Sabirabad rayonu yeni inkişaf erasına qədəm qoyub

Son dövrlər rayonda görülən işlər onu deməyə əsas verir ki, yaxın perspektivdə Sabirabad Muğanın ən abad, ən təmiz məkanlarından birinə çevriləcək və sakinlərin rifah halı daha da yaxşılaşacaq

Ümummilli lider Heydər Əliyevin əsasını qoyduğu və Prezident İlham Əliyev tərəfindən uğurla davam etdirilən daxili və xarici siyasət kursu Azərbaycanı nəinki regionun liderinə, eyni zamanda, dünyanın ən yüksək sürətlə inkişaf edən dövlətinə çevirib. Bu uğurlu siyasətin nəticəsidir ki, hazırda Azərbaycanın bütün guşələrində böyük tərəqqi hiss edilməkdədir. Prezident İlham Əliyevin imzaladığı regionların sosial-iqtisadi inkişafı üzrə Dövlət proqramları Azərbaycanın inkişafına böyük təkan verib. Bundan başqa, dövlət başçısının səfər etdiyi hər bir şəhər və rayonda yerli strukturların rəhbərlərinə sosial-iqtisadi inkişafa nail olmaq üçün verdiyi xüsusi tapşırıqlar da diqqət mərkəzindədir. Azərbaycan Respublikasının Prezidenti İlham Əliyevin Sədrliyi ilə keçirilən Nazirlər Kabinetinin 2011-ci ilin birinci yarısının sosial-iqtisadi yekunlarına həsr olunmuş iclasındakı nitqində dövlət başçısının dərin məzmunlu və proqram xarakterli tövsiyələri, sosial-iqtisadi inkişafla bağlı söylənilən faktlar və rəqəmlər belə bir fikri bir daha təsdiq edir ki, Azərbaycan nəinki regionda, hətta bütün dünyada aparıcı ölkə, Beynəlxalq Valyuta Fondunun və Dünya Bankının hesabatlarına əsasən isə bir nömrəli islahatçı ölkə kimi tanınıb. Ötən yarım ildə Azərbaycanda qeyri-neft sektorunda artımın 7,2 faiz olması, kənd təsərrüfatının 6,2 faiz, əhalinin pul gəlirlərinin 17 faiz artması, büdcə xərclərinin 20 milyard dollara çatması da bu fikri qətiyyətlə sübut edir ki, Azərbaycan dövləti düzgün yoldadır və bütün maneələri dəf edərək davamlı inkişaf mərhələsinə qədəm qoyub. Dünyada baş verən maliyyə və iqtisadi böhrana baxmayaraq, Azərbaycanın regionları yüksək makroiqtisadi göstəricilərini qorumaqdadır. Bu, özünü Sabirabad rayonunda da qabarıq şəkildə büruzə verir.

Prezident İlham Əliyevin səfərləri rayonda böyük canlanma yaradıb

Bu gün Sabirabad öz keçmiş şöhrətini qaytarmaq əzmindədir. Rayonda böyük tikinti-quruculuq və abadlıq işlərinə start verilib. Azərbaycan Respublikasının Prezidenti cənab İlham Əliyevin gündəlik qayğısı sayəsində Sabirabad rayonu yeni inkişaf erasına qədəm qoyub. Heç də təsadüfi deyil ki, dövlətimizin başçısı bu bölgədə görülən işləri daim diqqətdə saxlayır, Sabirabada və regionun digər rayonlarına mütəmadi səfərlər edərək yerindəcə tapşırıq və tövsiyələrini verir. Prezidentin səfərləri sakinlər arasında yüksək əhval-ruhiyyə yaradır, onları daha əzmlə və məhsuldar fəaliyyətə sövq edir.

Prezident İlham Əliyevin rayona bu ilin mayın 5-dəki səfəri də kifayət qədər əlamətdar olub. Məlum olduğu kimi, dövlət başçısı daşqına məruz qalmış Qasımbəyli kəndinə yeni çəkilmiş 15 kilometrlik asfalt yolun açılışında iştirak edib və həmin kənddə əsaslı təmir edilmiş tam orta məktəbin binası ilə tanış olıb, ictimaiyyətin nümayəndələri ilə görüşərək əhalini qayğılandıran problemlərlə maraqlanıb, lazımi tapşırıq və tövsiyələrini verib. Bu səfərin nəticəsi olaraq rayonda böyük canlanma yaranıb, abadlıq, tikinti və quruculuq işləri geniş vüsət alıb, infrastrukturun yeniləşməsi istiqamətində bir sıra tədbirlər həyata keçirilməyə başlanıb. Dövlət başçısının diqqət və qayğısı sayəsində təbii fəlakətin törətdiyi dağıntıların aradan qaldırılması istiqamətində xeyli iş görülüb. Subasmaya məruz qalan əksər evlərin yerində möhkəm özüllü 1010 yeni ev tikilib, 100 evdə bərpa-gücləndirmə işləri aparılıb, dəymiş ziyana görə əhaliyə 10 milyon manatdan çox kompensasiya verilib, 10 sosial obyektdə əsaslı təmir işləri başa çatdırılıb.

Cənab Prezidentin növbəti səfərindən sonra isə bu istiqamətdə işlər daha da güclənib. Ölkə başçısının göstərişi ilə daşqından ziyan çəkmiş 1164 nəfər rayon sakininə daha 1,5 milyon manat kompensasiya verilib, 276 yeni evin tikintisi nəzərdə tutulub. 318 evdə bərpa-gücləndirmə işləri görüləcək, 33 sosial obyektdə tikinti-təmir işləri aparılacaq ki, artıq bu tipli obyektlərdən 14-də inşaat işləri başlanıb. Dövlət başçısının tapşırığı ilə daşqına məruz qalmış Əsgərbəyli kənd məktəbinin tam orta məktəbə çevrilməsi üçün əlavə korpusun və həmin kənddə yeni tibb məntəqəsinin, poçt binasının tikintisi başa çatdırılmaq üzrədir.

Sabirabadda böyük tikinti meydançası

Yeri gəlmişkən qeyd edək ki, rayona səfərimizdə xüsusi diqqətimizi çəkən məqamlardan biri şübhəsiz ki, ərazidə aparılan böyük quruculuq və təmir işləri oldu. Rayon hazırda tikinti meydançasını xatırladır, desək, yanılmarıq. Rayonun görünüşünə xələl gətirən tikililər müvafiq plan üzrə yenidən qurulur, bütün binaların fəsadları gözəlləşdirilir. O cümlədən, Heydər Əliyev prospekti boyu yerləşən ictimai yaşayış binalarının üzlənməsi, plastik pəncərələrin qoyulması, dam örtüyünün müasir formada əsaslı təmiri və blokların suvanması, hasarların yenidən qurulması işləri aparılır.

Yolların yenidən qurulması işlərinə də başlanılıb. Hazırda Muradbəyli-Qasımbəyli və Narlıq-Qaraqaşlı istiqamətində yolların əsaslı təmiri davam etdirilir. Hacıqabul-Bəhrəmtəpə-Horadiz magistral avtomobil yolunun Sabirabad rayonundan keçən hissəsinin yenidən tikintisinə də başlanmaq üzrədir. Podratçı şirkət artıq müvafiq texnikanı və işçi qüvvəsini əraziyə yerləşdirib, bütün ölçmə işləri tamamlanıb.

Bölgəyə yeni körpü

Prezident İlham Əliyevin Kür çayının Cavad kəndi ərazisindən keçən hissəsində rayon mərkəzi ilə olan məsafəni dəfələrlə qısaldacaq yeni körpünün tikintisi barədə 25 may 2011-ci il tarixli Sərəncamı sabirabadlıların illərdən bəri qəlblərində bəslədikləri arzularının çin olmasıdır. Bu körpü Cavad, Yolçubəyli, Narlıq, Türkədi, Həsənlə, Əlicanlı və Zəngənə kəndlərinin 16 min nəfərdən çox əhalisi üçün və ümumilikdə sabirabadlılar üçün həyat deməkdir. Eyni zamanda, bu körpü digər rayonların da əhalisinin gündəlik gediş-gəlişlərini xeyli asanlaşdıracaq, bölgədə iş mühitinin əsaslı dərəcədə yaxşılaşmasına imkan verəcək. Artıq bu nəhəng körpünün tikintisinə ilkin hazırlıq işləri başlanıb.

Əhalinin təbii qaz və elektrik enejisi ilə təminatındakı problemlər həllini tapır

Etiraf olunmalıdır ki, görülən böyük işlərə baxmayaraq, bu gün bir sıra rayonların ucqar kəndlərində vətəndaşların enerji ilə fasiləsiz təmin olunmasında müəyyən çatışmazlıqlar var. Bu da bir sıra obyektiv və subyektiv səbəblərlə bağlıdır. Elə Sabirabad rayonunda ünsiyyətdə olduğumuz sakinləri də ən çox narahat edən məsələlərdən biri təbii qaza olan tələbatın yetərincə ödənməməsi idi. Amma deyə bilərik ki, artıq bununla bağlı şikayətlərə də son veriləcək. Çünki çox yaxın perspektivdə qaz problemi sabirabadlılar üçün tarixdə qalacaq. Elə bu məqsədlə rayonda geniş işlər həyata keçirilməkdədir. Belə ki, rayonun bütün yaşayış məntəqələrinə təbii qazın verilməsi işləri sürətləndirilib. Şəhərdə 16 çoxmərtəbəli yaşayış binasının qazlaşdırılması tamamlanmaq üzrədir. Şəhərin qaz xətti olmayan 27 küçəsindən 15-nə təbii qaz verilməsi üçün layihə-smeta sənədləri də hazırlanıb. Kürkəndi kəndinin 420 sakininə təbii qazın verilişi təmin edilib. Qalaqayın kəndinə mavi qazın verilməsi istiqamətində işlər davam etdirilir. Artıq 5 kənddə - Nərmankənd, Ulacalı, Şıxlar, Bulduq və Mürsəllidə qazlaşdırma işləri aparılır. Yaxın günlərdə isə daha 8 kənddə-Azadkənd, Beşdəli, Yaxa Dəllək, Minbaşı, Qarağac, Quruzma, Qaraqaşlı, Qəzlidə bu işə başlanacaq.

Əhalini dayanıqlı elektrik enerjisi ilə təmin etmək məqsədilə də xüsusi tədbirlər planı hazırlanıb həyata keçirilir. Cavad yarımstansiyası vasitəsilə elektrik enerjisi ilə təmin olunan 14 kəndin elektrik təsərrüfatının yenidən qurulması ilə bağlı layihələşmə işləri artıq yekunlaşıb və yaxın günlərdə işə başlanacaq.

Əhalinin içməli su ilə təchizatı yaxşılaşdırılır

Əhalinin təmiz içməli su ilə təminatı da xüsusi diqqət mərkəzində olan məsələlərdəndir. Bu günə qədər həyata keçirilmiş işləri yetərli saymayan rayon rəhbərliyi bu istiqamətdə təxirəsalınmaz tədbirlərə start verib. Prezidentin tapşırığı ilə yaxın vaxtlarda Sabirabad şəhərinin əhalisi üçün uzun illər problemə çevrilmiş, həm də yoluxucu xəstəlik mənbəyi olan “Axmaz” adlanan su hövzəsinin qurudulmasına başlanacaq. Nazirlər Kabinetinin qərarı ilə bu məqsəd üçün bir milyon manat vəsait ayrılıb. Eyni zamanda, Sabirabad şəhərinin su və kanalizasiya sistemi də yenidən qurulacaqdır. Bu istiqamətdə də işlərə start verilib. Su təmizləyici qurğuların və nasos stansiyaların yerləri müəyyənləşdirilib, şəhərin müxtəlif yerlərində 8 kanalizasiya nasos stansiyasının tikintisi üçün torpaq sahəsi də ayrılıb.

Təhsilin yüksək uğurları

Azərbaycanda təhsil sahəsinin inkişafı, bacarıqlı kadrların yetişdirilməsinə diqqət daim Ulu öndər Heydər Əliyevin həyata keçirdiyi siyasətin tərkib hissəsi olub. Ümummilli liderimiz deyirdi ki, “Təhsil millətin gələcəyidir”. Məhz Heydər Əliyevin bu sahədə əsasını qoyduğu işlər, Onun təhsil sisteminin inkişafı üçün həyata keçirdiyi siyasət bu gün də Prezident İlham Əliyev tərəfindən uğurla davam etdirilir. Prezidentimizin tapşırıq və göstərişlərinə uyğun olaraq, təhsilin inkişaf proqramları hazırlanır, Azərbaycanın təhsil sistemi qabaqcıl Avropa standartlarına uyğunlaşdırılır, təhsil müəssisələri müasirləşdirilir. Bu istiqamətdə Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisinin üzvü Mehriban xanım Əliyevanın da fəaliyyəti danılmazdır. Onun birbaşa təşəbbüsü və Heydər Əliyev Fondunun həyata keçirdiyi “Yeniləşən Azərbaycana yeni məktəb” layihəsi çərçivəsində yüzlərlə orta məktəb tikilib, ölkəmizin bir çox yerlərində təhsil müəssisələri yenidən qurulub, əsaslı təmir olunub.

Bu işlər Sabirabad rayonunda da geniş vüsət almaqdadır. Belə ki, rayonun M.Ə.Sabir adına məktəb həm görünüşünə, həm də istismar müddətini başa vurduğuna görə artıq sökülüb. Yerində Heydər Əliyev Fondunun dəstəyi ilə üçmərtəbəli 1200 şagird yerlik ən müasir formada məktəb inşa ediləcək. Yuxarı Axtaçı kəndində 250 şagird yerlik yeni məktəb binasının tikintisi sürətlə aparılır. Bu təhsil ocağının yeni dərs ilinədək istifadəyə verilməsi nəzərdə tutulub. Muradbəyli kənd tam orta məktəbinin əsaslı təmiri də başa çatdırılmaq üzrədir. Zəngənə kənd tam orta və Surxayoba kənd ümumi orta məktəblərində də əsaslı təmir işləri yeni dərs ilinədək yekunlaşacaq. Şəhərin 4 saylı və Azadkənd uşaq baxçaları binalarının əsaslı təmiri də yaxın vaxtlarda başa çatdırılacaq. Və görülən bu işlər artıq savadlı gənclərin yetişdirilməsində də özünü göstərir. Əgər bu günə qədər ali təhsil məktəblərinə qəbul imtahanlarında iştirak edən rayon orta təhsil məktəblərinin şagirdləri arasında ən yaxşı halda 500 baldan artıq bal toplayanlara rast gəlmək çətin bir məsələyə çevrilirdisə, artıq bu il 5 nəfər 600-dan artıq bal yığıb. Bu da rayon təhsili üçün rekord göstərici sayıla bilər.

Sahibkarlığın inkişafı diqqət mərkəzindədir

Azərbaycanda sahibkarlığın inkişafı Prezident İlham Əliyevin diqqət mərkəzində saxladığı və xüsusi əhəmiyyət verdiyi istiqamətlərdən biridir. Dövlət başçısı dəfələrlə bəyan edib ki, Azərbaycanın inkişaf etmiş ölkəyə çevrilməsi üçün sahibkarlığın inkişafı böyük önəm daşıyır. Təsadüfi deyil ki, Prezident İlham Əliyevin bu posta seçildiyi 2003-cü ildən bəri digər sahələr kimi, sahibkarlıq da böyük inkişaf yolu keçib, bu sahədə mövcud problemlərin həlli istiqamətində işlər xüsusi diqqətdə saxlanılıb, qeydiyyat probleminin həlli üçün “vahid pəncərə” sistemi tətbiq olunub. Sabirabad rayonunda da bu sahəyə xüsusi diqqət göstərilir. Rayonda sahibkarlar üçün məsləhət və marketinq xidmətləri göstərilib, yerli xammallar və ehtiyatlar nəzərə alınaraq investorların rayona cəlb olunması üçün şərait yaradılmaqla qeyri-dövlət sektorunun potensialından maksimum istifadə olunub.

Fermerlər təbii fəlakətin fəsadlarını tez aradan qaldırıb

Azərbaycan Prezidenti İlham Əliyevin kənd təsərrüfatının inkişafı üçün qəbul etdiyi qərarlar və onların icrası bu sahədə əsaslı dönüş kimi qiymətləndirilə bilər. Sabirabad rayonunda kənd təsərrüfatının inkişafı istiqamətində görülən işlər öz məntiqi nəticəsini verməkdədir. Sirr deyil ki, cəmi bir il öncə təbii fəlakət Sabirabad rayonuna da çox ciddi ziyan vurmuşdu. Hətta bir çoxları bu fəlakətin ağır nəticələrinin aradan qaldırılması üçün bir neçə il vaxt tələb olunacağı yönündə pessimist proqnozlar da səsləndirirdilər. Amma dövlətin iradəsi və görülən təxirəsalınmaz tədbirlər bu proqnozları alt-üst etdi. Selin ziyan vurduğu ərazilər isə bu il öz məhsuldarlığı ilə diqqət çəkdi. Rayonda 55470 hektarda əkin aparılıb ki, ondan da 17838 hektarını taxıl əkinləri təşkil edib. Hər hektardan 30,3 sentner olmaqla cəmi 54,1 min ton taxıl məhsulu toplanıb. Bu da 2010-cu illə müqayisədə 19 min ton çoxdur.

Ümumiyyətlə isə Sabirabadda hazırda kənd təsərrüfatı yönümlü 7 kooperativ, 116 kiçik müəssisə, 79 fermer təsərrüfatı, ümumilikdə 260 təsərrüfat subyekti qeydə alınıb. Dövlət başçısının tapşırıqlarına uyğun olaraq iri təsərrüfatların təşkili istiqamətində tədbirlər görülüb. Rayonun Çol Beşdəli və Axısxa kəndlərində 500 hektara yaxın pay torpağının könüllük əsasında birləşdirilməklə kooperativlər təşkil edilib.

Rayon rəhbərliyinin vətəndaşlarla görüşləri ənənəvi hal alıb

Sabirabada bu səfərimiz Əhmədabad kəndindən başlamışdı. Rayon İcra Hakimiyyətinin başçısı və bütün idarə, müəssisə rəhbərləri kənd sakinləri ilə görüşürdü. Rayon rəhbərliyi hər bir sakinin şikayətinə, təklifinə xüsusi diqqətlə yanaşır, onların həlli yolları barədə fikir mübadiləsi aparılırdı. Görüşdə məlumat verildi ki, belə tədbirlərin keçirilməsi artıq rayonda ənənə halını alıb. Bundan əvvəl 32 kəndin sakinləri ilə görüşlər də birbaşa ünsiyyət, açıq diskussiya şəraitində keçib və demək olar ki, özünü doğruldub. Bu arada təşkil olunan çoxsaylı qəbullarda və səyyar görüşlərdə isə rəhbərliklə sakinlər arasında açıq söhbətlər qarşıda duran konkret vəzifələrin müəyyən edilməsi baxımından faydalı olub. Elə bu görüşün də faydalı olacağına və konkret nəticələr verəcəyinə kənd sakinlərinin inamı olduqca böyük idi. Elə rayon İcra Hakimiyyətinin başçısı Nazim İsmayılov da sakinlərə müraciətində yaxın perspektivdə hər şeyin indikindən daha yaxşı olacağını vəd verdi: “Qarşımızda duran vəzifələrdən ən əsası Sabirabadı ən yaxın dövrdə Muğanın ən abad, ən təmiz mərkəzinə çevirmək və sakinlərin rifah halını daha da yaxşılaşdırmaqdır. Dövlətin və şəxsən cənab Prezident İlham Əliyevin diqqət və qayğısı sayəsində buna nail olacağımıza inancımız sonsuzdur”.

Aqşin ŞAHİNOĞLU

Yeni Azərbaycan.- 2011.- 10 avqust.- S. 6.