Azərbaycan - Rumıniya
münasibətlərinin inkişafında gənclərin rolu
Azərbaycan müstəqilliyinin
bərpa edilməsindən 20 il ötür. Bu illər ərzində Azərbaycan
böyük uğurla xarici siyasət yürüdür.
İlk onillikdə əsas məqsəd 86,6 min km2 ərazidə
yerləşən və böyük tarixə malik olan ölkəmizi
tanıtmaq idisə, sonrakı illərdə artıq məyyən
nailiyyətlərə əsaslanaraq regionda öz
sözünü daha güvənli, əminliklə deyən Azərbaycanı
görmək olar.
Bu gün regionda həyata
keçirilən hər hansı bir layihəni Azərbaycansız
təsəvvür etmək mümkün deyil. Xəzər dənizi
hövzəsindən karbohidrogen zənginliklərinin dünya
bazarlarına daşınmasında, Şərq-Qərb və
Şimal-Cənub enerji dəhlizlərinin effektiv
çalışmasında, region dövlətlərinin Avropa
təsisatlarına inteqrasiyası prosesində, son illər qlobal
təhlükəyə çevrilmiş terrorla dünya
dövlətlərinin mübarizəsində Azərbaycan
Respublikasının rolu çox vacib və danılmazdır.
Xarici dövlətlərin Vətənimizə olan
marağının bariz nümunəsi kimi, son illərdə
Bakı şəhərinə rəsmi səfərlə təşrif
buyurmuş ölkə və hökumət
başçıları, müxtəlif dövlət və
qeyri-dövlət strukturları rəhbərləri, biznes
qurumlarının təmsilçiləri tərəfindən
səsləndirilən fikirləri yada salmaq olar.
Eyni zamanda, dünya mədəniyyətlərarası
dialoqun qurulması və inkişaf etdirilməsi, bu platformalardan
istifadə edərək köklü mədəniyyətimizin
dünya xalqları arasında təbliğ olunması dövlətimizin
xarici siyasətinin əsas istiqamətlərindən biri
sayılır. Bu istiqamətin vacibliyini Azərbaycan
Respublikasının Prezidenti cənab İlham Əliyevin 29 may
2011-ci il tarixində imzaladığı “Azərbaycan
Respublikasında Ümumdünya Mədəniyyətlərarası
Dialoq Forumunun təşkili barədə Fərman”dan bir daha
anlamaq olar.
Digər bir istiqamət, Azərbaycan
Respublikasının müxtəlif platformalarda tərəfdaş
formatında təmasda olduğu ölkələrlə ikitərəfli
münasibətlərin inkişaf etdirilməsindən ibarətdir.
Avrointeqrasiya prosesində aktiv rol oynayan Azərbaycan bir
çox Avropa təsisatlarının üzvü və yaxud
müxtəlif proqramlar iştirakçısı kimi bu istiqamətdə
ciddi nailiyyətlər əldə etməkdədir. Təbii
ki, bu uğurların təməlində ikitərəfli
münasibətlərin çox yüksək səviyyədə
qurulması dayanır. Son illər həm ölkə rəhbərləri
arasında olan münasibətlər, həm də ikitərəfli
ticarətin inkişafı nöqteyi-nəzərdən Azərbaycan
– Rumıniya münasibətləri gənclər arasında
xüsusi maraq kəsb edir.
İki ölkə
arasında əlaqələr müxtəlif müstəvidə
inkişaf etdirilməkdədir.
Diplomatik münasibətlərin
qurulmasının 20 illiyini qeyd etməyə hazırlaşan
Azərbaycan və Rumıniya bu illər ərzində 50-dən
çox müxtəlif sənəd imzalamışdır. Bu sənədlərdən
Azərbaycan Respublikasının Prezidenti cənab İlham Əliyevin
Rumıniyaya son səfəri zamanı imzalanan “Strateji tərəfdaşlığın
yaradılmasına dair razılaşma haqqında birgə bəyannamə”
və Rumıniya Respublikasının Prezidenti cənab Trayan
Baseskunun 2011-ci ilin aprel ayında Azərbaycana səfəri
zamanı imzalanan “Strateji tərəfdaşlığın həyata
keçirilməsi üzrə Birgə Fəaliyyət
Planı”nın ikitərəfli münasibətlərin
möhkəmlənməsi baxımından xüsusi önəm
daşıdıqlarını qeyd etmək lazımdır.
2011-ci ilin əvvəlində
Avropa İttifaqı ilə Azərbaycan arasında “Cənub
qaz dəhlizi” üzrə bəyannamə imzalanıb.
Avropanın enerji təhlükəsizliyi məsələlərinin,
bu bəyannamə əsasında, o cümlədən Azərbaycanın
resursları hesabına həll olunması nəzərdə
tutulub. Azərbaycanın zəngin qaz ehtiyatlarının
müxtəlif yollarla dünya bazarına
çıxarılması baxımından Rumıniya-Azərbaycan
əlaqələri xüsusi əhəmiyyət kəsb edir.
Çünki Rumıniya həm NABUCCO layihəsinin fəal
üzvüdür, eyni zamanda, AGRİ layihəsinin də təşəbbüskarıdır.
Humanitar sahədəki əməkdaşlıq
öz nəticələri ilə bizləri sevindirməyə
bilməz. Azərbaycanın Ümummilli lideri Heydər Əliyevin
abidəsinin Buxarestdə, Rumıniyanın görkəmli bəstəkarı
Corce Eneskunun abidəsinin isə Bakıda ucaldılması bu
sahədəki əlaqələrə də çox müsbət
təsir göstərməkdədir.
Yeni Azərbaycan
Partiyasının sədri cənab İlham Əliyevin
uğurlu xarici siyasətinin nəticəsi kimi müxtəlif
ölkələrdə fəaliyyət göstərən
siyasi partiyaların Azərbaycanın lider partiyası olan Yeni
Azərbaycan Partiyası ilə geniş əlaqələrin
qurulmasında maraqlı olmalarını qeyd etmək olar.
Ölkələr arasında
geniş əlaqələrin bir təzahürü kimi Yeni Azərbaycan
Partiyası və PDL (Demokrat Liberal Partiyası) arasında
mövcud əməkdaşlığı vurğulamaq olar.
Rumıniyanın hakim
partiyası olan PDL (Demokrat Liberal Partiyası) 1990-cı ildə
təsis edilib. Ölkə prezidenti T.Basesku partiyanın
keçmiş, Baş nazir Emil Bok isə hal-hazırkı sədridir.
Bu gün Rumıniyanın ən güclü siyasi
qruplarından biri olan PDL-in ölkənin Avropa strukturlarına
inteqrasiya prosesində müstəsna rolu mövcuddur. Müxtəlif
qurumlarda (AŞ PA, AP) partiyalarını təmsil edən
deputatların sayına görə PDL ön sıralarda yer
almış təşkilatlar arasındadır. Misal
üçün qeyd etmək lazımdır ki, Avropa
Parlamentində ən böyük fraksiya olan Avropa Xalq
Partiyasında PDL 11 deputatla təmsil olunur. Bu, sayca Avropada
3-cü göstəricidir.
17 fevral 2011-ci il tarixində
Ruminıyanın Buxarest şəhərində PDL və YAP
arasında əməkdaşlıq haqqında anlaşma
memorandumu imzalanıb. PDL sədrinin birinci müavini A.Videanu və
YAP Sədrinin müavini, İcra Katibi Ə.Ahmədov öz
imzaları ilə aşağıdakı məqamlara dair birgə
mövqedən cıxış etdiklərini bəyan ediblər:
1. Partiyalararası əlaqələrin
Azərbaycan və Rumıniya münasibətlərinin
mühüm tərkib hissəsi olduğunun nəzərə
alınması;
2. Müstəqillik,
qarşılıqlı hörmət, bir-birinin daxili işlərinə
qarışmamaq, bərabərlik və tərəfdaşlıq
prinsiplərinə asaslanmaq;
3. Ölkələrin ikitərəfli
və çoxtərəfli əlaqələri ilə
bağlı məsləhətləşmələrin və
informasiya mübadiləsinin aparılması, beynəlxalq əlaqələr
və digər sahələrdə təcrübə mübadiləsinin
həyata keçirilməsi;
4. Partiyaların gənclər
təşkilatları arasında əlaqələrin
qurulmasına, gənclər siyasəti sahəsində təcrübə
mübadiləsinin reallaşdırılması.
Sonuncu prinsipə uyğun
olaraq, cari ilin 16-20 may tarixlərində YAP Gənclər Birliyi
sədri Seymur Orucov, beynəlxalq məsələlər
üzrə müavin Ramin Məmmədov və ümumi məsələlər
üzrə müavin Emin Əliyevdən ibarət olan nümayəndə
heyəti Rumıniyada səfərdə olub. Səfərin əsas
məqsədi ölkələrində lider siyasi qurumları təmsil
edən gənclər arasında əməkdaşlığın
genişləndirilməsi, Avropa Xalq Partiyası çərçivəsində
gənclərlə bağlı həyata keçirilən tədbir
və layihələrdə YAP gənclərinin
iştirakının təmin olunması kimi məsələlərdən
ibarət idi.
Rumıniya Parlamentində
keçirilən görüşlərdə birmənalı
şəkildə iki ölkə arasında mövcud olan
geniş əlaqələrin əsas götürülməsi
vurğulanaraq, gənclər təşkilatları arasında əməkdaşlığın
genişləndirilməsi, təcrübə mübadiləsi və
birgə layihələrin həyata keçirilməsi, Avropa
İttifaqı çərçivəsində aparılan gənclər
siyasətindən Azərbaycan gənclərinin
faydalanmasının vacibliyi qeyd olundu. Senator Radu Aleksandru və
Deputatlar Palatasının üzvü Danuts Liqa gənclərlə
görüşlərdə iki ölkə gəncliyi
arasında dostluq və əməkdaşlıq münasibətlərinin
inkişafı və möhkəmləndirilməsi istiqəmətində
aparılan işlərə tam dəstək verəcəklərini
bəyan edərək bir daha göstərdilər ki,
Rumıniya və Azərbaycan arasındakı münasibətlər
sadəcə enerji sahəsində deyil, eyni zamanda bir neçə
istiqamətdə inkişaf etməkdədir.
PDL Gənclər Təşkilatının
liderlərindən biri olan Sorin Moldovanla görüşdə
Azərbaycanın Avropa təsisatlarında geniş və
güclü iş apardığını qeyd edərək,
bu sahədə gənc siyasətçilərin də ciddi
iş aparmalarının vacibliyi səsləndirilib.
Müzakirə mövzusu olan
Avropa Xalq Partiyası gənclər qruplarında Azərbaycanın
təmsil olunması istiqamətində aparılacaq işlər
haqqında fikir mübadiləsi yekununda Avropa Xalq Partiyası Gəncliyi
(YEPP), həmçinin Avropa Demokrat Tələbələr
(EDS) kimi mühüm təşkilatlarda YAP Gənclər
Birliyinin geniş və aktiv şəkildə təmsil
olunması istiqamətində birgə fəaliyyət
proqramının hazırlanmasına dair razılıq əldə
olunub.
Azərbaycan gənclərinin
Rumıniyaya səfəri Azərbaycan - Rumıniya ikitərəfli
münasibətlərində yeni bir istiqamət yaradaraq,
mövcud ölkələrarası əməkdaşlıq
miqyasının genişləndirilməsinə imkan
yaradıb.
Ramin Məmmədov,
YAP Gənclər Birliyi sədrinin
Beynəlxalq məsələlər üzrə
müavini
Yeni Azərbaycan.- 2011.- 3 iyun.- S.4.