“Eurovision-2011” mahnı müsabiqəsində qələbəmiz xalqın təmsilçilərinin gözü ilə

Millət vəkilləri bu qələbəni yüksək qiymətləndirirlər

“Eurovision-2011” mahnı müsabiqəsində Azərbaycanın qələbəsi millət vəkilləri tərəfindən də böyük sevinclə qarşılanır. Belə ki, Milli Məclisin dünən keçirilən iclasında çıxışlar, eləcə də, söhbət etdiyimiz zaman millət vəkilləri bu sevinci bütün ölkə vətəndaşları ilə bölüşüblər.

Milli Məclisin sədri Oqtay Əsədov bütün millət vəkillərini bu uğur münasibətilə təbrik edib. Spiker bu hadisəni bütün Azərbaycanın qələbəsi kimi dəyərləndirib.

Milli Məclis sədrinin müavini Bahar Muradova da Eldar Qasımov və Nigar Cemalın “Eurovision” yarışmasında qələbəsini Azərbaycanın çox böyük uğuru kimi qiymətləndirib. B.Muradova, eyni zamanda, bu hadisəni təkcə sənət, musiqi sahəsində qazanılan uğur kimi deyil, Azərbaycanın dünyada tanıdılması istiqamətində əldə edilən bir nailiyyət olaraq hesab etdiyini bildirib. Onun sözlərinə görə, Azərbaycanın ikinci dəfə müstəqillik qazanmasından sonra bütün istiqamətlərdə - həm siyasət, həm iqtisadiyyat, həm mədəniyyət sahəsində, həm də başqa ölkələrlə qarşılıqlı münasibətlər zəminində atılan çoxsaylı addımların müsbət nəticələri məhz bu qələbənin qazanılmasını təmin edib. “Eyni zamanda, bu qələbəni Nigarla Eldarın da özlərinin həm zahirən çox gözəl, cəlbedici, həm çox səmimi və sərbəst olmaları, həm də öz ifalarını maksimum peşəkarlıqla etmələrinin nəticəsi hesab edirəm. Düşünürəm ki, onların bu çıxışını təmin edən komanda çox yaxşı işləyib, ona görə İTV-nin, onun baş direktoru İsmayıl Ömərovun bu sahədəki fəaliyyətini də xüsusi vurğulamaq istəyirəm. Bununla yanaşı, bütövlükdə Azərbaycan dövlətinin bu məsələyə ciddi diqqətini və dəstəyini xüsusi qiymətləndirirəm” - deyə, B.Muradova qeyd edib. Vitse-spiker hesab edir ki, bu, bütövlükdə Azərbaycanın, xalqımızın və dövlətimizin uğurudur. “Bu hadisə bütün dünya azərbaycanlılarının Azərbaycan adı, dövləti ətrafında birləşməsinə, vahid məqsədlər uğrunda toparlanmasına çox ciddi bir təkan olacaq və bizə belə ardıcıl qələbələr çox lazımdır. Biz bu qələbələri bundan əvvəl idmanda və digər sahələrdə çox qazanmışıq, indi isə bu bizim növbəti-musiqi sahəsində uğurumuzdur” - deyə, o, bildirib. Vitse-spiker deyib ki, qarşıdakı 2012-ci il bütövlükdə dünyada Azərbaycanın bu işi təşkil etməsi ilə əlaqədar tanınmasına, daha çox ölkəmiz barəsində müzakirələrin aparılmasına və Azərbaycanın bu işi çox yüksək səviyyədə təşkil edəcəyindən sonra onun haqqında nəzərəçarpacaq rəylərin formalaşmasına kömək edəcək. “Bir sözlə, bu çox gözəl uğurdur, sevinirəm, hər birimizi, xalqımızı təbrik edirəm və qürur hissi keçirirəm” - deyə, vitse-spiker bildirib.

Yeni Azərbaycan Partiyasının (YAP) Sədr müavini-İcra katibi, millət vəkili Əli Əhmədov isə hesab edir ki, Azərbaycanın “Eurovision” mahnı müsabiqəsində qalib gəlməsi Dağlıq Qarabağ münaqişəsi ilə bağlı həqiqətlərin dünyaya çatdırılmasına da xidmət edəcək. Əli Əhmədov deyib ki, “Eurovision” müsabiqəsindəki qələbə Azərbaycanın böyük uğurları içərisində əhəmiyyətli mərhələ kimi qeyd oluna bilər: “Azərbaycan ifaçılarının yüksək professionallığı qeyd olunmalıdır. O ki qaldı ayrı-ayrı ölkələrin Azərbaycana simpatiyasının özünü göstərməsinə, hesab edirəm ki, bu, qürur hissi ilə bildirilməlidir”.

YAP-ın Sədr müavininin fikrincə, mahnı müsabiqəsində qələbənin təmin edilməsinin başlıca faktoru Azərbaycan, xalqın mədəniyyəti, ölkə təmsilçilərinin ifası, həmçinin, Azərbaycanın olduğu kimi dünyaya, Avropaya təqdim edilməsidir: “Bəzi hallarda ikili standartlar mövqeyindən yanaşırlar. Bunu qəbul etmirik. Bunun ziyanlı olduğunu dəfələrlə demişik. Azərbaycanın Avropa müsabiqəsində qalib olması onu göstərdi ki, sadə insanlar, sadə avropalılar Avropanın bir sıra siyasətçilərindən daha ədalətli və daha obyektivdirlər”.

Əli Əhmədov müsabiqədən ortaya çıxan digər nəticələrdən də danışıb: “Avropalılar və dünya Azərbaycan mədəniyyəti ilə yanaşı, onun gerçəkliklərinin nədən ibarət olması barədə də məlumatlanmaq imkanı qazandılar. Bu, əhəmiyyətli məqamdır. Azərbaycanın hər bir uğuru ölkəmizin qarşısında duran problemlərin, o cümlədən, Dağlıq Qarabağ probleminin həll olunmasına müəyyən qədər kömək göstərə bilər. Hesab edirəm ki, Dağlıq Qarabağ münaqişəsi ilə bağlı ədalətli mövqeyin təqdim edilməsində bu qələbənin müsbət əhəmiyyəti olacaq”.

Milli Məclisin Sosial siyasət komitəsinin sədr müavini Musa Quliyev bildirib ki, “Eurovision” mahnı müsabiqəsində Azərbaycanın qalib gəlməsi qürur doğuran hadisədir. Bu, bütövlükdə Azərbaycan xalqının, dövlətinin qələbəsidir və şübhəsiz ki, bu qələbənin əldə olunmasında xidməti olan hər kəsin qələbəsidir. “İlk növbədə, bu qələbəni Azərbaycan xalqına daddıran bizim gənc ifaçılar Eldar və Nigarın uğurudur. Bu, Azərbaycan Prezidentinin gənclərin inkişafına, mədəniyyətimizin inkişafına xüsusi diqqət və qayğısının bariz nümunəsidir. Bu, həmçinin, Heydər Əliyev Fondunun, Gənclər və İdman Nazirliyinin, İctimai Televiziyanın uğurudur. Təbii ki, Azərbaycanın musiqisinin, incəsənətinin dünya dövlətləri tərəfindən yüksək qiymətləndirilməsi xalqın nə qədər yüksək mədəniyyətə malik olduğunu göstərirsə, digər tərəfdən, Azərbaycan dövlətinin beynəlxalq aləmdə mövqeyi, imici ilə bağlıdır. Bu uğur, eləcə də, Azərbaycanın xarici siyasətinin böyük uğuru kimi qiymətləndirilməlidir. Artıq bütün dünya neçə gündür ki, Azərbaycandan danışır. Bir il ərzində “Eurovision” mahnı müsabiqəsində iştirak edən dövlətlərin diqqəti Azərbaycanda olacaq. Azərbaycana dünyanın hər yerindən insanlar axışıb gələcəklər, bir daha ölkəmiz özünü dünyaya təqdim etmək imkanı qazanacaq. Azərbaycan dünyaya özünün mədəniyyətini, mətbəxini, milli mentalitetini təqdim edəcək və Azərbaycanın necə bir dövlət olduğunu dünya görəcək. Bu mənada bu qələbə böyük uğurdur. Hesab edirəm ki, bu, Azərbaycanın qələbələrinin başlanğıcıdır, bundan sonra bizim idman, incəsənət, ictimai-siyasi həyatımızın digər sahələrində, o cümlədən, hərbi sahədə də qələbələrimiz olacaq” deyə M.Quliyev vurğulayıb.

Milli Məclisin Mədəniyyət komitəsinin sədri Nizami Cəfərov isə deyib ki, “Eurovision - 2011” mahnı müsabiqəsində ölkəmizin təmsilçilərinin qələbəsi bütövlükdə Azərbaycan mədəniyyətinin uğurudur. N.Cəfərov bildirib ki, son illər ölkəmizdə mədəniyyət və incəsənət sahəsində ciddi nailiyyətlər qazanılmaqdadır. Onun sözlərinə görə, dövlətimiz bu sahələrin inkişafına xüsusi diqqət yetirir. “Bu gün Azərbaycan digər sahələrdə olduğu kimi mədəniyyət sahəsində də dünyada öz sözünü deməkdədir. “Eurovision -2011” mahnı müsabiqəsindəki qələbəmiz çox böyük hadisədir. Bu uğur Azərbaycanın Avropada nüfuzunu xeyli artıracaq. Hesab edirəm ki, 2012-ci ildə bu nüfuzlu musiqi yarışmasının ölkəmizdə keçirilməsi də Azərbaycanın dünyada təbliğ olunmasında ciddi rol oynayacaq” - deyə komitə sədri vurğulayıb.

“Şübhəsiz ki, mən Azərbaycan təmsilçilərinin “Eurovision” mahnı müsabiqəsindəki nəticələrini yüksək qiymətləndirirəm. Çünki bu qələbə həm də Azərbaycanın dünya miqyasındakı yerini bir daha göstərdi”. Bu sözləri isə Milli Məclisin Mədəniyyət komitəsinin üzvü, Bakı Slavyan Universitetinin prorektoru Sahibə Qafarova söyləyib. Onun sözlərinə görə, əsası Ümummilli liderimiz Heydər Əliyev tərəfindən qoyulan və bu gün cənab Prezident İlham Əliyev tərəfindən uğurla həyata keçirilən Azərbaycanın mədəniyyət siyasəti ümumbəşəri mənəvi dəyərlərlə zəngin olan milli mədəniyyətimizin inkişafına çox böyük töhfələr verib: “Siyasi, iqtisadi, sosial sahələrdə əldə olunmuş böyük nailiyyətlər mədəniyyət sahəsində də effektiv tədbirlərin görülməsinə, inkişaf meyillərinin yaranmasına stimul verib. Biz bunu son illər atılmış addımlarda və əldə edilən çoxşaxəli nailiyyətlərdə dəfələrlə görmüşük. lEurovision»dakı qələbə isə bunların zirvəsidir”.

O, daha sonra deyib ki, təmsilçilərimizin belə yüksək nəticə əldə etməsinin kökündə çox böyük əmək, zəhmət dayanır: “Sadəcə 4 dəfə qatıldığımız bir yarışda birincilik qazanmaq asan başa gələn uğur deyil. Burada təbii ki, müxtəlif faktorların rolu olub. Amma ən böyük rolu şübhəsiz ki, Azərbaycan dövlətinin mədəniyyətə, gənclərə yüksək diqqət və qayğısı, bu beynəlxalq müsabiqəyə hazırlıqla bağlı görülən işlər oynayıb. Bu mənada ölkəmizin birinci xanımı, Heydər Əliyev Fondunun prezidenti Mehriban Əliyevanın xidmətləri xüsusi təqdirəlayiqdir”.

S.Qafarova deyib ki, bu cür böyük nailiyyətlərdən sonra Azərbaycan mədəniyyətinin daha uca mərtəbələrdə qərar qılacağını söyləyə bilərik: “İndi bizim üçün daha məsuliyyətli bir dövr başlayır. Gələn il paytaxtımızda keçirələcək müsabiqəyə Azərbaycanın yüksək səviyyədə hazırlaşacağına, ən yaxşı şəkildə bu müsabiqəyə ev sahibliyi edəcəyinə heç kəsin şübhəsi yoxdur. Bu isə Azərbaycanın daha geniş arealda təbliğ olunacağına, mədəni dəyərlərimizin Avropada daha yaxşı səviyyədə tanıdılacağına dəlalət edir”.

Bu müsabiqədə ölkəmizə böyük qələbə qazandıran təmsilçilərimizdən biri olan Eldar Qasımovun Bakı Slavyan Universitetinin magistri olduğunu xatırladan S.Qafarova əlavə edib ki, universitetin kollektivi onun bu möhtəşəm qələbəsindən böyük qürur hissi keçirir: “Amma hesab edirəm ki, bu gün Eldar və Nigarla təkcə Bakı Slavyan Universitetinin çoxminli kollektivi deyil, bütün Azərbaycan xalqı haqlı olaraq fəxr edir. Çünki onların qələbəsi Azərbaycan dövlətinin, Azərbaycan xalqının böyük qələbəsi, uğurudur”.

Millət vəkili Sahib Alıyev isə bildirib ki, düşmənlərimizi neytrallaşdırmaq siyasəti bu gün uğurla həyata keçirilir: “Yəqin, izləyənlər bilirlər, erməni saytlarında “Eurovision” yarışmasında yaşananları az qala milli faciələri kimi qiymətləndirərək buna iki Azərbaycan musiqiçisinin uğurundan daha çox iki ölkə arasında gedən ideoloji savaşda diaspor ilə iş məsələsində Azərbaycanın Ermənistanı üstələməsi kimi yanaşırlar”.

BAXCP sədri, millət vəkili Qüdrət Həsənquliyev də bu hadisəni Azərbaycanın böyük qələbəsi kimi qiymətləndirib. Onun sözlərinə görə, Azərbaycanın birincilik əldə etməsi erməniləri bərk dilxor edib. Millət vəkili qeyd edib ki, gələn il müsabiqənin Azərbaycanda keçirilməsi Qarabağ problemini dünyanın diqqətində saxlamaq üçün ciddi imkandır. “Əminəm ki, gələn il Azərbaycanda “Eurovision” müsabiqəsi çox gözəl təşkil olunacaq” - deyə, Q.Həsənquliyev qeyd edib.

Millət vəkili Jalə Əliyeva da bildirib ki, “Eurovision” mahnı müsabiqəsində qazanılan uğur xalqımızın möhtəşəm qələbəsidir. O əmin olduğunu bildirib ki, Azərbaycan belə qələbələrin təntənəsini Qarabağda, Cıdır düzündə də yaşayacaq.

Nardar BAYRAMLI

Yeni Azərbaycan.- 2011.- 18 may.- S.6.