Neft Daşları ilə telekörpü

Neft Daşları bütün dövrlərdə sınaqdan çıxmış, mərd və iradəli neftçilərin çalışdığı, qurub-yaratdığı bir məkan olmuşdur.

“Neft Daşları” NQÇİ-nin rəisi Sarxan Babaşov vurğulayır ki, bu gün də burada Xəzərə, neft sənayesinə ürəkdən bağlı qəhrəmanlar çalışırlar. Onların sosial-məişət şəraitinin yüksək səviyyədə təşkili daim ARDNŞ və “Azneft” İB rəhbərliklərinin diqqət mərkəzində olan məsələlərdəndir. Sarxan müəllimlə söhbətimiz məhz “Neft Daşları” NQÇİ-də 2011-ci ilin səkkiz ayında sosial sahədə yerinə yetirilmiş və yaxın gələcəkdə görülməsi nəzərdə tutulan işlər barədədir.

İdarə rəisi bildirir ki, Azərbaycan Respublikası Dövlət Neft Şirkətinin və “Azneft” İstehsalat Birliyinin tapşırığı və yaxından köməyi sayəsində 9-mərtəbəli kişilər korpusunda yenidənqurma və əsaslı təmir işləri başa çatmış, bütün otaqlar yeni, müasir avadanlıq və inventarlarla təchiz olunmuşdur. Belə ki, 9 mərtəbəli kişilər korpusuna son aylar ərzində 162 ədəd televizor, 118 ədəd soyuducu, 158 ədəd kondisioner, 370 ədəd çarpayı və digər inventarlar alınmış, otaqlar komplektləşdirilmişdir.

Bütün otaqların jalüzləri vurulmuş, televizor, telefon xətləri çəkilmiş, kondisionerlər quraşdırılmışdır. Dəhlizlərə bəzək gülləri qoyulmuş, palazlar döşənmişdir. Binanın ön tərəfinə yeni qazon örtüyü salınmış, dekorativ güllər əkilmiş, ağaclar budanmışdır. Korpusun arxa tərəfi tullantılardan təmizlənərək böyük dəmir lövhələrlə çəpər çəkilmişdir.

Neft Daşları qəsəbəsi ərazisində bir çox sahələrə yeni asfalt örtüyü salınmış, çörəkbişirmə sexinin fasadı rənglənmiş, pilləkənlərə yeni məhəccərlər vurulmuşdur. 9-mərtəbəli kişilər korpusunun 1-ci mərtəbəsində yerləşən qəzet redaksiyası, Qızıl Aypara Cəmiyyəti, İcra Hakimiyyəti nümayəndəliyi və polis sahə müvəkkilinin otaqlarının təmir edildiyini, lazımi avadanlıqlarla təchiz olunduğunu bildirən Sarxan Babaşov “V”, “A” və 9 mərtəbəli qadınlar korpusunun fasadlarının rəngləndiyini, 19-cu korpusun dəhlizlərində rəngləmə işlərinin aparıldığını da söyləyir.

Çvanov adasındakı Heydər Əliyev adına parkın ərazisində onlarla bəzək kolu, 1350 ədəd mövsümi güllər, 80-dək dekorativ ağac əkilmişdir. 930 m2 qazon, 100 kisə torf alınaraq park ərazisində qurulmuş 8 guşəli ulduzun ətrafına döşənmişdir. Bütün idman avadanlıqları ilə təchiz edilmiş idman kompleksində, parkdakı Çay evində cari təmir başa çatmış, bu tikilinin və Heydər Əliyev muzeyinin damında təmir işləri aparılmışdır.

Bundan əlavə, mini-futbol, voleybol meydançalarında təmir işləri başa çatdırılaraq burada 28 May - Respublika Günü münasibətilə mini-futbol turniri keçirilmiş, ilk üç yeri tutan komandaları “Neft Daşları” NQÇİ Həmkarlar İttifaqı Komitəsi qiymətli hədiyyələrlə mükafatlandırmışdır.

Vertolyot meydançasının gözləmə zalında ağartma, fasadında rəngləmə işləri aparılmış, həyətyanı sahədə yeni qazon salınmış, güllər əkilmiş, asfalt örtüyü isə təzələnmişdir. Yataqxanalarda, özüllərdə təmirə ehtiyacı olan kondisionerlər və soyuducular “Akond” firması tərəfindən təmir edilmişdir və bu iş davamlı xarakter daşıyır. Təcili və təxirəsalınmaz tibbi yardım göstərilməsi, xəstələrə iş yerlərində və vaxtında yardım göstərilməsi məqsədilə müasir tipli tibbi avadanlıqlarla təchiz edilmiş təcilli tibbi yardım avtomaşını da alınmışdır.

Sarxan müəllim deyir ki, 9-mərtəbəli qadınlar yataqxanasının 2-ci mərtəbəsində yerləşən kitabxana tam təmir edilmiş, avadanlıqlar alınması üçün sifariş verilmişdir. Həmin korpusun 1-ci mərtəbəsində YAP Neft Daşları ərazi təşkilatı, bələdiyyə, poçt, dərzi, bərbərxana və ayaqqabı təmiri üçün otaqlar ayrılmışdır. 1, 2 və 4-cü mədənlərdə yeməkxanaların tikilməsi məqsədilə “Azneft” İB rəhbərliyindən müvafiq məktubla köməklik göstərilməsi xahiş edilmişdir.

Ayrı-ayrı özüllərdəki yaşayış evciklərində cari təmir işləri aparılmış, sex və sahələrdəki soyunub-geyinmə otaqları idarənin daxili imkanları hesabına cari təmir olunmuşdur. Son iki ay ərzində 2 ədəd müasir tipli vaqon-evcik alınmış, zəruri məişət avadanlıqları və yataq dəstləri ilə təchiz edilərək neftçilərin istifadəsinə verilmişdir. Zığ sahəsində yerləşən Maddi Texniki Təchizat şöbəsi də əsaslı təmirdən çıxmış, məişət avadanlıqları ilə təchiz edilmişdir. Hal-hazırda NQÇİ-nin Texnoloji Nəqliyyat Sexində də yenidənqurma və əsaslı təmir işləri başa çatdırılmışdır. Su çənləri parkındakı çənlər yuyulmuş və dezinfeksiya edilmişdir. Yeni tikilmiş Bioloji təmizləmə qurğusu tam istifadəyə verilmiş, hazırda çirkab suları burada təmizlənərək sanitar qovşaqlarında istifadə olunur.

Sarxan Babaşov yerinə yetirilən işlərdə NQÇİ Sosial inkişaf şöbəsinin, xüsusən şöbə rəisi Nəvai Həsənovun, mühəndislər Kamran Şirinov, Zaur Əsgərov, Hikmət Məmmədovun səmərəli fəaliyyətini vurğuladı. Bildirdi ki, Neft Daşlarında məhsuldarlığı sutka ərzində 400-500 m3 olan ƏKS OSMOS tipli dəniz suyunu şirinləşdirən ikinci sutəmizləyici qurğunun tikintisinə başlanılmışdır. Su çənləri parkında növbəti 2000 tonluq su çənində hal-hazırda təmir işləri aparılır.

İdarə rəisi qeyd etdi ki, Möcüzələr adasında 20 sentyabr - Neftçilər günü peşə bayramı da yüksək səviyyədə qeyd edilmişdir. Heydər Əliyev adına parkda təşkil olunmuş bayram konserti zamanı Bakıdakı Milli Parkda keçirilən bayram tədbiri ilə telekörpü qurulmuş, ARDNŞ prezidenti Rövnəq Abdullayev dəniz fatehlərini təbrik edərək uğurlar arzulamışdır. Əməkdə fərqlənmiş dəniz neftçiləri peşə bayramı münasibətilə NQÇİ rəhbərliyi və HİK tərəfindən mükafatlandırılmışlar.

İlqar Məmmədli

İki sahil.- 2011.- 22 sentyabr.- S. 10.