Əli Əhmədov: Hər bir vətəndaş Azərbaycan qanunları qarşısında bərabərdir

Yeni Azərbaycan Partiyasının Sədr müavini-İcra katibi, Milli Məclisin deputatı Əli Əhmədov APA-ya müsahibə verib

- Bir neçə gün öncə YAP rayon və şəhər təşkilatları sədrlərinin ümumrespublika müşavirəsi keçirildi. Müşavirədən sonra keçirilməsi nəzərdə tutulan konfranslara hazırlıq işləri necə gedir?

- Biz artıq YAP-ın rayon və şəhər təşkilatlarının konfranslarının keçirilməsi hazırlıqlarına start vermişik. Təxminən bir aydan sonra konkret rayon və şəhər təşkilatlarında konfranslar keçiriləcək. YAP-ın Nizamnaməsinə uyğun şəkildə müəyyən müddətdən bir partiyanın rayon və şəhər təşkilatları konfranslarını keçirir, hesabatlarını təsdiqləyir, tərkibdə müəyyən dəyişiklik etmək zərurət yaranırsa, bunu edir, yeni tərkibi təsdiq edir, növbəti fəaliyyət üçün proqram müəyyənləşdirilir. Hesab edirik ki, YAP-ın qarşıdan gələn rayon və şəhər təşkilatlarının konfransları yüksək fəallıq şəraitində keçəcək. Ən azı ona görə ki, YAP əvvəlki konfranslardan keçən dövr ərzində əhəmiyyətli dərəcədə inkişaf edib, partiyanın say tərkibi xeyli artıb, partiyanın Azərbaycanın ictimai-siyasi həyatında böyük uğurlar silsiləsi davam edib, daha da artıb, partiya ötən seçkilərdə qələbə qazanıb. Beləliklə, YAP növbəti dəfə Azərbaycanın ictimai-siyasi həyatında hakim partiya statusunu təsdiq edib. Bütün bunlar YAP-ın əldə etdiyi uğurlar, qazandığı nailiyyətlərdir. Keçiriləcək konfranslarda bu barədə həm danışılacaq, həm də növbəti dövr üçün fəaliyyət proqramları təsdiqlənəcək. İnanıram ki, qarşıdakı konfranslar partiyamızın həyatında əhəmiyyətli hadisə kimi yadda qalacaq.

- Bir müddət öncə işdən azad edilmiş təhsil nazirinin müavinləri arasında YAP Siyasi Şurasının iki üzvünün olması birmənalı qarşılanmadı. Buna münasibətinizi öyrənmək istərdik. Elmar Qasımov və İradə Hüseynova YAP Siyasi Şurasının üzvü kimi qalacaqlarmı?

- Bəli, onlar həqiqətən də YAP Siyasi Şurasının üzvləridir. Amma YAP-ın üzvü olmaq, hətta YAP-ın yüksək səviyyəli seçkili orqanlarında təmsil olunmaq kimisə hansısa vəzifədən azad edilməkdən xilasedici vasitə rolunu oynamır, kiminsə sığortalanması demək deyil. Nazirləri və nazir müavinlərini vəzifəyə təyin etmək və vəzifədən azad etmək səlahiyyəti müstəsna olaraq Konstitusiya ilə Azərbaycan prezidentinə məxsusdur. Prezident də bu məsələləri öz səlahiyyətləri çərçivəsində lazım bildiyi zaman həll edir. Azərbaycan təhsil nazirinin üç müavininin eyni zamanda işdən azad edilməsi Azərbaycan prezidentinin ölkənin təhsil sahəsində həyata keçirdiyi islahatlara yeni impuls vermək istəyindən irəli gəlib. Azərbaycan cəmiyyəti də bunu bu cür qəbul edir. Bununla yanaşı, deməliyəm ki, YAP Siyasi Şurasının üzvləri olan sabiq müavinlər YAP-ın fəalları kimi partiya ilə bu gün də əlaqələrini saxlayıblar. Hesab edirik ki, onlar bundan sonra da YAP-ın işində yaxından iştirak edəcəklər.

- “İctimai Palata” ilə bağlı yaranmış vəziyyəti necə şərh edərdiniz?

- “İctimai Palata” adlandırılan qurum fəaliyyət göstərdiyini sübut etmək üçün çox müxtəlif toplantılar keçirir. Bu, Azərbaycan müxalifətinin son 15 il ərzində birləşmək istiqamətində atdığı və nəticə etibarilə hər hansı uğura çıxarmayan addımlarından biridir. “İctimai Palata” son vaxtlar hansısa “yol xəritəsi” adlandırılan layihə hazırlayıb, orada özlərinin bəzi fikirlərini əks etdiriblər. Bununla tanış olanda belə qənaətə gəldim ki, görünür, “İctimai Palata” ya Amerikanı təzədən kəşf etmək istəyir, ya da velosipedi təzədən yaratmaq fikrindədir. O şeyləri ki, özlərinin uydurduqları “yol xəritəsi”ndə ictimaiyyətə təqdim etmək istəyirlər, onlar Azərbaycanda çoxdan həllini tapmış məsələlərdir. Bu gün Azərbaycanda “demokratiya qurmaq” haqqında planlar cızmaq və s. bundan xəbər verir ki, ölkəmizin hansı dövrdə, hansı mərhələdə yaşamasından ya xəbərsizdirlər, ya da sadəcə bunu qəbul etmək istəmirlər. 21-ci əsrin birinci onilliyi başa çatıb, artıq ikinci onilliyin başlanğıcındayıq. Ölkəmiz 20-ci əsrin 90-cı illərində deyil. Onların indi dedikləri məsələlər ötən əsrin 90-cı illərində Azərbaycanın ictimai-siyasi həyatının gündəmindəydi. O zaman, yəni 90-cı illərin əvvəllərində onların bəzilərinin - hansılar ki, hakimiyyətdə təmsil olunmaq şansı əldə etmişdilər - indi dedikləri məsələləri həyata keçirmək imkanları var idi. Amma o zaman bu insanlar indi təqdim etdiklərini həyata keçirmək istəmədilər. Çünki başları tamam ayrı işlərə qarışmışdı. “İctimai Palata”nın ümumi fəaliyyətini boşluqdan yığışaraq vaxt keçirmək kimi səciyyələndirmək olar. Onlar Azərbaycan cəmiyyəti tərəfindən soyuq biganəliklə qarşılanırlar. Bir şeyi də deyim ki, “İctimai Palata” adlandırılan qurum Azərbaycan müxalifətinin bütün palitrasını əks etdirmir. Baxmayaraq ki, onlar özlərini Azərbaycan müxalifətinin təmsilçisi kimi təqdim edirlər. Halbuki müxalifətin digər hissəsi “İctimai Palataya” qarşı kifayət qədər sərt mövqedə dayanır.

- “Yol xəritəsi” YAP-a rəsmi olaraq göndərilmişdimi?

- Həmin “yol xəritəsi” adlandırılan layihəni poçtla bizə də göndərmişdilər, tanış oldum. Tanışlıq nəticəsində də gəldiyimiz qənaət bu oldu ki, onlar sanki Amerikanı təzədən kəşf etmək istəyiblər. Onlar deyəsən bir toplantı keçirirdilər, sənədi də bizə həmin toplantıya dəvət etmək məqsədilə göndərmişdilər. Amma deməliyəm ki, sənəd bizə çatanda, artıq toplantı başlamışdı. Təbii, onlar özləri məxsusi şəkildə elə bir vaxtda göndərmişdilər ki, bu məktub bizə çatanda, toplantı başa çatmış olacaq. Yəni, formal bir göndəriş idi ki, hamıya desinlər ki, baxın, biz, Yeni Azərbaycan Partiyasına da dəvət göndərdik. Amma istənilən halda, “yol xəritəsi”ndə müzakirə oluna biləcək, hər hansı ciddi müzakirə üçün diqqəti cəlb edəcək nəsə yoxdur. Azərbaycanın çoxdan keçdiyi, həllini tapmış məsələləri “İctimai Palata” adlandırılan qurum yenidən müzakirə predmetinə çevirmək istəyib, guya ki, Azərbaycanın demokratiyaya keçidini təmin etmək üçün tədbirlər görürlər. Azərbaycan bu yolu çoxdan keçib. Əlbəttə, biz Azərbaycanda demokratiyanın daha da təkmilləşdirilməsi, demokratik təsisatların daha da gücləndirilməsi üzərində işləyirik. Azərbaycan hökuməti bu istiqamətdə üzərinə götürdüyü öhdəliklərə sadiqdir. Amma “İctimai Palata” deyilən qurumun Azərbaycanda yumşaq şəkildə demokratiyaya keçid problematikası təbii ki, reallıqdan tamamilə uzaqdır. Bu, bir daha deyirəm, Amerikanı yenidən kəşf etmək niyyətinə oxşayır. Amerika isə çoxdan kəşf edilib.

- “İctimai Palata”nın 2 aprel aksiyasında tutulmuş şəxslərin məhkəməsində Müsavat Partiyasının başqanı İsa Qəmbər aksiyanın bütün məsuliyyətini üzərinə götürdüyünü dedi...

- Hüquq məntiqi ilə hər bir hüquq pozuntusuna həmin hüquq pozuntusunda iştirak etmiş insan cavab verməlidir. Əgər kimsə bir cinayəti törədibsə, başqasının həmin cinayəti törətməyə-törətməyə məsuliyyəti üzərinə götürməsi, onun məsuliyyətə cəlb edilməsi üçün əsas yaratmır. Düşünürəm ki, İsa Qəmbər bunu özü də bilir. Bu səbəbdən də onun məhkəmədə çıxış edərək, guya məsuliyyəti öz üzərinə götürməsi populizmdən başqa bir şey deyil. İsa Qəmbər özü də çox gözəl bilir ki, hər kəs hüquqazidd əməlinə görə yalnız özü cavab verməlidir. Bu mənada, İsa Qəmbərin bu populist çıxışı yalnız öz tərəfdarları arasında müəyyən səbəblərlə əlaqədar itirilən mövqelərini kompensasiya etməyə hesablanıb. Ola bilsin, başqa məqsəd də var. Bu məhkəmələrlə bağlı bəzi müxalifət qəzetlərində yaradılan rezonansa gəlincə, hüquqi cəmiyyətdə hər bir vətəndaş hərəkətinə hüquq məntiqi baxımından qiymət verilməlidir. Əgər razılaşdırılmamış aksiyalar keçirilirsə, bu aksiyalar zamanı Azərbaycanın qanunları pozulursa, bu pozuntuda rol oynamış insanlar müvafiq şəkildə öz hərəkət və əməllərinə cavab verməlidir. Bu məsələdə kimin partiya təmsilçisi, fəalı olması onların məsuliyyətdən azad edilməsinə hər hansı əsas yaratmır. Günahkarın hər biri öz əməlinə görə cavab verməlidir. İstər müxalifət, istərsə də başqa partiyanın təmsilçisi olsun. Bu mənada YAP Siyasi Şurasının üzvləri olan nazir müavinlərinin vəzifələrindən azad olunmalarında da təəccüblü bir şey yoxdur. Hansı təşkilata mənsubluğundan asılı olmayaraq, hər bir vətəndaş Azərbaycan qanunları qarşısında bərabərdir.

- YAP-la müxalifət partiyaları arasında dialoq, debat gözlənilirmi?

- Biz Azərbaycanda ayrı-ayrı siyasi partiyaların təmsilçiləri, o cümlədən hakimiyyətdə olan partiya ilə müxalifət partiyalarının təmsilçiləri arasında dialoq, yaxud debat məsələsinə tamamilə müsbət yanaşmışıq. Amma məsələ burasındadır ki, bəzi adamlar müxalifət dedikdə məhdud sayda olan ayrı-ayrı partiyaları və onları təmsil edən insanları nəzərdə tuturlar. Sanki bəzi müxalifətçilər müxalifət anlayışını da inhisara almaq fikrinə düşüblər. Bununla da elə hesab edirlər ki, əgər YAP-ın bir təmsilçisi məsələn, İsa Qəmbər, yaxud Əli Kərimli ilə debat aparmayıbsa, bu, Azərbaycanda iqtidar-müxalifət debatının, dialoqunun olmaması deməkdir. Axı nəyə görə Azərbaycan müxalifətinin parlamentdə təmsil olunan nümayəndələri ilə YAP-ın təmsilçiləri arasında debatlar iqtidar-müxalifət debatı kimi qəbul olunmasın? Bununla yanaşı, deyim ki, biz hər hansı təşəbbüs olacağı halda onda iştirakdan heç zaman imtina etmirik.

- Son günlərdə BBC telekanalı tərəfindən Azərbaycan boksunda rüşvət iddiası ilə bağlı nə deyə bilərsiniz?

- Mətbuatda yayılmış bu informasiyaların nə qədər ciddi əsasları var, deyə bilmərəm. Amma bir neçə məqamı demək istərdim. Məlum olduğu kimi, Azərbaycanda boks üzrə Dünya Çempionatı keçirilir. Bu, Azərbaycanın idman həyatı üçün əhəmiyyətli hadisələrdən biridir. Bu, ondan xəbər verir ki, bütövlükdə Azərbaycan dünyada idmanın və bədən tərbiyəsinin inkişafına əhəmiyyətli töhfələr verən ölkələrdən birinə çevrilib. Ölkəmizdə tez-tez müxtəlif səviyyəli idman yarışları, Avropa və Dünya Çempionatları təşkil olunur. Digər tərəfdən, hazırda keçirilən boks üzrə Dünya Çempionatının özəlliklərindən biri də odur ki, bu çempionatda 2012-ci ildə Londonda keçiriləcək Olimpiadaya lisenziyalar əldə etmək mümkün olacaq. Bütün bunlar təbii ki, kimlərdəsə Azərbaycana qarşı qısqanclıq hissləri yaradır. Mən yayılan məlumatları daha çox Azərbaycana qarşı yaranmış qısqanclığın nəticəsi hesab edirəm. İkincisi, bunu Azərbaycanda keçirilən bu böyük idman hadisəsinin üzərinə kölgə salmaq cəhdi sayıram. Bütövlükdə, bu kampaniya və yazılarda Azərbaycana qarşı təzyiq elementləri də hiss edilir. Əslində, bunu görməmək mümkün deyil. Azərbaycan boksçularının beynəlxalq yarışlarda yüksək nəticələr əldə etdiyi hamıya məlumdur. Qarşıdan gələn Olimpiada da idmançılarımızın yüksək nəticələr əldə etmək ehtimalı kifayət qədər böyükdür. Beləliklə də, Azərbaycan idmançılarının bir ildən sonra keçiriləcək yarışlarda əldə edə biləcəyi qələbənin üzərinə əvvəlcədən kölgə salma kampaniyası həyata keçirirlər. Hesab edirəm ki, bu, Azərbaycandan çox Beynəlxalq Boks Federasiyasının problemdir, yəqin onlar da məsələyə aydınlıq gətirəcəklər. Nəticə etibarilə həqiqət, bunun Azərbaycanda keçirilən böyük idman yarışının üzərinə kölgə salmaq cəhdləri olduğu üzə çıxacaq.

Yeni Azərbaycan.- 2011.- 1 oktyabr.- S.4.