“Azəriqaz” İB-də tikinti-quraşdırma işləri geniş vüsət alıb

Kamandar Eyvazlı: Ümumilikdə 64 yaşayış məntəqəsinə təbii qaz verilib və bu, “Azəriqaz” üçün 6367 yeni abonent deməkdir

“Azəriqaz” İB tərəfindən mövcud qaz nəqletmə şəbəkəsi genişləndirilir, yenidən qurulur və qaz təchizatının tələbata uyğun təmin edilməsi üçün lazım olan bütün tədbirlər görülür. Bu istiqamətdə həyata keçirilən irimiqyaslı tədbirlər bu ilin ilk 6 ayında da davam etdirilib. Qurumun İctimaiyyətlə əlaqələr şöbəsinin rəisi Kamandar Eyvazlı həmin tədbirlərdən danışıb:

- 2011-ci ilin 6 ayı ərzində 808,6 km qaz kəməri əsaslı təmir edilib. Qaradağ, Zabrat, Digah, Böyük-Şor, Xırdalan, Suraxanı və Mehdiabad qazpaylayıcı stansiyalarının əsaslı təmiri işləri aparılıb. Yeni əhali abonentlərinin mənzillərində 188.461 ədəd məişət qaz sayğacı quraşdırılıb ki, bunun 79.970 ədədi Bakı şəhərinin, 108.49 ədədi isə regionların payına düşüb.

- Paytaxtın qaz problemi varmı?

- Demək olar ki, yoxdur. Bir sıra ərazilərdə qazın təzyiqi ilə bağlı hansısa xırda problem ola bilər. Bütövlükdə şəbəkədə hər hansı nasazlıq yoxdur və olmaması üçün “Azəriqaz” əlindən gələni edir. Elə götürək Bakı şəhərinin Xəzər, Qaradağ, Nizami, Sabunçu, Xətai və Səbail rayonlarında apardığımız işləri. Bu rayonların qaz təchizatının yaxşılaşdırılması, qaz kəmərlərinin çəkilməsi və yenidən qurulması məqsədilə ümumən 43,76 km boru xətti quraşdırılıb.

- Ölkə Prezidenti çıxışlarında bütün regionların qazlaşdırılması məsələsini daim vurğulayır. Yəqin ki, Bakı şəhəri və onun rayonlarından kənarda da işlər görülür?

- Ölkəmizin hər bir bölgəsini qazlaşdırmaq üçün “Azəriqaz” irimiqyaslı tədbirlər görməkdədir. Bu ilin 6 ayı ərzində qazlaşdırma Goranboy, Bərdə, Masallı, Zərdab, Qusar, Yevlax, Quba, Qax, Ağcabədi, Hacıqabul, Oğuz, Füzuli, Balakən, Şəki, Daşkəsən, Lerik, Ağdam, Gədəbəy, Göygöl, Samux, Kürdəmir, Şamaxı, Sabirabad, Salyan rayonları və Naftalan şəhərini əhatə edib. Ümumilikdə 64 yaşayış məntəqəsinə təbii qaz verilib və bu, “Azəriqaz” üçün 6367 yeni abonent deməkdir.

- Magistral qaz kəmərlərinin çəkilməsi istiqamətində hansı işlər görülüb?

- Təbii ki, qazlaşdırma təsərrüfatın bütün sahələrini əhatə edir. Təkcə bu ilin 6 ayı ərzində “Astara-Qazıməmməd” 1220 mm-lik magistral qaz kəmərinin Biləsuvar rayonu ərazisində “Araz” çayının yeni məcrasına düşən hissəsinin yerinin dəyişdirilməsi üçün 6,59 km qaz xətti çəkilib. Astara Kompressor stansiyasının 2-ci mərhələdə genişləndirilməsi işləri başa çatdırılıb və istismara qəbul edilib.

- Qazlaşdırma ən kiçik kəndlərdə, qəsəbələrdə də həyata keçirilir. Bu istiqamətdə ötən 6 ayda hansı yeniliklər olub?

- Dövlət başçısının tapşırığına əsasən 2012-ci ilin sonuna kimi ölkə ərazisinin qazlaşdırılması 95 faizə çatdırılmalıdır. Bunun üçün “Azəriqaz” İB-də bütün mövcud imkanlar səfərbər edilib. Cari ildə Abşeron rayonunun Digah, Qobu, Məhəmmədi, Çaylı, Qobustan, kəndlərinin, Atyalı və Nübar qəsəbələrinin qazlaşdırılması demək olar ki başa çatıb. Mehdiabad kəndinin qaz kəməri yenidən qurulub. Masazır və Saray qəsəbəsi üçün yeni daşıyıcı qaz kəmərlərinin çəkilməsi və qəsəbədaxili qaz kəmərlərinin yenidən qurulması prosesi yekunlaşmaq üzrədir. Fatmai və Goradil kəndlərinin və bağ massivlərinin daşıyıcı qaz kəmərləri polietilen borularla dəyişdirilib. Abşeron rayonunun yaşayış məntəqələrinin qaz təchizatının yaxşılaşdırılması və qazlaşdırılması, o cümlədən, Ceyranbatan qəsəbəsinin yeni yaşayış massivlərinin qazlaşdırılması, Novxanı bağ massivində S.Orucov küçəsində 159 mm diametrli qaz kəmərinin çəkilməsi başa çatdırılıb. Nəticədə sözügedən rayonda cəmi 650 km-dən çox qaz xətləri çəkilib və 976 ədəd qaz sayğacı quraşdırılıb. Sumqayıt şəhərində 1, 2, 3, 4, 5 və 14-cü məhəllələrinin yeraltı qaz kəmərləri yer üstünə çıxarılıb və şəhərə 1,8 km qaz xətti çəkilib.

- Bölgələrdə necə, bu işlər davam etdirilirmi?

- Bəli, məsələn, Mingəçevir şəhərinin AzDRES qəsəbəsində yeni yaşayış sahəsində yerləşən fərdi evlərin qazlaşdırılması üçün 2,2 km qaz xətti çəkilib. Şəhərin “Günəşli” yaşayış massivinin qazlaşdırılması işləri başa çatdırılıb. Ağsu-Kürdəmir orta təzyiqli qaz kəmərinin daha böyük diametrli polietilen borularla yenidən qurulması da başa çatdırılıb. Yevlax rayonu Cırdaxan, Salahlı, Ağqıraq və Varvara kəndlərinin qazlaşdırılması davam edir. Səmədabad kəndi də təbii qazla təmin edilib. Ağcabədi rayonunun qazlaşdırılması da uğurla davam edib. Yuxarı Qiyamadanlı, Mirzə-Haqverdili, Hacıbədəlli, Cəfərbəyli, Ağabəyli, Şənlik, Nəcəfqulubəyli, Arazbar və Pərioğullar kəndləri, Taxtakörpü ərazisində məcburi köçkünlər üçün salınmış qəsəbə qazlaşdırılıb və burada 98,45 km qaz xətti çəkilib, 1239 ədəd qaz sayğacı quraşdırılıb. Ağdaş rayonu Ləki qəsəbəsinin təbii qaz təchizatının yaxşılaşdırılması məqsədilə bir sıra işlər görülüb. Burada daşıyıcı qaz kəmərinin yenidən qurulması ilə qəsəbənin yeni salınmış yaşayış massivinin qazlaşdırılması başa çatıb. Bundan başqa, Beyləqan rayonu Dünyamallar kəndinin qazlaşdırılması üçün isə 34,5 km qaz xətti çəkilib. Zaqatala rayonunun Əliabad qəsəbəsində də qazlaşdırma davam edib və cəmi 6,7 km polietilen boru xətti quraşdırılıb. Bərdə rayonunda Mirzəlibəyli, Şatırlı, Hacılı, Qazaxlar, Kürdborakı, Nazırlı, Həsənqaya, Saatlı kəndləri də artıq qazlaşdırılıb və 32,56 km qaz xətti çəkilib. Bərdə rayonunda Samux kəndinin qaz təchizatının bərpası məqsədi ilə 6,6 km qaz xətti çəkilib və 350 ədəd qaz sayğacı quraşdırılıb. Deyim ki, təkcə Göyçay rayonunda 23,75 km qaz xətti çəkilib. Nəticədə rayonun 3 kəndinin - Ərəbcəbirli, Şəhadət və Mirzəhüseynli kəndlərinin qazlaşdırılması reallaşıb. Hacıqabul rayon mərkəzinin qaz təchizatının yenidən qurulması işləri çərçivəsində 136,21 km uzunluğunda qaz kəməri quraşdırılıb. Rayonun Talış kəndinin qazlaşdırılması üçün cəmi 30,5 km qaz kəməri quraşdırılıb. Rayonun Qubalı Baloğlan, Qızılburun, Atbulaq, Muğan, Nəvahi, Pirsaat və digər kəndlərində qaz kəmərlərinin yenidən qurulması işləri aparılıb və 220 km uzunluğunda qaz kəməri quraşdırılıb. İmişli şəhərinin qaz təchizatının bərpası və yaxşılaşdırılması, genişlənmiş hissələrin qazlaşdırılması məqsədilə 21,5 km qaz xətti quraşdırılıb. Neftçalada da rayon mərkəzinin qaz şəbəkəsi tam şəkildə yenidən qurulur. Artıq burada 22,62 km müxtəlif diametrli boru xətti quraşdırılıb. Kürdəmir rayonunda Təklə kəndinin qazlaşdırılması üçün 13,5 km qaz xətti çəkilib. Sabirabadın Nərimankənd, Kürkəndi, Yeni Qəsəbə, Ulacalı, Mürsəli, Bulduq, Qalağayın kəndlərinin, şəhərdə yerləşən 3 ədəd 5 mərtəbəli, 12 ədəd 2 mərtəbəli, 1 ədəd 1 mərtəbəli yaşayış binalarının qazlaşdırılması məqsədi ilə 183,45 km boru xətti quraşdırılıb. Salyan rayonunun Təzəkənd ölçü qovşağından Qırxçıraq kəndinə qədər 4,5 km qaz kəməri çəkilib. Salyan şəhərinin mərkəzini təbii qazla təmin edən 159 mm diametrli orta təzyiqli qaz kəmərinin 0,8 km hissəsi yenidən qurulub. Salyan şəhəri Plastik yeni yaşayış massivində yerləşən 150 evə qaz verilib. Rayonun Yolüstü, Parça Xələc, Şeyidan, Cəngan və Piratman kəndlərinin qazlaşdırılması üçün 31,34 km qaz xətti və 186 ədəd qaz sayğacı quraşdırılıb. Zərdab rayonunun Salahlı kəndinin qazlaşması üçün 1,94 km qaz kəməri çəkilib. Ağsu rayonunun Ərəbsərvan, Bəyimli, Çiyni, Hacıqədirli, Axundlu və Göydəlləkli kəndlərinin qazlaşdırılması üçün 25,33 km uzunluğunda daşıyıcı və paylayıcı qaz kəmərləri çəkilib. Rayonun Novçu, Axundlu, Hacıqədirli, Məlikçobanlı, Ərəbsərvan kəndlərinin qazlaşdırılması işləri çərçivəsində 23,48 km polietilen qaz xətti quraşdırılıb. Qobustan rayonu Nabur kəndinin qazlaşmamış hissəsinin qazlaşdırılması məqsədi ilə 13,8 km uzunluğunda qaz xətti quraşdırılıb. Şamaxı rayonunun Göylər, Kəlləxana, Adnalı, Məlikçobanlı, Dağbağırlı, Nüyüdü, Carhan, Osmanbəyli kəndlərində təbii qaz təchizatının bərpası ilə bağlı 22,5 km yeni daşıyıcı qaz kəməri çəkilib, Nağaraxana kəndinin qazlaşdırılması zamanı cəmi 22,7 km uzunluğunda qaz xətləri quraşdırılıb. Şabran rayonunun mərkəzinin qaz təchizatı şəbəkəsinin tam şəkildə yenilənməsi 65,1 km müxtəlif diametrli qaz xəttinin quraşdırılmasından sonra mümkün olub. Naftalan şəhərinin Əlirzalı kəndinin qazlaşmamış hissəsinin, Xanqərvənd kəndinin qazlaşması da bu ilin ötən 6 ayında 44,79 km uzunluğunda qaz xəttinin quraşdırılması nəticəsində mümkünləşib. Daşkəsən rayonunun Xoşbulaq kəndinin qazlaşdırılması üçün isə 30 km qaz xətti quraşdırılıb. Goranboy rayonunun Məşəli, Börü, Zəyvə və Şəfəq kəndlərinin qazlaşdırılması nəticəsində cəmi 30 km-ə yaxın boru xətti quraşdırılıb. Gədəbəy rayonunun Düzrəsullu kəndinin qazlaşdırılması məqsədi ilə 6,8 km qaz xətti çəkilib və 577 ədəd qaz sayğacı quraşdırılıb.

Şirvan şəhərinin “Kənd evləri”nin qazlaşdırılması aparılıb və 772 ədəd qaz sayğacı quraşdırılıb. Xaçmaz rayonu Qusarçay kəndinin qazlaşdırılması, Xudat şəhərində yeni yaşayış massivinin qaz təchizatının təmin olunması üçün 16,53 km qaz xətti çəkilib və 2 ədəd QSQO quraşdırılıb. Quba rayonunun Qəçrəş kəndinin qazlaşdırılması və ətraf kəndlərin qaz təchizatının yaxşılaşdırılması üçün yeni daşıyıcı qaz kəmərinin çəkilməsi işləri aparılıb, rayonun Qələdüz, Dağlı, Qımılqazma, Küsnətqazma, Kürçal, Üçgün kəndlərinin qazlaşdırılması üçün 107,11 km qaz xətti quraşdırılıb. Qusar rayonunun Samur qəsəbəsinin, Şirvanovka, Aşağı İmamqulukənd, Mucuğoba, Üzdənoba, Salehoba, Kufoba, Zuxuloba, Avaran, Xürel, Suaçal kəndlərinin qazlaşdırılması məqsədi ilə 15,99 km qaz xətti çəkilib. Astara rayonu Penser, Kaklos, Şahağacı və Siyəkəran kəndlərinin qazlaşdırılması işləri aparılıb. Bu məqsədlə 38,38 km qaz xətti quraşdırılıb. Cəlilabad rayonu, Günəşli və Alar kəndlərinin qazlaşdırılması üçün 84,98 km qaz xətti quraşdırılıb. Lerik rayonunun Pirzəküçə kəndinin qazlaşdırılması üçün 3,53 km polietilen boru xətti quraşdırılıb. Rayonun Piran, Zərküməco, Blaband, Vizəzəmin, Hamarmeşə, Peştətük, Təbrizi, Haran, Sipyəreğon, Almu, Cənginovud, Bibiyoni, Kornədi, Şivəkəran və Hücü kəndlərinin qazlaşdırılması üçün 21 km daşıyıcı qaz kəmərinin çəkilməsi işləri aparılıb. Lənkəran rayonunun Boladı kəndinin təbii qaz təchizatının bərpası məqsədilə 24 km uzunluğunda qaz kəməri çəkilib. Masallı şəhərində qaz kəmərlərinin yenidən qurulması işləri aparılıb, cəmi 63,15 km uzunluğunda müxtəlif diametrli qaz kəmərləri çəkilib. Rayonun Qızılavar kəndinin qazlaşdırılması üçün 19,41 km qaz xətti çəkilib, 28 ədəd qaz sayğacı quraşdırılıb. Qəbələ rayonu da qazlaşma prosesindən kənarda qalmayıb. Vəndam qəsəbəsinin qazlaşdırılması zamanı 33 km qaz xətti çəkilib. Qəbələ şəhərində Beynəlxalq Hava Limanınadək yolun genişləndirilmiş hissəsində qaz kəmərinin və qurğuların yerinin dəyişdirilməsi məqsədi ilə 7,22 km qaz xətti çəkilib. Oğuz rayonunun Bucaq kəndinin qazlaşdırılması işləri də davam edib və 42,5 km uzunluğunda qaz xətti çəkilərək qaz təminatı bərpa edilib.

- Yəqin ki, cəbhə bölgələrinin qazlaşdırılması da gündəmdə olan məsələlərdəndir?

- Təbii ki, bu sualınıza cavab olaraq bildirirəm ki, Qazax rayonunun Bala Cəfərli kəndinə qaz xətti çəkilərək 36 ədəd qaz sayğacı quraşdırılıb. Rayonun Daşsalahlı və Hüseynbəyli kəndinin də qaz təchizatının bərpası prosesi başa çatdırılıb. Tovuz rayonunun Qonaqlı, Qaralar, Kirən, Çataq, Şıxheybət, Qoşa və Muncuqlu kəndlərinin qazlaşdırılması üçün 4,97 km qaz xətti çəkilib. Tovuz rayonunun Əlimərdanlı kəndinin qaz təchizatının bərpası işləri aparılıb, 1,6 km qaz xətti çəkilib . Ağdam rayonunda Hacıməmmədli, Əfəlli, İsalar, Küdürlü, Mahrızlı, Zəngişalı, Həsənxanlı, Qəhrəmanbəyli, Məmmədbağırlı, Evoğlu, Qaradağlı, Rzalar kəndlərinin qazlaşdırılması işləri aparılıb, 96,09 km qaz xətti çəkilib. Dördyol-1 və Dördyol-2 qəsəbələrinin qazlaşdırılması məqsədi ilə 13,4 km qaz xətti çəkilib və 272 ədəd qaz sayğacı quraşdırılıb. Rayonun Quzanlı və Təzəkənd qəsəbələrində fərdi yaşayış evlərinin qazlaşdırılması üçün 28,19 km qaz xətti çəkilib və 71 ədəd qaz sayğacı quraşdırılıb. Füzuli rayonunun Şükürbəyli, Alxanlı, Kərimbəyli və Böyük Bəhmənli kəndlərinin qazlaşdırılması üçün 107,69 km qaz xətti çəkilib. Kərimbəyli kəndinin qazlaşdırılması üçün 16,6 km qaz xətti çəkilib və 522 ədəd qaz sayğacı quraşdırılıb.

- Bəs QPS-lərdə hansı işlər aparılır?

- Bildirirəm ki, Hacıqabul QPS-2-nin 15-25 atmosfer təzyiqli girişindən Şirvan şəhərinə qazın verilməsi üçün yeni tənzimləyici qovşağın və 315 mm-lik yeraltı qaz kəmərinin tikinti işləri həyata keçirilib. Samux rayonunun Alıuşağı kəndi ərazisində QPS-in tikintisi və həmin QPS-dən Göygöl rayonunun Hacıməlik qəsəbəsindəki ölçü qovşağına qədər 9,4 km polietilen borularla qaz kəməri çəkilib. Rayonun Əlibayramlı və Füzuli (Sunu) kəndlərinə 31 km uzunluğunda qaz xətti çəkilib və 496 ədəd qaz sayğacı quraşdırılıb. Balakən AQPS-dən rayon mərkəzinə gedən 500 mm-lik qaz kəmərinin dəyişdirilməsi prosesi də yekunlaşıb. Bu ilin 6 ayı ərzində 5,86 km uzunluğunda qaz xətti çəkilib. Rayonun Katex kəndinin qazlaşdırılması işləri aparılıb və 28,53 km qaz xətti quraşdırılıb. Qax rayonunun Marsan, Qorağan kəndlərinin qazlaşdırılması yekunlaşıb. Şamaxı rayonunun Hacılı kəndində yeni QPS-in tikintisi də başa çatmaq üzrədir. Yaxın vaxtlarda həmin QPS-dən 4 kəndi əhatə etməklə 1400 abonentə təbii qazın verilişi təmin ediləcək.

RUHİYYƏ

Yeni Azərbaycan.- 2011.- 26 iyul.- S.6.