YAP Gənclər Birliyi beynəlxalq əlaqələrini genişləndirir

Ramin Məmmədov: EDS-in tədbirlərində YAP Gənclər Birliyinin təmsil olunması bu ailənin içərisində Azərbaycan gəncliyinin aktiv rol oynamasının təmin edilməsinə çox böyük dəstək verəcəkdir

Müsahibimiz Yeni Azərbaycan Partiyasının Gənclər Birliyinin sədr müavini Ramin Məmmədovdur:

- Ramin müəllim, bu yaxınlarda YAP Gənclər Birliyinin nümayəndəsi olaraq Avropa Demokrat Tələbələr Birliyinin tədbirində iştirak etmisiniz. Bu tədbir haqqında məlumat verməyinizi xahiş edirik...

- Bildiyiniz kimi, Avropa Parlamentində ən böyük fraksiya Avropa Xalq Partiyasına məxsusdur. Avropa Xalq Partiyasının çərçivəsində də müxtəlif təşkilatlar öz fəaliyyətini həyata keçirməkdədir. Belə təşkilatlardan biri də Avropa Demokrat Tələbələr Birliyidir (EDS). Xatırladım ki, bu qurum iyul ayında Vyana şəhərində 50 illik yubileyini keçirmişdi. YAP Gənclər Birliyinin nümayəndəsi kimi mən bu yubiley tədbirində iştirak etmişəm. Bildirmək istərdim ki, EDS-in il ərzində bir neçə silsilə tədbirlər proqramı mövcuddur. 2011-2012-ci illəri əhatə edən bu proqrama uyğun olaraq təşkilatın birinci Şura iclası 13-18 sentyabrda Çexiyanın paytaxtı Praqa şəhərində keçirilib. Bu Şura iclasının ana mövzusu Mərkəzi və Şərqi Avropada inkişafın və müstəqilliyin 20 illiyi məsələsi seçilmişdi. Qeyd olunan mövzu ətrafında həm seminarlar, həm müxtəlif iclaslar oldu və ümumiyyətlə, bütün qeyd olunan məruzələr sırf bu mövzu ətrafında iştirakçıların diqqətinə çatdırıldı. Bir məqamı qeyd etmək istərdim ki, bu ildən etibarən EDS-in müəyyən layihələrində Avropa Şurasının gənclərlə iş direktoratı da bilavasitə iştirak edəcək. Və ilk pilot layihə olaraq Praqa şəhərində Avropa Şurasının və Avroparlamentdə ən böyük fraksiyaya sahib olan bir partiyanın gənclər təşkilatı arasında artıq müştərək əməkdaşlığın, birgə fəaliyyətin ilk formaları qurulmaqda və həmin iştirakçıların diqqətinə çatdırılmaqda idi. Avropa Şurasının qeyd etdiyim direktoratının nümayəndəsi və gənclər siyasətini bilavasitə həyata keçirən məmurlarından Mişel Berqdol həmin seminarlarda həm müşahidəçi statusunda, həm də müəyyən treninqləri sırf aparan şəxs qismində bizim tədbirdə iştirak edib.

- Ümumiyyətlə, YAP Gənclər Birliyinin bu təşkilatla əməkdaşlığının əhəmiyyəti nədən ibarətdir?

- Məlum olduğu kimi, YAP Gənclər Birliyi artıq ikinci dəfədir ki, EDS-in tədbirində iştirak edir. Təbii ki, hər bir beynəlxalq tədbirdə iştirak zamanı təmsil etdiyimiz ölkə və partiya haqqında məlumatları düzgün və əhatəli təqdim etməyə çalışırıq. Çünki bir çox iştirakçı ölkələr Azərbaycanın apardığı siyasət, beynəlxalq arenada, iqtisadi məkandakı rolunun artmasından ümumi şəkildə xəbərdardırlar. Ancaq yaranmış konkret suallara daha detallı şəkildə cavab verilməsi üçün bilavasitə bizim orda olmağımızın böyük əhəmiyyəti vardır.

- Avropanın enerji təhlükəsizliyi məsələsi bu gün aktual mövzulardan biridir. EDS-in toplantısında bu məsələyə dair müzakirələr aparıldımı?

- Mən tədbirin proqramında bir neçə məqamı xüsusi vurğulamaq istərdim. Həmin tədbirdə Çexiyanın müxtəlif sahələrinə rəhbərlik edən və kifayət qədər yüksək səviyyəli şəxslər iştirak etdilər. Onlar müxtəlif mövzularda tədbir iştirakçılarına Çexiyanın son 20 il ərzində əldə etdiyi nailiyyətlər, Avropa ailəsinə yönəlik atdıqları addımlar barəsində ətraflı məruzələr etdilər. Biz bu məruzələrlə tanış olduq. Xüsusi məruzələrdən biri Yaponiyada baş vermiş təbii fəlakətdən sonra Avropanı narahat edən və bu gün demək olar ki, Avropanın enerji məkanında ən vacib məsələlərdən olan atom enerjisinin və atom elektrik stansiyalarının fəaliyyətinin dayandırılması və ya yeni stansiyaların tikintisi ilə bağlı oldu. Bu mövzuda məruzəni Çexiyanın atom enerjisi təhlükəsizliyi idarəsinin nümayəndəsi Dara Drabova təqdim etdi. Bu istiqamətdə fikir mübadiləsi aparıldı. Ümumiyyətlə, həmin tədbirdə enerji təhlükəsizliyinə çox böyük önəm verildi.

Digər buna bənzər məsələlərdən biri də, Avropanın bu gün müxtəlif enerji mənbəyi, enerji daşıyıcı layihələrinin uğurundan kifayət qədər söhbətin açılmasıdır. Belə bir məruzə ilə Çexiyanın ətraf mühit nazirinin müavini Veronika Hunt Şafrankova çıxış etdi. O, eyni zamanda, enerji daşıyıcılarının Avropaya gətirilməsi yollarının müxtəlifliyi və müxtəlifliyin gətirdiyi həm alternativ enerji mənbələri, həm alternativ enerji daşıyıcılarının Avropaya çatdırılması məsələsi və enerji sisteminin qurulmasında ətraf mühitə vurulan zərər, bu zərərin qarşısının alınması yolları haqqında da fikirlərini bildirdi. Təbii ki, tədbirdə iştirak edən gənclər şahid oldu ki, Avropanın enerji təhlükəsizliyi məsələsi kifayət qədər aktualdır və Avropa gəncləri bu məsələyə xüsusi diqqət yetirir.

- Azərbaycanın Avropanın enerji təhlükəsizliyinin təmin olunmasındakı rolu necə dəyərləndirildi?

- Bu tədbirdə Avropada geniş və çox güclü aktor olaraq təbii ki, regionumuzla da bağlı məsələlər müzakirə olundu, yaşadığımız bölgənin gələcəkdə Avropanın enerji təhlükəsizliyi sistemində rolunun güclənməsinə dair müəyyən fikir mübadiləsi aparıldı.

Ümumiyyətlə, tədbirin əsas mahiyyətlərindən biri ondan ibarət idi ki, biz bir daha müxtəlif Avropa platformalarında Azərbaycanın artan rolunu qeyd edərək Avropa ictimaiyyətinə çatdırmaq istəyirik ki, Avropanın enerji təhlükəsizliyinin gələcəyi Azərbaycansız mümkün deyil. Azərbaycanın bu məsələdə rolunun artmasını nəzərə alaraq təbii ki, ölkəmizin də problemlərinə kifayət qədər diqqət ayrılmalıdır, çünki bu gün Azərbaycanın həll olunmayan problemləri gələcəkdə Avropanın təhlükəsizlik sisteminə zərər verə biləcək problemlərdən biri kimi qəbul olunmaqdadır.

- Yaxın gələcəkdə bu təşkilatın aktual mövzularla bağlı yeni tədbirlər keçirəcəyi və bu tədbirdə YAP Gənclər Birliyinin nümayəndələrinin iştirakı nəzərdə tutulurmu?

- EDS-in 2011-2012-ci illər ərzində təsdiq etdiyi və həyata keçirməyi planlaşdırdığı bəzi tədbirlər haqda bir neçə kəlmə demək istərdim. Çünki il ərzində bizi maraqlandıran bir sıra məsələlər müzakirə ediləcək. Qeyd etmək istərdim ki, EDS-in növbəti Şura iclası bu ilin dekabr ayında Fransanın Marsel şəhərində olacaq. Güman edirəm ki, YAP Gənclər Birliyi həmin tədbirdə təmsil olunacaq. Həmin tədbir demək olar ki, Avropada multikulturalizm, müxtəlif inteqrasiya prosesləri, xalqlar arasındakı mübadilə mövzusuna həsr olunacaq. Avropa ailəsi genişdir, müxtəlif xalqların təmsilçilərini özündə birləşdirməkdədir. Bu nöqteyi-nəzərdən Azərbaycanın Avropa təsisatlarına inteqrasiya yönündə uğurlu siyasəti haqqında da fikir mübadiləsi aparmaq mümkündür. Qeyd edim ki, üçüncü şura iclası isə Belçikada keçiriləcək.

Ümumiyyətlə, EDS növbəti illər ərzində üç şura iclası, qış və yay universitetləri layihələrini reallaşdırmağı nəzərdə tutur. Onu da bildirim ki, qış universitetləri Xorvatiyada keçiriləcək. Bu tədbirlərdə YAP Gənclər Birliyinin təmsil olunması bu ailənin içərisində Azərbaycan gəncliyinin aktiv rol oynamasının təmin edilməsinə çox böyük dəstək verəcək.

- Ramin müəllim, YAP Gənclər Birliyinin beynəlxalq əlaqələrinin daha da genişləndirilməsi istiqamətindəki perspektiv planlar haqqında nə deyə bilərsiniz?

- Bildiyiniz kimi, bu ilin yanvar ayında YAP Gənclər Birliyinin növbəti hesabat-seçki konfransı keçirilib və konfransda birliyin yeni rəhbər heyəti seçilib. Yeni heyət seçildiyi ilk gündən beynəlxalq əlaqələrin inkişafı və beynəlxalq ikitərəfli əməkdaşlığın genişlənməsinə böyük önəm verərək bu məsələni əsas prioritet istiqamətlərdən biri kimi öz proqramına daxil edib. Mən beynəlxalq əlaqələrə məsul sədr müavini kimi deyə bilərəm ki, ilk gündən etibarən apardığımız işlərin prioritet istiqamətlərini təyin etmişik. Təbii ki, YAP olaraq regionda bizə yaxın olan dövlətlərin nüfuzlu siyasi təşkilatları ilə əməkdaşlıq edirik. Buna bariz nümunə kimi qardaş Türkiyənin hakim partiyasının gənclər təşkilatı ilə sıx təmaslarımızı göstərə bilərəm. Güman edirəm ki, həmin təşkilatın nümayəndə heyəti yaxın zamanlarda Bakıya səfər edərək bizim gənclərlə görüşəcək. Eyni zamanda, onlar YAP Gənclər Birliyinin dəstəyinə arxalanaraq digər layihələr həyata keçirəcəklər.

Digər bir istiqamət isə, MDB məkanında mövcud olan gənclər təşkilatları ilə əlaqələrin genişlənməsini planlaşdırır. Bizim vəzifəmiz ondan ibarətdir ki, indiyədək qurulmuş əlaqələri daha da gücləndirək və əhatəsini genişləndirək. Artıq bununla bağlı iş aparılır və Belarus, Moldova, Ukrayna, Gürcüstan, Mərkəzi Asiya ölkələrinin hakim partiyalarının gəncləri və fəal gənclər təşkilatları ilə əməkdaşlığın gücləndirilməsi yönündə işlər aparılır. Ümumiyyətlə, gələcəkdə bu məkanda vahid platforma ilə çıxış etmək üçün müəyyən yeni bir fəaliyyət formasının axtarışındayıq. Təbii ki, bu məsələ ilə bağlı həmin təşkilatlarla fikir mübadiləsi aparılmaqdadır və fikrimcə, yaxın zamanlarda bu əməkdaşlıq formasının nədən ibarət olduğuna yekun vuraraq gənclərimizi bu platforma ilə tanış edəcəyik. Prioritet istiqamətlərdən biri Avropa gənclər təşkilatları ilə əlaqələrin qurulmasıdır. Bununla bağlı bir çox işlər aparılıb.

Bilirsiniz ki, biz bu ilin may və iyun aylarında Rumıniyanın hakim partiyası olan Liberal Demokrat Partiyasının gənclər təşkilatının dəvəti ilə bu ölkədə səfərdə olduq. Eləcə də, rumın gənclər də iyul ayında ölkəmizə səfər etdilər. Rumıniya Avropada bizim dayaq nöqtəmizə çevrilib. Rumıniya hakim partiyasının gəncləri ilə əməkdaşlığımız bir nümunə olaraq digər Avropa gəncləri ilə də həyata keçiriləcək. Bu gün Serbiya, Norveç, Almaniya, Fransa, İtaliya, Çexiya, Baltik ölkələri gəncləri və s. dövlətlərin gəncləri ilə münasibətlərin inkişaf etdirilməsinə dair işlər aparılır. Güman edirik ki, bu ilin sonuna qədər və 2012-ci ildə təşkilatımızın beynəlxalq arenada daha yaxşı tanınması üçün, həm də Azərbaycanımızın nailiyyətlərini dünya gəncləri arasında təbliğ etmək üçün mühüm zaman kəsiyi olacaq.

Nardar BAYRAMLI

Yeni Azərbaycan.- 2011.- 30 sentyabr.- S.5.