Keşlə qəsəbəsində hesabat yığıncağı keçirilmişdir

Yola saldığımız 2008-ci il Azərbaycan üçün sürətli inkişaf və tərəqqi dövrü olmuşdur. Məhz ötən il ölkəmizdə bir sıra iri infrastruktur layihələri reallaşdırılmış, Azərbaycanın iqtisadi qüdrəti və beynəlxalq nüfuzu xeyli artmışdır. Ölkəmizin regional, tarazlı inkişafı istiqamətində görülmüş işlər nəticəsində şəhər, qəsəbə və kəndlərimizin siması daha da dəyişmiş, gözəlləşmişdir. Yanvarın 16-da Nazirlər Kabinetinin 2008-ci ildə sosial-iqtisadi inkişafın yekunlarına və qarşıda duran vəzifələrə həsr olunmuş iclasında ölkə Prezidenti cənab İlham Əliyev Azərbaycanın son illər qazandığı uğurları yüksək qiymətləndirmiş, dinamik inkişafın daha da sürətləndirilməsi üçün qarşıya yeni vəzifələr qoymuşdur. Hazırda ölkənin hər yerində 2008-ci ilə yekun vurulur, dövlət başçısının məlum iclasda verdiyi tövsiyə və tapşırıqlar əsl fəaliyyət proqramı kimi qəbul edilərək növbəti — 2009-cu ildə görüləcək işlərin konkret istiqamətləri müəyyənləşdirilir...

Dünən Nizami rayonunun Keşlə qəsəbəsində 2008-ci ilin yekunlarına dair keçirilmiş hesabat yığıncağında da bu barədə geniş danışıldı, görülmüş işlərə qiymət verildi, qarşıda duran vəzifələr müzakirə olundu. Tədbiri giriş sözü ilə açan Nizami Rayon İcra Hakimiyyətinin başçısı Mehbalı Əliyev bildirdi ki, ümummilli lider Heydər Əliyevin müəyyənləşdirdiyi mühüm inkişaf strategiyasının, əsaslı islahatlar kursunun hazırda ölkə Prezidenti cənab İlham Əliyev tərəfindən uğurla davam etdirilməsi Azərbaycanı dünyanın inkişaf etmiş dövlətləri sırasına çıxarmış, regionda lider dövlətə çevirmişdir. Qeyd olundu ki, ölkədə həyata keçirilən məqsədyönlü inkişaf strategiyası nəticəsində dövlətimizin iqtisadi qüdrəti xeyli artmış, gələcək uğurlarımızın təməli qoyulmuşdur. Ötən il bütün ölkədə olduğu kimi, paytaxtın Nizami rayonunda da uğurlu nəticələr əldə edildiyini, sosial-iqtisadi inkişaf səviyyəsinin orta respublika göstəricisindən xeyli yüksək olduğunu vurğulayan M.Əliyev qazanılmış bütün bu nailiyyətləri Prezident İlham Əliyevin ölkədə həyata keçirdiyi islahatların məntiqi nəticəsi kimi dəyərləndirdi. Natiq Nizami rayonunun, eləcə də paytaxtın ən iri yaşayış sahələrindən olan Keşlədə də son illər mühüm işlərin görüldüyünü və qəsəbənin simasının əsaslı şəkildə yaxşılaşdığını, eləcə də sakinlərin üzləşdikləri problemlərin xeyli hissəsinin aradan qaldırıldığını diqqətə çatdırdı.

Nizami Rayon İcra Hakimiyyəti başçısının Keşlə qəsəbəsi üzrə nümayəndəsi Vidadi Bayramov 2008-ci ildə görülmüş işlər barədə geniş hesabat məruzəsi ilə çıxış etdi. Natiq bildirdi ki, ölkə Prezidenti cənab İlham Əliyevin rəhbərliyi ilə həyata keçirilən sosial-iqtisadi islahatların uğurlu nəticələri abadlıq-quruculuq işlərinin geniş vüsət almasına səbəb olmuşdur. Dövlət başçısının regionlarda həyata keçirdiyi görüşlər zamanı ölkə əhalisinin sosial vəziyyətinin daha da yaxşılaşdırılması, iqtisadiyyatın inkişaf etdirilməsi, elm, təhsil, səhiyyə, mədəniyyət və digər sahələrdə inkişafın təmin olunmasına dair verdiyi tövsiyə və tapşırıqlar yerlərdə əsl fəaliyyət proqramına çevrilmişdir. Qeyd olundu ki, Prezident İlham Əliyevin imzaladığı mühüm fərman və sərəncamlardan irəli gələn vəzifələrin həlli istiqamətində həyata keçirilən tədbirlər ölkəmizin sosial-iqtisadi inkişafının xeyli sürətlənməsinə, əhalinin güzəranının əhəmiyyətli dərəcədə yaxşılaşmasına səbəb olmuşdur.

Qəsəbə icra nümayəndəsi dövlət başçısının məlum sərəncamı ilə təsdiq edilmiş “Bakı şəhərinin qəsəbələrinin sosial-iqtisadi inkişafının sürətlənməsinə dair Dövlət Proqramı”nda Nizami rayonunun Keşlə qəsəbəsi üzrə nəzərdə tutulmuş tədbirlərin 2008-ci ildə uğurla reallaşdırıldığını diqqətə çatdırdı. Bildirdi ki, ötən il proqram çərçivəsində qəsəbədə 4600 nömrə tutumu olan ATS və yeni poçt binası tikilib istifadəyə verilmiş, rayonun hər yerində olduğu kimi, Keşlədə də abadlıq-quruculuq işləri davam etdirilmişdir. Qeyd edildi ki, yola saldığımız 2008-ci ildə poçt və rabitə müəssisələri tərəfindən əhaliyə 18 min manatlıq xidmət göstərilmişdir ki, bu da əvvəlki ilə nisbətən üç dəfə çoxdur.

V.Bayramov son illər qəsəbədə Dövlət Proqramına əsasən, eləcə də Heydər Əliyev Fondunun təşəbbüsü ilə yeni məktəblərin tikintisi, tədris müəssisələrinin maddi-texniki bazasının yaxşılaşdırılması və informasiya-kommunikasiya texnologiyaları ilə təminatı sahəsində mühüm işlər görüldüyünü diqqətə çatdırdı. Qeyd olundu ki, qəsəbədəki 201 saylı orta məktəb üçün 640 şagird yerlik yeni korpus və Avropa standartlarına uyğun stadion, 227 saylı orta məktəb üçün isə 200 şagird yerlik yeni korpus, Heydər Əliyev prospektində isə 1296 şagird yerlik yeni məktəb binası tikilib istifadəyə verilmişdir. Qəsəbə nümayəndəsi onu da qeyd etdi ki, Dövlət Proqramına uyğun olaraq Keşlədəki 32 saylı Birləşmiş Şəhər Xəstəxanası əsaslı təmir edilmiş, dünya standartlarına uyğun müasir avadanlıqlarla təmin edilmiş, buradakı uşaq poliklinikası bərpa edilərək sakinlərin istifadəsinə verilmişdir.

Keşlənin “mavi yanacaq”la təchizatının yaxşılaşdırılması ilə bağlı görülmüş işlərdən bəhs edən V.Bayramov bildirdi ki, ötən il 201 saylı orta məktəbə, qəsəbə nümayəndələrinin yeni inzibati binasına və “Xeyir-şər” evinə, eləcə də M.Abdullayev, Maarif, K.Əfkari, M.Ağayev, P.Fərzəliyev və digər küçələrinə yeni qaz xətləri çəkilmiş, müasir siyirtmə və şkaflar istifadəyə verilmiş, bir sıra təmir-bərpa işləri aparılmışdır. 2008-ci ildə istehlakçılara verilmiş qazın haqqı tam yığılmışdır. Son zamanlar rayon icra hakimiyyəti rəhbərliyinin köməyi və qayğısı nəticəsində qəsəbənin elektrik enerjisi ilə təminatı da normal vəziyyətə gətirilmiş, ayrı-ayrı yerlərdə yeni transformator məntəqələri quraşdırılmış, hava xətləri dəyişdirilmiş və ya təmir olunmuşdur.

Məruzəçi qəsəbənin içməli su ilə təchizatının əsaslı şəkildə yaxşılaşdırılması və kanalizasiya şəbəkəsinin işinin yenidən qurulması istiqamətində də mühüm tədbirlərin həyata keçirildiyini, eləcə də məişət tullantılarının vaxtlı-vaxtında daşınmasının təmin olunduğunu da diqqətə çatdırdı. Qəsəbədəki yolların təmiri istiqamətində xeyli iş görüldüyünü bildirən V. Bayramov dedi ki, ötən il rayonun daxili imkanları hesabına A.Mirzəyev, M.Ağayev, N.Abdullayev, K.Əfkari, Yenikənd, İ.Həbibov, Y.Səfərov, I və II Köndələn küçələrinə ümumilikdə 50 min kvadratmetr asfalt örtüyü salınmışdır. Qeyd olundu ki, abadlıq-quruculuq və təmizlik işlərini daim diqqət mərkəzində saxlayan Nizami Rayon İcra Hakimiyyətinin başçısı Mehbalı Əliyevin yaxından köməyi ilə bütün bu işlərin görülməsi üçün lazımi texnika, maşın və mexanizmlər alınmışdır.

2008-ci ildə qəsəbə nümayəndəliyi üçün yeni üçmərtəbəli inzibati bina tikilib istifadəyə verilmiş, qəsəbə nümayəndəliyinin nəzdində təsərrüfat hesablı sahə yaradılmışdır. Yeni qurum qısa müddətdə məişət tullantılarının vaxtında daşınması, həmçinin əhalidən və kommersiya obyektlərindən göstərilən xidmətə görə pul vəsaitlərinin yığılması sahəsində böyük uğurlara imza atmışdır.

Natiq ölkə Prezidenti İlham Əliyevin yeni iş yerlərinin yaradılması ilə bağlı qarşıya qoyduğu vəzifənin yerinə yetirilməsi üçün Keşlədə məqsədyönlü tədbirlərin həyata keçirildiyini, 2008-ci ildə qəsəbədə fəaliyyət göstərən istehsal və xidmət sahələrində 966 nəfərin işlə təmin olunduğunu bildirdi. V.Bayramov qəsəbənin abadlaşdırılması, sakinlərin üzləşdikləri problemlərin vaxtında aradan qaldırılması istiqamətində görülən işlərə görə keşləlilərin minnətdarlığını rayon rəhbərliyinə çatdırdı.

Məruzə ətrafında çıxış edən 201 saylı məktəbin direktoru Süsən Salmanova, NZS yaşayış sahəsindəki 11 saylı Birləşmiş Şəhər Xəstəxanasının baş həkimi Katib Məmmədov, Keşlə bələdiyyəsi sədrinin müavini Ələmdar Bafadarov və qəsəbə məscidinin axundu Hacı Əbdülhəsən Prezident İlham Əliyevin rəhbərliyi ilə ölkədə həyata keçirilən geniş miqyaslı abadlıq-quruculuq işlərindən, sakinlərin rifah halının yaxşılaşdırılması istiqamətində görülmüş işlərdən razılıqla söhbət açdılar. Belə bir fikir ifadə olundu ki, keşləlilər ötənilki Prezident seçkilərində böyük seçici fəallığı göstərərək Heydər Əliyev siyasi kursuna səs verdikləri kimi, martın 18-də keçiriləcək referendumda da yekdilliklə iştirak edəcəklər.

Tədbirə yekun vuran Nizami Rayon İcra Hakimiyyətinin başçısı M.Əliyev 2008-ci ildə Keşlə qəsəbəsində görülmüş işləri qənaətbəxş hesab etməklə yanaşı, burada həlli vacib probelmlərin də olduğunu önə çəkdi. Bütün problemlərin hesabat yığıncağının qərar layihəsində əks olunduğunu və onların aradan qaldırılması üçün imkanların səfərbər ediləcəyini bildirdi.

Mirbağır YAQUBZADƏ

Xalq qəzeti.-2009.-24 yanvar.-S.6.