Ermənistanı qismən azad ölkə adlandırmaq gülüncdür

Helsinki Vətəndaş Assambleyasının Vanadzor ofisinin rəhbəri Artur Sakuntsa “Freedom House”un hesabatının hakimiyyətin sifarişi ilə hazırlandığını bildirib

“Freedom House” beynəlxalq hüquq-müdafiə təşkilatının bu yaxınlarda yaydığı hesabat hər yerdə qeyri-ciddi qarşılanıb. Ekspertlərin qənaətinə görə, bu təşkilatın hər il yaydığı hesabat heç bir ölkə tərəfindən səmimi qəbul edilmir. Çünki hesabatda əks olunan “faktlar” reallıqdan çox uzaq olur. Qeyd olunub ki, bu təşkilatın nümayəndələri “faktları” gördüklərinə əsasən yox, eşitdiklərinə əsasən toplayırlar. Ona görə də “Freedom House” əksər ölkələr tərəfindən qeyri-ciddi, sifarişlə hesabat hazırlayan təşkilat kimi qəbul edilir.

“Freedom House”nin bu yaxınlarda yaydığı hesabat, hətta, Ermənistanda da qeyri-səmimi qarşılanıb. Baxmayaraq ki, bu hesabatda Ermənistan qismən azad ölkələr sırasına daxil edilib, yerli ekspertlər bunu cəfəngiyyat, gülüş doğuran “sənəd” adlandırıblar. Ermənistan Ümumxalq Konqresinin koordinatoru Suren Surenyants bu hesabatın hakimiyyətin sifarişi ilə hazırlandığını deyib. Onun fikrincə, dünyanın tanınmış, nüfuzlu beynəlxalq təşkilatları Ermənistanda demokratiyadan əsər-əlamət olmadığını bildirdikləri, beynəlxalq qurumlar qarşısında götürdüyü öhdəliklərin heç birini yerinə yetirməyən dövlət hesab etdikləri, hətta, bu ölkənin beynəlxalq aləmdən təcrid olunması ərəfəsində olduğu bir vaxtda “Freedom House”nin cəfəngiyyatla dolu hesabatı gülünc doğurur. S. Surenyants deyib ki, Ermənistan parlamentinin AŞPA-dakı nümayəndə heyətinin üzvləri bu qurumun qış sessiyasında iştirakdan imtina ediblər. Bunu onunla əsaslandırıblar ki, Ermənistan 2001-ci ildə Avropa Şurasına üzvlüyə daxil olarkən müəyyən öhdəliklər götürüb. Həmin vaxtdan 7 il ötsə də, hələ də bu öhdəliklərin heç biri yerinə yetirilməyib. Bundan başqa təşkilatın insan haqlarının müdafiəsi ilə əlaqədar apardığı monitorinqin nəticələri utandırıcı vəziyyətdədir. Ona görə də qış sessiyasında iştirakdan imtina ediblər.

S. Surenyants deyib ki, Ermənistandakı totalitar rejimin açıq-aydın hiss olunduğu bir vəziyyətdə “Freedom House”nin özünü meydana atıb ölkəmizi qismən azad ölkə adlandırması beynəlxalq qurumlara olan inamı heçə endirib. Bu hesabat Ermənistanda cəfəngiyyatla dolu cızma-qara adlandırılıb və “Freedom House”nin nümayəndələrinin ölkəyə buraxılmaması qərara alınıb.

“Freedom House”un hesabatına münasibət bildirən Helsinki Vətəndaş Assambleyasının Vanadzor ofisinin rəhbəri Artur Sakuntsa da diqqətə çatdırıb ki, Ermənistanda antidemokratik əhval-ruhiyyənin hökm sürdüyü, insanların siyasi əqidələrinə görə təqib olunduğu, azad mətbuata, fikir azadlığına məhdudiyyətlər qoyulduğu, süni əngəllər yaradıldığı bir vaxtda adını beynəlxalq hüquq-müdafiə təşkilatı qoyan bir qurumun bütün bunları görməzliyə vurub kimlərinsə sifarişini yerinə yetirməsi beynəlxalq hüququn normalarına qarşı hörmətsizlikdir. A. Sakuntsa Ermənistanda insan hüquq və azadlıqlarının qorunması istiqamətində heç bir iş görülmədiyinə, demokratiyanın inkişafına əhəmiyyət verilmədiyinə və köhnə sovet rejimindən hələ də əl çəkə bilməməsinə görə tanınmış beynəlxalq qurumların qınaq hədəfinə çevrildiyi bir vaxtda “Freedom House” öz yalanları ilə xalqı aldatmağa çalışır.

A. Sakuntsa hesab edir ki, hansı ölkədə siyasi məhbus varsa, o ölkədə demokratiyadan, azadlıqdan, sərbəstlikdən danışmaq absurddur. Ermənistanda bu məsələ hazırda çox aktualdır. Yəni Ermənistanda siyasi məhbusların sayı getdikcə artır. Ümumiyyətlə, 1998-ci ildə Ermənistanda dövlət çevrilişi yolu ilə hakimiyyətə gələn qüvvələr hələ də öz diktatorluğunu davam etdirirlər. Onun fikrincə, ötən ilin dekabrında keçirilən prezident seçkiləri öz antidemokratikliyinə, qeyri-şəffaflığına və zorakılığına görə dünyanın diqqət mərkəzində olmuşdur. Prezident seçkilərini izləmiş beynəlxalq müşahidəçilərin heç biri müsbət rəy söyləməmişdir. Qeyd olunmuşdur ki, hakimiyyət nümayəndələri seçkiyə kobud müdaxildə etmiş, seçicilərin öz iradələrini sərbəst ifadə etməyə şərait yaratmamış, onları zorla hakimiyyətin namizədinə səs verməyə məcbur etmiş, müxalifətdən olan namizədlərin seçki qərargahları odlu silahlardan atəşə tutulmuş, yandırılmış, viran edilmişdir. Müxalifəti dəstəkləyənlər müxtəlif bəhanələrlə həbs olunaraq işgəncələrə məruz qalmış, təhqir olunmuş və hələ də həbsxanada saxlanılırlar. Belə bir ölkədə hansı demokratiyadan, azadlıqdan danışmaq olar? A. Sakuntsa “Freedom House”un bu hesabatını boşboğazlıq adlandırmış, ağır məğlubiyyətə uğramış idmançının qolunu zorla havaya qaldırıb onu qalib elan edən vicdansız, rüşvətxor hakimə bənzədib. Onun qənaətinə görə, Ermənistan bütün sahələrdə acınacaqlı məğlubiyyətə uğrayan, Rusiyanın boyunduruğundan hələ də xilas ola bilməyən, müstəmləkədə olan dövlətdir. Bəzi beynəlxalq təşkilatlar korrupsioner hakimiyyətin sifarişi ilə hazırladıqları belə yalanlarla dolu hesabatlarla heç kimi “Ermənistanın qismən azad ölkə olmasına” inandıra bilməyəcəklər. Əksinə, həmin beynəlxalq təşkilatlar özlərini sifarişlə işləyən, öz maddi maraqları naminə qaraya ağ deyən qurum kimi tanıdır. Artıq Ermənistanda “Freedom House”u belə qurumlardan biri kimi tanıyırlar.

Müstəqil politoloq Abram Arakelyan da “Freedom House”un hesabatını “uşaq başı aldadan oyuncağa” bənzədib. O qeyd edib ki, 3 milyona yaxın əhalisi olan Ermənistanın 1,5 milyon sakini ədalətsizlikdən, diktatorluqdan aclıq və səfalətdən xilas olmaq üçün baş götürüb xarici ölkələrə gediblər. İşsizliyin, antidemokratiyanın, zülmün, zülmətin hökmranlıq etdiyi bir ölkəni — Ermənistanı qismən azad ölkə adlandıran beynəlxalq quruma adamın yazığı gəlir. Kimlərinsə çirkli pulları hesabına hamının gözü qarşısında yalan söyləyənlərə yalnız “rəzil” sözü yaraşır. Ona görə də “Freedom House” adlı təşkilat Ermənistanda tanınmamalı və bu təşkilatın nümayəndələri Ermənistana buraxılmamalıdır. Onun fikrincə, belə totalitar bir ölkəni qismən azad ölkə adlandırmaq həm yerli sakinlərə, həm də beynəlxalq ictimaiyyətə qarşı hörmətsizlikdir.

Əliqismət BƏDƏLOV

Xalq qəzeti.-2009.-30 yanvar.-S.6.