Azərbaycan dünyada analoqu olmayan iqtisadi inkişafa nail olmaqla, regionda və dünyada aparıcı dövlətlərdən birinə çevrilib

Bütün bu uğurlar Ulu öndər Heydər Əliyev və Onun siyasətinin dönməz davamçısı olan Prezident İlham Əliyevin fəaliyyətinin bəhrəsidir

Məlum olduğu kimi, cənab İlham Əliyevin Baş nazir təyin olunmasından 8 il ötdü. 2003-cü ildə Ulu öndər Heydər Əliyevin Özü qədər inandığı cənab İlham Əliyevin Baş nazir təyin olunması ilə bağlı Milli Məclisə müraciəti millət vəkilləri tərəfindən böyük razılıqla qarşılanmışdı. Azərbaycanın işıqlı sabahına inamın ifadəsi olan bu müraciət ali qanunvericilik orqanında müzakirələrdən sonra təsdiqini tapmışdı.

Həmin zaman cənab İlham Əliyevin Baş nazir təyin olunmasına razılıq verən Milli Məclis əslində, Ümummilli lider Heydər Əliyevin siyasi kursuna, dövlət quruculuğu konsepsiyasına yeni nəfəs verəcək strateji qələbələri hədəf seçmişdi. Çünki bu təyinata qədər Heydər Əliyev məktəbinin yetirməsi cənab İlham Əliyev Avropa Şurasında Azərbaycanın nümayəndə heyətinin rəhbəri, AŞPA-nın sədr müavini, büro üzvü, ARDNŞ-ın I vitse-prezidenti, Milli Olimpiya Komitəsinin Prezidenti kimi mühüm postlarda böyük nailiyyətlər əldə etmişdi.

2003-cü ilin avqustun 4-də Baş nazir təyin olunması ilə cənab İlham Əliyevin qlobal fəaliyyəti mahiyyətcə yeni keyfiyyət mərhələsinə keçdi və bu ilk növbədə xalqın iradəsilə müəyyənləşdi. Bu səbəbdən də, cənab İlham Əliyevin Baş nazir təyin edilməsinin bir neçə fundamental səbəbləri var idi.

- Birincisi, cənab İlham Əliyevin Baş nazir təyin edilməsi xalqın iradəsinin ifadəsi idi;

- İkincisi, bu təyinat xalqın Heydər Əliyev siyasi kursuna olan inamından və sədaqətindən doğurdu;

- Üçüncüsü, bu təyinat ölkədəki ictimai-siyasi sabitliyin qorunması və davamlı olmasına xidmət edirdi;

- Dördüncüsü, bu, müstəqilliyimizin dönməzliyinin təmin edilməsində İlham Əliyev şəxsiyyətinə olan xalqın inamı idi...

Azərbaycan xalqının iradəsi öz pozitiv nəticələrini çox gözlətmədi. ABŞ Prezidenti, Türkiyənin Baş naziri, Rusiyanın Prezidenti, İran hökuməti, Gürcüstan Prezidenti və digər ölkələr cənab İlham Əliyevin Baş nazir təyin olunmasını çox uğurlu seçim kimi qiymətləndirdilər və Onunla rasional əməkdaşlığa hazır olduqlarını bəyan etdilər...

2003-cü ilin oktyabrında xalqın böyük əksəriyyətinin səsi ilə Prezident seçilən İlham Əliyev bir çox cəhətləri ilə çoxlu sayda yerli və xarici ekspertlərin diqqətini cəlb etdi. Onun liderlik dövrünü olduqca əhatəli təhlil etdikdə ekspertlər haqlı olaraq, Prezident İlham Əliyevi yeniliklərə həssaslıq göstərən, rasional keyfiyyətləri özündə cəmləşdirən müasir lider kimi xarakterizə edirlər. Dövlət başçısında bu cür rasional, əlahiddə keyfiyyətlərin cəmləşməsi xarici siyasətdə və eləcə də, ölkə daxili demokratik proseslərin gedişində əsas leytmotivi təşkil edirdi ki, bu da beynəlxalq münasibətlər sistemində Azərbaycan üçün mühüm faktorlardan biri, bəlkə də, birincisi idi. Nəticədə Azərbaycan həm daxili siyasətdə, həm də beynəlxalq birliyə inteqrasiyada əməli nəticələrə nail oldu. İctimai-siyasi sabitlik davamlı xarakter aldı və bunun nəticəsi olaraq ölkədə qlobal layihələr gerçəkləşdi.

Ötən müddət ərzində Azərbaycan dünyada analoqu olmayan iqtisadi inkişafa nail olmaqla, regionda və dünyada aparıcı dövlətlərdən birinə çevrildi. Davamlı sosial-iqtisadi inkişaf regionların dinamik tərəqqisinə stimul verdi. Ölkədə demokratik proseslər dərinləşdi və bununla da, Azərbaycanın beynəlxalq birliyə inteqrasiyası keyfiyyətcə yeni mərhələyə yüksəldi...

Regional və beynəlxalq əməkdaşlığı prioritet seçən Prezident İlham Əliyev qısa müddət ərzində mürəkkəb geosiyasi şəraitdə Ulu öndər Heydər Əliyevin müəyyənləşdirdiyi strateji kursu böyük ustalıqla gerçəkliyə çevirdi. Bakı-Tbilisi-Ceyhan neft, ardınca isə Bakı-Tbilisi-Ərzurum qaz əsas ixrac boru kəmərlərinin həyata vəsiqə alması bu istiqamətdə yeni işlərə yol açdı. Bakı-Tbilisi-Qars dəmiryolu layihəsinin gerçəkləşməsinə start verilməsi isə bu mənada ən yaxşı nümunələrdəndir. İllərlə müzakirə olunan bu transmilli layihə Prezident İlham Əliyevin qətiyyəti sayəsində kağız üzərindəki layihə çərçivəsindən çıxaraq, yeni reallıq müstəvisinə keçdi.

İqtisadiyyat sahəsində isə aparılan islahatlar ölkənin maliyyə vəziyyətinin yaxşılaşmasını, dövlət büdcəsinin gəlirlərinin ildən-ilə artmasını təmin edib. Hazırda dövlət büdcəsinin gəlirləri 3493,2 milyon manat artırılıb. Cari ilin dövlət büdcəsinin gəlirləri 15554,2 milyon manat olacaq ki, bu da təsdiq edilmiş proqnoza nisbətən 29 faiz çoxdur.

Azərbaycanın iqtisadi uğurları dünyanın aparıcı maliyyə təsisatlarının diqqətindən də kənarda qalmayıb. Dünya Bankı və Beynəlxalq Maliyyə Korporasiyası tərəfindən hər il hazırlanan “Doing Business” reytinqinin 2009-cu il üçün hesabatında Azərbaycan dünya dövlətləri sırasında biznesin aparılması sahəsində ən uğurlu nəticələrə nail olmuş ölkə kimi qiymətləndirilib, ən islahatçı ölkə adına layiq görülüb. 2007-ci ilin fevral ayında Bakıya səfərə gələn “Doing Business” hesabatının müəlliflərinin rəhbəri Semeon Djankovu qəbul edən Prezident İlham Əliyev görüşdən sonra qeyd olunan hesabatda Azərbaycanın reytinqinin yaxşılaşdırılması ilə bağlı aidiyyəti dövlət orqanlarına müvafiq göstərişlər verib. Məhz, Prezident İlham Əliyevin məqsədyönlü tapşırıqlarının nəticəsi olaraq Azərbaycan 1 ildən sonra həmin reytinqdə 10 göstəricidən 7-si üzrə irəliləyiş əldə edərək lider oldu.

Son illərdə Azərbaycanın Prezidenti İlham Əliyevin Fərman və sərəncamları, qəbul olunmuş qanun və qərarlar da məhz, qeyri-neft sektorunun inkişafına yönəldilib. Bütün bu addımlar son nəticədə milli iqtisadiyyatın neft sektorundan asılılığının minimallaşdırılması və özəl sektorun inkişafına zəmin yaradıb.

Bu gün Azərbaycanda regionların sosial-iqtisadi inkişafı üçün Dövlət Proqramı həyata keçirilir. Dünyanın bir çox ölkələri ilə iqtisadi əməkdaşlıq qurulub. Ölkəmiz mötəbər beynəlxalq tədbirlərə ev sahibliyi edir. Bütün bunlar dünyanın Azərbaycana olan etibarının artması ilə şərtləndirilir. Bütün bu uğurlar Ulu öndər Heydər Əliyev və Onun siyasətinin dönməz davamçısı olan Prezident İlham Əliyevin fəaliyyətinin bəhrəsidir. Bu gün artıq Azərbaycanın iştirakı olmadan regionda hər hansı bir layihənin həyata keçirilməsi inandırıcı görünmür. Bu ölkənin iqtisadi qüdrəti və beynəlxalq aləmdəki nüfuzu ilə müəyyənləşir.

Bütün bunlar isə Ümummilli lider Heydər Əliyevin böyük uzaqgörənliklə söylədiyi “Mən İlham Əliyevə özüm qədər inanıram” fikrindən güc alır.

Aydın HÜSEYNOV,

YAP Siyasi Şurasının üzvü

Yeni Azərbaycan.- 2011.- 5 avqust.- S. 4.