Ölkənin sosial-iqtisadi inkişafı milli təhsilimizin tərəqqisinə yeni stimul yaradır

Nailə RZAQULİYEVA: Dövlət başçısının “Biz 2009-cu ili planlaşdırdığımız kimi başa vurmalıyıq” çağırışı paytaxt məktəblərinin fəaliyyət devizinə çevrilib

Azərbaycan Respublikasının Prezidenti İlham Əliyevin sədrliyi ilə Nazirlər Kabinetinin 2008-ci ildə sosial-iqtisadi inkişafın yekunlarına həsr olunmuş iclasında səsləndirilən faktları və rəqəmləri, demək olar ki, dünyanın hər yerində hamı eşitdi. Dostlarımıza da, bədxahlarımıza da məlum oldu ki, dünya tarixində maliyyə və iqtisadi böhran ili kimi qalacaq 2008-ci il respublikamız üçün növbəti uğurlu il olmuşdur. İclasın materialları ilə tanış olarkən dərhal müqayisə aparılmalı iki məqam yada düşür. Belə ki, yeni əsrin ilk günlərində — ulu öndər Heydər Əliyev müstəqil Azərbaycanın Avropa ailəsinə inteqrasiyasını genişləndirmək üçün hərtərəfli islahatlar aparanda xaricdəki və daxildəki bədxahlarımız “tutarlı” bir arqumentlə çıxış edirdilər: “Azərbaycanın sosial-iqtisadi inkişafı ancaq və ancaq neftlə bağlıdır. Qeyri-neft sektoru bu ölkədə heç zaman inkişaf etməyəcəkdir”. Bu gün — 2009-cu ilin əvvəlində isə regionun və postsovet ölkələrinin politoloqları Azərbaycanın neft sektorundan əldə edilən kapitalın qeyri-neft sektorunun inkişafına yönəldilməsini, xüsusən, bu gəlirlərin insan kapitalına çevrilməsindəki təcrübəsini nümunə kimi qəbul edirlər. Yəni, son beş ildə ölkədə həyata keçirilən sosial-iqtisadi tədbirlər respublikamız haqqında olan fikirləri tamamilə dəyişdirib. Nazirlər Kabinetinin bu il yanvarın 16-da keçirilmiş geniş iclasında bu barədə ətraflı danışıldı və əhatəli şəkildə fikirlər söylənildi.

Neft sahəsindən əldə edilən kapitalın qeyri-neft sektorunun inkişafına yönəldilməsinin ən bariz nümunəsi Azərbaycan təhsilinin son beş ildəki inkişafı, bu sahənin əldə etdiyi nailiyyət və uğurlardır. Həmsöhbətimiz, Bakı Şəhəri üzrə Təhsil İdarəsinin müdiri, respublikanın əməkdar müəllimi Nailə Rzaquliyeva da qəzetimizə verdiyi müsahibədə məhz bu məqamlardan söz açdı.

— Nailə xanım, xeyli müddət sırasında olduğunuz və artıq üç ildir rəhbərlik etdiyiniz paytaxt təhsil sistemi ölkənin sosial-iqtisadi inkişafından necə bəhrələnir?

— Gəlin, məsələni bu şəkildə qoymayaq. Təkcə son beş ildə deyil, ümumiyyətlə, ulu öndər Heydər Əliyevin ikinci dəfə siyasi hakimiyyətə qayıtmasından sonra ölkədə həyata keçirilən istənilən tədbir bütövlükdə xalqımızın və dövlətimizin inkişafına xidmət edibdir. Son beş ildə isə bu tendensiya daha geniş miqyas alıb, sosial-iqtisadi inkişaf prosesində daha böyük nailiyyətlərə imza atılıbdır. Məhz ona görə də cəmiyyət həyatının bütün sahələri kimi ölkənin təhsil sistemi də əvvəlki illərə nisbətən daha çox qayğı və diqqət görübdür. Yəni söhbət təkcə bizim sistemin bəhrələnməsindən getmir, bütövlükdə xalqımızın bəhrələnməsindən gedir. O ki qaldı Nazirlər Kabinetinin qeyd etdiyiniz iclasına, mən cənab Prezidentin həmin iclasdakı giriş nitqindən bir sitat gətirmək istəyirəm. Bu sitatı elə sizin qəzetdən oxuyaq: “Sosial sahədə, qeyd etdiyim kimi, 2009-cu ildə də öz siyasətimizi davam etdirəcəyik. Son beş il ərzində bu sahədə çox böyük nailiyyətlər əldə edilibdir. Azərbaycanda təhsil, səhiyyə, mədəniyyət, idman sahəsindəki nailiyyətlər haqqında qürurla danışa bilərik. Bu sahədə sözün əsl mənasında, böyük dönüş yarandı və artıq əldə edilmiş nailiyyətlər əsasında biz növbəti illərdə də bu siyasəti davam etdirməliyik. Yəni son beş il ərzindəki uğurlar, nailiyyətlər növbəti beş il üçün də həm əsasdır, həm də örnəkdir”.

— Siz o sitatı oxuyanda mən diqqət yetirdim, dövlət başçısının qürurla söz açdığı siyahıda ilk sahə təhsil sistemi oldu.

— Sonrakı sahələri necə sıraladıq? Səhiyyə, mədəniyyət, idman. Bilirsinizmi, hər bir fərd–həkim, mədəniyyət işçisi, idman ustası və ya kim olursa-olsun, onun inkişafı üçün təməl 6 yaşından — müəllim qarşısında, məktəbdə oturduğu günlərdən qoyulur. Ona görə də dövlətin təhsil sisteminə daha böyük önəm verməsi tamamilə təbiidir. Sivil ölkələrdə, dünyəvi dövlətlərdə — mən çox şadam ki, bu gün Azərbaycan həmin siyahıda ön yerlərdən birindədir — həmişə belə olub və olacaq.

Yadınızdadırmı, ötən il Dünya Bankı özünün illik hesabatında Azərbaycanı ən islahatçı ölkə adlandırmışdı? Bizim, yəni Azərbaycan təhsil sisteminin — mən bir qədər sonra sırf Bakı Şəhər Təhsil İdarəsi barədə danışacağam, amma bu məqamda söhbət bütövlükdə Azərbaycan təhsil sistemindən gedir — əldə etdiyi bütün nailiyyətlər məhz respublikada həyata keçirilən köklü islahatların nəticəsində mümkün olubdur. Həmin islahatlardan biri də təhsil müəssisələrinin maddi-texniki bazasının əsaslı şəkildə yeniləşdirilməsidir. Cənab Prezident ikinci dəfə dövlət başçısı seçiləndən sonra — ötən il oktyabrın 24-də keçirilən andiçmə mərasimində bu yeniləşməni xatırladaraq demişdi: “Son beş il ərzində Azərbaycanda 1600 yeni məktəb tikilibdir. Yüzlərlə məktəb təmir olunubdur. Bütövlükdə Azərbaycanda 4500 məktəb var. Yararsız vəziyyətdə olan məktəblər sökülüb, onların yerində ən müasir standartlara cavab verən məktəblər tikilibdir. Bütün məktəblərdə kompyuterləşmə prosesi aparılır və bütün məktəblər internetə qoşulur. Əgər beş il əvvəl hər 1000 şagirdə 1 kompyuter düşürdüsə, indi təxminən 30 şagirdə 1 kompyuter düşür. Bax, budur bizim gələcəyimiz”. Ona görə də, öndə adı çəkilməli məqamlar məhz bu şəkildə sıralanır. Bütövlükdə ölkənin inkişaf etdiyinə görə biz həmin uğurları qazana bilirik.

— Nailə xanım, siz Dünya Bankının Azərbaycanı ən islahatçı ölkə adlandırmasını yada saldınız. Elə sizin rəhbərlik etdiyiniz qurumun yaradılması da ölkəmizdə aparılan təhsil islahatlarının nəticəsidir.

— Bəli, belədir. Ancaq bu barədə əvvəlki müsahibələrimizdə söz açdığımıza görə indi daha çox bir məsələni qabartmaq istəyirəm. Ölkədə islahatların aparılmasına start verən və bu prosesi daim diqqət mərkəzində saxlayan liderin demokratik təfəkkürlü, sivil dünya görüşlü olduğuna görə bütün qurumlarda iş prinsipi daha çox demokratik xarakter alır. Bakı Şəhəri üzrə Təhsil İdarəsi də məhz paytaxtın təlim-tərbiyə müəssisələrində demokratik idarəetmənin təkmilləşdirilməsinə xidmət edir.

— Məsələn, bu dediklərinizi həyata keçirmək üçün neyləyirsiniz?

— Əvvəla, əksmərkəzləşdirmə prosesini daha da dərinləşdirdik. Yəni, məktəblərin özünüidarəetməsinə geniş imkan verdik. Bilirsinizmi, təlim, tərbiyə, tədris prosesi özlüyündə elə yaradıcı bir sahədir. Burada tərbiyəçiyə şablon vermək, müəllimin fəaliyyətini çərçivəyə salmaq, direktorların və onün müavinlərinin fəaliyyətini eyni şəkildə qurmaq qətiyyən yolverilməzdir. Bu gün dünyanın ən inkişaf etmiş ölkələrinin təhsil təcrübəsi var. Həmin ölkələrin təhsil sisteminin əldə etdiyi nailiyyətlərin təməlində məhz bu amil — sərbəstlik, müstəqillik, özünüidarəetmə prinsipləri — yəni demokratik idarəetmə meyarları durur. Odur ki, biz paytaxt məktəblərində bu tendensiyanın təməlini qoyduq və müsbət nəticəsini gördük.

İkinci, yeni idarəetmə mexanizmləri tətbiq olunmaqla yanaşı, həm də nəzarət işi gücləndirildi. Unutmaq olmaz ki, bizim cəmiyyət 70 il totalitar rejimdə yaşamış insanlardan ibarətdir. Ona görə də 90-cı illərin əvvəllərində postsovet məkanının hər yerində birdən-birə demokratiya verilmiş insanlar necə xaos və anarxiya yaratmışdılar. Heydər Əliyev kimi siyasətçilər insanlara demokratiya verməklə yanaşı, cəmiyyətin axarına nəzarəti də gücləndirdilər və bu axar düzgün məcraya yönəldildi. Odur ki, biz təhsil müəssisələrində yeni idarəetmə mexanizmlərini tətbiq etməklə yanaşı nəzarət işini də gücləndirdik.

Üçüncü, inkişaf etmiş ölkələrin hamısında hər bir təhsil müəssisəsinin öz nizamnaməsi mövcuddur. Özünü bütün dünyada doğrultmuş bu təcrübənin Bakı məktəblərində də tətbiqi fəaliyyətin düzgün istiqamətləndirilməsinə səbəb oldu. Mövcud nizamnamələrə yenidən baxıldı və əlavələr edildi. Yeni açılan məktəblərin nizamnamələri isə Bakı Şəhəri üzrə Təhsil İdarəsində təsdiq edildi. Bunu söyləyərkən bir məsələni də qeyd etmək zərurəti var. Belə ki, məktəbin kollektivi nizamnamə tərtib edibsə və həmin sənəd təsdiq edilibsə, bu o demək deyil ki, həmin məktəb öz fəaliyyətində tamamilə sərbəst buraxılır. Qətiyyən belə deyil. Əksinə, nizamnamənin təsdiq edilməsi məktəb kollektivlərinin məsuliyyətini daha da artırır. Çünki biz nizamnamənin təsdiq edilməsindən sonra məktəblərin məhz həmin sənəd əsasında fəaliyyət göstərməsinə nəzarət edirik. Qətiyyətlə deyə bilərəm ki, bu nəzarət Azərbaycan dövlətinin, xüsusən milli təhsilimizin yorulmaz təəssübkeşi olan cənab İlham Əliyevin qarşıya qoyduğu əsas məqsədə — təhsilin keyfiyyətinin daha da yaxşılaşdırılmasına xidmət edir.

Dördüncü, məlum məsələdir ki, təhsilin keyfiyyətinin müasir standartlar səviyyəsinə qaldırılmasında məktəblə, müəllimlə, pedaqoji kollektivlə yanaşı valideynlər də mühüm rol oynayırlar. Bu, dünya təhsil təcrübəsində özünü çoxdan sübut etmiş faktdır. Elə ulu öndər Heydər Əliyev də bizim sahə barədə danışarkən məktəbin valideynlərlə daha sıx əlaqədə işləməsi zərurətini dönə-dönə xatırladırdı. Odur ki, biz təhsil müəssisələrinin idarə edilməsində, məktəblərin fəaliyyətinin düzgün istiqamətləndirilməsində valideyn komitələrinin həyata keçirə biləcəyi tədbirlərə böyük önəm verdik. Bu komitələr ənənəvilikdən çıxarılaraq çevik, istənilən məsələyə dərhal və obyektiv münasibət bildirən, reaksiya verən ictimai quruma çevrildi. Üstəlik, Valideyn-Müəllim Assosiasiyaları da yaradıldı (bu qurumların bir çoxu əvvəllər də mövcud olsa da əslində elə bir fəaliyyətləri yox idi) və həmin assosiasiyaların imkanlarını ümumi işin, yəni təhsil və tərbiyə prosesinin təkmilləşdirilməsinə istiqamətləndirə bildik.

Qeyd etdiyim bütün bu yenilikləri reallaşdırmaq, onları səmərəli etmək üçün müxtəlif bölgələr üzrə məktəb rəhbərləri üçün treninqlər təşkil etdik. “İdarəetmə funksiyalarının yeni məzmun və formaları”, “Məktəbdaxili rəhbərlik və nəzarətin səmərəli təşkili”, “Məktəb pedaqoji şurasının funksiyaları və onun işinin təşkili” mövzularında təşkil edilən treninqlər bütün məktəb rəhbərləri tərəfindən maraqla qarşılandı və hamı üçün səmərəli oldu.

— Mütəxəssislər sizin idarənin başqa bir uğurunu da tez-tez yada salırlar. Bu, müəllimlərin və təhsil müəssisələrinin rəhbər kadrlarının işə qəbul edilməsi zamanı tətbiq edilən mexanizmlərin yeniləşdirilməsindən ibarətdir.

— İndi mən və ya idarəmizin məsul işçilərindən hansısa desə ki, paytaxt məktəblərində çalışan bütün pedaqoji kadrlar aydan arı, sudan durudur, yəqin ki, biz səmimi olmarıq, siz də inanmazsınız. Çünki iş olan yerdə nöqsan da olur. Əsas məsələ həmin nöqsanların aşkara çıxarılması və aradan qaldırılmasıdır. Ona görə də biz kadrların keyfiyyət tərkibinin yaxşılaşdırılması, öz işinin öhdəsindən gələ bilməyən, hələ də köhnə metodlarla işləməyə üstünlük verən təhsil müəssisələri rəhbərlərinin gənc, enerjili, savadlı və islahata, yeniliyə meyilliliyi ilə seçilən kadrlarla əvəz olunmasını təmin etdik. Bu əvəzləmələr kor-koranə edilmədi. Elə məktəb rəhbərləri var idi ki, bugünkü islahatlarla, yeniliklərlə ayaqlaşa bilməsə də ötən illərdə kifayət qədər səmərəli pedaqoji xidmətləri olmuşdur. Belə adamları “sən daha pedaqoji işə yaramırsan” — deyə tamamilə kənarlaşdırmaq heç bir ölçü-biçiyə düz gəlməzdi. Ancaq elə kadrlar da var idi ki, onlar mütləq, birbaşa tutduğu vəzifədən kənarlaşdırılmalı idi. Biz bunu Azərbaycan təhsili, paytaxtın pedaqoji sisteminin təəssübkeşliyi naminə etdik.

Bu məqamda bir məsələni də xüsusilə qeyd etmək istərdim. Paytaxtın təhsil müəssisələrində yeniliklərlə ayaqlaşa bilməyən və zamanın tələblərinə cavab verməyən rəhbər kadrlar gələcəkdə də yeniləri ilə əvəzlənəcəkdir. Ona görə də biz artıq iki ildir ki, kadrların daha səmərəli yerləşdirilməsi məqsədiylə “Rəhbər təhsil işçiləri bankı” yaratmışıq. Həmin bankda təhsil işçilərimizin yaşı, təhsili, təcrübəsi, nailiyyətləri, dərs yükü, peşəkarlığı, elmi səviyyəsi, eyni zamanda, kollektivdə və cəmiyyətdə nüfuzu da daxil olmaqla bütün məlumatları cəmləşdirilibdir. İstənilən kadr əvəzlənməsi zamanı həmin banka müraciət etdiyimizə görə məktəblərdə yeni pedaqoji işçilərin qəbulunda yol verilən subyektivliyə və xoşagəlməz hallara son qoyulubdur. Eyni zamanda, adı çəkilən bankın zənginləşdirilməsi istiqamətində də işləri davam etdiririk.

— “Rəhbər təhsil işçiləri bankı”nın təkcə məktəblərin rəhbər işçilərinin təyin edilməsi üçün yaradıldığı barədə fikirlər də səslənir.

— Qətiyyən elə deyil. Söhbət məktəblərdə pedaqoji işçilərin qəbulundan gedirsə, deməli həmin fikir tamamilə yanlışdır. Qeyd edilən bank heç bir əsas olmadan yaradılan süni vakansiyaların qarşısını alır. Məktəbə yeni müəllim götürülərkən öyrənilir ki, bu təhsil müəssisəsində həmin ixtisas üzrə müəllimlərin orta dərs yükü şərti şəkildə qəbul edilmiş 18 saat həddindən azdır, ya çox. Yəni məktəbdə müəllim ola-ola yeni müəllimin götürülməsinin qarşısı alınır. Bu isə nəticədə şəhərin ayrı-ayrı əraziləri üzrə fərqli müəllim sıxlığının aradan qaldırılmasına kömək edir. Çox təəssüf ki, son zamanlara qədər şəhərin müxtəlif rayonlarında bu məsələ bir problem olaraq qalırdı. Bir məktəbdə, tutaq ki, xarici dil müəllimi çatışmır, şəhərin o biri rayonundakı məktəbdə isə xarici dil müəllimləri 5-6 saat dərs yükü ilə işləyir. Biz belə anormallıqların qarşısını aldıq.

— Ondan başqa Bakı məktəblərində ibtidai siniflərdə “yığma saatlarla” işləyən müəllimlər də çox idi.

— Bəli, var idi və indi də var. Biz həmin məsələnin həlli istiqamətində müəyyən addımlar atdıq və bu şəkildə işləyən müəllimlərin sayının xeyli azaldılmasına nail ola bildik. Məsələn, yeni açılan məktəblərə “yığma saatlar” hesabına işləyən müəllimlərin köçürülməsini təmin etdik. Nəticədə bir çox məktəblərimizdə ibtidai sinif müəllimlərinin sıxlığı azaldı, kadr çatışmayan məktəblərin isə nisbətən səriştəli və peşəkar kadrlarla təminatı yaxşılaşdı. Onu da qeyd edim ki, bu üsul təkcə ibtidai sinif müəllimlərinin yerləşdirilməsində yox, həm də digər ixtisas müəllimlərinin də dərslə təminatında tətbiq edilir. Mövcud potensialdan səmərəli istifadəyə üstünlük verməklə lazımsız sıxlığa son qoya biləcəyik. Bu zaman bir təbii amil də bizə kömək edəcəkdir. Belə ki, son 7-8 ildə birinci sinifə gələn uşaqların sayı ya azalır, ya da elə bir artım olmurdu. Yeni dərs ilində isə birincilərin sayı 2006-cı ildəkinə nisbətən 1573 nəfər artıbdır. Bu isə yeni siniflərin açılması nəticəsində, “yığma saatlar” hesabına işləyən müəllimlərin azalması deməkdir. Bundan başqa həm dövlətin, həm də Heydər Əliyev Fondunun xətti ilə inşa edilən məktəblər istifadəyə verildikcə bu problem də öz həllini tapacaqdır. Yeri gəlmişkən, mən bir məsələni də qeyd edim. Nədənsə, siz bu barədə sual vermirsiniz. Bizim fəaliyyət sahəmizin mühüm tərkib hissələrindən biri də məktəbəqədər təhsil müssisələridir. Belə tərbiyə və təhsil müəssisələrinin ixtisaslı kadrlarla təmin edilməsi daha vacib məsələlərdəndir. Yenə də təəssüflə deyirəm ki, həmin müəssisələrə işçi götürülərkən çoxsaylı nöqsanlara yol verilmişdi. İndi həmin nöqsanlar tamamilə aradan qaldırılıb. Qeyri-pedaqoji və qeyri-ixtisas təhsillilərin bu sahəyə işə qəbul edilməsinə birdəfəlik son qoyulub. Əvvəllər işə qəbul edilmiş belə kadrlar isə yenidənhazırlanma təhsilinə cəlb ediliblər.

— Nailə xanım, təbii ki, dövlət başçımız “Biz neft sahəsindən əldə edilən kapitalı insan kapitalına çevirəcəyik” — deyəndə ilk növbədə təhsil sisteminin müasir elmi-texniki nailiyyətlərlə ayaqlaşmasını, sonra isə cəmiyyətin inkişafı üçün gərəkli olan kadrların hazırlanmasını nəzərdə tuturdu.

— Ümumiyyətlə, mən kütləvi informasiya vasitələrinin suallarını cavablandırarkən bu məsələyə xüsusi önəm verirəm. Çünki cənab Prezidentin də dediyi kimi, elə dövlətlər var ki, heç bir təbii sərvəti olmadığı halda, məhz yüksək intellektual səviyyəli kadrlar hesabına çox böyük inkişafa nail olublar. “Bütün inkişafın təməli orta məktəbdə qoyulur”, — deyənlər isə tamamilə haqlıdırlar. Ona görə də Bakı Şəhəri üzrə Təhsil İdarəsinin rəhbərliyi gənc nəslin daha intellektual səviyyədə böyüməsi üçün müvafiq layihələr hazırlamış və reallaşdırmışdır. Yeni pedaqoji texnologiyaların və innovasiyaların pedaqoji prosesə tətbiqi işi təkmilləşdirilmiş, müəllimlərin yaradıcı fəaliyyəti bu səmtə istiqamətləndirilmişdir. İnteraktiv təlim metodu ilə işləyən müəllimlərin qabaqcıl təcrübəsi ümumiləşdirilərək paytaxtın bütün məktəblərində yayılmışdır. Paytaxtın bütün məktəblərində kompyuterləşdirmə işləri başa çatdırılmışdır. Bakı məktəblərinin 23-də internet, 308-də isə lokal şəbəkə fəaliyyət göstərir. Nəsimi rayonundakı 23 nömrəli məktəbdə həyata keçirilən “elektron məktəb” layihəsi uğurla sınaqdan çıxmışdır. Hazırda paytaxtın bütün məktəblərinin internet şəbəkəsinə qoşulması istiqamətində tədbirlər həyata keçirilir. Ancaq tədrisin səmərəliliyini təkcə informasiya-kommunikasiya texnologiyalarının geniş şəkildə tətbiqinin ümidinə buraxmaq da mümkün deyil. Biz hələlik biologiya, fizika, Azərbaycan tarixi və kimya fənnlərini elektron dərsliklər vasitəsilə aparırıq. Ona görə də yazılı dərsliklərə hələ ehtiyac böyükdür və həmin ehtiyacın tamamilə ödənilməsi təhsilin səmərəliliyini və keyfiyyətini artırır.Bütün bu tədbirlərin nəticəsidir ki, son iki ildə Bakı məktəblərinin məzunları arasında ali məktəblərə qəbul olunanların sayı 893 nəfər artmışdır. İki il üçün bu, kiçik göstərici deyil. Ancaq təkcə ali məktəblərə qəbul olan məzunlarımızın sayı deyil, bir çox başqa göstəricilər də kifayət qədər artmışdır. Məsələn, 2006-cı ilin məzunları arasında 600-dən çox bal toplayan abituriyentlər 452 nəfər idisə, 2008-ci ildə bu göstərici 702 nəfər olmuşdur. Bu, bizim müəllimlərimizin və pedaqoji işçilərimizin il boyu davam edən gərgin əməyinin nəticəsidir. Çox şadam ki, dövlət bizim əməyimizi həmişə yüksək qiymətləndirir və öz qayğısını əsirgəmir.

— Elə növbəti sualı da bu istiqamətdə vermək istəyirdik.

— Bəli, məktəbin fəaliyyətini şərtləndirən, bilavasitə təhsilin keyfiyyətinə təsir edən amillərdən biri müəllim əməyinin stimullaşdırılması, qabaqcıl təcrübənin öyrənilərək yayılmasıdır. Azərbaycan Respublikasının Prezidenti cənab İlham Əliyevin sərəncamına uyğun olaraq keçirilən “Ən yaxşı ümumtəhsil məktəbi” və “Ən yaxşı müəllim” müsabiqələrində məktəblərimizin və müəllimlərimizin əldə etdiyi nəticələr ürəkaçan olmuşdur. Belə ki, müəllimlərimizin 42 nəfəri ölkənin 100 ən yaxşı müəllimi, 14 məktəbimiz isə 50 ən yaxşı ümumtəhsil məktəbi sırasına daxil olmuşdur. Bundan başqa, son beş ildə digər sahələrin əməkdaşları kimi pedaqoji işçilərin də sosial problemlərinin həll edilməsi istiqamətində dövlətin həyata keçirdiyi tədbirlər müəllimlərimiz tərəfindən yüksək qiymətləndirilir. Elə bayaq sizin qeyd etdiyiniz tədbirdə — Nazirlər Kabinetinin 16 yanvar tarixli geniş iclasında da qeyd edilmişdir ki, 2008-ci ildə əhalinin rifahının yaxşılaşdırılması, büdcədən maliyyələşən təşkilatlarda çalışan işçilərin əmək haqlarının artırılması üçün ölkə Prezidenti tərəfindən bir sıra sərəncamlar imzalanmışdır. Bu sərəncamlarla elm, təhsil, səhiyyə, mədəniyyət və başqa bir çox sahələrdə çalışanların aylıq əmək haqları orta hesabla 50 faiz artmışdır. Biz bu qayğıdan məmnunuq.

— Nəhayət, sonda demək istədikləriniz...

— Bizim fəaliyyətimizin səmərəli qurulmasına yaradılan imkanlara görə Təhsil Nazirliyinin rəhbərliyinə və paytaxtın icra orqanlarına öz minnətdarlığımızı bildiririk.Oxucularınıza isə Azərbaycanın daha firavan sabahının qurulmasında fəal iştirak arzulayırıq.

— Maraqlı söhbətə görə təşəkkür edirik!

Müsahibəni qələmə aldı:

İttifaq MİRZƏBƏYLİ

Xalq qəzeti.-2009.-28 yanvar.-S.4.