyat vasitəsi hesab olunur. Belə ki, bərə ilə hərəkət etmək daha sərfəlidir, nəinki təyyarə ilə. Lakin təəssüf ki, bərələrin bir çoxu istismar müddətini başa vursa da onlardan hələ də istifadə olunmaqdadır. Həmçinin bərələrin nəzərdə tutulduğundan xeyli artıq yüklənilməsi qəzaların baş verməsini qaçılmaz edir.

Xatırladaq ki, İndoneziyada ən çox insan tələfatı ilə nəticələnən gəmi qəzası 2000-ci ilin iyununda baş vermişdi. Həmin vaxt gəmi-bərənin sulara qərq olması nəticəsində beş yüzə yaxın adam həyatını itirmişdi. Yalnız cəmi on nəfər sağ qalmağı bacarmışdı.

Mahmud QƏZƏNFƏROĞLU

Xalq qəzeti.-2009.-13 yanvar.-S.6.