Yeni tariflər qüvvəyə minir

Yanvarın 16-dan etibarən Azərbaycan Tarif (qiymət) Şurasının Rabitə və İnformasiya Texnologiyaları Nazirliyinin təklifləri əsasında təsdiq olunmuş qərarları qüvvəyə minir. Bu məlumatı RİTN-nin mətbuat xidməti vermişdir. Məlumatda deyilir ki, şuranın qərarı ilə fiziki xətlə telefonlaşdırılması mümkün olmayan ərazilərdə yerləşən təhsil müəssisələri üçün “Teleradio” İstehsalat Birliyinə məxsus bina, sahə və qüllələrdə kənar təşkilatların avadanlıqlarının yerləşdirilməsi və xidmət göstərilməsinə görə aylıq tariflərə 80 faiz güzəşt tətbiq olunacaq.

Həmin qərar müvafiq olaraq avadanlıqlara görə tətbiq olunan tariflər 0,54 manatdan 53,6 manatadək (ƏDV-siz), anten sistemlərinə görə tətbiq edilən tariflər isə 2 manatdan 105 manatadək (ƏDV-siz) səviyyəsində təsdiq olunub. Bu tariflər uyğun olaraq, əvvəllər 2,68 manatdan 268 manatadək (ƏDV-siz) və 10 manatdan 525 manatadək (ƏDV-siz) təşkil edirdi. Şuranın qəbul etdiyi ikinci qərara əsasən, 2 Mbit/san şəhərdaxili rəqəmsal kanalların (portların) istifadəyə verilməsi tarifləri digər abonentlər (büdcə təşkilatları istisna olmaqla) üçün 1200 manatdan 600 manata (50 faiz), onlardan aylıq istifadə tarifləri isə 320 manatdan 300 manata (6,3 faiz), rəqəmsal rabitə kanallarının qoşulma və aylıq istifadə (Bakı şəhəri istisna olmaqla) tarifləri 240 manatdan 200 manata, hər tam və natamam 50 km məsafəyə görə 2 Mbit/san tutumundan istifadə tarifləri isə 180 manatdan 150 manata (16,7 faiz) endirilib.

M. MÜKƏRRƏMOĞLU

Xalq qəzeti.-2009.-28 yanvar.-S.6.