“Eurovision” tarixində ən gözəl mahnı yarışması Bakıda təşkil olunacaq

Aysel Teymurzadə: Ekspertlər indiyədək ən möhtəşəm müsabiqənin Moskvada təşkil olunduğunu söyləyirlər, amma düşünürəm ki, Azərbaycanda təşkil olunacaq “Eurovision-2012” bütün rekordları təzələyəcək

...Adətən, incəsənət sahəsində çalışanlar azacıq tanınanda, hər hansı bir şöhrət qazananda, çox tez “ulduz xəstəliyinə” tutulurlar, özlərini əlçatmaz hesab edirlər. O isə tamam fərqlidir. Azərbaycan xanımına xas olan ən müsbət keyfiyyətləri- zərifliyi, səmimiliyi, gülərüzlülüyü və ən nəhayət, vətənpərvərliyi ilə seçilir. Məhz ondakı bu keyfiyyətlərin sayəsində Azərbaycan tarixində ikinci dəfə qatıldığı Avropanın ən nüfuzlu musiqi yarışmasında-Moskvada keçirilən “Eurovizion-2009” mahnı müsabiqəsində üçüncü yerə sahib ola bildi. Əslində, bu, böyük qələbə idi. Çünki, artıq 54-cü dəfə keçirilən bu yarışmada Azərbaycan ikinci dəfə iştirak edirdi. Və bu uğur, gələcəkdə - iki il sonra Almaniyada keçiriləcək 56-cı musiqi yarışmasında Azərbaycan təmsilçilərinin qalib gəlməsinə bir növ zəmin yaratdı,- Avropa tamaşaçısında Azərbaycan, onun musiqisi haqda xoş təəssüratlar oyada bildi. Bəs, iki il əvvəl, ifa etdikləri musiqi nömrəsi ilə nəinki ölkəmizin, eləcə də, Avropanın musiqisevərlərinin qəlblərini riqqətə gətirən Aysel Teymurzadə-Araş cütlüyünün sonrakı aqibəti necə oldu? Avropa tamaşaçısı yenidən bu cütlüyün şux, oynaq duetlərinin şahidi olacaqmı? Sentyabrın 21-də “Yeni Azərbaycan” redaksiyasının qonağı olan Aysel Teymurzadə bütün bunlara aydınlıq gətirdi, eləcə də, Bakıda keçiriləcək “Eurovision-2012” mahnı müsabiqəsi ilə bağlı öz fikirlərini bölüşdü...

- Aysel xanım, təmsilçilərimiz-Nigar və Eldar cütlüyü Almaniyada keçirilən “Eurovision-2011” musiqi yarışmasında qalib gəldikləri üçün gələn il Azərbaycan paytaxtı bu möhtəşəm müsabiqəyə ev sahibliyi edəcək. Amma bu qələbəyə birdən-birə nail olmadıq. Bu qələbədə, “Eurovision” yarışmasında əvvəlki illərdə iştirak etmiş musiqiçilərimizin, o cümlədən, sizin də payınız var...

- Təbii, bunu inkar etmək olmaz. Hesab edirəm ki, həm birinci kollektiv- Samir Cavabzadə-Elnur Hüseynov dueti, həm bizim cütlük, həm də Səfura Əlizadənin bu qələbədə müəyyən payı var. Çünki Avropa tamaşaçısını Azərbaycan musiqisinə alışdırmaq lazım idi. Doğrudur, Avropa tamaşaçısı əvvəllər də bizim sənətkarlarımızın ifaları ilə tanış olmuşdular. Məsələn, muğamlarımız, xalq mahnılarımız Avropada böyük məmnunluqla dinlənilir. Amma müasir musiqimiz, estrada janrında olan mahnılarımızı Avropa tamaşaçısına təqdim etmək, onlara bəyəndirmək bir qədər çətin idi. Düşünürəm ki, çox qısa zamanda biz buna nail olduq. 56-cı dəfə keçirilən bu mahnı yarışmasında Azərbaycan artıq 4-cü ildə qalib oldu. Bundan əvvəlki illərdə isə, daim ilk onluqda qərar tuturduq. Hələ Avropada belə bir ölkə olmayıb ki, onun təmsilçiləri hər il ilk onluqda qərarlaşa bilsin. Yalnız Yunanıstan təmsilçilərinə belə bir uğur qazanmaq nəsib olmuşdu. İndi Azərbaycan bu rekordu da təzələyə bildi- cəmi 4 il lazım oldu ki, birinciliyi əldə etsin. Düşünürəm ki, hər şeydən əvvəl, bu, bizim musiqimizin, ifaçılıq sənətimizin yüksək olmasından irəli gəlir. Digər tərəfdən isə, unutmaq lazım deyil ki, biz elə ilk gündən bu müsabiqəyə ciddi hazırlaşırdıq. Burada təkcə ifaçılar deyil, böyük bir yaradıcı kollektivin- komandanın əməyini xüsusi qeyd etmək lazımdır. Buraya İctimai Televiziya, Gənclər və İdman Nazirliyi, Mədəniyyət və Turizm Nazirliyi və digər qurumlar daxildir. Eyni zamanda, Heydər Əliyev Fondu da hər zaman bizə dəstək olub. Odur ki, bu qələbədə hər kəsin, o cümlədən, tamaşaçıların da müəyyən mənada payı var və bizə verdikləri dəstəyə görə onlara dərin minnətdarlığımızı bildirirəm. Biz bu qələbəyə doğru məqsədyönlü şəkildə, pillə-pillə addımladıq və uğurlu nəticə qazandıq. Bu münasibətlə, bir daha hər kəsi təbrik edirəm.

- Sizcə 2011-də Azərbaycanın qələbəsini şərtləndirən əsas amillər hansılar idi?

- Öncə Avropa tamaşaçısı artıq səs-küylü, gurultulu mahnılardan bezmişdi. Tamaşaçının daha çox sakit, qəlbləri oxşaya bilən, onda romantik hisslər oyada bilən bir musiqiyə ehtiyacı var idi. Və biz də bu boşluğu doldura bildik. Amma onu da mütləq qeyd etməliyəm ki, elə bizim uşaqlar da- Eldar və Nigar səhnədə bu hissləri çox məharətlə çatdıra bildilər. Onların həm mahnıları çox gözəl idi, həm də ifaları. Afərin, onlara!

- Siz həm müsabiqə iştirakçısı kimi, həm də tamaşaçı qismində bir neçə dəfə “Eurovision” yarışmasında olmusuz. Sizcə, Azərbaycan bu mötəbər müsabiqəni keçirməyə hazırdırmı?

- Əminliklə deyə bilərəm ki, bəli, biz buna hazırıq. Çünki Azərbaycan paytaxtı indiyədək bir sıra mühüm beynəlxalq idman yarışlarına, forumlara, dünya miqyaslı sammit və konfranslara ev sahibliyi edib. Belə irimiqyaslı tədbirlərin keçirilməsi üçün Bakı şəhərində bütün lazımi infrastruktur mövcuddur, həmin tədbirlərin təşkili üçün yetərincə peşəkar kadrlarımız var. Digər tərəfdən isə, şəhərdə turistləri qəbul etmək üçün çoxlu sayda beynəlxalq standartlara uyğun beşulduzlu hotellər, gözəl və yaraşıqlı istirahət mərkəzləri, yüksək səviyyədə xidmətlər təqdim edən bar və restoranlar mövcuddur. Dənizkənarı Milli Parkımız dünyanın ən uzun və ən yaraşıqlı bulvarlarından biridir. Bundan əlavə, “Eurovision-2012”nin keçirilməsi üçün paytaxtda, Xəzər dənizinin sahilində möhtəşəm konsert salonu inşa edilir. Paytaxtımız günü-gündən inkişaf edir, gözəlləşir, yeni-yeni hündürmərtəbəli binalar, park və xiyabanlar salınır ki, bunlar da şəhərə xüsusi yaraşıq verir. Bütün bu sadaladıqlarım onu deməyə əsas verir ki, gələn il “Eurovision”a ev sahibliyi edəcək doğma Bakımız turistləri bir çox özəllikləri ilə heyrətləndirəcək. Yeri gəlmişkən, qeyd edim ki, hər il, musiqi yarışması bitdikdən sonra, Avropanın nüfuzlu musiqişünasları və ekspertləri “Eurovision”un təşkilini və keçirilməsini qiymətləndirirlər. Onların qənaətinə görə, indiyədək ən möhtəşəm “Eurovision” mahnı müsabiqəsi 2009-cu ildə Moskvada təşkil olunub. Amma mən düşünürəm ki, gələn il Bakıda təşkil olunacaq “Eurovision-2012” musiqi yarışması bütün paramertlərinə görə bu rekordu da təzələyəcək. Və “Eurovision” tarixində ən möhtəşəm mahnı müsabiqəsi məhz Bakıda təşkil olunacaq.

- Siz xarici ölkələrdə çox olursunuz. Bəs Avropadan Azərbaycan necə görünür?

- Məlumat üçün qeyd edim ki, mən ali təhsilimin bir hissəsini ABŞ-da almışam. Vaxtilə orada, Azərbaycan haqda çox az sayda insanlarda təsəvvürlər var idi, bizi yalnız dərsliklər vasitəsi ilə tanıyırdılar. Eləcə də, Avropada çox məhdud dairələrdə ölkəmiz haqda məlumata malikdilər. Amma artıq demək olar ki, dünyanın hər yerində Azərbaycanı tanıyırlar. Təbii ki, bizim “Eurovision”da qələbə çalmağımız, bu, ölkəmizin təbliği üçün böyük bir fürsət oldu. Təsəvvür edin, gələn il müsabiqədə iştirak etmək, eləcə də, onun işini işıqlandırmaq üçün bütün Avropa dövlətlərindən on minlərlə turistlər, eləcə də, minlərlə KİV nümayəndələri ölkəmizə gələcəklər. Ölkəmizin zəngin mədəniyyəti, milli mətbəxi, adət-ənənələri ilə yaxından tanış olacaqlar. Hesab edirəm ki, bu, ölkəmizin təbliği üçün böyük bir şansdır.

- Aysel xanım, “Eurovision” təmsilçilərinin seçilməsi ilə bağlı söz-söhbətlər hələ də davam edir. Kimisi münsifləri regionçuluqda və yerlibazlıqda günahlandırır, kimisi SMS-lərin düzgün hesablanmadığını iddia edir. Sizcə, ölkəni bu yarışmada təmsil edəcək namizədin seçilməsi üçün ideal variant hansıdır?

- Bu çox çətin bir məsələdir. Məsələn, builki seçim turundan sonra da belə söz-söhbətlər dolaşdı, mətbuatdan mən də bu haqda oxudum. Kimisi münsifləri ədalətsizlikdə günahlandırdı, kimisi ona göndərilən SMS-lərin sayının guya bilərəkdən azaldıldığını dedi. Məsələn, bizim vaxtımızda namizədin seçilməsi qapalı keçirildi və 40 iştirakçı arasından məni seçdilər. Sonra mənim Araşla duet oxuyacağım bəlli oldu. Amma sonrakı illərdə namizədin seçilməsi açıq səsvermə-SMS vasitəsi ilə müəyyənləşdi. Sonda münsiflər öz yekun qərarlarını söylədilər. Bu, heç də bir nəfərin fikri kimi başa düşülməməlidir. Münsiflər heyəti musiqimizi dərindən bilən, eyni zamanda, ölkəmizin təəssübkeşliyini çəkən insanlardan ibarətdir. Və mənim fikrimcə, münsiflərin qərarına hörmətlə yanaşılmalıdır. Ən azından, Eldar-Nigar cütlüyünün qələbəsi bunu təsdiqlədi.

- Ölkədə keçirilən “Eurovision”un uğuru həm də ev sahibinin təqdim etdiyi şou-proqramdan, eləcə də, müsabiqənin aparıcılarının peşəkarlığından da çox asılıdır. Sizcə, Azərbaycan, bu baxımdan Avropanı təəccübləndirə biləcəkmi?

- Sözsüz. Bizdə ingilis dilində sərbəst danışa bilən çoxlu istedadlı gənclər var. Hesab edirəm ki, məqamı yetişəndə onlar arasında seçim aparılacaq və ölkəmizi bu müsabiqədə layiqincə təmsil edə biləcək aparıcılar müəyyənləşəcək. Digər tərəfdən isə, məlum olduğu kimi, “Eurovision-2012”nin keçirilməsi üçün xüsusi komissiya yaradılıb. Hesab edirəm ki, Bakıda təşkil olunacaq mahnı yarışması “Eurovision” tarixinə öz damğasını vura biləcək.

- İcazə verin, bir az da şəxsi işlərinizlə maraqlanaq. Son vaxtlar hansı işləri görürsünüz?

- Son vaxtlar yeni mahnılar üzərində işləyirəm. Qeyd edim ki, “To night” adlanan mahnı Londonda studiyada lentə alınıb. Bu mahnı ilə bağlı böyük planlarımız var, yaxın vaxtlarda həmin mahnıya klip çəkiləcək. Xatırladım ki, mahnı sırf xarici auditoriya üçün nəzərdə tutulub. Yaradıcı heyət mahnının Avropada populyar olacağına əmindir. Bundan əlavə, məndən çox xahiş edirlər ki, Azərbaycan dilində də mahnılar ifa edim. Bu istiqamətdə də müəyyən işlər aparılır. İnşallah, çox yaxın vaxtlarda həmin mahnılar efirlərdən səslənəcək.

- Bəs xarici ölkələrdən necə, sizə təkliflər olurmu?

- Bilirsiz, xarici auditoriyaya çıxmaq üçün “Eurovision” müsabiqəsi bir növ tramplindir, səni bütün Avropada tanıyırlar. Bu baxımdan, özümü şanslı hiss edirəm və mənə bu etimadı göstərənlərə öz minnətdarlığımı bildirirəm. O ki qaldı sualın birbaşa cavabına, bəli, bir sıra ölkələrdən, o cümlədən, Rusiya və Türkiyədən də mənə belə iş təklifləri gəlir, həmin ölkələrin konsert salonlarında çıxışımı istəyirlər. Hələlik bu təkliflər müzakirə olunur. Amma bir şeyi də nəzərə çatdırmaq istəyirəm ki, valideynlərim məni hələ uşaqlıqdan bir az vətənpərvər ruhda tərbiyə ediblər. Odur ki, Vətənimi çox sevirəm və hələ ondan ayrılmaq istəmirəm.

- Pərəstişkarlarınız sizin musiqi albomunuzu tezliklə görə biləcəklərmi?

- Digər bəzi müğənnilərdən fərqli olaraq, mən bu işə çox ciddi yanaşıram. Bəzən elə olur ki, kimsə özünü tanıtmaq üçün, üç-beş mahnıdan ibarət albom çıxarır. Mən isə işi görəndə min ölçüb-bir biçirəm, onu keyfiyyətlə görürəm. İstəyirəm ki, albomumda keyfiyyətli, Avropa auditoriyasına hesablanan mahnılar daha çox yer alsın. Tezliklə deyə bilmərəm, amma gələcəkdə, bu, mümkündür.

- Qısa bir zaman kəsiyində öz şux, oynaq mahnıları ilə Avropa tamaşaçısının qəlbini riqqətə gətirən, onların sevimlisinə çevrilən Aysel-Araş cütlüyü sona yetdimi? Yoxsa, biz hələ qabaqda yenidən bu əməkdaşlığın şahidi olacağıq?

- Deməzdim ki, bu cütlük artıq tarixə qovuşdu. Bildiyiniz kimi, Araş bizim soydaşımızdır, Avropada yaşasa da, əslən Cənubi Azərbaycandandır. Bizim dostluğumuz hələ də davam edir. Demək olar ki, hər gün, internet vasitəsi ilə bir-birimizlə əlaqə saxlayırıq. Bu ilin martında onun toyu oldu, çox təəssüf edirəm ki, işlərimin çoxluğundan həmin mərasimdə iştirak edə bilmədim. Amma onları təbrik etdim. Yeri gəlmişkən, qeyd edim ki, “To night”ı Araşa da göndərmişəm, bu mahnı onun da çox xoşuna gəlib. (Gülür)Dünyanın işini bilmək olmaz, bəlkə inşallah, elə bir məqam yetişəcək ki, yenə də bu cütlüyü hansısa yeni bir layihədə görə biləcəksiniz.

- İndi bir növ müğənnilərin filmlərə dəvət olunması dəb halını alıb. Siz necə, heç filmlərdə çəkilməyə dəvət almısınızmı?

- Ötən iki il ərzində filmlərdə, yaxud seriallarda çəkilməklə bağlı mənə təkliflər çox olub. Bütün təkliflərdən imtina etmişəm. Çünki ssenarilərlə tanış olduqdan sonra düzü, onları bəyənməmişəm. Əslində, çəkilmək istərdim, amma indiyədək mənə təklif olunan əsərlərin həm özləri, həm də yaradıcı heyət çox zəif olub. Əlbəttə, hər hansı bir məşhur rejissorun filmində, yaxud, məşhur bir əsərin motivləri əsasında çəkilən bir filmdə oynamaq istərdim. Yeri gəlmişkən, qeyd edim ki, orta məktəbdə bizə gələcəkdə hansı peşə sahibi olmaq istədiklərimizi öyrənmək üçün anketlər paylayardılar. Mən də həmişə yazardım ki, ya aktrisa, ya da ki müğənni olacağam. Demək müəyyən mənada arzum çin olub.

- Bəs nə vaxtsa, “Qremmi” mükafatını almaq ürəyinizdən keçibmi?

- Uşaqlıqda, bəli, olub belə bir arzum. Amma yaşa dolduqca, bu, mənim üçün əlçatmaza çevrildi. Amma yenə də şansım gətirdi, “Eurovision” kimi Avropanın nüfuzlu musiqi yarışmasında üçüncü oldum. Avropa tamaşaçısı məni tanıdı, qəbul etdi. Taleyin işini bilmək olmaz. Bəlkə bir gün gələcək və mən həmin arzuma da çatacağam?

- Gələcək planlardan söz düşmüşkən, ixtisasca, gərək ki, diplomatsınız. Yoxsa gələcəkdə hansısa ölkədə Azərbaycanı səfir kimi təmsil etmək haqda düşünürsüz?

- (Gülür). Ötən il Azərbaycan Dillər Universitetinin Beynəlxalq münasibətlər fakültəsini Avropaşünaslıq və Amerikaşünaslıq ixtisası üzrə bitirmişəm. Yəni, ixtisasca, doğrudan da, diplomatam. Bilmək olmaz, bəlkə də bir gün gələcək elə əsas ixtisasımla məşğul olacağam. Niyə də olmasın? İndinin özündə də bizim diplomat xanımlarımız var. Yeri gəlmişkən, qeyd edim ki, elə incəsənət işçiləri, musiqiçilər də öz ölkələrinin mədəniyyət sahəsi üzrə bir növ diplomatları hesab olunurlar. Biz xarici ölkələrə səfərlər edirik, ölkəmizi təbliğ və təqdim edirik, başqa sözlə, indinin özündə də bir növ əsas peşəmlə məşğulam. Amma mən hələ gəncəm, düşünürəm ki, gələcəkdə hər iki işimi paralel aparacağam, bir növ peşələrimi sintez edəcəyəm.

- Aysel xanım, yeri gəlmişkən, bir gənc nəslin nümayəndəsi kimi, Azərbaycanda dövlət tərəfindən aparılan gənclər siyasətini necə qiymətləndirirsiniz?

- Heç kimə sirr deyil ki, Azərbaycan Prezidenti İlham Əliyev tərəfindən ölkəmizdə gənclərə xüsusi diqqət və qayğı göstərilir. Gənc kadrlar dövlətin idarəetmə strukturlarında işə cəlb olunur, onların məişət və digər sosial problemlərinin həlli istiqamətində ayrıca dövlət proqramları qəbul edilir və uğurla icra olunur. Bir gənc kimi, dövlətin bu diqqət və qayğısını hər zaman hiss etmişəm. Hesab edirəm ki, bizim gənclər də dövlətin bu diqqət və qayğısına öz əməli işləri ilə cavab verməyə hazırdırlar və bunu edirlər də. Görün neçə-neçə gənc idmançımız beynəlxalq yarışlarda qələbə qazanaraq dövlətimizin bayrağını ucalara qaldırıblar, onların şərəfinə dövlət himnimiz səslənib? Bu hissləri yaşamaq özü bir şərəfdir. Və hər bir gəncimizə belə uca hissləri yaşamağı arzu edirəm.

- Üzvü olduğunuz Yeni Azərbaycan Partiyası ilə bağlı fikirlərinizi bilmək oxucularımız üçün də maraqlı olardı.

- Mən çoxdan bu partiyaya üzv olmaq istəyirdim. Mənim atam YAP-ın fəal üzvlərindən biridir. Bu ilin yanvar ayında sənədlərimi hazırladım. Və fevralın 2-də - Gənclər günündə məni partiyaya qəbul etdilər. Bunun üçün çox sevinirəm və özümü çox xoşbəxt hiss edirəm. Çünki tarix göstərdi ki, Ümummilli lider Heydər Əliyevin qurucusu olduğu bu partiya Azərbaycanı tənəzzüldən inkişafa, tərəqqiyə apardı, onun dünya dövlətləri sırasında öz layiqli yer tutmasını labüdləşdirdi. Ulu öndərimizin layiqli davamçısı olan Prezident İlham Əliyevin rəhbərliyi ilə Azərbaycan yeni-yeni zirvələri fəth etdi. Dünyanın ən inkişaf etmiş dövlətlərindən birinə çevrildi. Və mən də çalışacağam ki, öz əməli işimlə bu partiyaya fayda verə bilim, onun layiqli üzvlərindən birinə çevrilim, layiqli vətəndaş ola bilim.

- Səmimi söhbətə görə, təşəkkür edirik.

- Mən də qəzetiniz vasitəsi ilə o

xucularınıza, eyni zamanda, bütün Azərbaycan xalqına öz salamlarımı çatdırıram. İnşallah, gələn il, Bakıda möhtəşəm “Eurovision” şousu görmək arzusu ilə sizə ən xoş arzularımı ifadə edirəm.

Səlim LOĞMANOĞLU

Yeni Azərbaycan.- 2011.- 23 sentyabr.- S.5.