Vətənimi sevərək, onun layiqli övladı olmağa çalışmışam

Aysel Teymurzadə: Yeni Azərbaycan Partiyasının sıralarında təmsil olunmaq mənim üçün çox böyük fəxrdir

Aysel Teymurzadə Azərbaycan, eyni zamanda, dünya tamaşaçısına ilk dəfə 2009-cu ilin “Eurovision” mahnı müsabiqəsinin hitinə çevrilən “Always” mahnısı ilə tanınıb. Məşhur mahnı müsabiqəsində Azərbaycana ilk dəfə üçüncülüyü qazandıran gənc soydaşımız 1989-cu il aprelin 25-də Bakı şəhərində anadan olub. Üzgüçülük, bədii gimnastika ilə məşğul olub, balet məktəbində dərs alıb. 9 yaşında incəsənət məktəbinə daxil olub, 12 yaşında məktəbin həndbol komandasına üzv qəbul olunub və idmanla ciddi məşğul olmaq fikrinə düşüb. Eyni zamanda, xarici dilləri öyrənməyə başlayıb, hazırda ingilis, alman, ispan, rus və türk dillərində danışa bilir. 14 yaşından xoreoqrafiya ilə məşğul olmağa başlayıb. 2006-cı ildə Bakı “İntellekt” liseyini bitirib. 2001-2005-ci illərdə fortepiano dərsləri alıb. 2007-ci ildə ABŞ-ın Texas ştatında “High School”da təhsil alıb. Bu müddət ərzində Amerikada gənclərin musiqi müsabiqələrində çıxış edib və hətta qızıl medala layiq görülüb. Azərbaycana qayıtdıqdan sonra “Yeni Ulduz-4” telelayihəsində iştirak edib.

Hələ uşaq vaxtlarından oxumağa meyil edib. “Pöhrə” və “Tələbə baharı” müsabiqələrinin iştirakçısı olub.

Sənətdə böyük uğurlar qazanmasına rəğmən çox gənc olan bu xanım haqqında daha çox yazmaq olar. Məsələn, Aysel Teymurzadə 2009-cu ilin “Evroforum.som.ru” internet forumunda “Eurovision gözəli” seçilib. Həmin ilin sentyabr ayında isə jurnalist Vasif Həsənli ilə birgə “Əsl məhəbbət” adlı Azərbaycan serialına çəkilib...

Bu günlərdə gənc sənətçi Yeni Azərbaycan Partiyasının sıralarına qəbul edilib. Öz sevincini oxucularımızla bölüşən A.Teymurzadəyə ilk sualımız da həyatında baş verən bu əlamətdar hadisə ilə bağlı oldu:

- Necə oldu ki, YAP-a üzv olmaq qərarına gəldiniz?

- Mən həmişə örnək olaraq valideynlərimi, daha çox isə atamı nümunə götürmüşəm. Atam Həsən bəy Zərdabinin nəvələrindəndir. Jurnalistdir, uzun müddət o, Azərbaycan Dillər Universitetində fəlsəfə kafedrasının müdiri vəzifəsində çalışıb. Bir neçə kitabın müəllifidir. 25-dən çox kitabın redaktoru olub. Respublika Veteranlar Şurasının üzvü, DAK Ağsaqqalar Şurasının sədr müavinidir. Anam isə elmlər doktorudur və Bakı Slavyan Universitetində pedaqoji fəaliyyətlə məşğul olub. Mən vətənpərvərlik duyğularını bu iki insandan öyrənmişəm. Vətənimi sevərək, onun layiqli övladı olmağa çalışmışam. 2009-cu ilin “Eurovision” mahnı müsabiqəsində də bu amalla iştirak etdim və Azərbaycanımın bayrağını yüksəklərə qaldırdım. YAP-ın sıralarına qəbul olunmağıma gəlincə, atam həmin partiyanın fəal üzvlərindən biridir. O həmişə söhbətlərində partiyamızın apardığı siyasətdən danışır, gənclər və dövlət siyasəti haqqında məlumat verir. Azərbaycanın siyasi palitrasında özünəməxsus yeri olan Yeni Azərbaycan Partiyası (YAP) Cənubi Qafqazın ən böyük sosial dayağa və gücə malik partiyasıdır. Ölkəmizin siyasi həyatı ilə yanaşı, mədəni sahədə də aktiv fəaliyyət göstərən YAP istedadlı gənclər ordusunu öz sıralarında birləşdirir. Mən də bir gənc kimi ölkəmin inkişafına öz töhfəmi vermək istəyirəm. Aydındır ki, bu məqsədə çalışdığım sahədə nail ola bilərəm. Bunun üçün isə YAP gənclərə çox böyük dəstək olur, öz qabiliyyətlərini nümayiş etdirmək üçün əlverişli şərait yaradır. Bir halda ki, insana istedadına, intellektinə görə meydan verilir, şərait yaradılır, bacarığına arxayın olan hər kəs bu addımı atmalıdır məncə. Vətən yolunda, hətta, kiçik bir iş görmək, lap xırda bir uğura nail olmaq belə çox böyük şərəfdir. Mən sadəcə partiyaya üzv olmaq üçün yox, onun gənclər siyasətində fəal iştirak etmək üçün müraciət etdim. Yeni Azərbaycan Partiyasının sıralarına qəbul olunmağım mənim həyatımın ən sevincli anlarından biridir. Əslində, mən yanvar ayında üzvlük üçün müraciət etmişdim. Fevralın 2-də Gənclər günündə üzvlük vəsiqəsi mənə təqdim edildi. Ölkənin inkişafında önəmli rol oynayan bir partiyanın sıralarında təmsil olunmaq hər bir azərbaycanlı gənc kimi mənim üçün də fəxrdir. Düşünürəm ki, gənclər siyasətinin fəal iştirakçısına çevrilməkdən ötrü bu partiyanın sıralarında olmaq ürəyində Vətən eşqi, düşüncəsində Vətən sevgisi olan hər bir kəs üçün vacibdir.

- Vətən sevgisindən danışdınız. Həyatımızın inkişaf dinamikasına təsir edə bilməsə də, 20 ildən çoxdur ki, müharibə şəraitində yaşayırıq. Belə bir zamanda bizim daha çox vətənpərvərlik duyğularının təbliğatına ehtiyacımız var. Nədənsə bəzən sənətçilərimiz bu işə biganə qalırlar.

- Əslində, şou-biznesdə olan bu tendensiya mənim də diqqətimi çəkib və təəccübümə səbəb olub. Odur ki, “Eurovision” mahnı müsabiqəsindən qayıdandan dərhal sonra vətənpərvərlik mövzusunda bir mahnı oxudum. Sözləri Cəlal Qurbanova, musiqisi Hüseyn Abdullayeva məxsus mahnıya hazırda klip çəkilir. Bu yaxınlarda tamaşaçılara təqdim ediləcək. İnanıram ki, bu mahnı da hitə çevriləcək. Çünki ilk olaraq Moskvada “Dostluğun ulduzları” mahnı müsabiqəsində həmin mahnını ifa edəndə necə maraqla qarşılandığının şahidi oldum. Dinləyicilərin arasında Tahir Salahov, Polad Bülbüloğlu kimi nüfuzlu soydaşlarımız da vardı. Düşünürəm ki, bu mahnı mənim yaradıcılığımda ən önəmli mahnılardan biri olacaq və brendə çevriləcək.

- Özünüzdən, sənətinizdən əminlik sizə çətinlik yaratmır ki?

- Mən özümə tam güvənirəm. Yəni həmişə üzərimdə işləyirəm və bununla yanaşı, öz gücümü qiymətləndirməyi sevirəm. Bu sualı həmişə mənə verirlər. “Eurovision-2009” müsabiqə tarixində ən heyrətamizi idi. Çünki həmin il müsabiqəyə qatılanların əksəriyyəti ulduzlar, ən azından peşəkar sənətçilər idi. Amma mən inanırdım ki, içimdəki Vətən eşqi, gərgin zəhmətlə birləşib bizə uğur gətirəcək. Elə də oldu. Klipi tamamlanmaq üzrə olan mahnımla bağlı da eyni fikirdəyəm- o uzun illər repertuarımdan düşməyəcək və tamaşaçıların sevgisini qazanacaq. Başqa layihələrə gəlincə, cəbhə xəttində hərbi hissələrdə konsertlər təşkil etməyi planlaşdırıram. Doğrudur, hələ ki, mən bu arzumu gercəkləşdirə bilməmişəm. Amma layihələrimin biri də hökmən bu olacaq. Çünki kiçik yaşlarımdan atamın cəbhə bölgələrindən, hərbi hissələrdən danışdığı xatirələr hələ də yaddaşımda yaşayır.

- Yenicə qatılmasına baxmayaraq respublikamız “Eurovision” mahnı müsabiqəsində ciddi uğurlara imza atıb. Ən böyük sevinci isə siz yaşatmısınız ölkəmizə. Yenidən dəvət gözləyirsinizmi?

- Əslində, mən artıq ikinci dəvəti almışam. Bilirsiniz ki, həmin mahnı müsabiqəsinin təcrübəsində bu da var. “Eurovision”u çoxdan izləyirəm, çox sevdiyim bir müsabiqədir. Həmişə özümü o səhnədə təsəvvür edirdim və deyirdim ki, bir zaman qismət olsa, mən də Azərbaycanı o müsabiqədə təmsil edəcəyəm. Şükür Allaha o zaman da gəldi və mən bu şərəfə layiq görüldüm. Amma mən solo karyera haqqında düşünürəm. Və bir də düşünürəm ki, Azərbaycanda yetərincə istedadlı gənclər var. Biz böyük bir dühaya, böyük bir istedada malik xalqıq. Sadəcə olaraq, bunu dünya miqyasına çıxartmağı, təqdim etməyi bacarmalıyıq. Şükür ki, müxtəlif mədəni layihələrlə özümüzü hər il bir az da çox tanıda bilirik.

- Bəs ilk gündən peşəkar addımlar atdığınız şou-biznes sizə nə öyrətdi?

- Bilirsiniz ki, “Eurovision” mahnı müsabiqəsinə qədər mən bir neçə böyük müsabiqələrdə iştirak etmişəm. Amma “Eurovision”da aparılan mübarizə artıq Aysel Teymurzadənin deyil Azərbaycan Respublikasının mübarizəsi idi. Amma ora seçilmək üçün 40 peşəkar səs verməli idi. Səhnə plastikası və səsdən başqa amillər də əsas götürülürdü. Yəni müsabiqə artıq arxada qaldığından ondan çox danışmaq istəmirəm. Sadəcə onu deyim ki, şou-biznes mənə göstərdi ki, öz üzərində işləmək, gücünə və peşəkarlığına inanmaq uğura aparan nəticəni təmin edir. Mən uzun müddət rəqslə məşğul olmuşam, tək müasir musiqilərin rəqsi ilə deyil, eyni zamanda, Azərbaycanın xalq mahnılarını da öyrənmişəm. Hesab edirəm ki, şou-biznesdə olan sənətçi bütün bunları bilməlidir.

- Bu illər ərzində “Eurovision”da çıxış edən musiqiçilərdən hansı sənin favoritin olub?

- O qədər çox sənətçilər olub ki... 2007-ci ildə birinci yeri qazanan Mariya Şerifoviç, Azərbaycanın ilk təmsilçiləri Elnur və Samir, Ruslana, Abba, Toto Kutunyo, Selin Dion... Amma mən özümü kiməsə bənzətmək istəmirəm. Mən hələ ki, özümü axtarıram. Mən ancaq Aysel kimi qalmaq istəyirəm.

- Artıq Moskvada Azərbaycan təmsilçisi olaraq mətbuat konfransı keçiribsən. Dünya səhnəsinə çıxmış bir müğənni kimi nələrdən söhbət açardın?

- Bəli, bu böyük təcrübəni keçdim. Azərbaycanın sərhədlərindən kənara ayaq basan hər bir şəxs çevrəsi üçün Azərbaycan deməkdir. Bu mənada sənətçilərin üzərinə çox böyük məsuliyyət düşür. Çünki onun çevrəsi, arealı daha genişdir. Azərbaycanın çox qədim bir ölkə olması, tarixi haqqında yetərli məlumat verə bilməyim üçün həmişə oxuyuram. Odur ki, Vətənim haqqında hər şeyi bilməyə çalışıram. Həm tarixi, həm mədəniyyəti ilə dünya tarixində iz qoyan şəxsiyyətlərimiz haqqında bildiklərimi zənginləşdirməyə çalışıram.

- O zaman mütaliəniz də zəngin olar?

- Əlimə düşən hər kitabı oxuyuram desəm düzgün olmaz. Sistemli şəkildə oxumağa çalışıram. Azərbaycan və dünya klassiklərinin demək olar ki, hamısını oxumuşam. Tarixi romanları çox sevirəm. Azərbaycanın tarixi ilə bağlı kitabları isə xüsusi maraqla oxuyuram. Amma etiraf edim ki, daha çox ingilis dilindən mütaliə edirəm.

KƏBUTƏR

Yeni Azərbaycan.- 2011.- 10 fevral.- S.4.