Hər bir Laçın sakini
torpaqlarımızın işğaldan azad olunacağına
inanır
Nazim Fərəcov: YAP-ın
gücü həm də öz ideya yükünü, ölkənin
gələcək inkişafı ilə bağlı konseptual
baxışlarını modernləşdirə və dünya
təcrübəsilə zənginləşdirə bilməsindədir
Məlum olduğu kimi, ötən
il noyabr ayının 7-də Azərbaycan Respublikasının
Milli Məclisinə keçirilmiş növbəti
seçkilərdə Yeni Azərbaycan Partiyası (YAP)
böyük üstünlüklə qalib gəldi və
partiyanın irəli sürdüyü namizədlərdən
71 nəfəri parlamentdə təmsil olunmaq hüququ qazandı.
Parlamentdə hakim partiyanı təmsil edən millət vəkillərinin
21-i yeni seçilmişlərdir. Onlar, eyni zamanda,
respublikamızın müxtəlif sahələrində
göstərdikləri səmərəli fəaliyyətlə
ölkəmizin inkişafına öz töhfələrini
verirlər. Bu baxımdan da, “Yeni Azərbaycan” qəzeti
YAP-ın parlamentə seçilmiş yeni deputatları ilə
cəmiyyəti daha yaxından tanış etmək
üçün layihə həyata keçirir. Layihəmizin
budəfəki qonağı isə Milli Məclisin
üzvü, parlamentin Aqrar siyasət daimi komitəsinin
üzvü Nazim Fərəcovdur. Əvvəlcə
müsahibimiz haqqında qısa dosyeni təqdim edirik.
Nazim Fərəc oğlu Fərəcov
1960-cı ildə Laçın rayonu Qazıdərə kəndində
anadan olub. Orta təhsilini də Laçın rayonunda
alıb. 1978-ci ildə Azərbaycan
Xalq Təsərrüfatı İnstitutuna (indiki İqtisadiyyat
Universiteti) daxil olub. Oranı bitirdikdən sonra əmək fəaliyyətini
Sumqayıt şəhərində davam etdirib. 1995-96-cı illərdə
Sumqayıt şəhər Ticarət İdarəsində
baş direktorun müavini, 1996-98-ci illərdə İctimai
İaşə Trestinin müdiri vəzifəsini icra edib.
1998-ci ildən 2000-ci ilə qədər isə Dövlət Əmlak
Komitəsi Sumqayıt Bölgə Özəlləşdirmə
İdarəsində rəis müavini işləyib. Eyni
zamanda, Dövlət Əmlakının İdarəedilməsi
üzrə Dövlət Komitəsinin İstehsal və Xidmət
müəssisələrinin İdarəetmə Mərkəzində
baş direktor əvəzi, Əmək və Əhalinin Sosial
Müdafiəsi Nazirliyi Bakı şəhər Əhalinin
Sosial Müdafiəsi İdarəsində rəis və
Dövlət Sosial Müdafiə Fondunun Sumqayıt şəhər
şöbəsində müdir vəzifələrində
çalışıb. Yeni Azərbaycan Partiyasının
üzvüdür. 2010-cu ildə keçirilən IV
çağırış Azərbaycan Respublikası Milli Məclisinə
121 saylı Laçın Seçki Dairəsindən millət
vəkili seçilib. Parlamentin Aqrar siyasət daimi komitəsinin
üzvüdür. Ailəlidir, iki övladı var.
- Nazim müəllim, 2010-cu
il parlament seçkilərində Yeni Azərbaycan
Partiyasının (YAP) üzvü kimi 121 saylı
Laçın Seçki Dairəsindən parlamentə
seçilmisiniz. İstərdik ilk olaraq təmsil etdiyiniz
YAP-ın ölkəmizin inkişafındakı yerindən
danışaq...
-Öncə qəzetiniz vasitəsilə
mənə göstərdiyi böyük etimada görə bir
daha Yeni Azərbaycan Partiyasının Sədri, Azərbaycan
Respublikasının Prezidenti möhtərəm İlham Əliyev
cənablarına öz təşəkkürümü
bildirim. Mən fəxr edirəm ki, parlamentə məhz
ümumxalq partiyası olan YAP-ın namizədi kimi
seçilmişəm. Bu gün sıralarında 530 mindən
çox üzvü birləşdirən partiyamız
yarandığı gündən dövlətçilik
maraqlarından çıxış edib. Partiyamızın
qurucusu Ulu öndər Heydər Əliyev ideyalarına söykənən,
bu ideyaların təcəssümü kimi meydana çıxan
Yeni Azərbaycan Partiyası dünya tarixində çox nadir
partiyalardandır ki, yarandığı vaxtdan sadəcə 7
ay sonra ölkədə iqtidara gəlib. Təbii ki, burada ən
böyük amil xalqın Ulu öndərimizə olan sevgisi və
inamı olub. Bu gün YAP Sədri, Prezident İlham Əliyevin
rəhbərliyi altında öz fəaliyyətini yüksək
səviyyədə davam etdirən partiyamız milli-mənəvi
dəyərlərə son dərəcə konservativ
yanaşmaqla, tarixi ənənələri müasir dünya təcrübəsilə
birləşdirməyə çalışır, Azərbaycanın
dünyadakı yerini daha dəqiq şəkildə müəyyənləşdirməyə
səy göstərir, xarici siyasətdə qloballaşan
dünyanın reallıqlarını nəzərə
almağı vacib sayır, demokratiyanı ilk növbədə
hüquqi dövlət modelinin əsası kimi qəbul edir.
YAP-ın gücü həm də öz ideya
yükünü, ölkənin gələcək
inkişafı ilə bağlı konseptual
baxışlarını modernləşdirə və dünya
təcrübəsilə zənginləşdirə bilməsindədir.
Hakim partiya cəmiyyətə yeni ideyalar təlqin edir,
bütün problemlərdən çıxış
yollarını göstərə bilir, ən mürəkkəb
məsələlərlə bağlı konkret təkliflərə
malikdir, mükəmməl kadr potensialı var və
bütün bunlar YAP-ın ən müxtəlif sosial təbəqələrin
etimadını qazanaraq, ümumxalq partiyasına çevrilməsinə
şərait yaradıb.
- Parlamentin Aqrar siyasət
daimi komitəsinin üzvüsünüz. Üzvü
olduğunuz komitənin fəaliyyətini və ümumiyyətlə
Azərbaycanda aqrar sahədə görülən işləri
necə dəyərləndirirsiniz?
-Bu gün Azərbaycanda kənd
təsərrüfatının inkişafı istiqamətində
olduqca münbit bir şərait yaradılıb. Ulu öndərimiz
Heydər Əliyevin əsasını qoyduğu və bu
gün hörmətli Prezidentimiz, cənab İlham Əliyevin
uğurla davam etdirdiyi aqrar siyasət kursunun nəticəsi
olaraq bu sahədəki boşluqlar aradan qaldırılıb, kənd
təsərrüfatının inkişafı ilə
bağlı mühüm sənədlər - “Ərzaq təhlükəsizliyi
haqqında” və “Regionların sosial-iqtisadi inkişafı”
Dövlət Proqramı təsdiq olunub. Bu proqramlar Azərbaycanın
ərzaq təhlükəsizliyinin təminatı istiqamətində
atılmış mühüm addımlardır. Fikrimcə,
qarşıdakı dövrdə bu proqramların göstərəcəyi
effekt daha qabarıq hiss olunacaq. Bu gün ölkəmizdə
demək olar ki, ərzaq təhlükəsizliyinin təminatı
ilə bağlı bütün problemlər öz həllini
tapır. Xüsusi olaraq vurğulamaq lazımdır ki, Prezident
İlham Əliyevin taxılçılığın
inkişaf etdirilməsi ilə bağlı verdiyi
tapşırıqlardan sonra bu istiqamətdə yarana biləcək
problemlərin qarşısı alınıb. Artıq Azərbaycan
öz taxıl ehtiyacını ödəməyə demək
olar ki, hazırdır. Fövqəladə Hallar Nazirliyi
Dövlət Material Ehtiyatları Agentliyinin Dövlət
Taxıl Fonduna məxsus Səngəçal taxıl
elevatorunun istifadəyə verilməsi respublikamızın ərzaq
təhlükəsizliyinin təmin olunması ilə
bağlı həyata keçirilən mükəmməl
strategiyanın tərkib hissəsi kimi qiymətləndirilməlidir.
Ümumiyyətlə, ölkəmizdə kənd təsərrüfatının
inkişafı dövlətin diqqət və
qayğısı ilə əhatə olunub. Ölkəmizdə
həyata keçirilən aqrar islahatlar nəticəsində kənd
təsərrüfatında torpaq və əmlak üzərində
xüsusi mülkiyyət hüququ bərqərar olunub,
kiçik və orta sahibkarlığın inkişafına
yaradılan şərait olduqca yüksək səviyyəyə
çatıb, aqrar sahədə müasir texnika və
texnologiyalar, yeni bilik və informasiyalar şəbəkəsi
genişlənib. Bununla yanaşı, kənd təsərrüfatında
torpaq və əmlakdan səmərəli istifadəyə
imkanlar artırılıb, qəbul edilən qanunlar, dövlət
proqramları, ayrılan subsidiyalar kənd təsərrüfatının
bütün sahələrinin paralel inkişafına yol
açıb. Bu mənada parlamentin Aqrar siyasət komitəsi də
öz üzərinə düşən məsuliyyəti dərk
edir və qanunlarımızın daha təkmil bir forma
alması üçün öz gücünü səfərbər
edir.
- Siz işğal altında
olan bir rayonun-Laçının Azərbaycan parlamentindəki
təmsilçisisiniz. Bu, əlavə bir məsuliyyət
yaradırmı?
- Əlbəttə ki,
yaradır. Bu gün Laçın rayonundan olan məcburi
köçkünlərimiz respublikanın 58 şəhər
və rayonlarında məskunlaşıb.
Laçınlıların kompakt yaşadığı ərazi
isə Ağcabədi rayonunun Taxtakörpü qəsəbəsidir.
70,5 min nəfər əhalinin 13 min nəfəri bu gün
Taxtakörpüdə məskunlaşıb, rayonun inzibati idarələri
də məhz burada yerləşir. Bu gün ölkə
Prezidenti cənab İlham Əliyevin yürütdüyü
siyasət kursu hər bir laçınlı tərəfindən
təqdir olunur, birmənalı şəkildə dəstəklənir.
Öz doğma yurd-yuvalarından zorla qovulmuş insanların həyat
şəraitinin yaxşılaşdırılması, təhsil,
səhiyyə və digər sosial tələbatlarının
ödənilməsi istiqamətində olduqca mühüm tədbirlər
görülür. Laçın rayonunun respublikanın fərqli
bölgələrində fəaliyyət göstərən 20
ümumtəhsil məktəbi, 3 səhiyyə və 6 mədəniyyət
müəssisəsi cari və əsaslı təmir olunub,
uşaq bağçaları tikilib istifadəyə verilib.
Taxtakörpü qəsəbəsində laçınlı
şəhidlərin adlarının əbədiləşdirilməsi
üçün Xatirə Kompleksi ucaldılıb. Azərbaycan
Prezidenti cənab İlham Əliyevin imzaladığı
Dövlət Proqramına əlavələrə müvafiq
olaraq rayonun müstəqil elektrik şəbəkəsi müəssisəsi
yaradılıb və bu da ərazidə məskunlaşmış
məcburi köçkünlərin elektrik enerjisi ilə
bağlı problemlərinin həllinə yaxından kömək
edir. Bundan başqa, Taxtakörpü qəsəbəsinə təbii
qaz xəttinin çəkilməsinə köməklik
göstərilməsi ilə bağlı Nazirlər Kabinetinə
və Dövlət Neft Şirkətinə müraciət əsasında
bu problem öz həllini tapır. Azərbaycan Respublikası
Prezidentinin Sərəncamı ilə təsdiq edilmiş
“Qaçqınların və məcburi köçkünlərin
yaşayış şəraitinin
yaxşılaşdırılması və məşğulluğunun
artırılması üzrə Dövlət Proqramı”na əlavələrin
icrası əsasında Laçın rayonundan olan 313 məcburi
köçkün ailəsinin müvəqqəti məskunlaşdığı
Taxtakörpü, 239 laçınlı ailəsinin məskunlaşdığı
Ağcabədi rayonu ərazisindəki “Alman” və “Yasıyol”
fin tipli qəsəbələrindəki sakinlərin mənzil-məişət
şəraitinin yaxşılaşdırılması məqsədilə
552 ailə üçün yeni qəsəbənin tikintisi həyata
keçirilir. Laçın rayonunun sakinləri hər zaman
öz dövlətinə, Prezidentinə inanır,
Dağlıq Qarabağın yaxın zamanda işğaldan azad
olunacağını, dövlət başçısı,
möhtərəm İlham Əliyevin apardığı
sülh danışıqlarının prosesdə həlledici
rol oynayacağına əmindirlər. Azərbaycan xalqı əsası
Ulu öndər Heydər Əliyev tərəfindən qoyulan və
bu gün möhtərəm Prezidentimiz İlham Əliyev tərəfindən
uğurla inkişaf etdirilən siyasi kursun Azərbaycanı
daha qüdrətli gələcəyə
daşıyacağına birmənalı şəkildə
inanır. İşğal altında olan
torpaqlarımızın azad edilməsi istiqamətində
sülh danışıqlarının aparılması ilə
yanaşı, ölkəmizdə ordu quruculuğuna da
mühüm önəm verilir. Ölkə büdcəsindən
müdafiə xərclərinə ayrılan vəsait
işğalçı Ermənistanın dövlət büdcəsi
həcmindədir. Bu isə ölkəmizin hərbi qüdrətinin
göstəricisidir...
- Amma təəssüf ki,
ölkəmizin bu inkişafını istər xaricdən, istərsə
də daxildən gözü götürməyən qüvvələr
də var. Bu qüvvələr min bir vasitə ilə ölkəmizdə
siyasi sabitliyi pozmağa çalışır...
- Heç vaxt buna nail ola bilməzlər.
Bilirsinizmi, Azərbaycanda siyasi sabitliyin yaranması prosesi orta
yaşlı nəslin gözləri önündə baş
verib. Müstəqillik əldə olunandan sonrakı dövrdə
Azərbaycanda hakimiyyəti ələ keçirən bir qrup səriştəsiz
qüvvənin öz fəaliyyətsizliyi ilə suverenliyimizi
sual altına qoyduğu hər bir Azərbaycan vətəndaşına
bəllidir. Hətta tarixin bu dönəmində elə bir məqam
yarandı ki, Azərbaycanın parçalanması, ölkədə
vətəndaş qarşıdurmasının yaranması an məsələsi
idi. Belə çətin bir zamanda Ümummilli liderimiz Heydər
Əliyev ölkəmizin bütövlüyünü qorudu, Azərbaycanda
vətəndaş birliyi, güclü mərkəzi idarəetmə-dövlət
idarəçiliyi mexanizmi yaratdı, ölkə vətəndaşlarını
bir ideologiyanın ətrafında birləşdirdi. Bu gün
Prezident İlham Əliyevin yüksək siyasi peşəkarlıqla
inkişaf etdirdiyi, dünyanın ən güclü inkişaf
tempi əldə etmiş iqtisadiyyatına malik, yerləşdiyi
Cənubi Qafqaz bölgəsinin lider dövləti sayılan Azərbaycan
məhz Ümummilli liderimiz Heydər Əliyevin 1993-cü ildən
sonrakı dövrdə xalqın dəstəyi ilə ölkəmizdə
bərqərar etdiyi sabitliyin təməlində yüksəlir.
Bu gün ölkəmizdə insanların sosial rifahı
yüksəlir, problemlərin həlli üçün
mühüm və qəti addımlar atılır. Azərbaycanda
son dövrlərdə korrupsiyaya qarşı gücləndirilmiş
mübarizə bu mənada xüsusi əhəmiyyətə
malikdir. Xalqımız aparılan islahatları, görülən
abadlıq-quruculuq işlərini dəstəkləyir,
keçirilən demokratik və şəffaf seçkilərdə
bu siyasətə öz dəstəyini nümayiş etdirir.
Qeyd etdiyiniz radikal azlıq isə əldə olunan bu
uğurlardan narahatdır. Bir sıra maraqlı xarici dairələrin
əlaltısına çevrilən həmin qruplar
üçün dövlət, millət maraqları heç
bir əhəmiyyət kəsb etmir. Əksinə, onlar bu
gün Azərbaycanın beynəlxalq imicinə zərbə
vurmaq, xainlik etmək üçün fürsət gözləyirlər.
Xalqımız onların bu xəyanətkar
addımlarını pisləyir, onların maddiyyatın əsirinə
çevrildiyini dərk edir. İnanıram ki, çox qısa
bir zamanda həmin destruktiv qüvvələr ölkəmizin
siyasi palitrasından silinib tarixin qaranlıqlarına
gömüləcəklər.
Pərviz SADAYOĞLU
Yeni Azərbaycan.- 2011.- 16 aprel.- S.9.