Sosial tərəqqi Prezident İlham Əliyevin fəaliyyətində başlıca prioritetlərdən birini təşkil edir

Yeni Azərbaycan Partiyasının Siyasi Şurasının üzvü, partiyanın Qaradağ rayon təşkilatının sədri Aydın Hüseynov www.yap.org.az saytına müsahibə verib:

- Aydın müəllim, bəzi müxalifət partiyaları ölkəmizdə ictimai-siyasi sabitliyi pozmağa çalışır və bu məqsədlə aprelin 17-də növbəti qanunsuz aksiya keçirməyə cəhd göstərdilər. Bu cür hərəkətlər mövcud ictimai-siyasi duruma necə təsir edə bilər?

- Azərbaycanda ictimai-siyasi sabitlik möhkəm təməllər üzərində qurulub. Bildiyimiz kimi, Azərbaycanda ictimai-siyasi sabitlik Ümummilli liderimiz Heydər Əliyev tərəfindən təmin edilib. Bu gün Ulu öndər Heydər Əliyevin müəyyənləşdirdiyi inkişaf strategiyası uğurla həyata keçirilməkdədir. Azərbaycan məhz Heydər Əliyev siyasəti nəticəsində böyük inkişaf yolundadır və bu yolla inamla irəliləyir. Bu gün Prezident İlham Əliyevin həyata keçirdiyi praqmatik siyasət Azərbaycanın dinamik inkişafını təmin etməklə yanaşı, ictimai-siyasi sabitliyi daha da möhkəmləndirib. Doğrudur, bəzi hallarda müxalifətin radikal qanadı ölkəmizdə sabitliyi pozmağa cəhdlər göstəriblər. Amma bütün hallarda bu cəhdlər iflasa uğrayıb. Birmənalı şəkildə qəbul olunmalıdır ki, Azərbaycanda radikal müxalifətin sosial dayaqları yoxdur və onların hər hansı bir pozuculuq fəaliyyəti də iflasa məhkumdur. Azərbaycan xalqı onların xislətinə bələd olduğu üçün qanunsuz aksiyalara dəstək vermir. Ölkə vətəndaşları bu gün dövlət başçısı tərəfindən həyata keçirilən siyasəti dəstəkləyir və bu mövqeyini dəfələrlə nümayiş etdirib. Ona görə də, ölkəmizdəki ictimai-siyasi sabitliyin hansısa qüvvələr tərəfindən pozulması qeyri-mümkündür.

- Belə olan halda, sizcə, radikal müxalifətin bilərəkdən qarşıdurma yarada biləcək qərarlar verməsi haradan qaynaqlanır?

- Radikal müxalifətin ölkə daxilində ictimai dəstəyi yoxdur. Belə olan təqdirdə isə onlar ölkəmizin inkişafını istəməyən xarici qüvvələrlə əməkdaşlığa üstünlük verirlər. Radikal müxalifətin son aksiyalarının xaricdəki müəyyən qüvvələr tərəfindən hazırlanmış ssenari üzrə həyata keçirilməsi, maliyyələşdirilməsi və idarə olunması şübhə doğurmur. Proseslər də göstərir ki, həmin aksiyalar, yəni, qanunsuz mitinqlər, yürüşlər xaricdən alınan maliyyənin hesabına başa gəlir. Çünki o aksiyaların təşkil edilməsi, orada iştirak edən adamların hərəkətləri və davranışları dediklərimə sübutdur. Eyni zamanda, radikal müxalifətin rəhbərlərinin fəaliyyətində antimilli hərəkətlər özünü açıq şəkildə büruzə verir. Hamımız bilirik ki, xarici dairələr Dağlıq Qarabağ problemi ilə bağlı Azərbaycanı güzəştə məcbur etmək istəyirlər. Bu alınmayanda isə ölkəmizi daxildən zəiflədərək məqsədlərinə çatmağa çalışırlar. Bu prosesdə isə müxalifət onların əlində vasitəyə çevrilir. Təəssüf ki, özünə azərbaycanlı deyən bəziləri öz şəxsi maraqları naminə milli maraqlarımızı qurban verməyə hazırdırlar. Amma bir daha deyirəm ki, onlar öz məqsədlərinə çatmayacaqlar. Son vaxtlar radikalların bütün qanunsuz aksiyalarına ictimai dəstəyin olmaması, bu aksiyaların iflasa uğraması fikrimin sübutudur.

- Radikal müxalifət iddia edir ki, Azərbaycanda vətəndaşların sərbəst toplaşmaq hüququndan istifadə olunmasına imkan verilmir. Onların bu iddialarının əsası varmı?

- Azərbaycan Konstitusiyasında vətəndaşların sərbəst toplaşmaq hüququ təsbit olunub. Amma bu hüququn həyata keçirilmə mexanizmi müvafiq qanunla tənzimlənir. Bu gün Konstitusiyada təsbit olunmş təhsil, əmək və digər hüquqlar ayrı-ayrı qanunlarla tənzimləndiyi kimi, sərbəst toplaşmaq hüququnun da reallaşdırılması üçün xüsusi qanun var. “Sərbəst toplaşmaq azadlığı haqqında” Qanun qəbul olunub və ötən dövr ərzində xeyli dərəcədə təkmilləşdirilib. Xüsusilə qeyd etmək istəyirəm ki, həmin qanunun son variantı Avropa Şurasının Venesiya komissiyası ilə birgə əməkdaşlıq çərçivəsində hazırlanıb və qanun həmin qurum tərəfindən müsbət rəy alıb. Ona görə də, heç kimin həmin qanunun Avropa standartlarına uyğun olmadığını deməyə haqqı yoxdur.

Bu qanunda açıq şəkildə göstərilir ki, kütləvi aksiyaların keçirilməsi müvafiq icra hakimiyyəti orqanı ilə razılaşdırılmalıdır. Bunun da bir sıra ciddi səbəbləri var. Burada mitinq iştirakçılarının təhlükəsizliyi, digər vətəndaşların hüquqlarının təmin olunması və başqa amillər mövcuddur. Dünyanın hər bir yerində bu təcrübə var. Amma müxalifətin radikal qanadı Bakı Şəhər İcra Hakimiyyətinin ayırdığı yerdə yox, yalnız şəhərin mərkəzində mitinqin keçirilməsinə israr edir. Bu isə açıq şəkildə qanunsuzluq deməkdir.

Əgər onlar fikirlərini tərəfdarlarına çatdırmaq istəyirlərsə, Bakı Şəhər İcra Hakimiyyətinin etiraz aksiyası və ya mitinq üçün ayırdığı yerlərdə bunu edə bilərlər. Amma etmək istəmirlər. Çünki bilirlər ki, vətəndaşlar onları müdafiə etmir, xalq bu insanları qətiyyən dəstəkləmir və onların arxasınca da getmir. Onlar nə üçün ayrılmış yerdə yox, insanların sıx, hərəkətin gur olduğu yerlərdə aksiya keçirmək istəyirlər? Radikal müxaliflərin məqsədi qarşıdurma yaradaraq beynəlxalq təşkilatların diqqətini çəkmək, eləcə də, kütləvilik fonu yaratmağa səy göstərməkdədir. Buna görə də, metro stansiyalarının ətrafları, şəhərin mərkəzi hissələrini hədəfə alırlar. Yəni, sadə dillə desək, onların başlıca məqsədi fon yaratmaq, sonra da həmin yerin şəkillərini və videogörüntülərini çəkib xaricə ötürməkdir. Bu adamlar bəhs etdiyim minvalla tərəfdarlarının çox olmasıyla bağlı görüntü yaratmağa çalışırlar.

- Bəzi ərəb dövlətlərində baş verən proseslər radikalların fəallaşmasında nə dərəcədə rol oynayır? Eyni zamanda, qanunsuz aksiyalara çağırışlarda sosial şəbəkələrin təsiri varmı?

- Doğrudur, ərəb dövlətlərində baş verən hadisələr zamanı Azərbaycanda da sosial şəbəkələrdə müəyyən qədər fəallaşma baş verdi, müxtəlif sosial şəbəkələrdə də ərəb inqilablarından bəhs edirdilər. Lakin ərəb ölkələrindən fərqli olaraq, Azərbaycanda heç bir inqilabi situasiya yoxdur və ola da bilməz. Bəlli ərəb ölkələrindəki vəziyyət etirazlar üçün müəyyən şərait doğurur, sosial sifariş yaradır. Azərbaycanda isə həmin situasiyanın elementlərinin heç biri yoxdur və görünmür. Ölkəmizdə insanlar müxtəlif siyasi proseslərdən çıxıb və indi ölkədə qanunun aliliyi, demokratik dəyərlər bərqərar olub. Azərbaycanın dövlət başçısı da ölkəni demokratik prinsiplərlə idarə edir. Ölkəmiz işğalçı Ermənistan istisna olmaqla, dünya dövlətləri ilə normal münasibətlərə malikdir. Ərəb ölkələrinə gəldikdə isə, oradakı hadisələrin yaranma səbəbləri, aktiv qüvvələrin niyyətləri tam başqadır. Ona görə də, sosial şəbəkələrdə Azərbaycanla bağlı əks olunan qərəzli fikirlər mənasızdır. Belə fikirlərə qarşı ciddi arqumentlər ortaya qoyulur və nəticələri də göz qabağındadır. Əslində, demokratiyadan dəm vuran bəzi radikalların əxlaqsız hərəkətlərini sosial şəbəkələrdə yayılan videogörüntülər təsdiq edir, onların mahiyyətini açır. Xalqımız bütün bunları görür və kimin kim olduğunu qiymətləndirməyi bacarır.

- Azərbaycan sürətli inkişaf yolundadır. Bu inkişaf, ilk növbədə vətəndaşların sosial rifahının yüksəlməsi ilə müşayiət olunur. Bu mənada sosial sahədə həyata keçirilən proqramların üstünlükləri nədən ibarətdir?

- Əlbəttə, iqtisadi siyasətin inamla həyata keçirilməsi sayəsində Azərbaycanda davamlı olaraq əməkhaqqı və pensiyalar artırılır. Prezident İlham Əliyevin müvafiq sərəncamları ilə əmək pensiyaçılarının sosial müdafiəsinin gücləndirilməsi ilə bağlı tədbirlər həyata keçirilib və bu, öz mühüm nəticələrini göstərib. Bildiyiniz kimi, Nazirlər Kabinetinin 2011-ci ilin birinci rübün sosial-iqtisadi yekunlarına həsr olunmuş iclasında Prezident İlham Əliyev bu il əməkhaqları və pensiyaların artırılacağını bəyan etdi. Ümumiyyətlə, sosial tərəqqi Prezident İlham Əliyevin fəaliyyətində başlıca prioritetlərdən birini təşkil edir və ötən bir il ərzində dövlətin kapital resurslarının böyük bir hissəsinin bu sahəyə yönəldilməsi bu strategiyanın uğurlarını şərtləndirmiş olur. Ötən müddətdə dövlətin gəlirləri, ilk növbədə, sosial kateqoriyaların maddi rifahının yüksəlməsinə və sosial infrastrukturların yaxşılaşdırılmasına yönəlib.

Respublikamızda yüz minlərlə insanı əhatə edən sosial tərəqqi və əməkhaqlarının artırılması ilə bağlı dövlət siyasəti hökumətin vətəndaşlara olan yüksək diqqət və qayğısının nəticəsidir. Artıq Azərbaycanın valyuta ehtiyatları 34 milyard dolları ötüb, ölkəmizdə orta pensiya məbləği 106 dollara çatıb. Bu artımdan sonra pensiyaların ölkə üzrə orta məbləği 150 dollara qədər yüksəlib. Son 7 il ərzində Azərbaycanda əməkhaqqı və pensiyalar orta hesabla 5 dəfə artıb.

Hazırda ölkəmizdə orta pensiya məbləği 150 dollar təşkil edir ki, bu da respublikamızın həmin göstərici üzrə MBD ölkələrinin əksəriyyətini üstələdiyini təsdiqləyir.

Ümumiyyətlə, 2010-cu ildə dövlətimizin başçısının imzaladığı müvafiq sərəncamlara əsasən, bütün güc strukturlarında, dövlət idarəetmə sistemində və digər dövlət təşkilatlarında çalışan insanların maaşlarında artım baş verib. Bütün büdcə təşkilatlarında çalışan vətəndaşların sosial müdafiəsinin gücləndirilməsi məqsədilə davamlı tədbirlər görülüb, onların aylıq vəzifə maaşları artırılıb. Bundan 2010-cu ildə aztəminatlı əhali qruplarına göstərilən qayğı daha da gücləndirilib, məcburi köçkünlərə və ünvanlı yardım alan ailələrə verilən aylıq müavinətin məbləği artırılıb. Hesab edirəm ki, gələcəkdə də hökumətin əhalinin sosial rifahının gücləndirilməsi istiqamətində tədbirləri davam edəcək.

- Hazırda inkişaf məsələləri ilə bağlı ölkəmizdə mühüm proqramlar qəbul olunub. Bu baxımdan, respublikamızın qarşıdakı dövrdə sosial-iqtisadi vəziyyəti barədə nə deyə bilərsiniz?

- Qeyd etdiyim kimi, dövlət başçısının müəyyənləşdirdiyi iqtisadi siyasətin başlıca hədəfləri makroiqtisadi sabitliyin möhkəmlənməsi, davamlı inkişafın intensiv xarakter alması, iqtisadi bölmələrdə fəallığın təmin edilməsi, maliyyə bazarının canlandırılması, investisiya qoyuluşlarının davam etdirilməsi, əhalinin sosial şəraitinin yaxşılaşması və digər iqtisadi ssenariləri əhatə edir və bu hədəflərin yerinə yetirilməsi respublikamızın uğurlarını daha da artıracaq.

Azərbaycan yeni sosial-iqtisadi inkişaf mərhələsinə daxil olur və qarşıdakı mərhələdə islahatların dərinləşdirilməsi zəruridir. Azərbaycan bazar iqtisadiyyatının ən son yeni modellərini tətbiq etməyə hazırlaşır. Sosial, iqtisadi, siyasi və hüquqi islahatların dərinləşdirilməsi bütün sahələrdə şəffaflığın tam təmin edilməsini zəruri edir. Yəni, azad, liberal iqtisadiyyatın tələbləri budur ki, sosial-iqtisadi inkişafa mane olan neqativ hallar, o cümlədən, korrupsiya halları, sahibkarlığın fəaliyyətinə süni maneə yaradan yoxlamalar aradan qaldırılmalı, dövlət orqanlarının fəaliyyətində şəffaflıq təmin olunmalıdır.

Məlum olduğu kimi, yanvarın 14-də Nazirlər Kabinetinin ölkəmizin 2010-cu ildəki sosial-iqtisadi inkişafının nəticələrinə dair keçirilən iclasında Prezident İlham Əliyev Azərbaycanı inkişaf etmiş ölkəyə çevirmək üçün siyasi, iqtisadi islahatların davam etdiriləcəyini bəyan edib. Sosial ədalət prinsiplərinin bərqərar olması, dövlət orqanlarında şəffaflığın təmin edilməsi, ictimai nəzarət, demokratiya - inkişaf etmiş ölkələrin ölçü meyarlarıdır. Cənab Prezident iqtisadiyyatın davamlı inkişafını təmin etmək məqsədilə qiymətlərin süni şəkildə qaldırılmasının qarşısının alınması, azad rəqabətin təmin edilməsi, inhisarçılıq meyillərinin, əsassız yoxlamaların, vergidən yayınma hallarının aradan qaldırılması, biznes mühitinin yaxşılaşdırılması kimi vəzifələr qoydu. Bürokratik əngəllərin aradan qaldırılması, korrupsiyaya qarşı mübarizə və şəffaflığın artırılması istiqamətində tədbirlərin gücləndirilməsi barədə ciddi tapşırıqlar verib. Bu istiqamətdə son dövrlər kompleks və sistemli şəkildə aparılan tədbirlər artıq öz bəhrələrini verməkdədir.

Yeni Azərbaycan.- 2011.- 20 aprel.- S.5.