Gəncəli idmançılar növbəti Yay Olimpiya oyunlarına hazırlaşırlar

Gəncə “Təhsil” idman kompleksi 1980-ci ildə ümummilli lider Heydər Əliyevin təşəbbüsü ilə inşa edilib, yeniyetmə və gənc idmançıların istifadəsinə verilib. İlk gündən, demək olar ki, idman həvəskarlarının isti ocağına çevrilib. Qısa müddətdə aydın olub ki, burada Azərbaycan idmanının şərəfini ləyaqətlə qoruyacaq idmançılar yetişir.

Artıq ötən əsrin 90-cı illərində “Təhsil” Respublika İdman Mərkəzi Gəncə filialının yetirmələrinin sorağı dünyanın müxtəlif ölkələrindən gəlirdi. Dünya və Avropa birinciliklərinin qalibləri sırasında bu məktəbin yetirmələri vardı. O zaman idmanın ayrı-ayrı növləri üzrə SSRİ yığma komandaları sırasında gəncəli idmançılar sayılıb-seçilirdilər.

İlk növbədə gözləmək olardı ki, bu inkişaf getdikcə daha böyük sürətlə gedəcək, məktəb öz şöhrətini artıracaq. Amma ötən əsrin sonunda baş verən hadisələr bu məktəbdən də yan keçmədi, onun fəaliyyətini zəiflətdi. 1993-cü ildən sonra — ümummilli liderimiz Heydər Əliyevin xalqın təkidi ilə hakimiyyətə qayıdışından sonra yenidən dirçəlməyə başlayan respublikamızda tədricən idmanın inkişafına da şərait yarandı. Məlum oldu ki, respublikanın əməkdar məşqçisi, Fəxri Bədən Tərbiyəsi işçisi Çingiz Pirverdiyev Gəncə “Təhsil” idman kompleksini bu qovqalardan qoruyub saxlayıb, bu müddətdə yeni idmançıların yetişməsi işini davam etdirib. Bəlkə də bu səbəbdəndir ki, XXVII Yay Olimpiya Oyunlarına hazırlıqla bağlı Azərbaycan Respublikası Nazirlər Kabinetinin 1999-cu il 10 may tarixli qərarı ilə Gəncə şəhər “Təhsil” idman mərkəzinin Gəncə filialı da Olimpiya dayaq bazası elan edildi.

Bundan sonra idman mərkəzində bir canlanma yarandı. İdmanın müxtəlif növləri üzrə ciddi məşqlər başlandı. Lakin bu çox uzun sürmədi. 2002-ci ildə Ç.Pirverdiyev direktor vəzifəsindən uzaqlaşdırıldı. Təbii ki, Çingiz müəllim bu qanunsuz işdənazadetmə ilə razılaşmadı, haqqını müdafiə etmək üçün əlaqədar orqan və təşkilatlara üz tutdu. Amma bu müddətdə yeni rəhbərlik də idman mərkəzinə yağı kəsildi. Mərkəzin ərazisi başqalarına icarəyə verildi, satıldı, idman qurğuları dağıdıldı. Təbii ki, tədricən idmançıların da ayağı buradan kəsilməyə başladı.

Artıq Ç.Pirverdiyev məhkəmə yolu ilə onun barəsində deyilən ittihamların böhtan olduğunu da sübut etmişdi. Digər tərəfdən, rəhbərlik idman mərkəzində baş verən özbaşınalıqdan narahat idi. Odur ki, 2008-ci ilin fevralında Çingiz Pirverdiyev yenidən “Təhsil” idman mərkəzinin Gəncə filialına direktor təyin edildi. Bununla da mərkəzin fəaliyyətində ciddi dönüş yarandı. Kimə gəldi paylanmış, bostan becərmək üçün icarəyə verilmiş torpaq sahələri geri qaytarıldı. Orada yeni idman meydançaları yaradıldı, idman qurğuları quraşdırıldı.

Mərkəzdə əsaslı yenidənqurma işləri aparmaqla yanaşı yeni bölmələr yaradıldı, təcrübəli məşqçilər işə dəvət edildi. Ailələrlə, təhsil müəssisələri ilə, uşaq və gənclər təşkilatları ilə əlaqələr möhkəmləndirildi. Nəticədə, yeniyetmə və gənclərin mərkəzə axını gücləndi, Olimpiya idman növləri üzrə bölmələrin sayı çoxaldıldı. Odur ki, bu gün idman mərkəzinə gələn mütəxəssislər bu fikirdədirlər ki, burada növbəti olimpiadada mərkəzin yetirmələri mütləq olacaq.

Ç.Pirverdiyev görülmüş işlər barədə danışarkən dedi:

— Azərbaycan idmanının inkişafında möhtərəm Prezidentimiz cənab İlham Əliyevin apardığı siyasətin həyata keçirilməsində Təhsil Nazirliyinin göstərdiyi qayğı və diqqətin təzahürü kimi “Təhsil” respublika idman mərkəzinin Gəncə filialında 2008-ci il tədris dövründə təmir-tikinti, quruculuq işlərinin aparılması, maddi-texniki bazanın möhkəmləndirilməsi üçün əməli işlər görülmüşdür. Filialın səkkiz hektar ərazisində yerləşən standart ölçüyə uyğun olan böyük futbol meydançası və köməkçi futbol meydançasının ərazisi dəmir torla çəpərlənmiş, köməkçi futbol meydançası yararlı hala salınıb, təlim-məşq prosesinin istifadəsinə verilmişdir. Eyni zamanda, idmançıların məşqdən sonra yuyunması üçün altı duşxana əsaslı təmir olunmuşdur. Bundan əlavə filialın inzibati binasının, iş otaqları və kabinetlərdə təmir işləri görülmüşdür. İnzibati binanın ümumi foyesi təmir edilmiş, foyenin girişində ulu öndər Heydər Əliyevin büstü qoyulmuşdur.

Filialda idmanın 12 növü üzrə təlim məşqləri keçirilir. Həmin növlərdə 3035 idmançı 268 qrup təlim və tədrislə məşğul olur. Eyni zamanda, bunlardan 6 idman növü üzrə 11 qrup idmanın təkmilləşdirilməsi mərhələsinə daxil edilmişdir. Bu il filialın ağır atletika və boks bölməsinin məşqçilərindən Əfəndi Hacıyev və Şahbaz Məmmədov Gənclər və İdman Nazirliyi tərəfindən respublikanın əməkdar məşqçisi adına layiq görülmüşdür. Sərbəst güləş bölməsinin məşqçi müəllimi Elçin Zeynalov ölkə Prezidentinin sərəncamı ilə respublikanın əməkdar idman xadimi adına layiq görülmüşdür.

Ötən il filialın idmançıları Dünya, Avropa, Beynəlxalq turnir və respublika birinciliklərində iştirak edərək, mükafatlara layiq görülmüşdür. Belə ki, cü-do növü üzrə Samir İsmayılov Bakı şəhərində keçirilən dünya kuboku yarışında 1-ci yerə, Giləxanım Ələkbərova 3-cü yerə layiq görülmüşdür. Sərbəst güləş üzrə Toğrul Əsgərov Latviyada keçirilən Avropa birinciliyində 1-ci yeri, Mehman İmamquliyev Mahaçqalada keçirilən beynəlxalq turnirdə 3-cü yeri, Azər Paşayev Türkiyədə keçirilən beynəlxalq turnirdə 3-cü yeri tutmuşlar. Basketbolçularımız respublikanın 1-ci liqasında 1-ci yerə çıxaraq, hazırda yüksək liqada çıxış edirlər. Ümumiyyətlə, filialın 78 idmançısı ötən il müxtəlif yarışlarda I-III yerlərə layiq görülmüşdür.

Ç.Pirverdiyev sonda bunları da dedi ki, bu gün də ayrı-ayrı adamlar filialın işinə müdaxilə etməyə, yenə inzibati binalardan öz şəxsi mənafeyi üçün istifadə etməyə, meydançalarda bostan əkməyə cəhd edirlər. Bunlar yolverilməzdir və onların qarşısı qətiyyətlə alınacaq.

Hamlet QASIMOV,

Vahid İMANOV

Xalq qəzeti.-2009.-28 yanvar.-S.5.