“Freedom House” qərəzli mövqeyindən əl çəkə bilmir

Yaxud qeyri-obyektiv təşkilatın qeyri-ciddi hesabatı

Özünü beynəlxalq aləmdə qeyri-ciddi qeyri-hökumət təşkilatı kimi tanıtmış “Freedom House” təşkilatı sərgilədiyi fəaliyyətlə ən azı adını doğrultmalı idi — “Azadlıq evi”. Çox təəssüf ki, doğrulda bilmir. Çünki qərəzçilikdən, qeyri-obyektivlikdən əl çəkə bilmir.

Bu təşkilatın 2008-ci il üçün hazırladığı (bu il yanvarın 13-də yayılmış) hesabatının beynəlxalq aləmdə yaratdığı reaksiya barədə aşağıda söhbət açacağıq. Əvvəlcə Azərbaycan Respublikasının Prezidenti İlham Əliyevin ötən ilin noyabrında İtaliyaya səfəri çərçivəsində “RAİ İnternational” telekanalına verdiyi müsahibədən bir məqama diqqət yönəldək:

Müxbir: — İqtisadiyyat artmaqdadır, lakin “Freedom House” təşkilatı bildirir ki, demokratiya inkişaf etmir.

Azərbaycan Prezidenti: — Bilirsiniz, “Freedom House” kimi təşkilatlar obyektiv deyildir. Onlar Azərbaycanı olduğu kimi yox, fərqli təqdim etməyə çalışırlar. Şəxsən mənim üçün fəaliyyətimizin ən vacib qiyməti beynəlxalq təşkilatların verdiyi qiymətdir. “Freedom House” özünün gündəliyi, siyasi maraqları olan bir qeyri-hökumət təşkilatıdır. Onların Azərbaycanda bəzi müxalifət nümayəndələri arasında dostları da var. Buna görə də onların Azərbaycan haqqında dedikləri düzgün hesab edilə bilməz.

Bu yaxınlarda bizdə prezident seçkilərini izləyən ATƏT-in və Avropa Şurasının qiymətləndirmələri — vacib olan budur... Bu il Dünya Bankı “Douing Business” proqramı üzrə Azərbaycanı dünyanın bir nömrəli islahatçı ölkəsi elan etmişdir. Ötən il BMT Dövlət Neft Fondunu şəffaflığa görə mükafatla təltif etmişdir. Beləliklə, qeyri-demokratik cəmiyyətdə bu, mümkün olmazdı. Qeyri-demokratik cəmiyyət Dünya Bankı tərəfindən bir nömrəli islahatçı ölkə elan edilə bilməz. Dünya Bankı dünyanın ən iri maliyyə təsisatıdır. ATƏT, Avropa Şurası, Avropa İttifaqı — bunlar ciddi təşkilatlardır. Beləliklə, “Freedom House” və ona bənzər təşkilatlar bu qurumlarla müqayisə edilə bilməz".

Fikrimizcə, dövlət başçımızın İtaliya telekanalı ilə bütün dünyaya yayılmış müsahibəsindən seçdiyimiz bu əhatəli sitat “Yeni Müsavat” qəzetinin 13 yanvar 2009-cu il tarixli sayında sevincək şəkildə verilmiş “Adımız yenə azad olmayan ölkələr sırasına düşdü” informasiyasına (hesabata birinci münasibət) ən layiqli cavabdır. Müxalifətçiliyi özünə iş, peşə hesab edənlərə üt tutub deyirəm ki, sevinməyin. Biz sizinlə əməkdaşlıq edən və sizin məlumatlarınız əsasında “hesabat” hazırlayan qeyri-ciddi təşkilatları yaxşı tanıdığımıza görə belə məqamlara o qədər də reaksiya vermək istəmirik.

“Freedom House”nin qeyd edilən “hesabatına” rusiyalı həmkarlarımızın münasibətinə gəlincə isə deyə bilərik ki, onlar da bu hesabatı qeyri-obyektiv adlandırırlar (ikinci münasibət).

“Rosbalt.ru” internet saytı insan hüquqları üzrə Moskva bürosunun direktoru, ictimai palatanın üzvü Aleksandr Broda müraciət edərək məsələyə münasibət bildirməsini xahiş edir. Cavab çox qısadır: ““Freedom House”” təşkilatı hesabatı hazırlayarkən qeyri-obyektiv məlumatlara istinad edir. Həmin məlumatları isə özlərinin ənənəvi mənbələrindən alırlar" (“Rosbalt.ru" internet saytı, 14 yanvar, 2008-ci il).

Azərbaycana və Rusiyaya nisbətən “qismən azad ölkə” adlandırılmış Ermənistanda da “Freedom House”nin hesabatına münasibət birmənalı deyil. “Reqnum.ru” internet saytı Ermənistanın “qismən azad ölkə” adlandırılmasını istehza ilə qarşılayır: “Xatırladaq ki, 2008-ci ildə Ermənistan üçün ən əlamətdar hadisə fevralın 19-da keçirilmiş prezident seçkisi oldu. Xalqın iradəsini əks etdirməyən bu seçkinin nəticələrinə etiraz edənlərdən 29 nəfəri öldürüldü, 200 nəfəri yaralandı və çoxlu həbslər başlandı” (üçüncü münasibət).

Sıravi ermənilər “Freedom House”nin bu hesabatını “Sarkisyan iqtidarının pulla yazdırdığı hesabat” adlandıraraq ələ salırlar.

Çox təəssüf ki, öz dövləti haqqında qeyri-obyektiv münasibəti pis qarşılayan ermənilərdən fərqli olaraq bizim “Turan” informasiya agentliyimiz Azərbaycan haqqında yazılan qərəzli və böhtan xarakterli fikirlərdən ləzzət alır: “Azərbaycan beynəlxalq ictimaiyyətdən növbəti sillə alıb”. Beş-on nəfər qərəzli və məqsədli adamın hazırladığı “hesabatı” beynəlxalq ictimaiyyətin rəyi adlandırmaq ən azı ədalətsizlikdir.

İttifaq MİRZƏBƏYLİ

Xalq qəzeti.-2009.- 15 yanvar.- S.4.