Naxçıvanda görkəmli bəstəkar Tofiq Bakıxanovun 80 illik yubileyi qeyd olunub

Naxçıvan şəhərindəki Heydər Əliyev Sarayında “Şöhrət” ordenli bəstəkar, Azərbaycan Respublikasının Xalq artisti, professor Tofiq Bakıxanovun 80 illik yubileyinə həsr olunmuş tədbir keçirilib. Yubiley tədbirində Naxçıvan Muxtar Respublikası Ali Məclisinin sədri Vasif Talıbov çıxış edərək musiqi mədəniyyətimizin inkişafında xüsusi xidmətləri olan görkəmli bəstəkar Tofiq Bakıxanovu 80 illiyi münasibəti ilə təbrik edib. Ali Məclisin sədri Tofiq Bakıxanova professional musiqimizin inkişafında bundan sonra da məhsuldar fəaliyyətində uğurlar arzulayıb, ona Naxçıvan Muxtar Respublikasının 85 illiyi münasibətilə buraxılmış xatirə qızıl medalını təqdim edib.

Xalq artisti Tofiq Bakıxanov yaradıcılığına muxtar respublikada yüksək qiymət verildiyini, 75 illik yubileyinin də Naxçıvanda qeyd olunduğunu vurğulayıb, ona göstərilən diqqət və qayğıya görə dərin minnətdarlığını bildirib.

Sonra görkəmli bəstəkarın 80 illik yubileyi münasibəti ilə konsert olub.

Konsert proqramında bəstəkarın Ümummilli lider Heydər Əliyevə həsr olunmuş “Həmişə bizimləsən” simfonik poemasının videoyazısı nümayiş etdirilib.

Konsert proqramından sonra səhnə arxasına keçən Ali Məclisin sədri Vasif Talıbov ifaçıları və ansamblın kollektivini uğurlu konsertə görə təbrik edib.

Ansamblın kollektivinin və ifaçıların bəstəkarın əsərlərini, mahnılarını çox gözəl ifa etdiklərini bildirən Ali Məclisin sədri Ümummilli liderimiz Heydər Əliyevin “Bizim hamımızın bir Vətəni var - bu, Azərbaycandır” kəlamını xatırladıb.

Tofiq Bakıxanov muxtar respublikada həyata keçirilən tədbirlərin, mədəniyyətin inkişafına göstərilən diqqət və qayğının burada Ulu öndər Heydər Əliyevin yolunun uğurla davam etdirilməsinin nəticəsi olduğunu vurğulayıb, 80 illik yubileyinin Naxçıvanda yüksək səviyyədə təşkilinə görə minnətdarlığını bildirib, 4 diskdən ibarət mahnı və əsərlərini, Bakıxanovlar nəslinin görkəmli nümayəndələrinə həsr olunmuş “Bakıxanovların ekran təcəssümü”, “Bakıxanovlarla nurlanan ekran” kitablarını Ali Məclisin sədri Vasif Talıbova təqdim edib.

Yeni Azərbaycan.- 2011.- 19 yanvar.- S. 8.