Yeni Azərbaycan Partiyası ilə Rumıniyanın Liberal Demokrat Partiyasının əlaqələrinin gücləndirilməsi hər iki ölkənin münasibətlərində vacib yer tutur

Yeni Azərbaycan Partiyası Gənclər Birliyinin sədri Seymur Orucov www.yap.org.az saytına müsahibə verib:

- Seymur müəllim, bu günlərdə YAP Gənclər Birliyinin nümayəndə heyəti Rumıniyada səfərdə olub. Səfər haqqında məlumat verməyinizi xahiş edirik. Ümumiyyətlə, YAP Gənclər Birliyinin beynəlxalq əlaqələrinin genişləndirilməsi baxımından bu səfərin əhəmiyyəti nədən ibarətdir?

- Bildiyiniz kimi, 16-20 may tarixlərində Yeni Azərbaycan Partiyasının Gənclər Birliyinin nümayəndə heyəti Rumıniyanın hakim Liberal Demokrat Partiyasının Gənclər Birliyinin dəvəti ilə bu ölkədə səfərdə oldu. Nümayəndə heyətinin tərkibinə mənimlə yanaşı, YAP Gənclər Birliyinin sədr müavinləri Emil Əliyev və Ramin Məmmədov daxil idi. Məlumat üçün deyim ki, bir neçə ay öncə YAP Sədrinin müavini-İcra katibi Əli Əhmədovun rəhbərliyi ilə partiyamızın nümayəndə heyəti bu ölkədə səfərdə oldu. O zaman YAP və Rumıniyanın Liberal Demokrat Partiyası arasında imzalanan Memorandumda hər iki partiyanın gənclər birliklərinin əlaqələrinin gücləndirilməsi məsələləri əks olunur. Məhz bizim səfərimizi də həmin memorandumda nəzərdə tutulan məsələlərin həyata keçirilməsinin nümunəsi kimi dəyərləndirə bilərik. Səfərimiz zamanı Rumıniya parlamentində maraqlı görüşlər keçirdik. Bu ölkənin parlamenti-Senat və Deputatlar Palatasından ibarətdir. Senatda görüşümüz hakim partiya fraksiyasının rəhbəri Radu Alexandru ilə oldu. Bu görüşdə Azərbaycan – Rumıniya münasibətləri ilə bağlı fikir mübadiləsi aparıldı, bu münasibətlərin inkişafında hər iki dövlətin Prezidentlərinin rolu xüsusi vurğulandı. Qeyd olundu ki, Azərbaycanla Rumıniya strateji tərəfdaşdırlar, dövlətlər münasibətlərin daha da gücləndirilməsində maraqlıdırlar. Bundan başqa, Deputatlar Palatasının Müdafiə və təhlükəsizlik komitəsinin üzvü Danuts Liqa ilə görüşdük. Qeyd edim ki, bu şəxs Azərbaycanın dostudur və o, ölkəmizə çox böyük maraq göstərir. Danuts Liqa ölkəmiz haqqında xoş sözlər dedi, Azərbaycanın Rumıniya üçün önəmindən geniş bəhs etdi. O, hətta iyun ayında YAP Gənclər Birliyinin on nəfər üzvünü Buxarestə dəvət etdi və bu səfərin bütün xərclərini Rumıniya tərəfinin çəkəcəyini bildirdi. Bundan əlavə, biz Liberal Demokrat Partiyasının Gənclər Birliyi sədrinin birinci müavini Sorin Moldovan başda olmaqla bu partiyanın gəncləri ilə görüşdük. Gənclər Birliyinin sədrinin səhhətində problem olduğu üçün görüşdə iştirak etmək imkanı olmadı.

- Rumıniyanın hakim partiyasının gəncləri ilə görüşdə hansı məsələlər müzakirə olundu? Qarşılıqlı əməkdaşlıq çərçivəsində birgə layihələrin həyata keçirilməsinin perspektivləri haqda tərəflər nə qənaətə gəldilər?

- Bu görüşümüzdə də Rumıniya-Azərbaycan dövlətlərarası əlaqələrinin inkişafı ilə bağlı fikir mübadilələrimiz oldu, iki ölkənin dövlət başçılarının arasındakı münasibətlərin dostluq səviyyəsində olduğu vurğulandı. Rumıniyalı gənclər Azərbaycanla bağlı olduqca yüksək fikirlərini bildirdilər. Biz ölkəmizdə olan iqtisadi inkişafdan, yüksək rifahdan, ölkəmizin son illərdə həyata keçirdiyi irimiqyaslı layihələrdən bəhs açdıq, Azərbaycanın regiondakı lider mövqeyi haqda fikirlərimizi bildirdik. Eyni zamanda, YAP Gənclər Birliyinin fəaliyyəti ilə bağlı qarşı tərəfə ətraflı məlumat verdik.

Görüşdə, hər iki partiyanın gənclər birlikləri arasında əlaqələrin inkişaf etdirilməsi, təcrübə mübadilələrinin aparılması ilə bağlı müzakirələrimiz oldu. Həmçinin, partiyaların gənclər birlikləri arasında əməkdaşlıq memorandumunun imzalanması ilə bağlı razılıq əldə etdik. Biz rumın gənclərini ölkəmizə dəvət etdik və onların partiyamızın Gənclər Birliyi tərəfindən həyata keçirilən yay məktəblərində iştirak etməsində maraqlı olduğumuzu vurğuladıq. Tərəfimizdən Bakı şəhərində Avrasiya Gənclər Forumunun keçirilməsi ilə bağlı təkliflər səsləndirildi. Belə bir beynəlxalq tədbirin keçirilməsinə Rumıniya böyük dəstək verə bilər. Bildiyiniz kimi Rumıniya Şərqi Avropada Azərbaycanın ən yaxın tərəfdaşlarından biridir. Bizim dövlətlərarası əməkdaşlığımız çox yüksək səviyyədədir. Biz də öz növbəmizdə hər iki ölkənin hakim partiyasının gəncləri olaraq, əməkdaşlığımızı daha da inkişaf etdirmək üçün bu tip görüşlərin davamlı olması qənaətinə gəldik.

- Bəs Heydər Əliyev Fondunun Rumıniya nümayəndəliyində keçirilən görüşlər barədə nə deyə bilərsiniz?

- Səfərimiz çərçivəsində Buxarest şəhərində yerləşən Heydər Əliyev Fondunun Rumıniya nümayəndəliyində olduq, nümayəndəliyin rəhbəri İqbal Hacıyevlə görüşdük. Biz Heydər Əliyev Fondunun Rumıniya nümayəndəliyinin bu ölkədəki fəaliyyəti ilə yaxından tanış olduq və görülən işlərdən qürur duyduq. Onu da vurğulamaq istəyirəm ki, nümayəndəlikdə Rumıniyada yaşayan Azərbaycan diasporası ilə görüş keçirdik. Görüşdə bu ölkədə yaşayan və təhsil alan soydaşlarımız, Heydər Əliyev Fondunun Rumıniyadakı nümayəndəliyinin əməkdaşları, Rumıniya-Azərbaycan Dostluq Cəmiyyətinin, Rumıniya-Azərbaycan Ticarət və Sənaye Palatasının, Rumıniya-Azərbaycan Gənclər və Mədəniyyət Assosiasiyasının üzvləri iştirak edirdilər.

Mən Azərbaycan Respublikasının dirçəlişi, ölkəmizin sürətli inkişafı, YAP-ın Gənclər Birliyinin fəaliyyəti, Azərbaycan Prezidenti İlham Əliyevin ölkəmizin gənclərinə olan dəstək və qayğısı haqqında ətraflı məlumat verdim. Görüşdə Ramin Məmmədov xaricdə yaşayan Azərbaycan diasporasının rolu və istiqaməti haqqında söhbət açdı. Xarici ölkələrdə yaşayan Azərbaycan diasporasının erməni təbliğatına qarşı daha da aktiv olmasının zəruriliyini deyərək bu yolda YAP-ın Gənclər Birliyinin Rumıniyada yaşayan Azərbaycan diasporasına hər zaman dəstək verə biləcəyini söylədi.

Emil Əliyev isə Azərbaycan Respublikasının beynəlxalq müstəvidə rolu, biznes mühiti və Azərbaycana qoyulan xarici investisiyalar haqqında görüş iştirakçılarına məlumat verərək, ölkəmizin son bir neçə ildə iqtisadiyyatın ən yüksək inkişaf tempinə çatdığını və bir çox dünya ölkələrinə nümunə ola biləcəyini vurğuladı.

Onu da bildirmək istəyirəm ki, söhbətlərimiz zamanı sadə rumınların da Azərbaycan haqqında xoş fikirdə olduqlarını müşahidə etdik. Təsadüfi deyil ki, Buxarest sakinləri burada yerləşən “Heydər Əliyev parkında” istirahət edir, Ümummilli liderimizin əziz xatirəsini ehtiramla yad edirlər. Rumınlar iki ölkə arasında münasibətlərin qurulmasında Ulu öndər Heydər Əliyevin xidmətlərini minnətdarlıqla xatırlayırlar.

- Seymur müəllim, diaspor nümayəndələrimiz Azərbaycanın bu ölkədə daha yaxından tanıdılması istiqamətində hansısa təkliflər, fikirlər irəli sürdülərmi?

- Bəli, görüş zamanı müəyyən təkliflər də səsləndirildi. Belə təkliflərdən biri də YAP-ın üzvü olan gənc müğənnilərin Buxarestdə konsertinin təşkili ilə bağlı oldu. Artıq bu istiqamətdə ilkin razılığa gəlinib. Yəqin ki, belə bir konsert Buxarestdə reallaşdırılacaq. Bundan başqa, rumıniyalı gənc tədqiqatçının Azərbaycana gəlib burada elmi-tədqiqat aparmaq təklifi səsləndirildi. Təbii ki, biz bunda çox maraqlıyıq. Çünki həmin tədqiqatçının əsəri kitab şəklində nəşr olunacaq. Azərbaycanın Ermənistan tərəfindən təcavüzə məruz qaldığını nəzərə alsaq, Azərbaycan həqiqətlərinin bu ölkədə yayılması olduqca böyük əhəmiyyətə malikdir. Bizim diasporumuz erməni təcavüzü ilə bağlı Rumıniya cəmiyyətinə geniş məlumatlar çatdırırlar və bu yöndə gələcəkdə də ciddi şəkildə fəaliyyət göstərəcəklərini vurğulayırlar. Dövlətimizin siyasəti ilə yanaşı, diasporumuzun fəaliyyətinin bəhrəsidir ki, bu ölkə Azərbaycanın ərazi bütövlüyünü dəstəkləyir və rumınlar ermənilər tərəfindən xalqımızın başına gətirilən fəlakətlər haqqında məlumatlıdırlar.

Onu da bildirim ki, yuxarıda səsləndirilən təkliflərin həyata keçirilməsi Heydər Əliyev Fondunun dəstəyi ilə baş tutacaq. Ümumiyyətlə, hesab edirəm ki, bu səfərimiz çox uğurlu oldu. Yeni Azərbaycan Partiyası və Rumıniyanın Liberal Demokrat Partiyası arasında əlaqələrin gücləndirilməsi hər iki ölkənin münasibətlərində vacib yer tutur.

Mən bu səfərin reallaşmasında göstərdikləri dəstəyə görə, partiyamızın rəhbərliyinə təşəkkür edirəm. Eyni zamanda, Rumıniyada nümayəndə heyətimizə diqqət göstərdikləri üçün Azərbaycanın bu ölkədəki səfirliyinə minnətdarlığımızı bildirmək istəyirəm. Qeyd etmək istəyirəm ki, YAP Gənclər Birliyi olaraq beynəlxalq əlaqələrimizi daha da gücləndirmək üçün bundan sonra da səylə çalışacağıq.

Yeni Azərbaycan.- 2011.- 26 may.- S.8.