“Heydər Əliyev və Azərbaycanın müasirləşmə strategiyası”

Yeni Azərbaycan Partiyası Ümummilli liderimiz Heydər Əliyevin anadan olmasının 88-ci ildönümünə həsr olunmuş konfrans keçirib

Yeni Azərbaycan Partiyası (YAP) mayın 7-də “Gülüstan” sarayında partiyanın yaradıcısı, Ümummilli liderimiz Heydər Əliyevin anadan olmasının 88-ci ildönümünə həsr olunmuş “Heydər Əliyev və Azərbaycanın müasirləşmə strategiyası” mövzusunda konfrans keçirib.

Konfrans iştirakçıları öncə Fəxri Xiyabana gedərək Ulu öndərimizin xatirəsini yad edib, məzarı önünə əklil və gül dəstələri qoyublar.

Görkəmli oftalmoloq alim, akademik Zərifə xanım Əliyevanın da xatirəsi anılıb, məzarı üstünə gül-çiçək düzülüb.

Konfransı giriş sözü ilə açan YAP Sədrinin müavini-İcra katibi, millət vəkili Əli Əhmədov bildirib ki, 2003-cü ildən başlayaraq, Yeni Azərbaycan Partiyası Ümummilli lider Heydər Əliyevin zəngin irsinin ətraflı öyrənilməsi və təbliği məqsədi ilə hər il Onun anadan olduğu gün ərəfəsində çoxsaylı tədbirlər, həmin günə həsr edilmiş konfrans keçirir. Bu il də əvvəlki illərdə olduğu kimi, müxtəlif tədbirlər təşkil edilib, konfransın materialları isə partiyanın İcra katibliyi tərəfindən toplanaraq eyniadlı kitab şəklində çap olunub.

YAP Sədrinin müavini qeyd edib ki, xalqımız Ulu öndərin doğum gününü ümummilli bayram kimi qeyd edir. Onun sözlərinə görə, ölkəmizin hər yerində, dünyanın azərbaycanlıların yaşadığı hər bir ölkəsində Heydər Əliyevin xatirəsi bu il də geniş şəkildə anılır, Ümummilli liderə insanların dərin hörmət və ehtiramı bir daha vurğulanır.

Əli Əhmədov bildirib ki, Ulu öndər Heydər Əliyevin müəyyənləşdirdiyi inkişaf strategiyası bu gün özünün müsbət nəticələrini verməkdədir. Ölkəmizin sürətlə inkişaf etdiyini deyən YAP Sədrinin müavini qeyd edib ki, artıq Azərbaycan yeniləşir, müasirləşir və modernləşir. “Ulu öndər Heydər Əliyevin ölkəmizə rəhbərlik etdiyi dövrdə Azərbaycanın müasirləşməsi məsələsi Onun fəaliyyətində əhəmiyyətli yer tutub. Ulu öndərin baxışları prizmasından yanaşsaq, müasirləşmə, modernləşmə Azərbaycanın iqtisadiyyatından tutmuş həyatımızın bütün sferalarının müasir tələblər baxımından yeniləşməsi məfkurəsini və təcrübəsini özündə ehtiva edir. Modernləşmə hər şeydən əvvəl iqtisadiyyatın sürətli inkişafının etibarlı və əzəmətli resursu kimi qavranılır. Eyni zamanda, modernləşmə dedikdə, istehsalın müasir rəqabət tələblərinə uyğunlaşmasını təmin edən amillər nəzərdə tutulur. Digər tərəfdən, modernləşmə insan fəaliyyətinin bütün sferalarında elmin və yeni texnologiyaların tətbiqini özündə ehtiva edir. Həmçinin, modernləşmə ictimai kommunikasiyanın ən müasir yeni formalarının tətbiq edilməsi kimi başa düşülür. Nəhayət, modernləşmə təbii ki, insanın yeni həyat keyfiyyətinin təmin edilməsi amillərinin məcmusudur”, - deyə Əli Əhmədov vurğulayıb

Azərbaycanın müasirləşmə strategiyasının həyata keçirilməsi istiqamətində əhəmiyyətli addımlar atıldığını, Ulu öndər Heydər Əliyevin müəyyənləşdirdiyi strategiyanın Prezident İlham Əliyev tərəfindən uğurla həyata keçirildiyini deyən YAP Sədrinin müavini bildirib ki, bu strategiya dövlətimizin daha da güclənməsinə, insanların yüksək rifahına xidmət edir.

Əli Əhmədov əmin olduğunu deyib ki, bu konfransın keçirilməsi, tədbirdə səslənən dəyərli ideyalar qarşıdakı dövrlərdə ictimai fikrimizdə Azərbaycan cəmiyyətinin müasirləşməsi məsələlərini ciddi araşdırmalar və tədqiqatlar obyektinə çevirəcək.

Sonra konfransda Baş nazirin birinci müavini, YAP Siyasi Şurasının üzvü Yaqub Eyyubov “Heydər Əliyev iqtisadi modeli, müasir inkişafımızın əsasıdır” mövzusunda məruzə ilə çıxış edib Ümummilli liderlə bağlı xatirələrini bölüşüb. Talenin onun həyatını Ulu öndər Heydər Əliyevlə bağladığına görə özünü xoşbəxt hesab etdiyini vurğulayan Y.Eyyubov hələ tələbə olduğu zaman dahi şəxsiyyətin daim Azərbaycanın gələcəyini düşünərək gəncliyə göstərdiyi böyük diqqət və qayğının şahidi olduğunu bildirib: “Həyatımın müxtəlif sahələrində, təhsildə, dövlət qulluğunda Ulu öndərlə birgə işləmək mənə nəsib olmuşdur. Bu gün də bu yola sadiq qalan Ulu öndərin layiqli davamçısı cənab İlham Əliyevin rəhbərliyi altında üzərimə düşən vəzifəni yerinə yetirməyə çalışıram”.

Azərbaycan xalqının Ümummilli lideri haqqında danışmağın heç də asan məsələ olmadığını qeyd edən Y.Eyyubov vurğulayıb ki, “Mən fəxr edirəm ki, azərbaycanlıyam” deyib mənalı ömrünü xalqına bəxş etmiş bir insan haqqında söz demək həm şərəfli, həm də məsuliyyətlidir: “Onun fəaliyyət dairəsi o qədər geniş və əhatəlidir ki, bu haqda nə qədər də danışsaq, azdır. Ulu öndər Heydər Əliyev son bir neçə əsrdə xalqımızın yetirdiyi ən nadir şəxsiyyət və qüdrətli dövlət xadimi kimi Azərbaycanın tarixində çox dərin izlər qoyub. Ümummilli lider hakimiyyətdə olduğu bütün zamanlarda var qüvvəsi ilə ölkəmizin gələcək inkişafı, firavanlığı və müstəqilliyi naminə yorulmadan çalışıb”.

Heydər Əliyevin birinci dəfə hakimiyyətdə olduğu dövrdə sosial-iqtisadi sahədə əldə edilən uğurlar barədə konkret faktlarla danışan Baş nazirin birinci müavini qeyd edib ki, dövlət idarəçiliyində Ulu öndərin özünəməxsus dəst-xətti, dəmir prinsipiallığı, proseslərə müntəzəm şəxsi nəzarəti, tələbkarlığı və obyektivliyi tezliklə öz nəticələrini verirdi. Baş nazirin birinci müavini vurğulayıb ki, bütün bu işlər yalnız Heydər Əliyevin fenomenal uzaqgörənliyinin və bacarığının, şəxsi əzmkarlığının, Vətənə böyük sevgisi sayəsində mümkün olmuş, reallığa çevrilmişdi. O, əminliklə deyib ki, məhz həmin dövrlərdə yaradılan iqtisadi potensial çox sonralar özünün dövlət müstəqilliyini bərpa etmiş Azərbaycanın inkişafı üçün yaxşı təməl idi.

Baş nazirin birinci müavini məruzəsində Ulu öndərin rəhbərliyi ilə Azərbaycan iqtisadiyyatının müstəqillik illərində də qazandığı uğurları qeyd edib, sosial-iqtisadi inkişaf ilə bağlı qarşıda duran vəzifələr haqqında ətraflı məlumat verib.

Y.Eyyubov inamla bildirib ki, Azərbaycanın güclənən mövqeləri, iqtisadiyyatının inkişafı, beynəlxalq nüfuzunun artması, xüsusən Prezident İlham Əliyevin siyasi iradə nümayiş etdirməsi, xalq-iqtidar birliyi 2011-ci ildə qarşıda duran vəzifələrin uğurla yerinə yetiriləcəyinə, o cümlədən, Dağlıq Qarabağ münaqişəsinin beynəlxalq hüququn tələbləri səviyyəsində və ölkəmizin maraqları çərçivəsində həll olunacağına əsas yaradır. O, 2011-ci ilin də ölkəmizin inkişafı üçün uğurlu olacağına əmin olduğunu deyib: “Bu, həm də o deməkdir ki, Ulu öndərin sosial-iqtisadi inkişaf konsepsiyası, məhz, Onun arzuladığı kimi, uğurla davam etdirilməkdədir. İndi bu böyük siyasəti xüsusi əzmkarlıq və iradə ilə yeni düşüncəli, müasir tipli bir rəhbər davam etdirir. Ölkənin davamlı inkişafına, milli maraqlarımıza, xalqın rifahının yaxşılaşdırılmasına xidmət edən iqtisadi-sosial strategiya bu gün Prezident İlham Əliyevin rəhbərliyi altında davam etdirilərək, Onun ardıcıl, məqsədyönlü və praqmatik siyasəti sayəsində müvəffəqiyyətlə reallaşdırılmaqdadır. Biz tam əminliklə deyə bilərik ki, Prezident İlham Əliyev Ulu öndərimizin müəyyənləşdirdiyi sosial-iqtisadi inkişaf xəttini inamla davam etdirərək ölkəni irəliyə, intibaha doğru aparacaq”.

Konfransda Prezident Administrasiyasının (PA) İctimai-siyasi məsələlər şöbəsinin müdiri, YAP İdarə Heyətinin üzvü Əli Həsənov “Heydər Əliyev və Azərbaycanın müasir geosiyasi inkişafı” mövzusunda çıxış edərək müasir dövrdə ölkəmizin dünyada və bölgəmizdəki mövqeyi barədə geniş məruzə edib. Müasir müstəqil dövlətimizin formalaşması, inkişafı və dünyada tanınmasında Ümummilli lider Heydər Əliyevin əvəzsiz rolundan söz açan şöbə müdiri bildirib ki, qısa zaman kəsiyində Azərbaycanda ictimai-siyasi sabitliyin bərpa edilməsi, ardıcıl milli dövlət quruculuğu və sosial-iqtisadi siyasətin həyata keçirilməsi, bazar iqtisadiyyatı mexanizmlərinin yaradılması, dövlət mülkiyyətinin özəlləşdirilməsi və biznes mühitinin liberallaşdırılması həyata keçirildi.

Ümummilli lider Heydər Əliyevin geosiyasi təlimindən çıxış edən Əli Həsənov hazırkı onillikdə və növbəti yüz ildə Azərbaycanın qarşısında duran əsas geosiyasi, geoiqtisadi və hərbi-geostrateji vəzifələri, ölkənin gələcək geosiyasi uğurlarını təmin edəcək milli strateji xəttin təsnifatını verib. O, bildirib ki, buraya birinci növbədə Cənubi Qafqazın lider dövləti geosiyasi statusunun qazanılması, möhkəmləndirilməsi və qorunub saxlanması daxildir. PA-nın şöbə müdiri vurğulayıb ki, Azərbaycan öz iqtisadi inkişaf potensialına və milli resurslarına görə faktiki olaraq regionun lider ölkəsinə çevrilib.

Məruzəçi bildirib ki, növbəti addım Avropa və dünyanın enerji təhlükəsizliyi sahəsindəki mövqeləri qorumaq, gücləndirmək və ölkənin milli maraqları ilə sıx əlaqələndirməkdən ibarətdir. Ə.Həsənov deyib ki, Avropa İttiqafının enerji təhlükəsizliyində həm tranzit ölkə, həm də neft və qaz təchizatçısı kimi tanınması XXI əsrdə Azərbaycanın geosiyasi dəyərini artırması üçün geniş perspektivlər yaradır.

Məruzəçi bildirib ki, növbəti geostrateji xətt geosiyasi mövqelərin möhkəmləndirilməsi taktikasının çevikləşdirilməsi və sistemli təminatından ibarətdir. Ə.Həsənovun sözlərinə görə, Dağlıq Qarabağ probleminin həllinə dinc yolla nail olunması növbəti geosiyasi xətti təşkil edir. O, bildirib ki, hazırda Azərbaycan özünün və ümumilikdə regionun geosiyasi, geoiqtisadi maraqları və perspektivi baxımından, bütün daxili və xarici münaqişələrin tezliklə, yeni müharibəyə əl atmadan - sülh yolu ilə nizamlanmasının tərəfdarı kimi çıxış edir: “Lakin Ermənistanın qeyri-konstruktiv mövqeyinin 20 ildən artıq davam etməsi və beynəlxalq aləmin buna ikili standartlar çərçivəsində yanaşması Azərbaycanın təkcə səbrini tükətmir, həm də getdikcə müharibəyə başlamaq ehtimalını artırır”.

Şöbə müdiri vurğulayıb ki, növbəti geosiyasi vəzifələrə Qərblə əməkdaşlığı zəiflətmədən, Türkiyə ilə strateji münasibətlərin dərinləşdirilməsi, Rusiya və İranla qarşılıqlı maraqlara söykənən tərəfdaşlıq münasibətlərinin yaradılması və inkişaf etdirilməsi; ABŞ-İran geosiyasi ziddiyyətləri fonunda hər iki dövlətlə dostluq və tərəfdaşlıq münasibətlərinin qorunması; yeni geosiyasi reallıqlara və bundan irəli gələn qlobal çağırışlara operativ reaksiya verilməsi, strateji tərəfdaşlarla geosiyasi münasibətlərə xələl gətirmədən daha praqmatik siyasət yürüdülməsi; dünyada baş verən son qlobal dəyişikliklərin mahiyyəti, Cənubi Qafqazda formalaşmış geosiyasi reallıqlar və onun yeni təzahür formalarının ciddi təhlil olunması, proseslərə təsir göstərən amilləri, onların meydana gəlməsi səbəblərini və digər məsələlərin araşdırılması, mövcud şəraitdə Azərbaycanın geosiyasi və geoiqtisadi addımlarını, transmilli layihələrlə bağlı prioritet vəzifələrini, onların təmin olunması yollarını və vasitələrini praqmatik şəkildə dəyərləndirməkdən ibarətdir.

Ə.Həsənov bildirib ki, ermənilərin zaman-zaman azərbaycanlılara qarşı törətdiyi soyqırımı siyasətinin ifşa edilməsi və dünyada effektli antierməni siyasətinin aparılması da geosiyasi vəzifələr sırasında xüsusi yer tutur.

PA-nın şöbə müdiri xüsusi qeyd edib ki, Ulu öndər Heydər Əliyev tərəfindən müəyyən edilmiş bu geosiyasi vəzifələr Onun böyük tarixi xidmətlərindəndir və həmin xətt bu gün dövlət başçısı İlham Əliyev tərəfindən uğurla davam etdirilir.

Konfransda Milli Məclis sədrinin müavini, YAP İdarə Heyətinin üzvü Bahar Muradova “Müasir Azərbaycan: Heydər Əliyev ideyaları ilə uğurlu inkişaf yolunda” mövzusunda məruzə ilə çıxış edib. B.Muradova bildirib ki, bu gün ölkəmizin qazandığı nailiyyətlərin əldə olunması, müasir Azərbaycanın ərsəyə gəlməsi, müstəqilliyimizin qorunub saxlanılması, dövlətçiliyimizin inkişafı Ulu öndər Heydər Əliyevin ideyaları əsasında hazırlanan, ölkəmizin milli maraqlarına söykənən dövlət quruculuğu xəttinə əsaslanır.

Azərbaycanın müstəqilliyinin əbədi olacağını vurğulayan B.Muradova qeyd edib ki, Heydər Əliyevin yaratdığı iqtisadi model bu gün uğurla həyata keçirilməkdədir. “Cənubi Qafqaz regionunun lider dövləti olan, ildən-ilə Avropanın enerji təhlükəsizliyi məsələsində əhəmiyyətli tərəfdaşa çevrilən və dünya miqyasında nüfuzu artan Azərbaycanın əldə etdiyi inkişaf trayektoriyası istər dünya ölkələri, istərsə də beynəlxalq təşkilatlar tərəfindən xüsusi olaraq vurğulanır. Bir neçə il öncə başlayan qlobal maliyyə böhranının fonunda ölkəmizdə müşahidə olunan dayanıqlı iqtisadi inkişaf Azərbaycanda həyata keçirilən uğurlu daxili iqtisadi-sosial siyasətin bəhrəsi sayıla bilər. Bu, ölkəmizin inkişafının əsas təməl prinsipini özündə əks etdirən Ulu öndər Heydər Əliyevin siyasi kursunun Azərbaycanda paralel olaraq bütün sahələr üzrə inkişafını təmin etməsini əsaslandıran amildir. Dayanıqlı iqtisadi siyasət, habelə, müstəqil və tarazlı şəkildə həyata keçirilən xarici siyasət kursu Azərbaycan dövlətinin hər bir müstəvidə - istər daxili sabitliyin, inkişafın təminatında, istərsə də beynəlxalq dayaqların möhkəmləndirilməsində mühüm əhəmiyyət kəsb edir. Qeyd olunan sferalarda qısa zaman kəsiyində iqtisadi, mədəni, sosial və hərbi-siyasi sahədə qazanılan uğurlar ilk növbədə xalqımızın Ümummilli lideri Heydər Əliyevin adı ilə bağlıdır. Xüsusi olaraq vurğulanmalıdır ki, sadalanan nailiyyətlərin əldə olunması, müasir Azərbaycanın ərsəyə gəlməsi, müstəqilliyimizin qorunub saxlanılması, dövlətçiliyimizin inkişafı Ulu öndərin ideyaları əsasında hazırlanan, dövlətimizin milli maraqlarına söykənən dövlət quruculuğu kursuna əsaslanır”, - deyə vitse-spiker vurğulayıb.

Konfrans plenar iclasdan sonra bölmələrdə öz işini davam etdirib. “Heydər Əliyev siyasəti və müasirləşmə” adlanan birinci bölmənin iclası YAP Səbail rayon təşkilatının sədri, partiyanın İdarə Heyətinin üzvü Zahid Qaralovun rəhbərliyi ilə keçirilib.

Z.Qaralov bildirib ki, ümumiyyətlə, strateji hədəflər, ideoloji dayaqlar, sosial baza düzgün təyin olunandan sonra inkişaf strategiyasını formalaşdırmaq üçün maddi və mənəvi bazalar nəzərdən keçirilir, qiymətləndirilir. Beləliklə, beş mühüm parametr: strateji hədəflər, ideoloji dayaqlar; sosial, maddi (iqtisadi) və mənəvi bazalar əsasında inkişaf strategiyası əsaslandırılır, ölkədaxili bütün qüvvələr, imkanlar bir istiqamətə-strateji parametrlərin reallaşdırılmasına yönəldilir.

YAP İdarə Heyətinin üzvü, professor Şahlar Əsgərov çıxışında deyib ki, Ulu öndər Heydər Əliyevin həyatına nəzər salanda, Onun hər gün onlarla, ildə minlərlə, ömrü boyu isə yüz minlərlə hadisə və proseslərin içərisindən keçdiyini təsəvvür etmək olar.

YAP İdarə Heyətinin üzvü Kərim Kərimov isə çıxışında bildirib ki, Heydər Əliyevin zəngin dövlətçilik təcrübəsini dərindən mənimsəmiş cənab İlham Əliyev Ulu öndərin möhkəm təməllər üzərində formalaşdırdığı idarəçilik ənənələrini əzmlə davam etdirir: “Heydər Əliyevin müəllifi olduğu yeni neft strategiyasının davam etdirilməsi, ölkədə bazar iqtisadiyyatı prinsiplərinin tam bərqərar olması, xarici investisiyaların, neft istehsalından əldə edilən gəlirlərin əhəmiyyətli hissəsinin qeyri-neft sektoruna yönəldilməsi, işsizlik problemlərinin həlli, əhalinin maddi-rifah halının yaxşılaşdırılması kimi mühüm işlər Prezidentimiz İlham Əliyevin yeritdiyi sosial-iqtisadi siyasətin aparıcı istiqamətlərindəndir”.

O, qeyd edib ki, yüksək intellektli, enerjili, praqmatik düşüncəli, təşəbbüskar, yenilikçi keyfiyyətlərinə, yüksək zövqə malik, xalq arasında “qurucu, yaradıcı İlham” adını qazanmış siyasi varis qarşıda duran böyük işlərin öhdəsindən müvəffəqiyyətlə gəlmək üçün yeni iş metodları tətbiq etdi. “İlk növbədə, sovet dövründən miras qalmış, uzun sürən sürəkli alqışlarla müşayiət olunan təntənəli iclasların, istehsalat və zona müşavirələrinin keçirilməsi praktikasına son qoydu. Sadə adamlarla canlı əlaqə yaratdı. Bu məqsədlə rayon, şəhər əhalisi mərkəzi meydana toplaşır, cənab Prezident də onlara yaxınlaşıb hal-əhval tutur, qayğıları, problemləri ilə maraqlanır, aidiyyəti olan halimiyyət nümayəndələrinə tapşırıq və göstərişlər verir. Seçki ərəfəsində ətraf kəndlərin yol ətrafında toplaşmış əhalisi qarşıda dayanır, söhbətlər, çıxışlar edir. Bu cür görüşlərin əhəmiyyəti ondan ibarət olur ki, cənab Prezident əhalinin yaşayış vəziyyətini hansısa məmurun dilindən yox, birbaşa xalqın özündən eşidir”, - deyə K.Kərimov vurğulayıb.

“İki sahil” qəzetinin baş redaktoru, YAP Siyasi Şurasının üzvü Vüqar Rəhimzadə isə bildirib ki, xalqın, millətin böyüklüyü say tərkibi ilə deyil, soy-kökünün qədimliyi, tarixinin, mədəniyyətinin, milli-mənəvi dəyərlərinin zənginliyi, ən əsası bəşəriyyətə bəxş etdiyi tarixi şəxsiyyətləri ilə müəyyənləşir: “Ölkəmizdən çox-çox uzaqlarda şöhrət tapmış dövlət xadimləri, siyasətçilər, uzaqgörənliyi ilə tanınan müdrik şəxsiyyətlər haqqında söz düşəndə ilk növbədə, Ümummilli lider Heydər Əliyevin adı çəkilir. Ulu öndər Heydər Əliyev xalqımızın dünya tarixinə bəxş etdiyi elə qüdrətli dövlət xadimlərindəndir ki, yeni-yeni nəsillər zaman-zaman Onun ömür yoluna müraciət edəcək, zəngin irsini araşdıracaq, təhlil edəcək, öyrənəcək, liderlik məktəbindən dərs alacaqlar. Hər bir xalq, millət keçmişinə hörmət bəslədikdə onun gələcəyi parlaq olur, dünyada özünü yüksək səviyyədə təsdiq edir. Ulu öndər Heydər Əliyev Azərbaycanın keçmişi deyil, ölkəmizin bugünkü uğurları və perspektivləri Onun adı ilə bağlıdır”.

YAP Qadınlar Şurasının sədri, Dövlət Pedaqoji Kollecinin direktoru Nurlana Əliyeva isə çıxışında bildirib ki, Heydər Əliyevin siyasi və dövlətçilik irsi misilsiz bir xəzinədir. Onun sözlərinə görə, müstəqil dövlətimiz, xalqımız Heydər Əliyev yolu ilə gedərkən bu xəzinəni öyrənməli, onun dərslərini təhlil etməli və bütün bunlardan xalqımızın sürətli tərəqqisi üçün istifadə etməlidir.

YAP Siyasi Şurasının üzvü, millət vəkili Aydın Mirzəzadə isə bölmə iclasında çıxışı zamanı Dağlıq Qarabağ problemi ilə bağlı ölkəmizin həyata keçirdiyi siyasətdən bəhs edib. O, bildirib ki, Azərbaycanın düzgün seçdiyi inkişaf xətti onu bütün parametrlər üzrə Ermənistandan əhəmiyyətli dərəcədə önə çıxartdı. A.Mirzəzadə qeyd edib ki, Azərbaycan dövlətçiliyinin inkişafına Heydər Əliyev töhfəsi bu gün də öz müsbət nəticəsini verməkdədir: “Böyük idarəçilik təcrübəsinə, dəmir məntiqə, prosesləri düzgün təhlil etmək qabiliyyətinə malik Heydər Əliyev Dağlıq Qarabağ probleminin haradan qaynaqlandığını yaxşı bilirdi. Tarix sübut etdi ki, Heydər Əliyevin problemin həllini ilk növbədə güclü və qüdrətli Azərbaycan dövlətinin qurulmasında görməsi çox düzgün siyasət idi. Məhz Onun birbaşa iştirakı ilə cəmiyyətdəki demokratiya, güclü iqtisadiyyat, güclü sosial müdafiə sistemi, güclü ordu Azərbaycanı problemin həllində qətiyyətli etməyə imkan verdi. ATƏT-in Minsk qrupu adlı beynəlxalq vasitəçi qurum və onun ABŞ, Rusiya və Fransa kimi nüfuzlu ölkələrdən ibarət həmsədrlər institutu müntəzəm olaraq bu problemin həlli ilə məşğuldurlar. Onların fəaliyyəti Azərbaycan cəmiyyətini tam təmin etməsə də, ortada Azərbaycan dövlətinin ərazi bütövlüyünü tanıyan və Ermənistan beynəlxalq hüquq müstəvisinə çəkmək istəyən üç dövlətin birgə səyi var”.

Bölmə iclasında çıxış edən digər natiqlər də Ulu öndər Heydər Əliyevin həyat və fəaliyyəti haqqında fikirlərini bildiriblər.

Nardar BAYRAMLI

Yeni Azərbaycan.- 2011.- 11 may.- S.4.