İnsanlara xidmət etmək hər birimizin amalı olmalıdır

Sədaqət Vəliyeva: Əgər bir insan bacarmadığı işi görməyə cəhd edirsə, o, heç zaman həmin sahənin inkişafına öz töhfəsini verə bilməyəcək

Ötən ilin noyabr ayının 7-də Azərbaycan Respublikasının Milli Məclisinə keçirilmiş növbəti seçkilərdə Yeni Azərbaycan Partiyası (YAP) böyük üstünlüklə qalib gəldi və partiyanın irəli sürdüyü namizədlərdən 71 nəfəri parlamentdə təmsil olunmaq hüququ qazandı. Məlum olduğu kimi, parlamentdə hakim partiyanı təmsil edən millət vəkillərinin 21-i yeni seçilmişlərdir. Onlar, eyni zamanda, respublikamızın müxtəlif sahələrində göstərdikləri səmərəli fəaliyyətlə ölkəmizin inkişafına öz töhfələrini verirlər. Bu baxımdan da, “Yeni Azərbaycan” qəzeti YAP-ın parlamentə seçilmiş yeni deputatları ilə cəmiyyəti daha yaxından tanış etmək üçün yeni layihəyə başlayır. Layihənin ilk qonağı isə YAP Nizami rayon təşkilatının sədri, millət vəkili, 4 saylı Vərəm Dispanserinin baş həkimi Sədaqət Vəliyevadır.

Vəliyeva Sədaqət Süleyman qızı 1954-cü ildə anadan olub. 1972-ci ildə Azərbaycan Dövlət Tibb İnstitutunun müalicə-profilaktika fakültəsinə daxil olub, 1978-ci ildə institutu bitirib. Əmək fəaliyyətinə tələbəlik illərindən Döş qəfəsi cərrahiyyəsi xəstəxanasında tibb bacısı işləyərək, başlayıb. 1980-ci ildən isə Suraxanı 6 saylı Vərəm Xəstəxanasında həkim-fiziatr işləməyə başlayıb. 1984-cü ildən 1985-ci ilə kimi 6 saylı Vərəm Xəstəxanasında baş həkiməvəzi işləyib.

1985-ci ildən 1995-ci ilədək Suraxanı rayonu 6 saylı Vərəm Xəstəxanasının baş həkimi vəzifəsində çalışıb. 1995-1996-cı illərdə Suraxanı rayon Səhiyyə şöbəsinin müdiri işləyib. 1997-2002-ci illərdə yenidən Suraxanı rayonu 6 saylı Vərəm Xəstəxanasının baş həkimi vəzifəsində çalışıb. 2002-ci ildən 2006-cı ilədək Sabunçu rayon Səhiyyə şöbəsinə rəhbərlik edib. 2006-cı ildə Sabunçu rayon 4 saylı Vərəm Əleyhinə Dispanserə baş həkim vəzifəsinə təyin edilib. 1990-cı ildə Suraxanı rayonu Zığ qəsəbə Sovetinin deputatı olub. Ali dərəcəli həkimdir. Bir qız övladı var.

Həkimlik ən şərəfli və məsuliyyətli peşədir

Həkim sənəti cəmiyyətdə ən məsul peşələrdən biridir. Məhz, bu ixtisasın sahibləri insanlara şəfa verir, onların dərdlərinə çarə qılırlar. Uzun müddətdir insanlara tibbi xidmət göstərən, səhhətində problemlər yaranmış çoxsaylı soydaşlarımıza sağlamlıq bəxş edən Sədaqət Vəliyeva da vəzifəsinin öhdəsindən layiqincə gələn həkimlərimizdən biridir. O, əvvəllər Suraxanı rayonu 6 saylı Vərəm Xəstəxanasında, Suraxanı və Sabunçu rayonu Səhiyyə şöbəsində, hazırda isə Sabunçu rayonu 4 saylı Vərəm Əleyhinə Dispanserdə uğurla fəaliyyət göstərərək bir sıra nailiyyətlərə imza atmaqdadır.

Öz peşəsindən danışan müsahibimiz deyir ki, əgər bir insan bacarmadığı işi görməyə cəhd edirsə, o, heç zaman həmin sahənin inkişafına öz töhfəsini verə bilməyəcək: “Çünki insan gərək işlədiyi sahə üzrə bütün potensilanı, bacarığını ortaya qoysun. İnkişafa səbəb olacaq, nailiyyətlərin əldə olunmasına əlverişli şərait yaradacaq potensial olmadıqda isə, insan işlədiyi sahənin tərəqqisinə öz töhfəsini verə bilməyəcək. Mən hələ Vərəm Dispanserində çalışarkən, bu prinsipin nə qədər vacib olduğunu anlamışdım. Müxtəlif psixoloji vəziyyətdə olan adamlarla işləməli olmuşdum. Ümumiyyətlə, sağlamlıqlarında müəyyən problemlər olan insanların şəfa tapması üçün ən azından onlarla səmimi münasibətin qurulması vacibdir”.

Vərəm xəstəliyinə düçar olmuş insanlarla ünsiyyətin xoş və səmimi atmosfer üzərində qurulmasının vacibliyini söyləyən baş həkim bu işin bəzən həddən artıq ağır olduğunu deyir: “İllərlə bu xəstəliyin mənfi təsirləri ilə üzləşmiş insanlarda psixoloji gərginliyin olması, gələcəklə bağlı düşüncələrində bir növ ruh düşkünlüyünün oturuşması onlara qarşı olan diqqətin artırılmasını vacib amilə çevirir. Məhz, bu cür problemli insanlarla işləmək həm peşəkarlıq, həm də səmimi münasibət tələb edir”.

Azərbaycanda səhiyyə sahəsinə olan dövlət qayğısından danışan Sədaqət Vəliyeva deyir ki, ölkəmizin səhiyyə sisteminin inkişaf səviyyəsi heç zaman bugünkü qədər yüksək olmayıb: “Cənab Prezident İlham Əliyevin və Azərbaycanın birinci xanımı, Heydər Əliyev Fondunun Prezidenti, YUNESKO-nun və İSESKO-nun xoşməramlı səfiri, millət vəkili Mehriban Əliyevanın xüsusi diqqət və qayğısı nəticəsində səhiyyə sahəsində böyük irəliləyişlər əldə olunub. Bu gün Azərbaycanın elə bir bölgəsi yoxdur ki, orada müasir standartlara cavab verən xəstəxana olmasın. Hər bir rayonda bütün müasir avadanlıqlarla təchiz olunmuş diaqnostika mərkəzləri insanlarımıza xidmət edir. Dövlət siyasətinin əsas hədəfini insan amili təşkil etdiyindən bütün bu işlərin məntiqini, fəlsəfəsini başa düşmək o qədər də çətin olmur. Prezident İlham Əliyevin tapşırıqlarına əsasən respublika əhalisinin sağlamlığının qorunması ilə bağlı görülən tədbirlər çərçivəsində ölkəmizdə müasir tibbi avadanlıqlarla təchiz olunmuş yeni səhiyyə ocaqlarının yaradılması davam etdirilir. Məhz, Prezident İlham Əliyevin Respublika Uşaq və Yeniyetmələr üçün Vərəm Xəstəlikləri Sanatoriyasının yeni binasının tikintisi ilə bağlı tədbirlər haqqında imzaladığı Sərəncam da yuxarıda söylənilən fikrin əyani sübutudur”.

Ümumiyyətlə, həkimliyin ən şərəfli və məsuliyyətli peşə olduğunu söyləyən baş həkim bildirir ki, bundan sonra da insanlara xidmət edəcək və səhhətilə bağlı problemləri olan adamların şəfa tapmasına yardım göstərəcək.

YAP dövlətimizin inkişafında müstəsna rolu olan bir partiyadır

Səhiyyə sahəsindəki uğurlarla yanaşı, Sədaqət Vəliyeva siyasi fəaliyyət sahəsində də müvəffəqiyyətlər qazanıb. Hazırda, Yeni Azərbaycan Partiyasının Nizami rayon təşkilatının sədri olan Sədaqət Vəliyeva bu sferada özünəməxsus iş prinsipinə malikdir.

YAP rayon təşkilatının sədri əminliklə

söyləyir ki, bu gün Azərbaycan cəmiyyətində ən güclü siyasi təşkilat kimi qəbul edilən partiya məhz Yeni Azərbaycan Partiyasıdır: “Bunu həm seçki kampaniyaları, həm müxtəlif günlərlə bağlı tədbirlər, həm də sadə vətəndaşlarla görüşlər zamanı müşahidə etmişəm. Çünki YAP bu gün Azərbaycan dövlətinin inkişafında müstəsna rolu olan bir partiyadır. Partiyamızın ideoloji prinsipləri azərbaycançılıq, dövlətçilik, qanunçuluq və sosial ədalət prinsipləridir. 1992-ci ildə Ümummilli lider Heydər Əliyev YAP-ın Proqram və Nizamnaməsini necə yazmışdısa, həmin sənədlərdə əks olunmuş prinsiplər bu gün də olduğu kimi Azərbaycanda həyata keçirilməkdədir. YAP-ın əsas məramı Azərbaycan xalqının müstəqil, demokratik və çox zəngin yaşamasıdır. Partiyamız bu yolda cənab Prezident İlham Əliyevin rəhbərliyilə uğurla fəaliyyət göstərir”.

Sədaqət Vəliyevanın sözlərinə görə, Ulu öndər Heydər Əliyevin yaradıcısı olduğu, ölkənin ictimai-siyasi həyatında fəal rol oynayan YAP böyük inkişaf yolu keçib. Bu gün partiyanın cəmiyyətdə qazandığı nüfuz möhkəm əsaslara söykənir: “Sevindirici haldır ki, YAP yarandığı gündən bugünədək bu inamı yüksək səviyyədə doğruldub. Bu gün partiyanın sıralarında 530 minə qədər üzv birləşir. Azərbaycanın siyasi tarixində YAP qədər güclü və qüdrətli siyasi təşkilat olmayıb. Ötən 19 ildə partiyamız şərəfli yol keçib, bütün sınaqlardan uğurla çıxıb. Çünki partiyamızın amalı xalqa və dövlətə ləyaqətlə xidmət etməkdən ibarətdir”.

Sədaqət Vəliyeva, həmçinin, Yeni Azərbaycan Partiyasının gücünün və nüfuzunun göstəricisi kimi, partiyanın rayon təşkilatının üzvlərinin günü-gündən artdığını göstərib: “Hazırda rayon təşkilatının üzvlərinin sayı 7905 nəfərdir. Onlardan 3923 nəfəri qadınlar, 3372 nəfəri isə gənclərdir”.

“YAP-ın digər partiyalardan fərqi həm də ondan ibarətdir ki, öz ətrafında intellektual insanları birləşdirib” deyən rayon təşkilatının sədrinin sözlərinə görə, partiyamızda gənclər də üstünlük təşkil edir: “YAP üzvlərinin təxminən 40 faizini gənclər təşkil edir. Əgər ölkənin bilikli, müasir dünyagörüşlü gəncləri öz siyasi talelərini YAP-la bağlayırlarsa, bu, partiyamızın uğurlu perspektivlərindən xəbər verir”.

Millət vəkili olmaq çox böyük məsuliyyət tələb edir

2010-cu ilin noyabr ayının 7-də keçirilmiş parlament seçkilərində seçicilərin 67 faizinin səsini qazanaraq Milli Məclisə üzv seçilən Sədaqət Vəliyeva hazırda parlamentdə Sosial siyasət komitəsinin və İntizam komissiyasının üzvüdür.

Deputat deyir ki, millətin vəkili olmaq çox böyük məsuliyyət və əhəmiyyət kəsb edir: “Çünki sənə etimad göstərmiş insanların problemlərini həll etmək, qarşılaşdıqları ədalətsizlikləri aradan qaldırmaq üçün ciddi səylə çalışmalısan. Bu mənada, həmçinin, millət vəkili seçilmək istəyən şəxs imkanları daxilində seçicilərinə vəd verməlidir. Bu da o baxımdan əhəmiyyətlidir ki, Milli Məclisə üzv seçildikdən sonra tam məsuliyyətlə işləməyi bacarasan”.

“Millət vəkili seçilmiş şəxs, eyni zamanda, bu günə qədər qəbul edilmiş qanunları və bütövlükdə qanunvericiliyi öyrənməlidir”, - deyən Sədaqət Vəliyevanın sözlərinə görə, bu amil seçicilərin hüquqlarını daha effektli şəkildə müdafiə etməyə şərait yaradır: “Komitəmizdə insanların sosial vəziyyəti ilə bağlı hansısa qanun layihəsi hazırlanarkən, onun yerlərdə ictimai müzakirəsini biz millət vəkilləri həyata keçirməliyik. Bununla biz insanların hansı tələblərinin olduğunu öyrənə və yeni fikirlər irəli sürə bilərik. Düşünürəm ki, ictimai nəbzi yoxlamaqla, daha doğru nəticələrə gəlmək olar”.

Sədaqət Vəliyeva son olaraq bildirib ki, bundan sonra da insanlara xidmət etmək amalına sadiq qalacaq və onların etimadını doğruldacaq.

Ramil VƏLİBƏYOV

Yeni Azərbaycan.- 2011.- 19 fevral.- S.9.