Azərbaycanın gələcəyi gənclərlə bağlıdır

YAP Sədrinin müavini-İcra katibi, millət vəkili Əli Əhmədov partiyanın Suraxanı rayon təşkilatı Gənclər Birliyinin fəalları ilə görüş keçirib

Dünən Yeni Azərbaycan Partiyası (YAP) Sədrinin müavini-İcra katibi, millət vəkili Əli Əhmədov partiyanın Suraxanı rayon təşkilatı Gənclər Birliyinin fəalları ilə görüş keçirib. Tədbiri giriş sözü ilə açan YAP Suraxanı rayon təşkilatının sədri Vüqar Seyidov bu görüşün 15 İyun - Milli Qurtuluş Gününə həsr olunduğunu bildirib. Gənclərin ölkəmizin ictimai-siyasi həyatında fəal rol oynadığını qeyd edən rayon təşkilatının sədri belə görüşlərin zəruri olduğunu vurğulayıb. V.Seyidov, həmçinin, Milli Qurtuluş Günü haqqında da fikirlərini bildirib.

Görüşdə çıxış edən YAP Sədrinin müavini-İcra katibi, millət vəkili Əli Əhmədov öncə Milli Qurtuluş Günü münasibətilə gəncləri təbrik edib. Əli Əhmədov bildirib ki, 15 İyun - Milli Qurtuluş Günü bir tərəfdən Heydər Əliyevin əzəmətinin və qüdrətinin, digər tərəfdən Azərbaycan xalqının müdrikliyinin və siyasi kamilliyinin təntənəsidir. Onun sözlərinə görə, Ulu öndər Heydər Əliyevin hakimiyyətə tarixi qayıdışına qədər Azərbaycan tənəzzül etməkdə olan bir ölkə kimi tanınırdısa, bu gün o, bütün dünyada ən yüksək sürətlə inkişaf edən iqtisadiyyata malik bir dövlət kimi qəbul olunur: “Ümummilli lider Heydər Əliyevin tarixi qayıdışı Azərbaycanın bir ölkə olaraq həyatının tamamilə dəyişməsi ilə müşayiət edildi. Heydər Əliyevin hakimiyyətə gəlişindən sonra Azərbaycanın keçdiyi yola nəzər salsaq görərik ki, ölkəmiz hərtərəfli iflas və tənəzzül yolundan Ümummilli liderin müəyyənləşdirdiyi siyasət nəticəsində inkişaf, tərəqqi və yüksəliş dövrünə qədəm qoydu”.

YAP Sədrinin müavini vurğulayıb ki, Heydər Əliyevin hakimiyyətə qayıdışı həyatımızın bütün sahələrindəki inkişaf, tərəqqi, yüksəlişlə müşayiət olunur. O bildirib ki, bu gün ölkəmiz Ulu öndər Heydər Əliyevin möhtəşəm qayıdışı ilə əsası qoyulan inkişafın böyük mərhələsini keçərək yüksələn, müasirləşən, yeniləşən bir Azərbaycan kimi özünü tanıda bilib: “Azərbaycanın müasir tarixinin ən əzəmətli hadisəsi Heydər Əliyevin qayıdışında özünü ehtiva edən qurtuluş məfkurəsi ilə əlaqədardır. Qurtuluş məfkurəsi Azərbaycana nə verdi sualına cavab axtararkən ölkəmizin bugünkü həqiqətlərini, mənzərəsini, vətəndaşlarımızın əhval-ruhiyyəsini, bütövlükdə Azərbaycanın gözəl gələcəyi üçün yaradılan imkanları göstərmək lazımdır. Ötən müddət ərzində Azərbaycan fəlakətlərdən, hərtərəfli iflasdan geniş inkişaf yoluna çıxaraq sabitliyin təmin olunduğu, iqtisadiyyatı sürətlə inkişaf edən, dünyada rolu durmadan artan bir ölkə kimi özünü təsdiq edib. Bütün bunlar Ulu öndər Heydər Əliyev qətiyyətinin, müdrikliyinin bəhrəsidir”.

Əli Əhmədov qeyd edib ki, ölkəmizin bugünkü inkişafı Azərbaycan gəncliyi üçün böyük imkanlar açıb. YAP Sədrinin müavini Azərbaycan dövlətinin uğurlu gənclər siyasəti həyata keçirdiyini bildirib. Əli Əhmədov qeyd edib ki, dövlət hər zaman gəncliyə önəm verib və bu gün də verməkdədir. “Bu fakt bir daha təsdiqləyir ki, dövlətimiz Azərbaycan gəncliyinin inkişafına xüsusi diqqət yetirir” - deyə, o vurğulayıb.

Azərbaycanın sürətlə inkişaf etdiyini deyən YAP Sədrinin müavini qeyd edib ki, Prezident İlham Əliyevin siyasətinin məqsədi ölkəmizi zəngin, firavan və qüdrətli dövlətə çevirməkdən ibarətdir. “YAP Azərbaycanın ən güclü, qüdrətli siyasi təşkilatıdır. Partiyamız gələcəkdə də Azərbaycanın inkişafında həlledici rol oynayan, bu inkişafı təmin edən siyasi təşkilat olaraq qalacaq” - deyə Əli Əhmədov qeyd edib.

O bildirib ki, Azərbaycan müasirləşir, modernləşir və bu proses davamlı xarakter daşıyır. Əli Əhmədovun sözlərinə görə, cəmiyyətimiz bu yeniliklərə uyğunlaşmalı, müasir dövrün çağırışlarına cavab verməlidir: “Təbii ki, bu prosesdə yenilikçi qüvvə olaraq gənclərin üzərinə böyük məsuliyyət düşür. Gənclərimiz bu prosesi irəli aparmaq üçün fəal olmalıdırlar. Sevindirici haldır ki, partiyamızın sıralarında təmsil olunan gənclər yüksək intellektual potensiala malikdir və bu məsuliyyətin öhdəsindən gəlmək iqtidarındadır”.

Əli Əhmədov YAP üzvlərinin 40 faizinin gənclərdən ibarət olduğunu da diqqətə çatdırıb. O gənclərin öz siyasi talelərini Ulu öndər Heydər Əliyevin qurucusu olduğu partiya ilə bağlamalarının əhəmiyyətini vurğulayıb: “Gənclər bu qənaətdədirlər ki, özlərini ifadə etmək üçün ən əlverişli mühit YAP-dadır və bu partiyanın üzvü olmaqla Azərbaycanın ictimai-siyasi həyatında fəal iştirak etmək imkanları əldə etmiş olurlar. YAP gənclərə ən düzgün yol göstərən əzəmətli siyasi təşkilat, Azərbaycanın yaxın keçmişini, bu gününü və gələcəyini özündə ifadə edən güclü bir partiyadır. YAP-ın gücü, əzəməti və gələcəklə bağlı olan perspektivləri, ilk növbədə, partiyanın istinad etdiyi ideya və prinsiplərə söykənir. YAP-ın yaradıcısı Heydər Əliyev bu partiyanın formalaşmasının elə əzəmətli və əbədiyaşar prinsiplərini müəyyənləşdirib ki, bu prinsiplərə istinad edən partiya mövcudluğu dövründə həm üzvləri, həm də Azərbaycan xalqının bəslədiyi bütün ümidləri doğrulda bilib. Sevindirici haldır ki, gənclərin partiyamıza axını böyük vüsət alıb”.

Əli Əhmədovun sözlərinə görə, Azərbaycan hökumətinin fəaliyyətində gənclərlə bağlı siyasət əsas yerlərdən birini tutur. Gənclərin yaxşı təhsil alması, müasir dünyagörüşünə yiyələnməsi, malik olduğu potensialı ifadə etməsi və bu potensialı Azərbaycanın inkişafı istiqamətinə yönəltməsi bu gün hökumətimizin həyata keçirdiyi siyasətin əsas qayəsini, ideya bazasını təşkil edir. Ölkə Prezidentinin Sərəncamı əsasında 2011-2015-ci illərdə Azərbaycan gəncliyinin inkişafı ilə əlaqədar Dövlət Proqramının hazırlandığını deyən Əli Əhmədov bildirib ki, bu proqramda gəncliyin inkişafını təmin etmək üçün ən ümdə vəzifələr öz əksini tapacaq. YAP Sədrinin müavini qeyd edib ki, proqramın qəbul olunub həyata keçirilməsi Azərbaycan gəncliyinin daha da inkişafına ciddi təkan verəcək.

“YAP-ın mövqeyi bundan ibarətdir ki, ölkəmizin müasirləşməsi və modernləşməsində, bütövlükdə inkişaf, quruculuq prosesində Azərbaycan gəncliyi yaxından iştirak etməlidir. Gənclərimiz yüksək biliklərə, müasir dünyagörüşünə yiyələniblər. Bütün bu və digər amillər gənclərin Azərbaycanın inkişafında çox əzəmətli güc olduğunu ortaya qoyur. Hökumətimiz və partiyamız da bu gücdən faydalanmaq, Azərbaycanın inkişafı naminə bu amildən səmərəli istifadə etmək yolunu tutub” - deyə, o vurğulayıb.

Əli Əhmədov bildirib ki, ölkəmizdə sabitliyin, əminamanlığın möhkəmləndirilməsi hər bir Azərbaycan vətəndaşının, xüsusilə, gənclərin borcudur. Çünki Azərbaycanın gələcəyi gənclərlə bağlıdır. Ona görə də, gənclər bugünkü sabitliyin, əminamanlığın, dincliyin qorunmasında maraqlı olmalıdırlar ki, bütün bunların əsasında Azərbaycan daha da inkişaf etsin və gənc nəsil üçün daha yüksək rifahın təmin edildiyi bir Azərbaycan qurulsun. “Təəssüf ki, gənclərimizin kiçik bir hissəsini Azərbaycanın inkişafını gözü götürməyən qüvvələrin sifarişini həyata keçirən müxalifət partiyalarının radikal qanadı öz ətrafına toplayıb. Bəzi siyasi partiyalar var ki, gənclərdən özlərinin mənfi məqsədləri üçün istifadə edirlər. Onlardan ictimai-siyasi sabitliyi pozmaq, hansısa xarici qüvvələrin maraqlarını həyata keçirmək üçün istifadə etməyə çalışırlar. Səhv yola gedən gəncləri isə bu yoldan çəkindirməkdə onlara kömək etməlisiniz. Az da olsa gənclərimiz kimlərinsə maraqlarının həyata keçirilməsi üçün alətə çevrilirlər. Dünyada baş verən proseslər sübut edir ki, kənar qüvvələrin müdaxiləsi ilə heç bir millət xoşbəxt, firavan olmayıb. Əksinə, belə müdaxilələr o ölkələrdə fəlakətlərlə, dağıntılarla müşayiət olunur. Ona görə də, gənclərimiz ayıq olmalı, proseslərə düzgün qiymət verməlidirlər” - deyə, YAP Sədrinin müavini vurğulayıb.

Tədbirdə çıxış edən YAP Suraxanı rayon təşkilatı Gənclər Birliyinin sədr müavini Fariz Cəfərov gəncliyin inkişafı ilə bağlı fikirlərini bildirib. Dövlətin gənclərə qayğısından bəhs edən F.Cəfərov buna nümunə kimi özünün iki il Londonda təhsil almasını göstərib. Təşkilatın sıralarında 2675 gəncin birləşdiyini deyən sədr müavini bu gənclərin sosial şəbəkələrdə fəallıq göstərdiyini bildirib.

Suraxanı rayon İcra Hakimiyyətinin başçısı İlqar Abbasov çıxışında 15 İyun-Milli Qurtuluş Gününün əhəmiyyəti haqqında fikirlərini bildirib. O qeyd edib ki, bugünkü inkişafın əsası qurtuluşdan başlayır. Son illər ərzində Azərbaycanın bütün bölgələrinin inkişaf etdiyini deyən İ.Abbasov Suraxanı rayonunun sosial-iqtisadi inkişafı istiqamətində görülən işlər haqqında da ətraflı məlumat verib.

Görüşdə, həmçinin, YAP Sədrinin müavini Əli Əhmədov gənclərin suallarını cavablandırıb.

Daha sonra bir qrup partiya fəalları fəxri fərmanlarla təltif olunub, YAP sıralarına yeni qoşulmuş gənclərə üzvlük vəsiqələri təqdim edilib.

Tədbirdə YAP İcra katibinin müavini, millət vəkili Mübariz Qurbanlı iştirak edib.

Nardar BAYRAMLI

Yeni Azərbaycan.- 2011.- 15 iyun.- S.2.