“Heydər Əliyev və inkişafın Azərbaycan modeli”

Yeni Azərbaycan Partiyası Ümummilli lider Heydər Əliyevin anadan olmasının 87-ci ildönümü münasibətilə bu mövzuda konfrans keçirib

Mayın 8-də Yeni Azərbaycan Partiyası (YAP) “Gülüstan” sarayında müstəqil dövlətimizin memarı, YAP-ın yaradıcısı, Ümummilli lider Heydər Əliyevin anadan olmasının 87-ci ildönümünə həsr olunmuş “Heydər Əliyev və inkişafın Azərbaycan modeli” mövzusunda konfrans keçirib. Konfrans iştirakçıları öncə Fəxri Xiyabanda Ulu öndərin məzarını ziyarət ediblər.

Görkəmli oftalmoloq alim, akademik Zərifə xanım Əliyevanın da xatirəsi anılıb, məzarı üzərinə gül-çiçək düzülüb. Konfransı giriş sözü ilə açan YAP Sədrinin müavini-İcra katibi, millət vəkili Əli Əhmədov bildirib ki, bir neçə ildir ki, Yeni Azərbaycan Partiyası Ümummilli lider Heydər Əliyevin zəngin irsinin ətraflı öyrənilməsi və təbliği məqsədi ilə hər il Onun anadan olduğu gün ərəfəsində konfrans keçirir. Bu il də əvvəlki illərdə olduğu kimi, konfransın materialları partiyanın İcra Katibliyi tərəfindən toplanaraq kitab şəklində çap olunub. YAP Sədrinin müavini qeyd edib ki, Azərbaycan xalqının Ümummilli lideri Heydər Əliyevin doğum günü hər il xalqımız tərəfindən geniş və yüksək əhval-ruhiyyə ilə qeyd olunur. Bu il də ölkəmizin hər yerində, dünyanın azərbaycanlıların yaşadığı hər bir ölkəsində Ulu öndərin xatirəsi anılır, Ona insanların dərin hörmət və ehtiramı bir daha vurğulanır.

Əli Əhmədov bildirib ki, bütün bunların hamısı tariximizin yetişdirdiyi böyük şəxsiyyətə xalqımızın dərin məhəbbətini göstərməklə yanaşı, həm də Azərbaycanda formalaşmış dövlətçilik təfəkkürünün ifadə formalarından biridir. Müasir müstəqil Azərbaycan dövlətçiliyinin yaradıcısı Heydər Əliyevin xatirəsinə dərin hörmət və ehtiramın ifadə olunması, eyni dərəcədə dövlətçiliyimizə vətəndaş hörmət və ehtiramının ifadəsidir.

YAP Sədrinin müavini qeyd edib ki, Azərbaycanın son 40 illik inkişaf tarixi birbaşa Heydər Əliyevin adı və ideyaları ilə bağlıdır. Müstəqil Azərbaycan dövlətinin formalaşması, bununla yanaşı, cəmiyyətin bütün sahələrinin yüksək dinamik inkişafı Heydər Əliyevin adı, fəaliyyəti və ideyaları ilə əlaqədardır. Bu gün Azərbaycanın yüksək inkişaf nümunələri nümayiş etdirdiyini vurğulayan natiq bildirib ki, ölkəmizin tərəqqisi, müasirləşməsi, ölkənin bütün regionlarında quruculuq və abadlıq işlərinin geniş vüsət alması Ulu öndərin ideyalarının hər bir vətəndaşımız tərəfindən həyata keçirilməsinin bariz ifadəsidir.

Əli Əhmədov məmnunluq hissi ilə qeyd edib ki, Prezident İlham Əliyevin həyata keçirdiyi siyasət məhz Ümummilli liderin ideyaları əsasında qərar tutub. Heydər Əliyev ideyaları bu gün Azərbaycanın əldə etdiyi iqtisadi uğurların, milli-mənəvi dəyərlərimizin qorunması və inkişaf etdirilməsi sahəsində çoxşaxəli fəaliyyətin əsasında dayanır. Konfransın inkişafın Azərbaycan modelinə həsr olunduğunu diqqətə çatdıran YAP Sədrinin müavini, həmin modelin tərkib hissələri olan yüksək iqtisadi dinamikanı, onun formalaşması üçün siyasi-ictimai zəmin hazırlamış daxili sabitliyi, bazar iqtisadiyyatı ilə sosial ədalət prinsiplərinin qovuşması nəticəsində yaranmış sosial bazar prinsiplərini, eyni zamanda, ölkəmizin beynəlxalq inteqrasiya proseslərinə qovuşmasını xüsusi qeyd edib. “Məhz bu modelin formalaşması nəticəsində Azərbaycanda bütövlükdə müasirləşmə və yeniləşmə prosesləri uğurla həyata keçirilib. Bu modelin mahiyyəti Azərbaycan xalqının rifah halının yaxşılaşmasına xidmət edir” - deyə, o, vurğulayıb.

Konfransda YAP İdarə Heyətinin üzvü, təhsil naziri Misir Mərdanov “İnkişafın Azərbaycan modeli və təhsilimiz” mövzusunda məruzə ilə çıxış edib. M.Mərdanov bildirib ki, Prezident İlham Əliyevin uzaqgörən siyasəti və genişmiqyaslı islahatçı fəaliyyəti, müstəsna təşkilatçılığı sayəsində son illərdə qazanılmış nailiyyətlər birmənalı şəkildə Ulu öndər Heydər Əliyevin dövlətçilik ideallarına sadiqliyinin parlaq təcəssümü olmaqla hər bir Azərbaycan vətəndaşının qəlbində milli iftixar və ölkəmizin işıqlı gələcəyinə dərin inam hisslərini daha da gücləndirib. Azərbaycan dövlətinin elmə, təhsilə həmişə xüsusi diqqət yetirdiyini vurğulayan nazir deyib ki, təhsilə ayrılan vəsaitin ilbəil artması Prezident İlham Əliyevin bu sahəni dövlət siyasətinin əsas prioritetlərindən biri hesab etməsi ilə birbaşa bağlıdır. Bu mənada “təhsil əsri” elan edilən XXI əsrdə yüksək intellektə malik insan kapitalının formalaşması və güclü iqtisadiyyatın qurulmasında təhsilin rolu heç vaxt indiki qədər aktual olmayıb. O, qeyd edib ki, təhsilə ayrılan büdcə vəsaiti 2003-cü illə müqayisədə 5 dəfədən çox artaraq 2008-ci ildə 1,1 milyard manata çatıb, 2009-cu ildə isə 1,3 milyard manat təşkil edib. “Təhsil tariximizdə ilk dəfə olaraq Prezident İlham Əliyev tərəfindən “Ən yaxşı ümumtəhsil məktəbi” və “Ən yaxşı müəllim” mükafatlarının təsis edilməsi haqqında” Sərəncam imzalanıb, 2008-ci və 2009-cu illərdə müsabiqələr keçirilib, “Ən yaxşı ümumtəhsil məktəbi” müsabiqəsinin qalibi olmuş 50 məktəbin hər birinə 10 min manat, “Ən yaxşı müəllim” müsabiqəsinin qalibi olmuş 100 müəllimin hər birinə 5 min manat məbləğində birdəfəlik pul mükafatı verilib. Məhz dövlətimizin başçısının təhsilə diqqət və qayğısının nəticəsidir ki, təhsil tariximizdə ilk dəfə olaraq 16 inkişafyönümlü Dövlət Proqramı təsdiq olunub və uğurla həyata keçirilməkdədir. Təhsilin ayrı-ayrı sahələrinin inkişafı üzrə real vəziyyətin təhlili əsasında hazırlanıb təsdiq edilmiş bu proqramların həyata keçirilməsi nəticəsində təhsil infrastrukturunun müasir tələblərə uyğun qurulması, təhsilin məzmununun yeniləşdirilməsi, yeni dərslik siyasətinin reallaşdırılması mümkün olub” - deyə, M.Mərdanov vurğulayıb.

Nazir bildirib ki, təhsil alanların nailiyyətlərinin qiymətləndirilməsi üzrə yeni model və mexanizmlərin tətbiqi, əmək bazarının tələbatına uyğun kadr hazırlığı və təminatının yaxşılaşdırılması, təhsil müəssisələrinin informasiya-kommunikasiya texnologiyaları ilə təmin edilməsi və təhsil sisteminin informasiyalaşdırılması həyata keçirilib. Məktəbəqədər, texniki-peşə, ali təhsil, xaricdə təhsil, istedadlı uşaqların inkişafı, xüsusi qayğıya ehtiyacı olan uşaqların təhsilinin təşkili, de-institutlaşdırma və digər sahələrdə əhəmiyyətli nailiyyətlər əldə olunub. “Məktəblərin infrastrukturunun yeniləşdirilməsi sahəsində Heydər Əliyev Fondunun müstəsna xidmətləri olub. Fondun təşəbbüsü ilə 300-ə yaxın yeni məktəb, uşaq bağçası, uşaq evi, internat məktəbi binası tikilib istifadəyə verilib, əsaslı təmir və bərpa olunub, müasir avadanlıqla təchiz edilib. 550-dən çox məktəb əsaslı təmir edilib, müasir avadanlıqla təchiz olunub. 708 məktəb və 10 rayon təhsil şöbəsi müasir avadanlıqla təchiz edilib. Yeni məzmun yeni nəsil dərsliklərin hazırlanmasını da zəruri edib. 2003-2009-cu illərdə milli-mənəvi dəyərlər əsasında müasir tələblərə uyğun məzmunda ümumilikdə 35 milyon nüsxə dərslik çap edilib” - deyə, o, bildirib.

Dünya və beynəlxalq fənn olimpiadalarında Azərbaycan məktəblilərinin uğurları barədə danışan nazir vurğulayıb ki, son illər bu yarışlarda 11 qızıl, 28 gümüş, 60 bürünc olmaqla ümumilikdə 99 medal qazanılıb.

Davamlı insan inkişafı sahəsində ölkənin təhsil müəssisələrində həyata keçirilən islahatlar BMT tərəfindən yüksək qiymətləndirilib, Azərbaycan təcrübəsi bütün üzv ölkələrə nümunə kimi tövsiyə olunub.

YAP İdarə Heyətinin üzvü, Milli Məclisin Regional məsələlər komitəsinin sədri Arif Rəhimzadə “Yeni inkişaf mərhələsində” mövzusunda məruzə edib. O, bildirib ki, Prezident İlham Əliyevin iqtisadi sahədə keçid dövrünün başa çatması barədə bəyanatı ölkəmizin irəliləyişində yeni mərhələnin başlandığını nümayiş etdirib: “Bu irəliləyiş təkcə ölkənin iqtisadi qüdrətinin artması ilə deyil, həm də keyfiyyətcə yeni hədəflərin müəyyənləşdirilməsi, daha mürəkkəb vəzifələrin yerinə yetirilməsi ilə bağlı olacaq. Həmin vəzifələr sırasında ən vacibi idxalı əvəz edən məhsul istehsalının artırılması barədə dövlət başçısının göstərişidir. İdxalın əvəz edilməsi problemi heç də bu gün meydana gəlməyib. Ötən 15 ildə sənaye və kənd təsərrüfatı istehsalının inkişaf etdirilməsi və istehlak olunan məhsullar içərisində özümüzün istehsal etdiyimiz malların payının artırılması üçün faydalı tədbirlər görülüb. Bu tədbirlər ölkədə iqtisadiyyatın qeyri-neft sektorunun inkişafı sahəsində həyata keçirilən proqramların tərkib hissəsidir”.

A.Rəhimzadə qeyd edib ki, kredit siyasəti, elektroenergetika, yol və digər kommunikasiya obyektlərinin, məhsul emalı və saxlanması müəssisələrinin tikintisinə dair genişmiqyaslı proqram, kiçik və orta biznesin dəstəklənməsi, hüquqi şəxslərin qeydiyyatının sadələşdirilməsi xətti Ulu öndər Heydər Əliyev tərəfindən müəyyən olunub və reallaşdırılan digər tədbirlər həmin məqsədlərin əldə edilməsinə yönəldilib. Milli Məclisin komitə sədri bildirib ki, ideya nə qədər cəlbedici olsa da, əvvəllər o, üstün vəzifə kimi irəli sürülə bilmirdi: “Ölkənin sosial-iqtisadi göstəriciləri, yüksək inkişaf dinamikası bu vəzifənin qarşıya qoyulması üçün təməl yaradıb. Ötən il dünyada maliyyə böhranının hökm sürdüyü şəraitdə belə, Azərbaycan ÜDM-in və sənaye istehsalının artımına görə lider mövqelərini qoruyub saxlaya bilib. Kənd təsərrüfatı məhsullarının həcmi 3,5 faiz artıb. Makroiqtisadi sabitlik qorunub, investisiya və sosial proqramlar yerinə yetirilib, inflyasiyanın xeyli azaldılmasına nail olunub. Ölkənin valyuta ehtiyatları rekord göstəricilərə çatıb”.

A.Rəhimzadə vurğulayıb ki, aqrar sahə ölkə iqtisadiyyatında həmişə çox böyük yer tutub. Onun sözlərinə görə, Azərbaycan xalqının Ümummilli lideri Heydər Əliyev bu sahəni əsas prioritetlərdən biri sayırdı: “Ölkənin son illər artan iqtisadi potensialı və büdcə imkanları bu sahəyə dövlət dəstəyinin həcmini artırmağa imkan verib. 2004-cü ildən başlayaraq fermerlərin yanacağa, sürtkü materiallarına və mineral gübrələrə çəkdikləri xərclərin xeyli hissəsi dövlət büdcəsinin vəsaiti hesabına kompensasiya edilir. Fermer təsərrüfatlarının və kənd təsərrüfatı məhsullarının emalı sahəsinin inkişafına güzəştli kreditlər ayrılır. Kənd təsərrüfatı maşınlarının və avadanlığının lizinqi getdikcə daha çox inkişaf edir. Təsərrüfatlar güzəştli şərtlər əsasında məhsuldar mal-qara ilə təmin edilir. Buğda becərilməsinə görə xeyli güzəştlər müəyyənləşdirilib. Təsərrüfatların texnika və avadanlıqla təchizatı yaxşılaşdırılır, onlara aqrotexniki xidmət göstərən müəssisələr yaradılır. Kənd yerlərində məhsulun emalı, saxlanması və tədarükü müəssisələri tikilir ki, bu da itkilərin azaldılmasına, kəndlilərin istehsal fəaliyyətindən götürdükləri gəlirlərin artırılmasına şərait yaradır. 2008-2015-ci illərdə respublika əhalisinin etibarlı ərzaq təminatına dair Dövlət Proqramı həyata keçirilir”.

Parlamentin komitə sədri qeyd edib ki, idxalın əvəz edilməsi, daxili bazarın qorunması və istehsal etdiyimiz məhsulların ixracının artırılması bütövlükdə aqrar sektorun inkişafına yeni yanaşmadır. Prezident İlham Əliyev tərəfindən keyfiyyətcə yeni olan bu vəzifənin qarşıya qoyulması ölkəmizin iqtisadi qüdrətinin dinamik inkişafının bariz nümunəsidir.

Milli Məclisin Elm və təhsil komitəsinin sədri, Dövlət İqtisad Universitetinin rektoru Şəmsəddin Hacıyev isə “Azərbaycanda keçid dövrünün başa çatması və milli iqtisadi inkişaf modelinin formalaşması” mövzusunda məruzəsində bildirib ki, əsası Ümummilli lider Heydər Əliyev tərəfindən qoyulmuş və uğurla reallaşdırılan milli iqtisadi inkişaf strategiyasının hədəflərinin bir çoxuna nail olunması, milli iqtisadiyyatın formalaşması prosesinin başa çatması və onun keyfiyyətcə yeni inkişaf mərhələsinə qədəm qoyması çox mühüm hadisə kimi qiymətləndirilməlidir.

Azərbaycanda inzibati-amirlik sistemindən bazar iqtisadi sisteminə keçid prosesinin XX əsrin 90-cı illərinin əvvəllərindən başlandığını xatırladan Ş.Hacıyev vurğulayıb ki, kifayət qədər mürəkkəb xarakterə malik olan və kompleks amillər sisteminin əsaslı şəkildə dəyişdirilməsini nəzərdə tutan bu prosesin 20 ildən də qısa müddətdə başa çatması diqqətəlayiqdir. Xüsusi qeyd edilməlidir ki, biz transformasiya dövrünü başa vuraraq bir ictimai quruluşdan başqa quruluşa - həm də sadəcə olaraq klassik, yaxud neoliberal dəyərlərin hakim olduğu bazar iqtisadiyyatına deyil, sosialyönümlü bazar iqtisadiyyatına keçmişik.

Ş.Hacıyev bildirib ki, Azərbaycan 2003-cü ildən sonrakı qısa müddət ərzində öz iqtisadiyyatının həcmini üç dəfədən də çox artırıb. Respublikamız bütün makroiqtisadi göstəricilərin səviyyəsinə görə, indi orta səviyyəli inkişaf etmiş ölkələrlə bir sırada dayanır. Azərbaycan iqtisadi gücünə və potensialına görə, regionun lider ölkəsinə çevrilib. “Məlum həqiqətdir ki, 2008 və 2009-cu illər dünya iqtisadiyyatı üçün qlobal iqtisadi böhranın baş verməsi və demək olar ki, dünyanın bütün ölkələrinin bu böhranın mənfi təsirlərinə məruz qalması ilə xarakterizə olunur. 2009-cu ilin sosial-iqtisadi yekunları Azərbaycan iqtisadiyyatının bu kimi qlobal iqtisadi böhranlara qarşı nə dərəcədə davamlı və dayanıqlı olduğunu bir daha sübut etmiş oldu. Ölkəmiz bir çox beynəlxalq iqtisadi qurumlar tərəfindən qlobal iqtisadi böhranın təsirlərinə ən az məruz qalmış ölkələrdən biri kimi qiymətləndirilib. 2009-cu ildə dünya iqtisadiyyatında 1.1 faizlik geriləmə müşahidə olunduğu halda, Azərbaycanda ÜDM-in 9.3 faiz artımına nail olunub. Nəticədə, 2009-cu ildə ölkədə adambaşına düşən ÜDM 3917 manata (7.9 faiz artım), orta aylıq əməkhaqqı isə 298 manata (6.8 faiz artım) çatıb, yoxsulluğun səviyyəsi 11 faizə qədər aşağı enib. Bütün bunlar düşünülmüş iqtisadi siyasət, ardıcıl və sistemli həyata keçirilən qabaqlayıcı tədbirlər sayəsində mümkün olub.

Dünya valyuta-maliyyə bazarlarında kəskin tənəzzülün baş verdiyi bir vaxtda, Azərbaycanda strateji valyuta ehtiyatlarının həcminin 20 mlrd. ABŞ dollarını ötüb keçməsi, orta illik inflyasiyanın 1.5 faiz səviyyəsində olması, yerli bankların aktivlərinin 14 faiz artması, milli valyutanın mübadilə kursunun sabit olması və 2009-cu ildə ölkə iqtisadiyyatına 9.2 mlrd. ABŞ dolları həcmində investisiya qoyulması ölkə başçısı cənab İlham Əliyev tərəfindən uğurla reallaşdırılan iqtisadi strategiyanın uzunmüddətli hədəflərə yönəlməsini və elmi əsaslandırılmış prinsiplərə söykəndiyini bir daha təsdiqləyir.

Xüsusi qeyd edilməlidir ki, hazırkı böhran Azərbaycanda investisiya layihələrinin reallaşdırılmasına, yeni iş yerlərinin açılmasına, regionların sosial-iqtisadi inkişafının gücləndirilməsinə, nəhəng infrastruktur layihələrinin həyata keçirilməsinə, kiçik və orta sahibkarlığın inkişaf etdirilməsinə, aztəminatlı əhalinin mənzil-məişət şəraitinin yaxşılaşdırılmasına yönəlmiş tədbirlərin həyata keçirilməsinə heç bir maneə yarada bilməyib” - deyə Ş.Hacıyev vurğulayıb.

Daha sonra, Dövlət Sosial Müdafiə Fondunun sədri Səlim Müslümov “Sosial müdafiənin Azərbaycan modeli” məruzəsində bildirib ki, hər bir cəmiyyətin həyatının dəyərləndirilməsinə diqqəti çəksək, inkişafın əsas məqsədi olan sosial rifah ön plana çıxır. Azərbaycanın sosial müdafiə modeli onun sosial-iqtisadi həyatının əsas mərhələlərinin təsiri ilə formalaşıb dövlət quruculuğu fəlsəfəsinin başlıca elementlərindən biri kimi meydana gəlib.

S.Müslümov vurğulayıb ki, hakimiyyətə gəldiyi ilk günlərdən Ulu öndər Heydər Əliyevin gələcəyə hesablanan strateji proqramında sosial müdafiənin daim gücləndirilməsi çoxşaxəli fəaliyyətin başlıca məqsədi kimi təyin olunub. Müstəqillik dövründə sığorta-pensiya sisteminin Azərbaycan modelinin formalaşmasından danışan S.Müslümov bildirib ki, ötən dövrdə sosial sığorta, fərdi uçot və pensiya təminatı sahəsində idarəetməni həyata keçirən Dövlət Sosial Müdafiə Fondunun fəaliyyəti beynəlxalq standartlar əsasında tamamilə yenidən qurulub: “Ölkəmizdə qurulmuş yeni sığorta-pensiya sistemində pensiyaların artırılması mexanizminin bazar iqtisadiyyatının tələblərinə uyğun şəkildə dəyişdirilməsi mövcud maliyyə imkanlarının əmək pensiyaçıları arasında ədalətli bölgüsünə imkan verib. Beləliklə, ölkəmizdə ilk dəfə olaraq istehlak qiymətləri indeksinin illik səviyyəsinə, yəni inflyasiyaya uyğun indeksləşdirmə aparılmağa başlanıb. Nəticədə, yeni sistem fəaliyyətə başladığı dövrdən indiyədək əmək pensiyalarının minimum məbləği 3 dəfə, orta aylıq məbləği isə 3,4 dəfə artıb. Sığorta-pensiya sisteminin Azərbaycan modelinin digər mühüm bir cəhəti onun əhatəliliyidir. 2007-ci il yanvarın 1-dən hərbi qulluqçular və xüsusi rütbəli şəxslərin məcburi dövlət sosial sığortasına cəlb edilməsi və fərdi uçotla əhatə olunmasına, həmin şəxslərin və dövlət qulluqçularının əmək pensiyaları ilə təminatına keçilib. İşləyənlərə pensiya və sosial sığorta müavinətlərinin verilməsi də yeni qaydalarla əhatə olunub”.

S.Müslümov vurğulayıb ki, Azərbaycanın sığorta-pensiya modelinin uğurlu nəticələri Ümummilli lider Heydər Əliyevin sosial müdafiənin yenidən qurulması strategiyasının və onun icrası sahəsində Prezident İlham Əliyevin həyata keçirdiyi islahatların nə qədər düzgün və alternativsiz olduğunu təsdiqləyir. “Ümummilli liderimizin Pensiya İslahatı Konsepsiyası Azərbaycanın müasir və beynəlxalq standartlara tam cavab verən sığorta-pensiya modelini ortaya qoyub. İslahat pensiyaçıların sosial müdafiəsinin və layiqli həyat səviyyəsinin təmin olunması məqsədilə pensiya ödənişlərinin etibarlı maliyyə təminatına nail olunması, pensiya təminatı sisteminin bazar iqtisadiyyatı prinsiplərinə uyğunlaşdırılması və onun rolunun artırılması, pensiya və müavinət ödənişləri üçün nəzərdə tutulan vəsaitin tam yığılması və məqsədyönlü istifadəsi, pensiya təminatı sisteminin idarə olunmasını təkmilləşdirməklə onun səmərəliliyinin yüksəldilməsi, sosial sığorta haqları ilə ödənişlər arasındakı əlaqənin uyğunlaşdırılması kimi mühüm problemlərin həllinə yönəldilib. Qeyd olunan məqsədlərə çatmaq və qarşıda duran problemləri həll etmək üçün pensiya sisteminin idarə olunması üzrə prinsipial tələblər, pensiya islahatının həyata keçirilməsi mərhələləri Ulu öndərimiz tərəfindən dəqiq müəyyən olunmuşdu.

Respublikamızın həyatının bütün sahələrində olduğu kimi, sosial sahədə də Ümummilli liderimizin müəyyənləşdirdiyi prinsiplər uğurla reallaşdırılıb. Azərbaycan Respublikasının Prezidenti cənab İlham Əliyevin rəhbərliyi ilə respublikamızın həyatının bütün sahələrində davam etdirilən sürətli islahatlar insanlarımızın sosial müdafiəsini gücləndirməyə geniş imkanlar yaradıb, ölkəmizdə aztəminatlı əhalinin sosial müdafiəsi sahəsində yeni bir sistem formalaşıb. Bu məqsədlə, 2003-2005-ci illərdə pilot və hazırlıq tədbirləri başa çatdırılıb, 2006-cı ildən sığorta-pensiya sistemi ilə dövlət sosial yardım sistemlərinin bir-birindən ayrılması və beynəlxalq standartlar əsasında fəaliyyət göstərməsi təmin edilib. 2006-cı ilin yanvarın 1-dən ölkədə sosial sığorta münasibətlərinə əsaslanan əmək pensiyaları sistemi tətbiq olunub, pensiyaçıların sosial müdafiəsinin dövlət tənzimləməsi və bazar münasibətləri əsasında təminatının müasir forması təşəkkül tapıb. Eyni zamanda, əmək qabiliyyətini itirmiş, lakin əmək pensiyası hüququ olmayan şəxslərin sosial müdafiəsi üçün dövlət sosial müavinətlərinin, gəlirləri aşağı olan ailələrin sosial müdafiəsi üçün isə ünvanlı dövlət sosial yardımı sisteminin uğurla tətbiqinə başlanılıb” - deyə, S.Müslümov bildirib.

Daha sonra, konfrans işini “Heydər Əliyev yolu - milli inkişaf strategiyası”, “İnkişafın Azərbaycan modeli: Başlıca xüsusiyyətlər və meyllər” və “Azərbaycan yeni mərhələdə: uğurlu nəticələr və perspektivlər” mövzularında bölmə iclaslarında davam etdirib.

“Heydər Əliyev yolu - milli inkişaf strategiyası” bölməsinə rəhbərlik edən Milli Məclis sədrinin birinci müavini, YAP Siyasi Şurasının üzvü Ziyafət Əsgərov bildirib ki, dövlət orqanlarının fəaliyyətini müəyyən çərçivəyə salan konstitusiya normalarının sabitliyində hər bir dövlətin böyük marağı var. Onun sözlərinə görə, Konstitusiyanın sabitliyi hüquq subyektləri arasında qarşılıqlı əlaqələrin davamlılığında, daim və məqsədyönlü şəkildə ictimai münasibətlərə və vətəndaşların hüquq düşüncəsinə onun etdiyi təsirdə özünü göstərir. Z.Əsgərov bildirib ki, Ulu öndər Heydər Əliyevin müəllifi olduğu Azərbaycan Konstitusiyasının əsas məqsədi insan hüquq və azadlıqlarının, vətəndaşlara layiqli həyat səviyyəsinin təmin edilməsidir: “Konstitusiyanın inkişaf dinamikası cəmiyyətdə mövcud olan ictimai-siyasi münasibətlərə adekvat baş verir. Bu baxımdan, Konstitusiya cəmiyyətin və dövlətin inkişafına xidmət edən və cəmiyətdə “hüquq balansı” qoruyub saxlayan əsas normativ hüquqi sənəddir”.

Bölmə iclasında həmçinin, YAP İdarə Heyətinin üzvləri Zahid Qaralov və millət vəkili, Mixail Zabelin, YAP İcra katibinin müavini, millət vəkili Siyavuş Novruzov, Milli Məclisin deputatları Fəttah Heydərov, Eldar İbrahimov, Aydın Mirzəzadə, Məlahət İbrahimqızı, Asəf Hacıyev, Musa Quliyev, YAP Siyasi Şurasının üzvü Xeyrəddin Qoca və başqaları çıxış ediblər. Çıxışlarda fenomen şəxsiyyət Heydər Əliyevin dövlətçiliyimizin, müstəqilliyimizin qorunması və möhkəmləndirilməsi sahəsindəki tarixi xidmətləri bir daha diqqətə çatdırılıb. Qeyd olunub ki, Ulu öndər Heydər Əliyev bütün həyatını Azərbaycana və Türk dünyasına həsr edib, Azərbaycanın xoşbəxt gələcəyi naminə ömrünü xalqına bağışlayıb. Azərbaycan və Heydər Əliyev - bir-birindən ayrılmaz hesab olunan bu iki qüvvə bu gün bütün azərbaycanlıların rəmzinə çevrilib. Çıxışlarda vurğulanıb ki, Ulu öndər Heydər Əliyevin tariximizdə oynadığı rol - illər keçdikcə daha dərindən dərk edilir, əsl qiymətini alır.

Nardar BAYRAMLI

Yeni Azərbaycan.- 2010.- 12 may.- S.5-6.