“Erməni soyqırımı”: uydurmalar və həqiqətlər

Yeni Azərbaycan Partiyasının təşkilatçılığı ilə bu mövzuda dəyirmi masa keçirilib

Dünən Atatürk Mərkəzində Yeni Azərbaycan Partiyasının (YAP) təşkilatçılığı ilə “Erməni soyqırımı”: uydurmalar və həqiqətlər” mövzusunda dəyirmi masa keçirilib. Konfransda YAP İdarə Heyətinin və Siyasi Şurasının üzvləri, Milli Məclisdə təmsil olunan siyasi partiyaların və bitərəflərin nümayəndələri, alimlər və digər şəxslər iştirak ediblər.

Tədbirdə çıxış edən YAP Sədrinin müavini-İcra katibi, millət vəkili Əli Əhmədov bildirib ki, uydurma “soyqırımı” məsələsi ermənilərin yalan və saxtakarlıq üzərində qurulmuş siyasətinin tərkib hissəsidir. Onun sözlərinə görə, əslində tarix boyu ermənilər türklərə və azərbaycanlılara qarşı qırğınlar törətsə də, dünyaya özlərini məzlum xalq kimi təqdim etməyə çalışırlar. “Tarixdə çox yalanlar və saxtakarlıqlar olub. Lakin bunlar həmin yalan və saxtakarlığın üstü açılana qədər yaşayıb. Elə yalan və saxtakarlıqlar da olur ki, bəlkə də, üstünü açmağa ehtiyac yoxdur, çünki onun yalan olduğu hamıya məlumdur. Ancaq onu müxtəlif üsullarla yaşatmağa çalışanlar var. “Erməni soyqırımı” adını almış yalan və saxtakarlıq bu kateqoriyaya aid edilə biləcək ən klassik yalan və saxtakarlıq nümunəsidir. Başlanğıcı da yalan üzərində qurulub və bu günə qədər də saxta üsullarla yaşadılması üçün çox böyük səylər göstərilib”, - deyən Əli Əhmədovun sözlərinə görə, erməni uydurmalarının üstünün açılması üçün çox ciddi səylər göstərilir. Onun fikrincə, bəzi hallarda bu səylər bizim istədiyimiz qədər öz təsirli effektini verə bilmir.

“Amma açıq şəkildə bizi məmnun edən tendensiya görünməkdədir. Türkiyənin mövqelərinin güclənməsi, dünyada rolunun artması erməni yalanı və saxtakarlığının təkcə üstünün açılması yox, yaşamasının çətinləşməsi üçün təsirli fəaliyyət göstərən amilə çevrilməkdədir. Bu yaxınlarda Fransanın Konstitusiya Məhkəməsi Senatın uydurma “erməni soyqırımı”nı inkar edən vətəndaşların cəzalandırılması ilə bağlı qəbul etdiyi qərarı qüvvədən salmaqla sadəcə bu qərarın absurdluğunu etiraf etmək zorunda qalmayıb. Eyni zamanda, “erməni soyqırımı”nın saxta olduğunu etiraf etmək zorunda qalıb. İnanıram ki, bu, yeganə etiraf olmayacaq. Bunun arxasınca digər etiraflar da gələcək. Ən azından Türkiyənin və onun qardaşı Azərbaycanın bütün sahələrdə olduğu kimi bu sahədə də birliyinin möhkəmlənməsi bu saxtakarlığın yaşamasını çətinləşdirən və mümkünsüz edən amil kimi öz əhəmiyyətini getdikcə artıracaqdır. Bəşəriyyəti Türkiyənin, Azərbaycanın, dünyanın sağlam düşünən nümayəndələrinin səyləri ilə bu yalandan xilas etmək mümkün olacaq”, - deyə o vurğulayıb. YAP Sədrinin müavini hesab edir ki, biz məsələyə Türkiyə və Azərbaycan mövqeyindən yox, bütövlükdə dünya mövqeyindən baxmağa və təqdim etməyə çalışmalıyıq. Çünki erməni yalanı təkcə Türkiyəyə, Azərbaycana qarşı çevrilmiş yalan deyil. Bu yalan üzərində təcavüzlər qurulur, bu yalan dövlətlər arasında münasibətlərə bir saxtalıq, gərginlik gətirir və bütövlükdə beynəlxalq həyatın normal prinsiplər əsasında fəaliyyət göstərməsini çətinləşdirir. Ona görə də, bu problem də ümumbəşəri mahiyyət kəsb edir. Belə olan halda isə bəşəriyyətin ədalət səsini ucaltmaq istiqamətində addımlar atmaq bizim vəzifəmizdir.

“Bu tədbirin əsas məqsədi, ilk növbədə, bu yalana qarşı mübarizə aparan Türkiyə ilə birgə olduğumuzu nümayiş etdirməkdir. Biz, həmçinin, bu toplantını keçirməklə erməni saxtakarlığını və bu saxtakarlıq üzərində qurulan erməni təcavüzünə öz etirazımızı bildiririk. Çünki Azərbaycan da erməni saxtakarlığı üzərində qərar tutan təcavüzə tuş gəlib. Məmnunluq hissi ilə demək istəyirəm ki, Ermənistan tərəfindən işğal olunmuş Azərbaycan torpaqlarının azad olunmasında bizimlə yanaşı qardaş Türkiyənin də rolu və mövqeyi gündən-günə güclənməkdədir. Hesab edirəm ki, bu amil Azərbaycanın diplomatik və digər səyləri ilə birlikdə münaqişənin tezliklə həll olunmasına öz müsbət təsirini göstərəcək. Toplantını keçirməkdə digər məqsədimiz isə bəşəriyyəti, ayrı-ayrı dövlətlərin parlamentlərini bütün saxtakarlığa, xüsusilə erməni saxtakarlığına qarşı çıxmağa səsləməkdən ibarətdir”, - deyə Əli Əhmədov qeyd edib.

Vətəndaş Həmrəyliyi Partiyasının sədri, millət vəkili Sabir Rüstəmxanlı isə çıxışında bildirib ki, ötən əsrin əvvəllərində beynəlxalq güclər “erməni soyqırımı”ndan Osmanlı dövlətini parçalamaq üçün istifadə ediblər. Amma o zaman Atatürkün səyi nəticəsində Türkiyə dövləti quruldu. Onun sözlərinə görə, hazırda isə “erməni soyqırımı” məsələsinin ortaya atılması Türkiyəyə qarşı təzyiq formasıdır: “Bununla da, müxtəlif qüvvələr öz niyyətlərini həyata keçirməyə, Türkiyədən güzəşt qoparmağa çalışırlar. Onlar görürlər ki, Türkiyə Dağlıq Qarabağ məsələsində Azərbaycana güclü dəstək verir. Ona görə də, Qarabağ məsələsindən, ermənilərin təcavüzkarlığından diqqəti yayındırmaq üçün bu məsələni gündəmdə saxlayırlar. Bütün bunlara qarşı ciddi tədbirlər görülməlidir. Ermənilərin törətdiyi qırğınları dünyaya tanıtmaq üçün ciddi addımlar atılmalıdır. Mən təklif edirəm ki, Bakıda nəhəng soyqırımı abidəsi yaradılsın”.

Böyük Quruluş Partiyasının sədri, millət vəkili Fazil Mustafa isə Türkiyənin son illər gücləndiyini bildirib. Onun fikrincə, ABŞ prezidenti aprelin 24-dəki ənənəvi müraciətində soyqırımı ifadəsini işlətməyəcək. Millət vəkili bildirib ki, Türkiyə və Azərbaycanın güclənməsi erməni yalanlarının iflasa uğramasına da öz təsiri göstərməkdədir. Onun fikrincə, Fransa Konstitusiya məhkəməsinin məlum qərarı çox ciddi geri çəkilmək faktıdır. F.Mustafa deyib ki, qarşıdakı illərdə də belə addımı atan dövlətlər olacaq.

Millət vəkili Qənirə Paşayeva çıxışında belə bir tədbiri təşkil etdiyi üçün YAP-a təşəkkür edib. Onun sözlərinə görə, bu tədbirdə, iqtidar nümayəndələri ilə yanaşı bitərəf və müxalifət deputatlarının da iştirak etməsi məsələnin ümummilli problem olduğunu sübut edir. “Ümummilli məsələlərdə hər zaman bir yerdə olmalıyıq”, - deyən millət vəkili bildirib ki, bu problem Türkiyə ilə Azərbaycanın ortaq məsələsidir. “Artıq son illər görülən işlər nəticəsində “erməni soyqırımı”nın tanıdılması prosesi dayanıb. Əgər 10-15 il əvvəl hansısa dövlət bunu tanıyırdısa, indi belə hadisələr baş vermir. Təbii ki, burada Türkiyə və Azərbaycanın gördüyü işlər qiymətləndirilməlidir. Dövlətlərlə yanaşı, xaricdəki diasporamızın fəaliyyətini xüsusi qeyd etmək lazımdır. Fransa Konstitusiya Məhkəməsinin qərarı göstərir ki, vaxtilə “erməni soyqırımı”nı tanıyan dövlətlər indi bunu inkar edir. Bir sözlə, bu prosesdə Türkiyə-Azərbaycan birliyi öz bəhrəsini verir. Mən təklif edirəm ki, “erməni soyqırımı”nı tanıyan dövlətlərə müraciət qəbul olunsun və onlar da verdikləri qərarlardan imtina etsinlər”, - deyə Q.Paşayeva bildirib.

Sosial Rifah Partiyasının sədri, millət vəkili Xanhüseyn Kazımlı çıxışında Azərbaycan və Türkiyə xalqlarının erməni yalanlarına qarşı mübarizədə hər zaman həmrəy olduğunu bildirib. Onun sözlərinə görə, Ulu öndərimizin dediyi kimi, bir millətin iki dövləti sarsılmaz birlik nəticəsində bütün çətinlikləri dəf edəcək.

Millət vəkili Fəttah Heydərov dünyada erməni yalanlarının və erməni təcavüzünün ifşa edilməsi üçün Türkiyə və Azərbaycanın üzərinə böyük vəzifələrin düşdüyünü deyib. Onun sözlərinə görə, müasir informasiya texnologiyaları dövründə səmərəli fəaliyyətlə erməniləri ifşa etmək mümkündür. “Tarix boyu Azərbaycan və türk xalqlarına qarşı qətliamlar törədən ermənilər layiqli cavablarını almalıdırlar. Bu gün bəzi beynəlxalq qüvvlələr erməni uydurmalarından istifadə edərək bizə qarşı təzyiqlər göstərməyə çalışırlar. Biz bir olub güclü fəaliyyət göstərməklə belə halların qarşısını almalıyıq. Bir neçə ildən sonra Ermənistan uydurma iddialarının 100 illiyini qeyd etməyə hazırlaşır. Biz bu yalanı elə ifşa etməliyik ki, uydurma “erməni soyqırımı” dünya tarixinə ən uzunömürlü yalan kimi düşsün”, - deyə F.Heydərov vurğulayıb.

Milli Məclisin İnsan hüquqları komitəsinin sədri Rəbiyyət Aslanova bildirib ki, bəzən miflər və yalanlar siyasətə nüfuz edir. Onun sözlərinə görə, erməni yalanları da belə miflərdəndir: “Yalan total ola bilər, həqiqət isə universaldır. Erməni yalanlarının ifşa edilməsi üçün imkanlar mövcuddur və bu imkanlardan səmərəli istifadə olunmalıdır”.

R.Aslanovanın fikrincə, bu məsələdə gənclərin də üzərinə ciddi vəzifələr düşür.

Millət vəkili Asəf Hacıyev isə bildirib ki, uydurma “erməni soyqırımı”nı ifşa etmək üçün arxivlərdə kifayət qədər sənədlər mövcuddur. Onun fikrincə, Ermənistan arxivlərin açılmasına razılıq verməyəcək: “Amma həmin hadisələrlə bağlı Rusiyanın və digər dövlətlərin arxivlərində sənədlər var. Bu sənədləri ortaya çıxarıb onu dünyada təbliğ etmək lazımdır. Ona görə də, intellektlər bir araya gəlib işləməli, bu faktlarla erməni yalanlarını ifşa etməlidirlər”.

Tədbirdə çıxış edən Milli Məclisin sədr müavini, YAP İdarə Heyətinin üzvü Bahar Muradova uydurma “erməni soyqırımı”nın dünyada ifşa edilməsi ilə bağlı fikirlərini bildirib. O, vurğulayıb ki, erməni yalanlarının qarşısına çıxacaq qüvvə ümumtürk birliyinin gücüdür. “Ümummilli liderimiz Heydər Əliyev ümumtürk birliyi ideyasını irəli sürərək müəyyən addımlar atdı. Bu gün Prezident İlham Əliyev tərəfindən türk birliyi uğrunda böyük işlər görülür”, - deyə vitse-spiker vurğulayıb.

Çıxış edən Türkiyənin ölkəmizdəki fövqəladə və səlahiyyətli səfiri Hulusi Kılıç bu məsələdə göstərilən dəstəyə görə Azərbaycan dövlətinə təşəkkür edib. O, qeyd edib ki, uydurma “erməni soyqırımı”nın dünyada ifşa olunması istiqamətində Azərbaycan Türkiyəyə çox ciddi dəstək verir. Səfir bildirib ki, hər iki dövlətin birgə səyi ilə erməni saxtakarlığının ifşa olunması istiqamətində mühüm işlər görülür.

Nardar BAYRAMLI

Yeni Azərbaycan.- 2011.- 23 aprel.- S.3.