Azərbaycanda inkişaf prosesləri davamlı və dönməz xarakter daşıyır

“Azərkontrakt” Səhmdar Cəmiyyətinin sədri Miri Qəmbərov www.yap.org.az saytına müsahibə verib:

- Miri müəllim, hazırda dünyada qlobal böhranın hələ də davam etdiyi bir dövrdə Azərbaycandakı sosial-iqtisadi vəziyyəti necə qiymətləndirmək olar?

- Bildiyiniz kimi, müstəqil Azərbaycan dövləti Ümummilli liderimiz Heydər Əliyev tərəfindən müəyyənləşdirilmiş strategiyaya uyğun olaraq inkişaf etməkdədir. Bu gün ölkəmizdə inkişaf proseslərinin dönməz xarakter alması birmənalı şəkildə Azərbaycanda Heydər Əliyev siyasətinin alternativi olmadığını sübut edir. Ulu öndərimizin əsasını qoyduğu mükəmməl iqtisadi inkişaf strategiyasının Prezident İlham Əliyev tərəfindən yeni tərəqqi erasının tələblərinə uyğun olaraq davam etdirilməsi respublikamızın yüksək sıçrayışlı inkişafını təmin etməkdədir. Ölkəmizin hazırkı inkişafını təmin edən iqtisadi strategiya, inkişaf modeli mövcuddur. İqtisadiyyatın dinamik inkişafını davam etdirmək, maliyyə sisteminin möhkəmlənməsini təmin etmək, kompleks tədbirləri nəzərdə tutan proqramları icra etmək çoxmülkiyyətli iqtisadiyyat və azad rəqabət şəraitində mümkün olur. Prezident İlham Əliyev iqtisadi inkişafın Azərbaycan modelini yaradıb. İqtisadi konsepsiyanın həyata keçirilməsi nəticəsində Azərbaycan keçid iqtisadiyyatını arxada qoyub. Cənab Prezident İlham Əliyev bəyan edib ki, Azərbaycan artıq postsovet ölkəsi deyil, respublikamız yüksək inkişaf etmiş, keçid iqtisadiyyatını arxada qoymuş dünya iqtisadiyyatına sıx inteqrasiya etmiş və müasir bazar iqtisadiyyatına malik dövlətdir.

Mən bir iqtisadçı kimi deyə bilərəm ki, Azərbaycanda uğurlu, davamlı islahatların həyata keçirilməsi son illər daha da sürətlənib. Hazırda ölkəmizin bütün iqtisadi sahələrində əhəmiyyətli dərəcədə artım meyilləri hiss olunur.

- Azərbaycanın inkişafı ilk növbədə, vətəndaşların sosial rifahının yüksəlməsi ilə müşayiət olunur. Bu mənada sosial sahədə həyata keçirilən proqramların üstünlükləri nədən ibarətdir?

- İqtisadi siyasətin inamla həyata keçirilməsi sayəsində Azərbaycanda davamlı olaraq əməkhaqqı və pensiyalar artırılır. Prezident İlham Əliyevin müvafiq sərəncamları ilə əmək pensiyaçılarının sosial müdafiəsinin gücləndirilməsi ilə bağlı tədbirlər həyata keçirilib və bu, öz mühüm nəticələrini göstərib. Ümumiyyətlə, sosial tərəqqi Prezident İlham Əliyevin fəaliyyətində başlıca prioritetlərdən birini təşkil edir və ötən bir il ərzində dövlətin kapital resurslarının böyük bir hissəsinin bu sahəyə yönəldilməsi bu strategiyanın uğurlarını şərtləndirmiş olur. Ötən müddətdə dövlətin gəlirləri ilk növbədə, sosial kateqoriyaların maddi rifahının yüksəlməsinə və sosial infrastrukturların yaxşılaşdırılmasına yönəlib.

Respublikamızda yüz minlərlə insanı əhatə edən sosial tərəqqi və əməkhaqlarının artırılması ilə bağlı dövlət siyasəti hökumətin vətəndaşlara olan yüksək diqqət və qayğısının nəticəsidir. Son 7 il ərzində Azərbaycanda əməkhaqqı və pensiyalar orta hesabla 5 dəfə artıb.

Hazırda ölkəmizdə orta pensiya məbləği 150 dollar təşkil edir ki, bu da respublikamızın həmin göstərici üzrə MDB ölkələrinin əksəriyyətini üstələdiyini təsdiqləyir.

Ümumiyyətlə, 2010-cu ildə dövlətimizin başçısının imzaladığı müvafiq sərəncamlara əsasən, bütün güc strukturlarında, dövlət idarəetmə sistemində və digər dövlət təşkilatlarında çalışan insanların maaşlarında artım baş verib. Bütün büdcə təşkilatlarında çalışan vətəndaşların sosial müdafiəsinin gücləndirilməsi məqsədilə davamlı tədbirlər görülüb, onların aylıq vəzifə maaşları artırılıb. 2010-cu ildə aztəminatlı əhali qruplarına göstərilən qayğı daha da gücləndirilib, məcburi köçkünlərə və ünvanlı yardım alan ailələrə verilən aylıq müavinətin məbləği artırılıb. Hesab edirəm ki, gələcəkdə də hökumətin əhalinin sosial rifahının gücləndirilməsi istiqamətində tədbirləri davam edəcək.

- Bildiyimiz kimi, hazırda inkişaf məsələləri ilə bağlı ölkəmizdə mühüm proqramlar qəbul olunub. Bu baxımdan, respublikamızın qarşıdakı dövrdə sosial-iqtisadi vəziyyəti barədə qənaətiniz necədir?

- Qeyd etdiyim kimi, dövlət başçısının müəyyənləşdirdiyi iqtisadi siyasətin başlıca hədəfləri makroiqtisadi sabitliyin möhkəmlənməsi, davamlı inkişafın intensiv xarakter alması, iqtisadi bölmələrdə fəallığın təmin edilməsi, maliyyə bazarının canlandırılması, investisiya qoyuluşlarının davam etdirilməsi, əhalinin sosial şəraitinin yaxşılaşması və digər iqtisadi ssenariləri əhatə edir və bu hədəflərin yerinə yetirilməsi respublikamızın uğurlarını daha da artıracaq.

Azərbaycan yeni sosial-iqtisadi inkişaf mərhələsinə daxil olur və qarşıdakı mərhələdə islahatların dərinləşdirilməsi zəruridir. Azərbaycan bazar iqtisadiyyatının ən yeni modellərini tətbiq etməyə hazırlaşır. Sosial, iqtisadi, siyasi və hüquqi islahatların dərinləşdirilməsi bütün sahələrdə şəffaflığın tam təmin edilməsini zəruri edir. Yəni, azad, liberal iqtisadiyyatın tələbləri budur ki, sosial-iqtisadi inkişafa mane olan neqativ hallar, o cümlədən, korrupsiya halları, sahibkarlığın fəaliyyətinə süni maneə yaradan yoxlamalar aradan qaldırılmalı, dövlət orqanlarının fəaliyyətində şəffaflıq təmin olunmalıdır.

Məlum olduğu kimi, yanvarın 14-də Nazirlər Kabinetinin ölkəmizin 2010-cu ildəki sosial-iqtisadi inkişafının nəticələrinə dair keçirilən iclasında Prezident İlham Əliyev Azərbaycanı inkişaf etmiş ölkəyə çevirmək üçün siyasi, iqtisadi islahatların davam etdiriləcəyini bəyan edib. Sosial ədalət prinsiplərinin bərqərar olması, dövlət orqanlarında şəffaflığın təmin edilməsi, ictimai nəzarət, demokratiya - inkişaf etmiş ölkələrin ölçü meyarlarıdır. Cənab Prezident iqtisadiyyatın davamlı inkişafını təmin etmək məqsədilə qiymətlərin süni şəkildə qaldırılmasının qarşısının alınması, azad rəqabətin təmin edilməsi, inhisarçılıq meyillərinin, əsassız yoxlamaların, vergidən yayınma hallarının aradan qaldırılması, biznes mühitinin yaxşılaşdırılması, korrupsiyaya qarşı mübarizənin gücləndirilməsi və şəffaflığın artırılması istiqamətində tədbirlərin gücləndirilməsi barədə ciddi tapşırıqlar verib. Bu istiqamətdə son dövrlər kompleks və sistemli şəkildə aparılan tədbirlər artıq öz mühüm bəhrələrini verməkdədir.

Burada bir məsələyə də toxunmaq istərdim. Məlum olduğu kimi, bəzi ərəb dövlətlərində baş verən hadisələrdən sonra Azərbaycanda sabitliyi pozmaq istəyən qüvvələr də fəallaşmağa çalışırlar. Fikrimcə, Ermənistanın Azərbaycana qarşı təcavüzü, torpaqlarımızın işğalının davam etdiyi bir şəraitdə belə hərəkətlər yolverilməzdir. Ölkəmizdə iqtidar və ya müxalifət mövqeyində olmasına baxmayaraq bütün qüvvələr həmrəy olmalı, milli maraqlarımıza zidd addımlar atılmamalıdır. Məqsədimiz Azərbaycanın dinamik inkişafını davam etdirmək, ən ağır problemimizi milli həmrəylik nəticəsində həll etməkdən ibarət olmalıdır.

- Bəs Heydər Əliyev Fondunun həyata keçirdiyi layihələr Azərbaycanın dünyada tanınması, xalqımızın adət-ənənələrinin təbliğ olunması işinə nə dərəcədə töhfələr verməkdədir?

- Respublikamızda genişmiqyaslı proqramların həyata keçirilməsində Heydər Əliyev Fondunun fəaliyyəti daha çox nəzərə çarpır. Fondun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın təşəbbüsü ilə təhsil, səhiyyə, sosial müdafiə, mədəniyyət, incəsənət, ekologiya və digər sahələrdə mühüm layihələr həyata keçirilməkdədir. Fondun dəstəyi ilə paytaxt və regionlarda yeni məktəb binaları tikilib, əsaslı təmir olunub, təhsil ocaqları ən müasir avadanlıqlarla təchiz edilib. Bundan başqa, onlarla səhiyyə müəssisəsi əsaslı şəkildə təmir olunub. Azərbaycanda səhiyyənin inkişafı və onun maddi-texniki bazasının gücləndirilməsi daim diqqət mərkəzində saxlanılır. Səhiyyə müəssisələrinin yenidən qurulması, əhalinin sağlamlığının daha yaxşı təşkili, bu sahədə qabaqcıl texnologiyaların tətbiqi Heydər Əliyev Fondunun fəaliyyətinin mühüm istiqamətlərindəndir.

Fondun təşəbbüsü ilə ölkəmizdə mədəniyyətin inkişafı ilə bağlı mühüm tədbirlər görülür, mədəniyyət və incəsənət xadimlərinə dövlət səviyyəsində yüksək qayğı göstərilir. Mehriban xanım Əliyevanın təşəbbüsü ilə həyata keçirilən layihələr mədəniyyətimizin inkişafı, onun dünyada təbliği, Azərbaycanın zəngin mədəni irsinin, musiqisinin qorunmasında mühüm rol oynayır. Muğamın, aşıq sənətinin təbliği, bu sahələrə böyük dəstəyin göstərilməsi ölkəmizin milli-mənəvi dəyərlərinə verilən ən böyük qiymət sayıla bilər. Heydər Əliyev Fondunun təşəbbüsü ilə həyata keçirilən regional layihələrin miqyası da artmaqdadır. Fond dünya xalqları arasında dialoqun təşviqi və inkişafında mühüm rol oynamaqdadır.

- Miri müəllim, rəhbərlik etdiyiniz təşkilatın fəaliyyəti barədə nə deyə bilərsiniz? “Azərkontrakt” SC bu gün ölkəmizin inkişafı ilə bağlı həyata keçirilən tədbirlərdə necə iştirak edir?

- Cənab Prezidentin müvafiq tapşırıqlarına uyğun olaraq respublikamızda həyata keçirilən tədbirlərdən kənarda qalmırıq və biz öz səylərimizi daha da artırmışıq. İqtisadiyyatın inkişafı, iş yerlərinin yaradılması, biznes fəaliyyətinin genişləndirilməsi və iqtisadiyyata sərmayə qoyuluşlarını həyata keçirmək hər bir şirkətin başlıca məqsədlərindən biridir. Ona görə də, təşkilatımız hökumətin həyata keçirdiyi tədbirlər planına uyğun olaraq üzərinə düşən vəzifələri layiqincə yerinə yetirməyə çalışır.

Yeni Azərbaycan.- 2011.- 5 aprel.- S.3.