Şəmkir rayonu 2011-ci ilin birinci yarısında uğurlu sosial-iqtisadi nəticələr qazanıb

Ümummilli lider Heydər Əliyevin əsasını qoyduğu və Prezident İlham Əliyev tərəfindən uğurla davam etdirilən daxili və xarici siyasət kursu Azərbaycanı nəinki regionun liderinə, eyni zamanda, dünyanın ən yüksək sürətlə inkişaf edən dövlətinə çevirib. Bu uğurlu siyasətin nəticəsidir ki, hazırda Azərbaycanın bütün guşələrində böyük tərəqqi hiss edilməkdədir. Prezident İlham Əliyevin imzaladığı regionların sosial-iqtisadi inkişafı üzrə Dövlət proqramları Azərbaycanın inkişafına böyük təkan verib. Bundan başqa, dövlət başçısının səfər etdiyi hər bir şəhər və rayonda yerli strukturların rəhbərlərinə sosial-iqtisadi inkişafa nail olmaq üçün verdiyi xüsusi tapşırıqlar da diqqət mərkəzindədir. Azərbaycan Respublikasının Prezidenti İlham Əliyevin Sədrliyi ilə Nazirlər Kabinetinin 2011-ci ilin birinci yarısının sosial-iqtisadi yekunlarına həsr olunmuş iclasındakı nitqində dövlət başçısının dərin məzmunlu və proqram xarakterli tövsiyələri, sosial-iqtisadi inkişafla bağlı söylənilən faktlar və rəqəmlər belə bir fikri bir daha təsdiq edir ki, Azərbaycan nəinki regionda, hətta bütün dünyada aparıcı ölkə, Beynəlxalq Valyuta Fondunun və Dünya Bankının hesabatlarına əsasən isə bir nömrəli islahatçı ölkə kimi tanınıb. Dünyada baş verən maliyyə və iqtisadi böhrana baxmayaraq, Azərbaycan yüksək makroiqtisadi göstəricilərini qorumaqdadır. Bu inkişaf özünü rayonlarımızın həyatında baş verən müsbət dəyişikliklərdə də göstərir. Son illərdə böyük inkişaf yolu keçən rayonlarımızdan biri də Şəmkir rayonudur.

Prezident İlham Əliyev tərəfindən həyata keçirilən uğurlu iqtisadi siyasət nəticəsində respublikamızda tərəqqi və sıçrayışlı inkişaf daha da sürətlənib. 2011-ci ilin birinci yarısında ölkəmizin bütün makroiqtisadi sahələrində inkişaf pozitiv meyilləri qeydə alınıb, islahatların dinamikası geniş vüsət alıb. Respublikamızda dərin xarakter alan yeni istehsal, xidmət və emal müəssisələrinin yaradılması, sosial nfrastrukturun yeniləşdirilməsi, kommunal sektorun yeni dövrün tələblərinə uyğun qurulması ilə bağlı həyata keçirilən proqramlar Şəmkir rayonunun da sosial-iqtisadi həyatında mühüm dönüşə səbəb olub.

2011-ci ilin birinci yarısı Şəmkirdə sürətli və dinamik inkişaf dövrü kimi yadda qalıb. Hesabat dövrü ərzində rayonda tikinti-quruculuq işləri davam etdirilib, sosial-iqtisadi sahələrində mühüm nailiyyətlər əldə olunub. Ötən ilin eyni dövrü ilə müqayisədə ümumi daxili məhsul (ÜDM) istehsalının həcmi 14,4 faiz artaraq 138 milyon 100 min manat təşkil edib. Adambaşına düşən ÜDM 12,4 faiz artaraq 698 manata çatıb.

Şəmkir rayonu əsasən kənd təsərrüfatı rayonu kimi ixtisaslaşıb. Rayon üzrə 181 min 610 hektar torpaq sahəsinin 59 min 504 hektarı dövlət mülkiyyətində, 73 min 377 hektarı bələdiyyə mülkiyyətində, 48 min 729 hektarı isə xüsusi mülkiyyətdə olan torpaqlardır. Əkinə yararlı 44 min 680 hektar torpaq sahəsinin 38 min 394 hektarı suvarma suyu ilə təmin edilib. Bu uğurlarda rayonda fəaliyyət göstərən 3 böyük suvarma idarəsinin- Şəmkir suvarma sistemləri, Şəmkir Maşın kanal və Subartezian quyularının istismarı idarələrinin kollektivlərinin böyük əməyi olub.

Son illər rayonda kənd təsərrüfatının dinamik inkişafı müşahidə olunur. Heyvandarlıq və bitkiçilik sahəsində yüksək göstəricilər əldə olunub. Birinci 6 ayda kənd təsərrüfatı məhsullarının həcmi 7,7 faiz artıb. Bu il 17077 hektar sahədə taxıl əkilib ki, bunun 12627 hektarı buğda, 4400 hektarı arpa, 50 hektarı isə vələmir olub. Hazırda rayonda taxıl biçini başa çatmaqdadır. Hər hektardan məhsuldarlıq 39,5 sentner təşkil edib. Taxıl biçininin itkisiz başa çatdırılmasında “Aqrolizinq”in Şəmkir filialının böyük əməyi olub. Bundan başqa, rayonda 2337 hektar sahədə qarğıdalı, 6389 hektar sahədə kartof, 6124 hektar sahədə tərəvəz, 251 hektar sahədə bostan bitgiləri, 588 hektar sahədə günəbaxan, 10 min 93 hektar sahədə isə yem bitkiləri əkilmişdir. İndiyədək əkilmiş sahələrdən 44 min 806 ton kartof, 41 min 739 ton tərəvəz və 3593 ton meyvə istehsal olunub. Sarıtəpə kəndi yaxınlığında “Azaqro” MMC-yə məxsus istilikxana kompleksində tərəvəz məhsulları istehsal olunur. Kənd əməkçiləri tərəfindən 4 min hektardan çox sahədə istilikxanalar tikilib və həmin sahədə bostan və tərəvəz məhsulları yetişdirilir. İstehsal olunan məhsullar daxili bazarlarla yanaşı, xarici ölkələrə də ixrac olunur.

Dövlət proqramlarının icrası inkişafı sürətləndirib, iş yerlərinin sayı artır...

Şəmkirdə üzümçülüyün və şərabçılığın inkişafına başlıca diqqət yetirilir. Rayon üzrə 511 hektar sahədə üzüm bağı salınıb və “Şərq Ulduzu” MMC tərəfindən istehsal gücü 2000 ton olan, alman texnologiyası əsasında üzüm emalı zavodu fəaliyyət göstərir. Hazırda müəssisədə 9 növ şərab və konyak məhsulları istehsal olunur. Rayon üzrə iri buynuzlu mal-qaranın sayı 59673 başa, qoyun və keçilərin sayı isə 278170 başa çatıb. Yanvar - iyun ayları ərzində 3924 ton - ət (diri çəkidə), 21232 ton - süd, 454 ton - yun, 21 milyon 364 ədəd - yumurta istehsal edilib. Şəmkir rayonunun istehsalçılarına öz məhsullarını əlverişli şəkildə satmaq üçün Bakı şəhərinin Xətai rayonundakı kənd təsərrüfatı məhsulları yarmarkasında geniş yer təşkil olunub. Hər həftə 80-90 tondan artıq məhsul Bakı şəhərinə göndərilir. 2011-ci ilin birinci yarım ili ərzində 1624 ton müxtəlif çeşidli kənd təsərrüfatı məhsulları satış üçün Bakı şəhərinə göndərilib.

Regionların sosial-iqtisadi inkişafı ilə bağlı ikinci Dövlət Proqramının qəbul edildiyi vaxtdan indiyədək rayonda 5529-dan çox iş yeri açılıb ki, bunun da 1848-i daimi iş yerləridir. 2011-cu ilin birinci yarısında rayon üzrə 1233 iş yeri açılıb, bundan 381-i daimi iş yeri olub.

Rayonda sosial proqramların icrası da uğurla həyata keçirilir. 2011-ci ilin birinci yarısında 2775 nəfərə ünvanlı sosial yardım verilib.

Şəmkir rayonunda sənaye məhsullarının əsas hissəsi istehsal gücü 380 meqavat olan Şəmkir Su Elektrik Stansiyası və istehsal gücü 150 meqavat olan Yenikənd Su elektrik stansiyasında istehsal olunur. 2011-ci ilin 6 ayı ərzində Şəmkir SES üzrə proqnoza qarşı 634 milyon kilovat saat əvəzinə 640 milyon kilovat saat elektrik enerjisi istehsal edilib, plana 101 faiz əməl olunub. Yenikənd SES üzrə 251 milyon kilovat saata qarşı, 256 milyon kilovat saat elektrik enerjisi istehsal edilərək plana 102 faiz əməl edilib. Respublikamızda həyata keçirilən ən böyük iqtisadi layihələrdən biri kimi Şəmkirçay dəryaçasının tikintisi davam edir. Ümumi su tutumu 175 milyon kub metr, bəndin hündürlüyü 190 metr olacaq bu dəryaçanın tikintisi başa çatdıqdan sonra Şəmkir və ətraf rayonlarda 75 min hektar torpaq sahəsi suvarma suyu ilə təmin olunacaq. Artıq Gəncə və Şəmkir şəhərinin içməli su təchizatına hazırlıq işləri aparılır. Dəryaçanın qarşısında qurulacaq 6 ədəd hidroturbin vasitəsilə 49 meqavat elektrik enerjisi istehsal olunacaqdır. Dəryaçadan çəkiləcək sağ və sol sahil kanallarının çəkilişinə son hazırlıq işləri görülür. Rayonun ərazisində qiymətli metalların və tikinti materiallarının axtarış və kəşfiyyat işləri davam etdirilir.

Şəmkir rayonunda geniş quruculuq, abadlıq, tikinti quraşdırma işləri ötən müddət ərzində uğurla həyata keçirilib. Bakı-Qazax avtomobil yolunun Şəmkir rayonu ərazisindən keçən 42 km-lik hissəsi yenidən qurularaq asfalt beton örtüyü salınıb. Bakı-Qazax avtomobil yolundan Şəmkirçay dəryaçasına, Şəmkirçay dəryaçasından isə rayonun Nərimanlı kəndinə yeni avtomobil yolu çəkilib. Şəmkir-Gədəbəy avtomobil yolunun Şəmkir rayonu ərazisindən keçən hissəsinə, Şəmkir-Posanlı, Şəmkir-Sərxan avtomobil yollarına asfalt beton örtüyü çəkilib. Şəmkir-Dəllər qəsəbə yoluna, Zəyəm-Düyərli yolunun 1,5 km, Dəllər-Zəyəm yolunun 1,1 km hissəsinə, Şəmkir şəhərinin Əzizbəyov, R.Rəhimov, M.Füzuli, Ə.Cavad, M.C.Paşayev küçələrinə asfalt salınıb, M.Əsədov və Sevil Qazıyeva küçələrində asfalt salınmasına hazırlıq işləri görülür.

Şəmkirdə yeni yollar çəkilir, infrastruktur yenidən qurulur...

Şəmkir-Yeni Göyçə-Dağ-Cəyir, Dağ-Cəyir-Günəşli avtomobil yolları əsaslı təmir olunub, Kür qəsəbəsinə gedən 12 km-lik avtomobil yolunun əsaslı təmiri Dövlət Proqramına daxil edilib.

Hazırda Şəmkir şəhərinin S.Vurğun küçəsində yenidənqurma işləri aparılır, o cümlədən, səkilərə tamet döşənir, bardurlar yenisi ilə əvəz olunur, su arxları təzələnir, binaların fasad hissələri müasir üslubda abadlaşdırılır.

Rayon əhalisinin təbii qaz və elektrik enerjisi ilə təminatı əhəmiyyətli dərəcədə yaxşılaşdırılıb. Rayonun 37 yaşayış məntəqəsində 30242 abonentin mənzilinə təbii qaz verilir. Rayon ərazisində son altı ay ərzində 1146 mənzilə təbii qaz verilib. Hazırda rayon əhalisinin 95 faizi qazdan istifadə edir. Cari ildə 4 yaşayış məntəqəsinə təbii qazın verilməsi nəzərdə tutulub. İlin sonuna kimi Qapanlı, Çaparlı, Məşədi Hüseynli və Qılıncbəyli kəndlərinə təbii qaz verilməsi təmin ediləcək.

Hesabat dövründə rayonda 20 km məsafədən elektrik verilişi xətləri təmir edilib, 1,1 km uzunluğunda kabel xətləri çəkilib, 127 ədəd yeni sayğac quraşdırılıb, 198 ədəd sayğac dəyişdirilib. Hazırda Dəllər-Daşbulaq kəndində də elektrik təchizatı yenidən qurulur, köhnə xətlər yeni sip kabellərlə əvəz olunur. Zədəli və istifadəyə yararsız olan 33 ədəd ağac dayaqlar yenisi ilə əvəz olunub. Görülmüş tədbirlər nəticəsində 2011-ci ilin iyun ayında təbii qazın dəyərinin ödənişi 145,1 faiz, elektrik enerjisinin ödənişi isə 100,10 faiz olub.

Birinci yarımillikdə rayon üzrə 7 milyon 445 min manatlıq tikinti-quraşdırma işləri aparılıb. Ötən ilin eyni dövrü ilə müqayisədə tikinti-quraşdırma işlərinin həcmi 47,7 faiz, pullu xidmətlərin həcmi 10 faiz, əmtəə dövriyyəsinin həcmi 12 faiz artıb.

Poçt və rabitə müəssisələri tərəfindən 697 min manatlıq xidmət göstərilib ki, bu da ötən ilin eyni dövrü ilə müqayisədə 61,3 faiz çoxdur. Rayonda kənd ATS-lərinin əksəriyyəti yeni elektron ATS-lərlə əvəz olunub, Mahmudlu və Yeni Həyat kəndlərində yeni elektron ATS-lərin quraşdırılması ilin sonunadək başa çatdırılacaq.

Rayonda əhalinin su təchizatının yaxşılaşdırılması istiqamətində tədbirlər davam etdirilib. Zəyəm çayından Tatar kəndinə 11 km məsafədə, Təzəkənd kəndində 4 km məsafədə içməli su xətləri istifadəyə verilib. Şəhəri içməli su ilə təchiz edən əsas su kəməri əsaslı təmir olunub, Nizami küçəsində yerləşən kəhrizdə təmir bərpa işləri aparılıb, peşə məktəbi istiqamətində 1,6 km məsafədə su xətti əsaslı təmir olunaraq borular yenisi ilə əvəz olunub.

Rayonda abadlıq-quruculuq işləri sürətlənib...

Şəmkir şəhəri son illər aparılan quruculuq və abadlıq işləri sayəsində sürətlə inkişaf edir. Ona görə də, şəhərin təmiz və abad saxlanılması məqsədi ilə Şəmkir rayon İcra Hakimiyyəti Başçısının 01 iyun 2009-cu il tarixli 106-nömrəli sərəncamı ilə Qərargah yaradılıb, küçə və parklar rayonun idarə və müəssisələrinə təhkim olunub. Hər həftənin 4-cü günləri rayon Qərargahının iclaslarında şəhərin təmizliyi və abadlığı sahəsində görülən işlər və mövcud vəziyyət ətraflı təhlil edilir. Şəmkir şəhərinin mərkəzi küçələrində və parklarında səliqə-səhman yaradılır.

Ötən 6 ay rayonda təhsil sistemi irəliləyişlərlə də yadda qalıb. Rayonun 81 ümumtəhsil məktəbindən 57-i yenidən tikilib və əsaslı təmir olunub. Son bir il ərzində Təzəkənd kəndində 960, Zəyəm-Cırdaxan kəndində 1200, Dəllər qəsəbəsində 880 şagird yerlik məktəb binaları istifadəyə verilib. Qapanlı kəndində 460 şagird yerlik yeni məktəb binasının tikintisi başa çatdırılaraq, istifadəyə hazır vəziyyətə gətirilib. Abbaslı, Düyərli və Şeidlər kəndlərində yeni məktəb binaları tikintisinə başlanılacaq.

Heydər Əliyev Fondunun vəsaiti hesabına Dəllər qəsəbəsində tikilmiş yeni məktəb binasında Bakı-Oksford məktəbinin filialı fəaliyyətə başlayıb. Hazırda həmin məktəbdə 62 nəfər şagird təhsil alır.

Səhiyyə sistemində aparılan islahatlar nəticəsində səhiyyə müəssisələri yeni avadanlıqlarla təchiz edilib. Hazırda rayonda əhaliyə 12 xəstəxana, 32 həkim məntəqəsi, 27 feldşer-mama məntəqəsi tibbi xidmət göstərir. Rayonda səhiyyənin maddi-texniki bazasının möhkəmləndirilməsi, əhaliyə göstərilən tibbi xidmətin keyfiyyətini xeyli yaxşılaşdırılıb. Regionların sosial-iqtisadi inkişafı Dövlət Proqramına uyğun olaraq rayonda yeni doğum evinin, poliklinikanın tikintisi, Yoluxucu xəstəliklər xəstəxanasının və Kür qəsəbə xəstəxanasının əsaslı təmiri nəzərdə tutulub.

Son 6 ayda rayonun mədəniyyət müəssisələrinin maddi-texniki bazasının yaxşılaşdırılması diqqət mərkəzində saxlanılıb. Şəhər Mədəniyyət evinə, tarix-diyarşünaslıq muzeyinə yeni mebel, kompüter və digər inventarlar alınıb. 2006-cı ilin noyabr ayından rayonda fəaliyyət göstərən Heydər Əliyev Muzeyində milli-vətənpərvərlik mövzusunda kütləvi tədbirləri keçirilir. 2011-ci ilin iyul ayından etibarən Heydər Əliyev Muzeyi Heydər Əliyev Mərkəzinə çevrilib. Mərkəzdə Ulu öndərin zəngin irsi və fəaliyyəti ilə bağlı arxiv, dövrü mətbuat materialları, video-foto sənədləri və digər materialları toplayan 15 nəfərdən ibarət təhqiqat qrupu yaradılıb, Mərkəz texniki avadanlıqlarla təchiz olunub. Burada kompüter və ingilis dili kursları fəaliyyət göstərir. Həmçinin, Mərkəzdə Ulu öndərin həyat və fəaliyyəti ilə bağlı kitabxana yaradılıb.

Şəmkirdə Yeni Azərbaycan Partiyasına böyük inam və etimad mövcuddur

Şəmkir rayonunda yüksək siyasi aktivlik, ictimai-siyasi fəallıq müşahidə olunur. Rayon sakinləri ictimai-siyasi proseslərdə yaxından iştirak edərək ölkəmizin yüksək inkişafı və güclənməsinə xidmət edən bütün təşəbbüslərə dəstək verirlər. Respublikamızın əsas aparıcı siyasi təşkilatı olan Yeni Azərbaycan Partiyasına (YAP) dərin inam və etibar şəmkirlilərdə partiya sıralarına axını sürətləndirib. Ümummilli lider Heydər Əliyev ideyalarına sadiq qalan Şəmkir sakinləri ictimai-siyasi, iqtisadi-sosial proseslərdə öz fəallıqları ilə həmişə seçiliblər. Onlar indiyə kimi keçirilən bütün seçkilərdə Ulu öndərin davamlı siyasi kursuna, bu siyasəti yeni inkişaf mərhələsində gücləndirən Prezident İlham Əliyevə və hakim partiyaya sədaqətlərini nümayiş etdiriblər.

Şəmkirdə YAP-ın üzvü olmaq istəyən insanların sayı hər il durmadan artır. Hazırda YAP Şəmkir rayon təşkilatı öz sıralarında 7850 nəfəri birləşdirir. 125 ilk partiya təşkilatında sıx birləşən YAP fəalları partiya quruculuğuna öz töhfələrini verməyə çalışırlar. Bunun nəticəsidir ki, son illərdə YAP Şəmkir rayon təşkilatına üzv qəbul olunanların, xüsusilə də, gənclərin güclü axını başlayıb. Hazırda rayon təşkilatında 2164 nəfər gənc təmsil olunur. Gənclər öz təşəbbüskarlığı, siyasi fəallıqları ilə böyük təcrübə əldə ediblər.

Rayonda fəaliyyət göstərən Heydər Əliyev Məktəbi də davamlı olaraq müxtəlif seminar və konfranslar təşkil edir. Bu cür tədbirlər gənclərdə xüsusi maraq oyadır, Ulu öndərin müəyyən etdiyi sabitlik və inkişaf strategiyasının mühüm nəticələri onların zəngin biliklər əldə etməsi baxımından böyük əhəmiyyət kəsb edir.

YAP Şəmkir rayon təşkilatında qadınlar da öz fəallıqları ilə seçilirlər. 3846 qadının üzv olduğu rayon təşkilatında zərif cinsin nümayəndələrinin birbaşa təşəbbüsü ilə müntəzəm olaraq müxtəlif tədbir və seminarlar təşkil olunur, ölkə həyatının inkişafına səbəb olan aksiyalar keçirilir. Ümumiyyətlə, rayonda siyasi fəallıq həmişə olduğu kimi, yüksək olaraq qalmaqdadır. Şəmkirlilər dərin inam və qətiyyətlə Yeni Azərbaycan Partiyasının Sədri, Cənab Prezident İlham Əliyevin həyata keçirdiyi mükəmməl islahatları dəstəkləyirlər, respublikamızın tərəqqisi və yüksək sosial rifahı naminə YAP-a böyük etimad göstərirlər.

ELBRUS CƏFƏRLİ

Yeni Azərbaycan.- 2011.- 26 avqust.- S. 4.