Avropa dəhşətli qasırğanın nəticələrini aradan qaldırır

Fransanın cənub-şərqində və İspaniyanın şimalında yerli hakimiyyət orqanları yanvarın 24-də Atlantik okeanı sahillərindən Korsikaya qədər böyük bir ərazini əhatə etmiş güclü qasırğa nəticəsində dağılmış yolların, binaların və elektrik xətlərinin təmirinə başlayıb.

Mütəxəssislərin sözlərinə görə, bu, son bir neçə onillik ərzində regionda baş vermiş ən dəhşətli təbii fəlakətdir. Küləyin sürəti saniyədə 54 metr olub. Qərb mətbuatının verdiyi məlumata görə, fəlakət nəticəsində həlak olanların sayı 24 nəfərə çatıb. Onlardan 4-ü Barselona yaxınlığındakı Sant-Boy-de-Lobreqat şəhərindəki idman zalının damının uçması zamanı həlak olan uşaqlardır.

Şəhər meri artıq baş vermiş insan itkisi ilə əlaqədar üç günlük matəm elan edib. Onun sözlərinə görə, qəfil fəlakət bütün şəhər sakinlərini şoka salıb. İspaniyanın baş naziri Xose Luis Sanatero ölənlərin ailələrinə başsağlığı verib. Mer bildirib ki, uşaqlar idman zalına beysbol oynamaq üçün toplaşıblar. Lakin qəfil yağış və güclü külək onları tamaşaçı salonunun damı altında gizlənməyə məcbur edib. Bu zaman külək damı və divarın bir hissəsini uşaqların üstünə aşırıb.

Qasırğa Aralıq dənizinin şərqinə, İtaliyaya tərəf çəkildikdən sonra Fransa və İspaniyanın təmir briqadaları elektrik xətləri, telefon şəbəkələri və dəmir yollarının bərpasına başlayıb. Dəymiş zərərin və dağılmış xətlərin dəqiq mənzərəsini müəyyən etmək üçün 12 vertolyot cəlb edilib.

Fəlakətin böyüklüyünü nəzərə alaraq Almaniya, İngiltərə və Portuqaliya da fransız və ispan təmirçilərinə kömək göndərib. Min nəfərdən çox təmirçinin çalışmasına baxmayaraq, Paris və Tuluza arasında dəmiryol əlaqəsini bərpa etmək mümkün olmayıb. Bir çox digər istiqamətlərdə də qatarların hərəkəti dayandırılıb. Fransa hökuməti sərnişinləri dəmir yolu xidmətindən imtina etməyə çağırıb və bir çox reyslərə əlavə avtobuslar göndərib. Fransanın cənubundakı Landa və Jironda departamentlərindəki meşələrdə külək ağacları kökündən çıxarıb. Bazar günü axşam ölkə başçısı Nikolya Sarkozi fəlakət zonasına gəlib.

İspaniyanın elektrik kompaniyası isə bildirib ki, ölkənin şimalında 17 magistral elektrik xətti tamamilə sıradan çıxıb. Qalisiya və Kataloniyada on minlərlə insan işıqsız qalıb. İspaniya — Fransa sərhədindən keçən marşrutlar istisna olmaqla digər istiqamətlərdə qatarların və təyyarələrin hərəkəti bərpa edilib. Bir çox sahələrdə, eləcə də Bendorm kurort şəhəri yaxınlığındakı Alikante əyalətində bərpa işlərinə ordu hissələri cəlb edilib. İşıq dirəklərinin aşması nəticəsində baş vermiş meşə yanğınları ilə mübarizədə də onların gücündən istifadə olunub.

İtaliyada güclü yağışlardan sonra baş vermiş torpaq sürüşməsi nəticəsində isə 3 nəfər həlak olub.

Paşa ƏMİRCANOV

Xalq qəzeti.-2009.-27 yanvar.-S.6.