“Zəriflik” jurnalının əsas məqsədi Azərbaycan qadınının fəaliyyətini, eləcə də, milli-mənəvi dəyərlərimizi cəmiyyətdə təbliğ etməkdir

Yeni Azərbaycan Partiyası (YAP) Qadınlar Şurasının sədri Nurlana Əliyeva www.yap.org.az saytına müsahibə verib:

- Nurlana xanım, başa vurduğumuz 2010-cu il ölkəmiz üçün bir sıra uğurlarla yadda qaldı. İstərdik ki, YAP Qadınlar Şurasının ötən il ərzindəki fəaliyyəti haqqında məlumat verəsiniz...

- Bildiyiniz kimi, YAP Qadınlar Şurasının son hesabat-seçki konfransından sonra yeni tərkibdə fəaliyyət göstəririk. Fəaliyyət göstərdiyimiz bir il yarım ərzində bir sıra layihələr, tədbirlər həyata keçirmişik. İlk olaraq qeyd etmək istəyirəm ki, biz bu müddət ərzində bütün regionlarımızda qadınlarımızla görüşlər keçirmişik. Fəaliyyətimizin yeni istiqamətlərini də həmin görüşlərimizdən sonra müəyyənləşdirmişik. Bəzi bölgələrdə müəyyən məsələlərin həllinin zəruri olması qənaətinə gəlmişik. Bütün bunlarla bağlı həmin bölgələrin insanları, xüsusilə qadınlar arasında maarifləndirici təbliğat işlərinin həyata keçirilməsi zərurəti ortaya çıxıb. Məsələn, elə region var ki, orada erkən nikahla bağlı problemlər mövcuddur. Düzdür, bu problemi birdən-birə həll etmək, valideynlərə bunu birdən-birə izah etmək çətindir. İllərlə kök salmış bu ənənəni müxtəlif təbliğat işləri əsasında aradan qaldırmaq lazımdır. Biz bu istiqaməti də öz fəaliyyətimizdə əsas məqamlardan hesab edirik. Təəssüf ki, bəzi valideynlər öz övladlarını tez evləndirməyə çalışırlar. Bunun gələcəkdə nəticələri isə yaxşı ola bilməz. Çünki erkən yaşda qurulan ailələrdə ciddi problemlər yaşanır. Biz belə halların qarşısını almaq üçün müəyyən addımlar atmışıq və bu proses davamlı olacaq. Təkcə bir fakt deyim: Qadınlarımızın cəmiyyətdəki rolunu təlqin edən gözəl teatr tamaşalarımız var və onları bölgələrdə nümayiş etdirmişik. Fikirləşdik ki, bu tamaşalara baxan insanlar tərbiyəvi, maarifləndirici xarakterli bu tədbirdən özləri üçün müsbət nəticə çıxara bilərlər.

Bundan əlavə, YAP Qadınlar Şurası olaraq Lerik rayonunda səhiyyə aksiyası keçirmişik. Biz Lerik rayonunda qadınlarla görüş keçirərkən bəzi kəndlərdən olan qadınlar şikayət edirdilər ki, rayon mərkəzi uzaq olduğu üçün xəstə uşaqları xəstəxanaya aparmaq çətindir. Biz ötən ilin yayında böyük bir səhiyyə aksiyası keçirərək 865 uşağın tibbi müayinəsini təşkil etdik. Lerik rayonuna 12 fərqli sahələrin mütəxəssisləri olan həkimlərlə getmişdik. Lerikin qadın sakinləri bu aksiyadan həddən artıq çox razı qalmışdılar.

Tarixən Azərbaycan qadını güclü olub. Müasir dövrümüzdə Azərbaycan qadınının sözünü deməyə tribunası, öz həmfikirlərini bir yerə yığmaq imkanı var. Çünki cəmiyyətimizin YAP kimi böyük siyasi qüvvəsi var. Partiyamızın sıralarında təmsil olunan insanların 49 faizi qadınlardır ki, onlar da müxtəlif sahələrdə çalışırlar. Fəxrlə deyə bilərik ki, bu gün Azərbaycan qadınları cəmiyyətimizdə böyük nüfuza, hörmətə, ehtirama sahibdir. Ölkəmizdə qadınları narahat edən məsələlər öz həllini tapıb. Ölkəmizdə aparılan dövlət siyasətinin uğurlu nəticələrini hamımız görürük. Ulu öndər Heydər Əliyev tərəfindən müəyyən edilmiş bu siyasət bu gün hörmətli Prezidentimiz İlham Əliyev tərəfindən uğurla həyata keçirilir. İndi Azərbaycanın mövqeyi dünyada tanınır, təqdir olunur. 20 il əvvəlki kimi ölkədə xaos yoxdur. Bu gün analarımız Milli Qəhrəman Mübariz İbrahimov kimi oğullar yetişdirir. Yəni, bu fakt sübut edir ki, ailələrimizdə nə qədər vətənpərvər oğullarımız böyüyür. Gənc nəslin belə yüksək milli ruhda böyüməsində analarımızın müstəsna əməyi, zəhməti var.

- “Zəriflik” jurnalının fəaliyyətə başlaması da YAP Qadınlar Şurasının yeni layihələrindən biridir. Bu jurnalın nəşrinə başlamaq zərurəti nədən yarandı?

- Qeyd etdiyim kimi, YAP Qadınlar Şurası bir sıra layihələr həyata keçirməkdədir. Bu layihələrdən biri də təşkilatımızın mətbu orqanı olan “Zəriflik” jurnalının fəaliyyətə başlamasıdır. Biz bu mətbu orqan vasitəsilə müxtəlif təbəqələrin insanlarını cəmiyyətə təqdim edirik. Artıq ilk sayımız işıq üzü görüb. Təbii ki, hər bir mətbu orqanın təkmil şəkildə ortaya çıxması, cəmiyyətdə özünə mövqe əldə etməsi üçün əsas şərt zamandır. Fikrimcə, bu jurnal yüksək reytinq qazanacaq və uğurlar əldə edəcək. İlk nömrəmizdə müxtəlif məqalələr dərc olunub. Bu məqalələrin həm də böyük tərbiyəvi əhəmiyyəti var, milli-mənəvi dəyərlərimizin qorunmasına xidmət göstərir. YAP Qadınlar Şurasının əsas məqsədi məhz bu dəyərlərin qorunmasında qadınlarımızın rolunu cəmiyyətə təqdim etməkdir. Çalışırıq ki, klassik mədəniyyətimizi, incəsənətimizi gənc nəslə daha yaxından tanıdaq. Qeyd edim ki, jurnalın ilk sayında ölkəmizin birinci xanımı, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, millət vəkili Mehriban xanım Əliyeva haqqında, Onun xeyirxah əməlləri haqda geniş bir yazı dərc etmişik. Bu gün Azərbaycan qadını öz ölkəsinin inkişafı üçün mübarizə aparır. Bu baxımdan Mehriban xanım Əliyevanın fəaliyyəti qadınlarımıza örnək olmalıdır. Mehriban xanım Əliyevanın səyi nəticəsində ölkəmizdə xeyli sayda xoşməramlı layihələr həyata keçirilib, təhsilimizin inkişafına töhfələr verilib. Bu gün ölkəmizin bir çox regionlarında Heydər Əliyev Fondunun təşəbbüsü ilə məktəblərin yenidən qurulması prosesi davam edir. Yeni Azərbaycan Partiyasının üzvü olan qadınlarımız da məhz Mehriban xanım Əliyevanın fəaliyyətini hər zaman nümunə kimi qəbul edirlər, istər siyasi, istərsə də ictimai proseslərdə aktivlik göstərirlər.

Jurnalda, həmçinin, sənətkarlarımız haqqında da geniş yazılar var. Məsələn, Xalq artisti, böyük sənətkar Şövkət Ələkbərova ilə bağlı məqalə dərc olunub. Fikrimcə, gənc nəslin Şövkət xanımın sənəti ilə, onun yüksək səviyyəli səhnə fəaliyyəti ilə yaxından tanış olması olduqca vacibdir. Həmçinin, digər tanınmış sənətkarımız Aygün Səmədzadə ilə müsahibə dərc olunub. Bundan əlavə, jurnalda milli mətbəximizlə bağlı gözəl yazılar öz əkisini tapıb. Fikrimizcə, bu gün milli mətbəximizin təbliğinə də kifayət qədər ehityac var. Bu, həm də milli mətbəximizin başqa dövlətlərdə də tanınmasına, təbliğinə kömək göstərə bilər. Bir sözlə, jurnalın ilk sayında rəngarəng mövzular çoxdur. Qeyd edim ki, gələcəkdə jurnalımızda fərqli, digər maraqlı rubrikalar da yer alacaq və burada elmə bağlı olan qadınlarımız haqqında da geniş məlumatlar əldə etmək olacaq. Fikrimcə, bu jurnalın dərci olduqca lazımlı idi və biz də bu ehtiyacı hiss edərək belə bir nəşri reallaşdırmağa qərar verdik.

- Yeni nəşrə ad seçimi edərkən, nə üçün “Zəriflik” adına üstünlük verdiniz?

- Dünyada qadın qədər incə, zərif bir məxluq yoxdur. Sanki zəriflik qadının boyuna biçilib. Zəriflik deyən kimi insanın gözünün qarşısında qadın, qadın deyəndə isə zəriflik canlanır. Zəriflik yalnız incəlik demək deyil. Zəriflik elə bir duyğudur ki, o məhəbbətdən yaranır. Dünyada ana ilə övladının məhəbbətindən zərif bir hiss yoxdur. Qadının gördüyü bütün işlər zəriflikdir. Hətta qadının öz övladı üçün bir sıra çətinliklərə sinə gərməsi də zəriflikdən qaynaqlanan bir hissdir. Jurnalın adının seçilməsində də bu amillər başlıca rol oynayıb.

- Nurlana xanım, bu gün Azərbaycanda yüzlərlə kütləvi informasiya vasitəsi fəaliyyət göstərir. Necə hesab edirsiniz, hazırda Azərbaycan mətbuatı ictimai ehtiyacları ödəyə bilirmi? Onların sırasına qoşulan “Zəriflik” jurnalı bu prosesə hansı töhfələr verə bilər?

- KİV-lər arasında bu gün rəngarənglik mövcuddur. Bizim çox gözəl, maarifləndirici nəşrlərimiz var. Bu nəşrləri oxuduqca insan özündə bir məmnunluq hissi duyur, nə isə öyrəndiyini dərk edir. Amma ümumilikdə yanaşdıqda, bu gün ölkəmizdə KİV-in səviyyəsindən tam razı olduğumu deyə bilmərəm. Nəşrlər arasında maraqsız, bəzi hallarda çox müraciət olunmuş mövzulara müraciət edənlər də kifayət qədərdir. KİV-in əsas vəzifəsi insanları maarifləndirmək, oxucusunu mənəvi cəhətdən zənginləşdirmək, ona yeniliklər çatdırmaqdır. KİV bütün sahələr üzrə əsas məqamlara toxunmağı bacarmalıdır, oxucu üçün bir yenilik gətirməlidir. Əgər bunlar yoxdursa, həmin nəşr sadəcə quru söz yığınından başqa bir şey deyil. Mən inanıram ki, “Zəriflik” jurnalı fəaliyyətində bu prinsipləri əsas tutaraq daim maraqlı mövzularla oxucularını sevindirəcək.

Yeni Azərbaycan.- 2011.- 22 yanvar.- S.6.