Azərbaycanın vergi sistemi müasirliyi ilə fərqlənir

Sahir Məmmədxanov: Prezident İlham Əliyevin rəhbərliyi ilə həyata keçirilən siyasət nəticəsində regionların inkişafı və sahibkarlıq subyektlərinin maliyyə vəziyyətinin yaxşılaşması öz növbəsində bu sahədən vergi daxilolmalarının həcminin artmasına müsbət təsir göstərib

Azərbaycan Respublikasının Prezidenti İlham Əliyevin “Azərbaycan Respublikasının 2011-ci il dövlət büdcəsi haqqında” Qanunun tətbiq edilməsi haqqında Fərmanında, həmçinin, 2010-cu ilin və 2011-ci ilin birinci rübünün sosial-iqtisadi inkişafının yekunlarına həsr olunmuş Nazirlər Kabinetinin iclaslarındakı çıxışlarında Vergilər Nazirliyinin də qarşısında bir çox mühüm vəzifələr qoyulub. Bu vəzifələrin icrası, ilk növbədə, yerli sahibkarların müraciətlərinin diqqətlə araşdırılması, onların problemlərinin yerində həll olunması və qanunvericiliyin təbliği ilə bağlı geniş məlumatlandırma işlərinin təşkili kimi mühüm məsələləri əhatə edir. Vergilər nazirinin müavini Sahir Məmmədxanov KİV-ə müsahibəsində bu və digər məsələlərlə bağlı ortaya çıxan suallara aydınlıq gətirib.

- Sahir müəllim, Azərbaycan Respublikasının Prezidenti cənab İlham Əliyevin 24 noyabr 2010-cu il tarixli Fərmanında ilk dəfə regionlarda işləyən hüquqi və fiziki şəxslər tərəfindən ödənilən vergilərin yerli büdcələrə tam və ya qismən daxil edilməsi məsələsi əks olunur. Bu istiqamətdə görülən işlərlə bağlı məlumat verməyinizi xahiş edirik.

- Hazırkı mərhələdə ölkə iqtisadiyyatının daha da inkişaf etdirilməsi istiqamətində qarşıda duran vəzifələrin yerinə yetirilməsi regionların inkişafının sürətləndirilməsini, Azərbaycanın sosial-iqtisadi problemlərinin həllində sahibkarlığın rolunun artırılmasını, bu istiqamətdə dövlət qayğısının genişləndirilməsini və ən əsası regionlarda sahibkarlığın inkişafı sahəsində mövcud potensialın reallaşdırılmasını tələb edir. Bu baxımdan qeyd etmək lazımdır ki, regionların maliyyə vəziyyətinin yaxşılaşdırılması və sahibkarlığın regional inkişafının sürətləndirilməsi bu gün xüsusi əhəmiyyət kəsb edən məsələlərdəndir. Məhz sadalanan vəzifələrin həyata keçirilməsi istiqamətində mühüm sənəd olan regionların sosial-iqtisadi inkişafı Dövlət Proqramı bölgə iqtisadiyyatının və sahibkarlığın daha intensiv inkişafına münbit şərait yaradıb. Bu isə regionlarda vergi ödənişlərinin ümumi daxilolmalardakı payının artmasına müsbət təsir göstərib. Regional inkişaf sahəsindəki mühüm nailiyyətlərə əsaslanaraq Azərbaycan Respublikasının Prezidenti cənab İlham Əliyevin 2011-ci il dövlət büdcəsi haqqında Fərmanında Vergilər Nazirliyinin qarşısında bir çox mühüm vəzifələr qoyulub. Belə ki, dövlət büdcəsinin ümumi gəlirlərində regionlardan vergi ödənişlərinin xüsusi çəkisinin tədricən artırılması, bölgələrdə işləyən hüquqi və fiziki şəxslər tərəfindən ödənilən vergilərin yerli büdcələrə tam və ya qismən daxil edilməsi regional inkişafın əsasında dayanır. Həmin Fərmanın icrası məqsədilə Vergilər Nazirliyi və Maliyyə Nazirliyi tərəfindən ətraflı müzakirələr və araşdırmalar aparılıb. Bakı şəhəri istisna olmaqla, ölkənin digər şəhər və rayonlarının ərazilərində fəaliyyət göstərən, həmçinin, mərkəzləşdirilmiş qaydada vergi uçotunda olan vergi ödəyicilərinin hesablanmış vergilərinin aidiyyəti şəhər və rayonların yerli gəlirlərinə aid edilməsi ilə əlaqədar təkliflər hazırlanaraq Azərbaycan Respublikasının Prezidentinə təqdim edilib. Gələcəkdə dövlət büdcəsinin gəlir və xərcləri müəyyənləşdirilən zaman qeyd olunanlar Maliyyə Nazirliyi tərəfindən nəzərə alınacaq.

- Bu ilin ötən dövrü ərzində vergi daxilolmalarında regionların payı hansı səviyyədə olub?

- İlk növbədə, qeyd edim ki, regional inkişaf sahəsində əldə olunmuş nailiyyətlərə, ölkənin iqtisadi inkişafında yaranmış müsbət meyillərə əsaslanaraq uzunmüddətli vəzifələrin sistemli yerinə yetirilməsini təmin edə bilən bir çox mühüm tədbirlərin həyata keçirilməsi dövlət başçısı cənab İlham Əliyevin rəhbərliyi altında uğurla davam etdirilir. Bu tədbirlərə ölkədə işsizliyin azaldılması və əhalinin, xüsusilə gənclərin faydalı əməklə məşğulluğunun artırılması, regionların yerli resursları və digər amilləri nəzərə alınmaqla, onların sosial-iqtisadi inkişafı məqsədilə müvafiq dövlət proqramlarının hazırlanması, qeyri-neft sektorunun sürətli inkişafı və bu sahəyə sərmayələrin cəlb olunması və digərləri daxildir. Regionların inkişafı və sahibkarlıq subyektlərinin maliyyə vəziyyətinin yaxşılaşması öz növbəsində bu sahədən vergi daxilolmalarının həcminin artmasına müsbət təsir göstərib. İlkin məlumata görə, 2011-ci ilin ötən 6 ayı ərzində Vergilər Nazirliyi tərəfindən büdcəyə 2 milyard 564,1 milyon manat vəsaitin daxil olması təmin edilib. Toplanan vergilərin 696,8 milyon manatı dövlət sektorunun, 1 milyard 867,3 milyon manatı isə qeyri-dövlət sektorunun payına düşüb. Bir faktı qeyd etmək istərdim ki, qeyri-dövlət sektorunda iqtisadi fəallığın artmasının, real sektorun dəstəklənməsi siyasətinin nəticəsi kimi qeyri-dövlət sektoru üzrə daxilolmaların həcmi ötən ilin müvafiq dövrünə nisbətən 39,0 faiz artıb, nəticədə bu sahə üzrə vergi daxilolmalarının xüsusi çəkisi 2010-cu illə müqayisədə 67,1 faizdən 72,8 faizə yüksəlib. Vergilər Nazirliyinin qarşısında duran vəzifələrdən biri də ölkənin regionları üzrə müəyyən olunmuş vergi daxilolmaları proqnozunun tam icra edilməsi, habelə hesablanmış vergilərin və vergi borclarının dövlət büdcəsinə ödənilməsi üçün zəruri tədbirlərin görülməsidir. Bu sahədə aparılan işlərin, eyni zamanda, Azərbaycan Respublikası regionlarının sosial-iqtisadi inkişafı Dövlət proqramlarının uğurla həyata keçirilməsinin nəticəsi olaraq ümumilikdə regionlar üzrə-ərazi vergi idarələri tərəfindən büdcəyə 2011-ci ilin 6 ayı ərzində 197,2 milyon manat daxil olub və proqnoza 122,0 faiz əməl olunub. Bu, 2010-cu ilin eyni dövrünə nisbətən 41,5 milyon manat və ya 26,7 faiz çox vəsaitin dövlət büdcəsinə ödənilməsi deməkdir.

- Sahir müəllim, bu yaxınlarda 13 rayonda vergi ödəyiciləri ilə görüşlər keçirdiniz, onların rəy və təkliflərini, şikayətlərini dinlədiniz, qaldırılan məsələlərə ətraflı cavablar verdiniz. Bu görüşlərdə əsasən hansı məsələlər sahibkarlarla müzakirə olunub?

- Ölkə Prezidenti cənab İlham Əliyev rüşvətxorluğa və korrupsiyaya qarşı daha ciddi və sistemli mübarizənin aparılmasını aidiyyəti dövlət orqanlarının qarşısında əsas vəzifə kimi qoyub. Bu gün vətəndaş müraciətlərinin cavablandırılması məsələsinə xüsusi həssaslıqla yanaşılır və vergilər naziri Fazil Məmmədovun vurğuladığı kimi, Vergilər Nazirliyində vətəndaş müraciətlərinə baxılmasına vergilərin dövlət büdcəsinə səfərbər olunması qədər önəm verilir. Bu sahədə vergi xidməti orqanlarının üzərinə düşən vəzifələrin yerinə yetirilməsini təmin etmək məqsədilə hələ 2007-ci ildə müvafiq əmrlə “Şəffaflığın artırılması və korrupsiyaya qarşı mübarizə üzrə 2007-2011-ci illər üçün Tədbirlər Planı” təsdiq edilib. Bu Tədbirlər Vergilər Nazirliyinin fəaliyyətinin təkmilləşdirilməsi, sahibkarlığın inkişafı, şəffaflığın artırılması, vergi ödəyicilərinin hüquqlarının qorunması, maarifləndirmə və əməkdaşlıq sahəsində tədbirlərin görülməsini əhatə edir. Bu tədbirlər çərçivəsində vergilər naziri Fazil Məmmədovun əmrinə müvafiq olaraq, may və iyun aylarında 13 rayonda vergi ödəyiciləri ilə görüşlər təşkil olunub, bu tədbirlərdə onların müraciətləri, rəy və təklifləri, şikayətləri dinlənilib və verilən suallara ətraflı cavablar verilib. Vergi ödəyiciləri ilə dövlət arasında münasibətlərin tənzimlənməsi baxımından bu görüşlərin keçirilməsini çox faydalı hesab edirəm. Görüşlərin səmərəliliyini daha da artırmaq məqsədilə tədbirlərə millət vəkillərini, icra başçılarını və onların müavinlərini də dəvət etmişdik. Bununla da vergi məsələləri ilə yanaşı, ortaya çıxan digər sahələrə aid sualların da icra başçıları və millət vəkilləri tərəfindən operativ cavablandırılmasına şərait yaradılıb. Bu görüşlərdə çalışdıq ki, vergi ödəyicilərinin qaldırdıqları məsələlərə maksimum dolğun və ətraflı cavablar verək. Ancaq dərhal cavablandırılması mümkün olmayan məsələlər də var idi ki, onlar da sonradan diqqətlə araşdırıldı, nəticələri barədə vətəndaşlara yazılı cavablar göndərildi. Ötən il 11 rayonda keçirdiyimiz görüşlər zamanı vergi ödəyicilərinin qaldırdıqları suallar içərisində həm vergi orqanlarının, həm də digər icra strukturlarının fəaliyyəti ilə bağlı şikayətlər üstünlük təşkil edirdi. Bu il keçirilən görüşlərdə isə sualların çoxu qanunvericiliklə bağlı olub. Vergi ödəyicilərini maraqlandıran məsələlər arasında köhnə borcların silinməsi və borclara hesablanmış cərimə faizləri, şəhər (rayon) kommunal təsərrüfatlarının dövlət büdcəsinə olan borcları və bu borcların dövlət büdcəsinə alınması ilə bağlı vergi orqanlarının həyata keçirdiyi tədbirlər və s. var idi. Bir sıra müraciətlər son illər vergi xidmətinin spektrinin genişləndirilməsi sahəsində elektron texnologiyaların tətbiqi ilə bağlı görülən işlərlə, bir qrup suallar isə fiziki şəxslərin vergi qeydiyyatı ilə bağlı olub. Vergi ödəyicilərinin nəzərinə çatdırılıb ki, qeydiyyatın elektron qaydada, internet vasitəsilə aparılması nəzərdə tutulur. Məlum olduğu kimi, artıq iyulun 1-dən biz bu prosesə başlamışıq. Regionlarda keçirilən görüşlər zamanı bələdiyyə üzvləri tərəfindən bir sıra məsələlər və problemlər qaldırılıb. Bələdiyyələrin problemlərinin məhz yerlərdə araşdırılması və onları narahat edən məqamlara aydınlıq gətirilməsi məqsədilə vergilər nazirinin müvafiq əmri ilə nazirliyin əməkdaşları yerlərə ezam ediliblər.

- Regionlarda bələdiyyələrlə keçirilən görüşlər və bu görüşlərin nəticələri barədə məlumat verməyinizi xahiş edirik.

- Məlum olduğu kimi, “Yerli (bələdiyyə) vergilər və ödənişlər haqqında” Qanunun tətbiq edilməsi barədə ölkə Prezidentinin 4 aprel 2002-ci il tarixli Fərmanının 2-ci bəndi ilə bələdiyyələrə yerli vergilərin və ödənişlərin düzgün hesablanmasında, tam və vaxtında ödənilməsində, habelə vergi qanunvericiliyinə tam və dəqiq riayət edilməsində metodiki rəhbərliyin Vergilər Nazirliyi tərəfindən həyata keçirilməsi müəyyən edilib. Fərmanın icrası ilə əlaqədar Vergilər Nazirliyi və yerli vergi orqanları tərəfindən zəruri tədbirlər müəyyənləşdirilərək həyata keçirilib. Bununla yanaşı, yerli vergilər və ödənişlər haqqında qanunvericiliyin tətbiqində müəyyən çətinliklərin və problemlərin olması barədə bələdiyyələrdən Vergilər Nazirliyinə müraciətlər daxil olub. Yerlərdə keçirilən görüşlərdə yerli özünüidarəetmə sahəsində mövcud problemlər geniş müzakirə edilib, onların aradan qaldırılmasında metodiki köməklik göstərilib. Bütövlükdə həmin işlərin davamı olaraq bələdiyyələrə yerli vergilərin və ödənişlərin düzgün hesablanmasında, tam və vaxtında ödənilməsində, habelə vergi qanunvericiliyinə tam və dəqiq riayət olunması işlərində köməklik göstərilməsi məqsədilə bundan sonra da tədbirlərin həyata keçirilməsi davam etdiriləcək. Görüşlər zamanı bələdiyyə üzvləri tərəfindən qaldırılmış problemlər nazirlikdə ümumiləşdirilib və hazırda onların aradan qaldırılması istiqamətində görüləcək işlərlə bağlı təkliflər hazırlanır.

- Regionlarda fəaliyyət göstərən vergi ödəyicilərinin vergi borclarının məbləği nə qədərdir? Vaxtı keçmiş borcların silinməsi ilə bağlı vəziyyət necədir?

- Regionlarda keçirdiyimiz görüşlər zamanı vergi ödəyiciləri öz vergi borcları haqqında müxtəlif səpkili suallar verirdilər. Qanunvericiliyə uyğun olaraq, silinməsi mümkün olan vergi borclarının ləğv edilməsi üçün yerli vergi orqanlarına müvafiq təlimatlar verilib. Qeyd etmək istərdim ki, vergi ödəyicilərinin hüquqlarının artırılması və mənafelərinin qorunması istiqamətində həyata keçirilən tədbirlərin davamı olaraq onların maliyyə vəziyyətinin yaxşılaşdırılması, rəqabət qabiliyyətinin möhkəmləndirilməsi və daxili investisiya fəaliyyətinin stimullaşdırılması məqsədilə vergilərin vaxtında ödənilməməsinə görə 1 (bir) ildən artıq olan müddətə tətbiq edilmiş faizlərin silinməsi barədə Azərbaycan Respublikası Nazirlər Kabinetinin 20 avqust 2010-cu il tarixli 261s nömrəli Sərəncamı imzalanıb. Ümumilikdə, iyun ayının 1-nə olan məlumata görə, ərazi vergilər idarələri üzrə əsas vergi borcu 495,8 milyon manat təşkil edib. Bu ilin 5 ayı ərzində respublika üzrə cəmi 21,2 milyon manat vergi borcu silinib və bu məbləğin də 90%-dən çoxu ərazilərdən olan vergi ödəyicilərinin payına düşüb.

- Vergi bazasının genişləndirilməsi ilə bağlı görülən işlər haqqında məlumat verməyinizi xahiş edirik. Vergi ödəyicilərinin pasportlaşdırılması tədbirlərinin ilkin nəticələri barədə nə deyə bilərsiniz?

- İlk növbədə qeyd etmək istərdim ki, ölkənin sosial-iqtisadi inkişafında Azərbaycan Respublikasının Prezidenti tərəfindən təsdiq edilmiş Dövlət proqramları və digər sənədlərin xüsusi rolu olub. Həmin sənədlər dövlət büdcəsindən regionlara investisiya vəsaitlərinin ayrılması, regional biznes layihələrinin maliyyələşdirilməsi, investorların regionlara yönəldilməsi, regionlarda infrastrukturların yaxşılaşdırılması, bölgələrdə yeni iş yerlərinin açılması və həmçinin, sahibkarlıq subyektlərinin fəaliyyətinə daha səmərəli şəraitin yaradılması kimi prioritet istiqamətləri əhatə edir. Bu istiqamətlər üzrə kompleks tədbirlərin həyata keçirilməsində Azərbaycan Respublikasının Prezidentinin müvafiq fərmanları ilə təsdiq edilmiş regionların sosial-iqtisadi inkişafı Dövlət proqramları xüsusilə əhəmiyyətlidir. Dövlət proqramlarının uğurla icrası nəticəsində bölgələrdə mühüm infrastruktur obyektləri istifadəyə verilib, əhalinin məşğulluğu problemi əhəmiyyətli dərəcədə həll edilib, regional iqtisadiyyatda artım qeydə alınıb. Bütün bunlar digər tərəfdən vergitutma bazasının genişləndirilməsi və vergi ödəyicilərinin maliyyə imkanlarının artmasını şərtləndirib. Həmçinin, regionlarda yaranan yeni istehsalat müəssisələri və digər təsərrüfat subyektləri bölgələrin sənaye gücünün artması, ümumi məhsul buraxılışının yüksəlməsi, yerli əhalinin işlə təmin olunması ilə yanaşı, büdcə gəlirlərinin formalaşmasında da özünəməxsus rolu var. Bununla əlaqədar, qarşımızda duran ilk vəzifə vergitutma bazalarının düzgün uçotunun təşkili və vergidən yayınma hallarının tam aradan qaldırılması olunub. Vergilər Nazirliyi vergitutma bazasının genişləndirilməsi, vergidən yayınma hallarına qarşı mübarizə tədbirlərinin gücləndirilməsi məqsədilə cari ilin fevral ayının 1-dən sahibkarlıq fəaliyyəti həyata keçirən vergi ödəyicilərinin uçot məlumatlarının dürüstləşdirilməsi məqsədilə bütün təsərrüfat subyektlərində müşahidələr aparmağa başlayıb. Bu prosesin sonunda əldə olunmuş məlumatlar vergi-uçot məlumatları ilə təhlil olunacaq və meydana çıxan uyğunsuzluqlarla əlaqədar qanunamüvafiq tədbirlər görüləcəkdir. Vergilər nazirinin müvafiq əmri ilə birinci mərhələ başa çatıb. Artıq sahibkarlıq fəaliyyəti ilə məşğul olan obyektlərin təxminən yarısında müşahidələr aparılıb və ölkə üzrə 80 minədək vergi ödəyicisinin 84 mindən çox təsərrüfat subyektinin (obyektinin) pasportlaşdırılması təmin edilib. Bununla yanaşı, pasport məlumatları mövcud məlumat bazası ilə üzləşdirilərək müvafiq dəqiqləşdirmələr aparılıb. Bu sahədə görülən işlərin səmərəliliyinin artırılması məqsədilə pasportlaşdırılma tədbirləri üzrə müəyyən edilmiş müddət 2011-ci il dekabr ayının 31-dək uzadılıb, görüləcək tədbirlərin qrafiki təsdiq edilib. Qrafikdə vergi ödəyicilərinin və onların təsərrüfat subyektlərinin pasportlaşdırması işlərinin yekunlaşdırılması, təsərrüfat subyektlərinin və vergi ödəyicilərinin pasport məlumatlarının baza məlumatları ilə qarşılaşdırılması və uçotda olmadığı aşkar edilən təsərrüfat subyektlərinin uçota alınması kimi əsas istiqamətləri müəyyən edən konkret tədbirlər və icra müddətləri əks olunub.

- Elektron bəyannamə sisteminin tətbiqindən sonra kameral vergi yoxlamaları sahəsində vəziyyət necədir?

- Vergi orqanlarının qarşısında qoyulan ən vacib tələblərdən biri də vergi potensialının yerlərə getmədən müəyyən edilməsidir. Məlum olduğu kimi, vergi sistemində informasiya - kommunikasiya texnologiyalarının geniş tətbiq edilməsindən sonra kameral vergi yoxlamalarına nəzarətin həyata keçirilməsi avtomatlaşdırılıbdır. Bu sahədə aparılmış məqsədyönlü işlərin nəticəsi olaraq, cari ilin 5 ayı ərzində vergi orqanları tərəfindən kameral vergi yoxlamaları ilə 97,6 milyon manat əlavə vəsait hesablanıb ki, bu da daxilolmaların 3,9 faizini təşkil edir. Ötən dövrdə “İqtisadi sahələr üzrə kameral vergi yoxlamaları zamanı əlavə təhlillərin aparılması barədə” Metodiki Tövsiyələrə uyğun olaraq kameral vergi yoxlamalarının aparılmasına başlanılıb və bu sahədə vergi nəzarətinin səmərəliliyinin yüksəldilməsinə nail olunub.

- Vergilər Nazirliyində yaradılmış Vergi Apelyasiya Şurasının fəaliyyəti vergi ödəyicilərini çox maraqlandırır. Regionlarda fəaliyyət göstərən vergi ödəyiciləri şura haqqında müfəssəl məlumatlara malikdirlərmi?

- İlk növbədə qeyd edim ki, vergi ödəyiciləri üçün daha mükəmməl apelyasiya sisteminin yaradılması ölkə Prezidenti cənab İlham Əliyevin 12 sentyabr 2005-ci il tarixli Sərəncamı ilə təsdiq olunmuş “Azərbaycan Respublikasında vergi inzibatçılığının təkmilləşdirilməsi Dövlət Proqramı”nda nəzərdə tutulub. Bu sistem vergi ödəyicilərinin hüquqlarının hərtərəfli müdafiəsi, onların şikayətlərinə baxılması işinin təkmilləşdirilməsi və bu sahədə nəzarətin gücləndirilməsinə xidmət edir. Dövlət Proqramının icrası ilə əlaqədar, Vergi Apelyasiya Şurası 2008-ci ildə vergilər nazirinin müvafiq əmri ilə vergi ödəyicilərinin şikayət və ərizələrinin daha yüksək səviyyədə və dəqiq araşdırılması məqsədilə yaradılıb. Vergi Apelyasiya Şurası ötən ilin əvvəlində Katibliyin yaradılması ilə daha da aktiv fəaliyyətə başlayıb. Şura tərəfindən baxılmış şikayətlərin bir çoxu vergi ödəyicilərinin xeyrinə həll olunub. Şurada operativ vergi nəzarəti, səyyar vergi yoxlamaları, kameral vergi yoxlamaları, vergi borclarının məcburi alınması ilə əlaqədar tərtib edilmiş aktlardan və qəbul olunmuş qərarlardan verilmiş təkrar şikayət və ərizələr, nazirliyin funksional idarələri tərəfindən verilmiş yazılı göstərişlərin mübahisələndirilməsi ilə əlaqədar yerli vergi orqanlarının müraciətləri, həmçinin, vergilər nazirinin şurada baxılmasını məqsədəmüvafiq hesab etdiyi digər məsələlər araşdırılır. Artıq Vergi Apelyasiya Şurasının bu fəaliyyəti haqqında hamıda müfəssəl məlumat mövcuddur. Bunu regionlarda keçirilən görüşlər zamanı vergi ödəyicilərinin şura haqqında müxtəlif suallarla müraciət etməsi də sübut edir. Onları daha çox Vergi Apelyasiya Şurasına müraciət etmək prosedurları maraqlandırırdı. Vergi ödəyiciləri ilə görüşlərdə böyük mübahisə doğuran məsələlərlə bağlı şuraya müraciət etmələrini tövsiyə etdik və bildirdik ki, bu qurumda baxılan işlərin nəticələri vergi ödəyicilərini tam qane edəcək. Əgər vergi ödəyicisi vergi orqanına müraciət etmişdirsə və oradan verilən cavab onu qane etməmişdirsə, həmin ödəyicinin hüququ var ki, Vergi Apelyasiya Şurasına müraciət etsin. Şuranın çıxardığı qərar vergi orqanlarında yenidən baxılmır və birbaşa icraya yönəldilir. Əgər vergi ödəyicisi şuranın qərarından da razı deyilsə, onun məhkəməyə müraciət etmək hüququ özündə qalır. Odur ki, vergi ödəyiciləri tərəfindən Vergi Apelyasiya Şurasına etimad artır. Artıq Bakı Şəhər Vergilər Departamentinin Bəyannamələrin qəbulu və işlənməsi idarəsində də Apelyasiya şöbəsi fəaliyyət göstərir. Bu orqanın fəaliyyəti uğurlu olduğu üçün vergilər nazirinin əmri ilə Vergi Auditi Departamentində də belə qurum yaradılıb. Bundan əlavə, həmin departamentdə vətəndaşların müraciətlərinə baxılması ilə bağlı şöbə də fəaliyyətə başlayıb.

Yeni Azərbaycan.- 2011.- 13 iyul.- S.5.