Günü-gündən yeniləşən Yevlax

Öz inkişaf tempinə görə region üçün nümunə sayıla biləcək Yevlax bu gün Azərbaycanın ən qabaqcıl rayonlarından biridir

Bu, bir həqiqətdir ki, hazırda öz inkişafına görə, Cənubi Qafqazda lider dövlətə çevrilən Azərbaycanda bütün sahələrdə tərəqqi müşahidə edilir. Əsası Ulu öndər Heydər Əliyev tərəfindən qoyulan və Prezident İlham Əliyev tərəfindən uğurla davam etdirilən siyasət nəticəsində təkcə paytaxt Bakı deyil, eyni zamanda, bütün bölgələrimiz yüksək inkişaf dövrünə qədəm qoyublar. Onu da vurğulamaq yerinə düşər ki, Azərbaycanda həyata keçirilən sosialyönümlü siyasət nəticəsində digər bölgələrdə olduğu kimi, Yevlaxda da sosial-iqtisadi inkişafın sürətləndirilməsi üçün genişmiqyaslı, əhatəli, real nəticələrlə müşayiət olunan işlər görülüb. Hazırda özünün tərəqqi dövrünü yaşayan Yevlaxda bu uğurlara məhz dövlət başçısının imzaladığı Fərman, Sərəncam və təsdiqlədiyi dövlət proqramlarından irəli gələn vəzifələrin yerinə yetirilməsi nəticəsində nail olunub. Hər halda Azərbaycan Respublikasının Prezidenti İlham Əliyevin dövlət başçısı kimi 8 ildə Yevlağa 6 dəfə səfər etməsi, həmçinin, dövlət başçısının 14 aprel 2009-cu il tarixli Fərmanı ilə təsdiq edilmiş “Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı”na Yevlağın həyatının bütün sahələrini əhatə edən 15 tədbirin daxil olması belə deməyə əsas verir. Belə demək mümkünsə, 2010-cu ili də uğurlarla başa vuran Yevlax inkişaf tempinə görə region üçün nümunə sayıla bilər.

Qala kompleksindən başlanan Novruz tədbirləri

Yevlağa budəfəki səfərimiz Novruz bayramı günlərinə təsadüf edirdi. Özü də bu Novruz yevlaxlıların həyatında təkcə yeni ilin başlanması kimi deyil, həm də yeni Qala kompleksinin istifadəyə verilməsi ilə əlamətdar oldu. Elə Novruz şənliklərinə də şəhərin Nizami prospektində yenicə istifadəyə verilmiş Qala kompleksindən alovun götürülməsi ilə start verildi və bayram tədbiri Yevlağın mərkəzi meydanında davam etdirildi.

Novruz tonqalının yandırılmasından sonra yevlaxlıları təbrik edən şəhər İcra Hakimiyyətinin başçısı Qoca Səmədov “İnanırıq ki, növbəti Novruz atəşfəşanlığının məskəni bütün Qarabağ olacaq” dedi.

İH başçısı əlavə etdi ki, xalqımızın Ümummilli lideri Heydər Əliyev tərəfindən əsasları möhkəm təməl üzərində qurulmuş Azərbaycan dövləti getdikcə qüdrətlənir: “Biz belə bir qüdrətli dövlətin vətəndaşı olmaqdan şərəf duyuruq. Ulu öndər Heydər Əliyevin ideyalarının layiqli daşıyıcıları olmaq uğrunda çalışır və yurdumuzu Onun arzu etdiyi bir məkana çevirmək üçün əlimizdən gələni edirik. Biz baharı qarşılamağa hazırlaşırıq. Bahar deyəndə gözlərimiz önünə gül-çiçək, bar- bərəkət, gözəllik gəlir. Amma ölkə Prezidenti möhtərəm İlham Əliyev cənablarının respublikamıza rəhbərlik etdiyi 8 il ərzində ölkəmiz ilin bütün fəsillərində gülüstanı xatırladır. Geniş quruculuq və abadlıq işləri sayəsində yurdumuzun hər yerində olduğu kimi, şəhərimizdə də bu Bahar, müqəddəs və əziz Novruz bir ayrı büsatda qarşılanır. Geniş, yaraşıqlı prospektlər, küçələr, bir-birindən gözəl parklar, xiyabanlar yazın ilıq nəfəsinin duyulduğu günlərdə daha füsunkar görünür”.

Yevlax getdikcə daha da gözəlləşir

Yeri gəlmişkən, çalışdıqları sahələrdə fərqlənən yevlaxlıların fəxri fərman və müxtəlif hədiyyələrlə mükafatlandırılması mərasimindəki çıxışlar zamanı xüsusi olaraq qeyd edildi ki, 2010-cu ildə şəhərin həyatında baş verən ən yaddaqalan hadisə Azərbaycanın dövlət başçısının bir ildə iki dəfə Yevlağa səfər etməsidir. Ümumiyyətlə isə, yuxarıda da vurğuladığımız kimi, 8 ildə 6 dəfə Yevlağa səfər etmiş Prezident İlham Əliyevin hər dəfə söylədiyi fikirlər yevlaxlıların yaddaşında dərin izlər buraxıb.

Məsələn, 2007-ci il oktyabrın 23-də Yevlaxda olan Azərbaycan Prezidenti İlham Əliyev “Azərbaycan inkişaf edir, Azərbaycan çiçəklənir. Azərbaycanın bütün bölgələrində işlər elə gedir və getməlidir ki, ən yüksək dünya səviyyəsi Azərbaycana gəlsin və biz buna nail oluruq. Mən Yevlaxın timsalında bunu görürəm” deyib.

2009-cu ilin martın 2-dəki səfəri zamanı dövlət başçısı Yevlağın Azərbaycanın ən qabaqcıl rayonlarından biri olduğunu bildirib: “Yevlax getdikcə daha da gözəlləşir, daha da müasirləşir, çox gözəl binalar tikilir, çox gözəl abadlıq işləri aparılır”.

Dövlət başçısının 2010-cu il oktyabrın 14-də Yevlağa səfəri zamanı söylədiyi fikirlər isə yevlaxlıların əməyinə verilən ən yüksək qiymətdir: “Bu gün Azərbaycan qüdrətli dövlətdir. Bu gün Azərbaycan təkcə təhsildə deyil, bütün sahələrdə böyük işlərə qadirdir. Hara baxsan, bunu görmək mümkündür. Elə Yevlağın yeniləşən simasına baxın. Siz burada yaşayırsınız, bəlkə öyrəşmisiniz. Amma mən Prezident kimi buraya beşinci dəfədir ki, gəlirəm. Ondan əvvəlki dövrlərdə də burada olmuşam. Mən də yaxşı xatırlayıram burada vəziyyət necə idi. Yevlax bu gün Avropanın ən qabaqcıl şəhərlərindən bir addım geri qalmır”.

2010-cu il də Yevlax üçün uğurlu olub

Beləliklə, əvvəlki illərdə olduğu kimi, 2010-cu ildə də Yevlax rayonunda sosial-iqtisadi sahədə uğurlu nəticələr qazanılıb. Tikinti-quruculuq işlərinin miqyası genişləndirilib, infrastrukturun yaxşılaşdırılmasına, əhalini narahat edən problemlərin həllinə xüsusi fikir verilib. Şəhər İcra Hakimiyyətindən verilən məlumata görə, 2010-cu ildə rayonda ümumi daxili məhsulun (ÜDM) həcmi 569,9 milyon manat olub. Bu, 2009-cu ilə nisbətən 143,2 milyon manat və yaxud 33,5 faiz çoxdur. ÜDM-in 11,4 milyon manatını sənaye, 68,2 milyon manatını kənd təsərrüfatı, 287,6 milyon manatını tikinti, 162,2 milyon manatını ticarət, 4,1 milyon manatını nəqliyyat, 0,8 milyon manatını rabitə, 35,6 milyon manatını digər xidmətlər təşkil edib. Sənaye məhsulunun 5 milyon 129,3 min manatlığı ixrac olunub. Bu, satılmış sənaye məhsulunun 49,7 faizini təşkil edir. İl ərzində adambaşına 4753,4 manat ÜDM istehsal olunub ki, bu da 2009-cu ilə nisbətən 1149,7 manat, yaxud 31,9 faiz çoxdur.

2010-cu ildə əhalinin pul gəlirləri də artıb ki, bu da öz növbəsində yevlaxlıların iqtisadi və sosial rifah halının yaxşılaşması, yaşayış səviyyəsinin daha da yüksəlməsi deməkdir. Hesabat ilində bütün maliyyə mənbələri hesabına kapital qoyuluşunun həcmi 336,6 milyon manat olub. Bu, 2009-cu ilə nisbətən 155,2 milyon manat və yaxud 85,6 faiz çoxdur.

Hesabat dövründə kənd təsərrüfatı məhsullarının istehsalı əvvəlki illə müqayisədə 13,6 faiz artıb. 2009- cu ilin eyni dövrü ilə müqayisədə mal-qara 221 baş, qoyunlar 1812 baş, quşlar 1246 baş artıb, 72 ton ət, 291 ton süd, 115,2 min ədəd yumurta, 4,2 ton yun, 498 ton çox pambıq istehsal edilib.

Su, qaz və elektrik enerjisi ilə təminat yüksək səviyyədədir

Yevlaxda əhalinin su, qaz və elektrik enerjisi ilə təminatı ötən ildə də diqqət mərkəzində olub. Belə ki, 17 kənddə içməli suyu təmizləyən qurğular quraşdırılıb, 85 km. uzunluğunda kəndarası su xətləri çəkilib və 175 bulaq tikilib. Bu isə əhalinin ekoloji cəhətdən təmiz su ilə təmin olunmasıdır. Yeri gəlmişkən, içməli sutəmizləyici qurğuların quraşdırılmasının səviyyəsi respublikanın digər rayonlarına nisbətən Yevlaxda daha yüksəkdir. Hazırda şəhərin 7 küçəsində 1550 p/m uzunluğunda kanalizasiya xətlərinin çəkilişi aparılır ki, bu da əhalinin məişət şəraitinin yaxşılaşması, komfortun təmin olunmasıdır.

2010-cu ildə əhalinin elektrik enerjisi ilə təminatı sahəsində də bir sıra işlər görülüb, abonentlərin keyfiyyətli və dayanıqlı elektrik enerjisi ilə təmin edilməsi istiqamətində ardıcıl tədbirlər həyata keçirilib. Təkcə onu demək kifayətdir ki, hazırda Yevlaxda şəhər və kənd yaşayış məntəqələrinə 24 saat elektrik enerjisi verilir.

Bu inkişafı rayonun təbii qazla təmin edilməsi sahəsində də müşahidə etmək olar. İl ərzində rayonun 10 yaşayış məntəqəsi təbii qazla təmin edilib və insanların bu yerlərdə yaşam tərzi, həyat səviyyəsi yüksəlib, güzəranları yaxşılaşıb. Bu işlərin görülməsi üçün 32,5 km təzyiqli daşıyıcı, 28 km paylayıcı qaz xətləri çəkilib.

Bütün təbəqələr diqqət mərkəzindədir

Ötən il Yevlaxda sahibkarlara, iş adamlarına 15 milyon 480,9 min manat kredit verilib, 1218-i daimi olmaqla 1843 iş yeri açılıb. Ümumilikdə, 2004-2010-cu illərdə rayonda 14822 iş yeri yaradılıb ki, onlardan da 8004-ü daimi iş yerləridir. Sosial müdafiəyə ehtiyacı olan 2605 ailəyə 3 milyon 148 min manat ünvanlı sosial yardım ödənilib. Onu da xüsusi olaraq vurğulamaq yerinə düşər ki, məhz rayonun daxili imkanları hesabına şəhid ailələrinə, Qarabağ müharibəsi əlillərinə və digər imkansız şəxslərə 307,4 min manat yardım edilib.

Quruculuq-abadlıq işləri davam edir

Ötən il Milli Təhlükəsizlik Nazirliyinin Yevlax şöbəsinin, Əhalinin Sosial Müdafiə Mərkəzinin, Dövlət Miqrasiya Xidmətinin Qanunsuz Miqrantların Saxlanması Mərkəzinin, “Bank of Azerbaijan”ın Yevlax filialının, Baytarlıq idarəsinin inzibati binaları, “Azərtoxum” MMC toxum emalı müəssisəsi, saatda 60 kubmetr beton istehsal edən zavod, Qarabağ müharibəsi əlilləri və şəhid ailələri üçün 36 mənzilli bina, 4 məktəb, məcburi köçkünlər üçün 612 mənzilli 10 ədəd beşmərtəbəli bina, 480 şagird yerlik orta məktəb, uşaq bağçası və digər infrastrukturdan ibarət yaşayış məhəlləsi istifadəyə verilib, sahibkarlar tərəfindən hər biri 72 mənzilli 2 ədəd altımərtəbəli binanın inşası başa çatdırılıb. Şəhərdə 37 binanın dam örtüyü təmir olunub. Hazırda 235 çarpayılıq regional klinik xəstəxananın, “Lalə Tekstil” MMC- nin II növbəsinin, Laminat parket zavodunun, ayaqqabı fabrikinin, dekorativ plitə istehsal edən sexin, Azərbaycan Beynəlxalq Bankının Yevlax filialının, Fövqəladə Hallar və İqtisadi İnkişaf nazirliklərinin regional idarələrinin, Yevlax şəhəri üzrə Maliyyə İdarəsinin, Qaz istismar idarəsinin, Mərkəzi Bankın Yevlax ərazi idarəsi və ehtiyatların idarəetmə mərkəzinin binalarının, Könüllü Hərbi Vətənpərvərlik Texniki İdman Cəmiyyətinin birləşmiş avtomobil məktəbinin, Kür çayının sağ sahilində bulvar kompleksinin, 5 ulduzlu mehmanxananın, Avtovağzal binasının, 5 və 6 mərtəbəli yaşayış binalarının, açıq havada muzeyin, Qarabağ müharibəsi əlilləri və şəhid ailələri üçün 36 mənzilli binanın, Xaldan-Yevlax yolunun tikintisi, Dəmiryol vağzalının və “Yevlax-beton” ASC-nin yenidən qurulması, K-11 kollektorunda nasos stansiyasının tikintisi və təzyiqli xətlərin çəkilişi davam etdirilir. Şəhər ərazisindən keçən Xaldan-Mingəçevir, Xaldan-Zaqatala avtomobil yollarına, Nizami prospektinə, 9 küçəyə, Xaldan, Nemətabad, Nərimanabad, Hacıselli, Varvara, Kövər kəndlərinin giriş və daxili yollarına asfalt örtüyü salınıb. 28 kənddə 99,6 kilometr kənddaxili yollara, şəhərdə 9 küçəyə çınqıl döşənərək hamarlanıb.

Təhsil, səhiyyə və mədəniyyət sahələrində də inkişaf qeydə alınıb

İcra Hakimiyyətindən onu da bildirdilər ki, ötən ildə də Yevlağın təhsil, səhiyyə və mədəniyyət sahələrində inkişaf qeydə alınıb. Təhsilin maddi-texniki bazasının möhkəmləndirilməsi, təhsilin məzmunca yeniləşməsi, müasir tələblər baxımından təşkili, müasir düşüncə tərzinin formalaşması istiqamətində əvvəlki illərdə həyata keçirilmiş tədbirlər hesabat ilində də davam etdirilib. Dünyanı iqtisadi böhran bürüdüyü bir zamanda şəhərdə 3 yeni məktəb binası inşa edilib. Şəhər 1 saylı orta məktəbi üçün tikilmiş, ən müasir texniki avadanlıqlarla və məktəb inventarları ilə tam təchiz edilmiş 600 şagird yerlik yeni məktəb binası 2010-cu il oktyabrın 14-də öz qapılarını məktəblilərin üzünə açıb. Sevindirici faktdır ki, məktəbin açılış mərasimində ölkə başçısı İlham Əliyev və xanımı Mehriban Əliyeva iştirak ediblər. Cırdaxan və Xaldan kəndlərində hər cür avadanlıqlarla təchiz edilmiş 180 şagird yerlik məktəb binaları tikilib istifadəyə verilib. Şəhər Uşaq-gənclər idman məktəbi, Meyvəli kənd ibtidai məktəbi, uşaq bağçası-körpələr evi əsaslı təmir edilərək yenidən qurulub. Təhsilin səviyyəsinin yüksəldilməsi, IX və XI sinif şagirdlərinin buraxılış imtahanlarına hazırlanması, onların bilik səviyyəsinin artırılması istiqamətində Şəhər Təhsil Şöbəsi tərəfindən bir sıra tədbirlər həyata keçirilib.

Hesabat ilində rayonun səhiyyə müəssisələrində əhaliyə göstərilən tibbi xidmətin səviyyəsinin yüksəldilməsi istiqamətində həyata keçirilən tədbirlər də əhəmiyyətli olub. İl ərzində 1720 nəfər xəstəxanalarda stasionar müalicə olunub, 64270 nəfər ambulator müayinədən keçib. Səhiyyə nazirinin “Yevlax rayonunun tibb müəssisələri şəbəkəsində dəyişikliklərin edilməsi barədə” 5 avqust 2009-cu il tarixli 95 saylı əmrinə əsasən 9 kənd xəstəxanası həkim məntəqəsinə, Yuxarı Qarxun kənd feldşer-mama məntəqəsi tibb məntəqəsinə çevrilib, Cırdaxan kəndində və İrəvanlı qəsəbəsində yeni tibb məntəqələri yaradılıb. Ana və uşaqlara göstərilən səhiyyə xidmətinin yaxşılaşdırılması, bu sahəyə vahid nəzarətin əlaqəli təşkili, cərrahiyyə xidmətinin yaxşılaşdırılması üçün ginekologiya və doğum şöbələrinin əsasında 40 çarpayılıq mamalıq-ginekologiya şöbəsi yaradılıb, Ailə Planlaşdırılması və Reproduktiv Sağlamlıq Mərkəzi Qadın məsləhətxanasının binasına köçürülüb, xəstələrin əlaqəli müalicəsinin təşkili məqsədilə xəstəxanada 60 çarpayılıq vahid cərrahiyyə şöbəsi təşkil edilib.

2010-cu il Yevlaxda əhaliyə göstərilən mədəni-maarif xidmətinin səviyyəsinin yüksəldilməsi ilə də yaddaqalandır. Bu məqsədlə, Şəhər Mədəniyyət və Turizm Şöbəsi tərəfindən tədbirlər həyata keçirilib. Yeni yaradılan Elektron kitabxanada, əsaslı təmirdən çıxmış Uşaq kitabxanasında oxuculara göstərilən xidmətin keyfiyyəti yüksəlib, onların kütləviliyi artıb. Mevvəli kənd kitabxanası, klubu əsaslı təmir edilib, yeni avadanlıqlarla, latın qrafikası ilə nəşr olunmuş ədəbiyyatlarla təchiz edilərək istifadəyə verilib.

Yeri gəlmişkən, ötən il hər üç sahədə fərqlənən Yevlax fəalları üçün xüsusilə yaddaqalan olub. Belə ki, Prezident İlham Əliyevin sərəncamları ilə üç nəfər həkim “Əməkdar həkim” adına, üç nəfər mədəniyyət işçisi “Əməkdar mədəniyyət işçisi”, 4 nəfər müəllim “Əməkdar müəllim” fəxri adına layiq görülüb, 1 nəfər isə “Tərəqqi” medalı ilə təltif olunub.

Nadir AZƏRİ

Bakı-Yevlax-Bakı

Yeni Azərbaycan.- 2011.- 30 mart.- S.6.