Prezident İlham ƏLİYEV: Azərbaycan dünya miqyasında öz müsbət imicini daha da gücləndirir

Yanvarın 16-da Prezident Sarayında 2008-ci ilin yekunlarına həsr edilmiş iclası keçirildi. İclasda ötən ilin sosial-iqtisadi inkişafının yekunları müzakirə edildi və 2009-cu ildə görüləcək işlər haqqında fikir mübadiləsi aparıldı. Ölkə Prezidenti İlham Əliyev 2008-ci ildə Azərbaycan iqtisadiyyatının yüksək sürətlə inkişaf etdiyini bildirdi. Göstərdi ki, əsası ümummilli liderimiz Heydər Əliyev tərəfindən qoyulmuş sosial-iqtisadi islahatların uğurla davam etdirilməsi Azərbaycanın dünyanın inkişaf etməkdə olan ölkələri sırasında mövqeyini getdikcə möhkəmləndirir. Bu gün Azərbaycan həyata keçirilən məqsədyönlü və çevik islahatlar nəticəsində yeni və daha sürətli inkişaf mərhələsini yaşayır.

Dövlət başçısı çıxışında vurğulamışdır ki, 2008-ci il dünya tarixində maliyyə və iqtisadi böhran ili kimi qalacaqdır. Azərbaycan üçün isə 2008-ci il növbəti uğurlu il olmuşdur. 2008-ci ildə nəzərdə tutulmuş bütün proqramlar uğurla icra edilmişdir. Azərbaycan iqtisadiyyatı yüksək sürətlə inkişafını davam etdirmiş və ölkədə infrastruktur və digər layihələr vaxtlı-vaxtında icra olunmuşdur.

Prezident ötən ilin yekunlarına toxunarkən bir məqamı xüsusi diqqətə çatdırmışdır: “...2008-ci ilin yekunlarına görə Azərbaycanda yoxsulluğun səviyyəsi daha da aşağı düşübdür. Bu gün Azərbaycanda yoxsulluğun səviyyəsi 13,2 faiz təşkil edir. Bu, çox böyük nailiyyətdir. Nəzərə alsaq ki, 2003-cü ildə yoxsulluğun səviyyəsi 49 faiz idi, bu, 13,2 faiz böyük nailiyyətdir. Bu, bir daha onu göstərir ki, ölkədə aparılan əsaslı, köklü iqtisadi islahatlar həm ölkənin iqtisadi potensialının möhkəmlənməsinə yönəldilib, eyni zamanda və ilk növbədə, insanların rifah halının yaxşılaşmasında özünü göstərir”.

Dövlət başçısı nitqində sosial siyasətin bu il də uğurla davam etdiriləcəyini əminliklə bildirmişdir. Göstərmişdir ki, ötən il minimum əməkhaqqı və minimum pensiyaların baza həddi 50 faiz artırılmışdır və indi Azərbaycanda orta əməkhaqqı 335 dollar, orta pensiya 120 dollar səviyyəsindədir. Bu, yaxşı göstəricidir. Ancaq, əlbəttə ki, növbəti illərdə bizim iqtisadiyyatımız artdıqca, bütün sosial məsələlər daha da uğurla icra olunacaqdır.

Prezident İlham Əliyev regionların sosial-iqtisadi inkişafı məsələsinə də münasibət bildirmişdir. Dövlət başçısı demişdir: “... Regionların sosial-iqtisadi inkişafı Dövlət Proqramı uğurla başa çatıbdır. 2004-cü ilin əvvəlində qəbul edilmiş proqram tam şəkildə yerinə yetirilib və proqrama o vaxt nəzərdə tutulmamış bir çox məsələ əlavə olunub və uğurla icra edilibdir. Proqramın icrası nəticəsində ölkə iqtisadiyyatı şaxələndirilib, bütün bölgələrdə infrastruktur layihələri həyata keçirilib, iş yerləri açılıbdır, yeni müəssisələr fəaliyyətə başlayıbdır. Son beş ildə 766 min yeni iş yeri açılıb ki, bunların 548 mini daimidir. 2008-ci ildə 120 mindən çox yeni iş yeri açılmışdır”.

Azərbaycan Prezidenti İlham Əliyev nitqində dünya maliyyə böhranına da toxunmuşdur. Göstərmişdir ki, dünyada mövcud olan maliyyə və iqtisadi böhrana, neftin qiymətinin 4-5 dəfə aşağı düşməsinə baxmayaraq, 2009-cu ilin dövlət büdcəsi 2008-ci ilə nisbətən həcm baxımından daha da böyükdür. Dövlət büdcəsinin xərcləri 15,4 milyard dollar, icmal büdcə isə 18,4 milyard dollar təşkil edir. Bu büdcə bizə imkan verəcək ki, 2009-cu ildə bütün sosial məsələlər öz həllini tapsın, infrastruktur layihələri uğurla davam etdirilsin və ölkə üçün lazım olan tədbirlər görülsün.

Dövlət başçısı Azərbaycanın enerji təhlükəsizliyindən danışarkən diqqəti maraqlı bir məqama yönəltmişdir: “... Biz enerji siyasətimizdən məharətlə istifadə edib daha da çox dostlar qazanırıq. Azərbaycanın enerji siyasəti əməkdaşlığa, dostluğa yönəldilibdir, bölgədə regional əməkdaşlığın güclənməsinə yönəldilibdir. Budur, bizim yanaşmamız, bizim siyasətimiz və geniş mənada enerji fəlsəfəmiz...”

İclasda ötən ilin sosial-iqtisadi yekunları ilə bağlı digər göstəricələrə də diqqət yetirilmişdir. Bildirilmişdir ki, 2008-ci ildə dövlət büdcəsinin mədaxil proqnozu 10 milyard 484 milyon manata qarşı 10 milyard 763 milyon manat və ya 102,7 faiz icra olunmuşdur. Bu da 2007-ci ilə nisbətən 4 milyard 756 milyon manat və ya 79,2 faiz çoxdur.

Ötən il sosialyönümlü tədbirlər üzrə xərclərin maliyyələşdirilməsi diqqətdə olmuşdur. Bu məqsəd üçün 2 milyard 312 milyon manat vəsait sərf edilmişdir ki, bu da 2007-ci illə müqayisədə 642 milyon manat və ya 38,4 faiz çoxdur.

2009-cu ildə Azərbaycanın enerji təhlükəsizliyinin və regionların elektrik enerjisinə, habelə qaza olan tələbatını təmin etmək məqsədilə 312 milyon manat, o cümlədən Səngəçalda gücü 300 MVT olan modul tipli elektrik stansiyasının tikintisinə 262,8 milyon manat, paylayıcı elektrik şəbəkələrinin yenidən qurulmasına 120 milyon manat vəsait sərf edilmişdir. Eyni zamanda ölkənin hər bir regionuna qaz çatdırılması barədə ölkə Prezidentinin tapşırığı icra olunaraq, regionların qazlaşdırılmasına 82,1 milyon manat vəsait yönəldilmişdir.

İclasda bildirilmişdir ki, bu gün dünyada dərinləşən maliyyə böhranının təsiri nəticəsində hətta bir çox aparıcı ölkələrin iqtisadiyyatında yaranan durğunluğa baxmayaraq, Azərbaycan iqtisadiyyatı inkişaf etməkdədir. Dünya iqtisadiyyatı 2003-cü illə müqayisədə ümumilikdə 25,4 faiz, o cümlədən ABŞ-da 13,3 faiz, Avropa İttifaqında 13,7 faiz, MDB ölkələrində 45,4 faiz, Çində 66,5 faiz artdığı halda, Azərbaycan iqtisadiyyatı 2,6 dəfə artmışdır. 2008-ci ildə ÜDM-in real həcmi 2003-cü illə müqayisədə 2,6 dəfə artaraq, 38 milyard manat olmuş, o cümlədən qeyri-neft sektoru 1,8 dəfə, neft sektoru isə 4,1 dəfə artmışdır.

ÜDM-də özəl sektorun payı 2008-ci ildə 84,5 faiz təşkil etmişdir. İl ərzində ÜDM-in real artımı 10,8 faiz, o cümlədən neft sektoru üzrə 7 faiz, qeyri-neft sektoru üzrə isə 15,7 faiz olmuşdur. ÜDM-in adambaşına düşən nominal həcmi 2003-cü ilə nisbətən 5 dəfə artaraq, 4.440 manat təşkil etmişdir.

Beynəlxalq Valyuta Fondunun və Dünya Bankının hesabatlarında Azərbaycanda həyata keçirilən sistemli iqtisadi islahatlar və 2009-cu il üçün ölkəmizin iqtisadi inkişaf perspektivləri, hazırlanmış büdcə sənədləri, dünya maliyyə böhranının ölkə iqtisadiyyatına təsirinin qarşısının alınması ilə bağlı görülən tədbirlər müsbət qiymətləndirilmişdir.

İclasda 2009-cu ildə qarşıda duran vəzifələrə də toxunulmuş, əsas diqqətin Azərbaycanın dünya iqtisadi, maliyyə böhranı ilə üzləşməməsinə yönəldilməsinin zəruriliyi göstərilmişdir. Bu barədə Prezident İlham Əliyev demişdir: “... Əminəm ki, Azərbaycan bu böhrandan daha da güclü çıxacaqdır. Yəni, bu, bizi daha da səfərbər edəcəkdir. Biz həm maliyyə intizamının, həm istehlak bazarına nəzarətin gücləndirilməsi, həm də strateji istehsal sahələrinin sağlamlaşdırılması ilə daha da güclü olmalıyıq. Bütün bu görüləcək tədbirlər böhran başa çatandan sonra da Azərbaycan iqtisadiyyatına ancaq müsbət təsir göstərəcəkdir”.

Vaqif BAYRAMOV

Xalq qəzeti.-2009.-18 yanvar.-S.1.