“Müxalifət Azərbaycan vətəndaşlarının diqqətini çəkəcək nəsə vəd edə bilmir”

“Media forum” saytının suallarını Yeni Azərbaycan Partiyası Sədrinin müavini – İcra katibi, deputat Əli Əhmədov cavablandırır:

- ATƏT-in Bakı ofisi iqtidar-müxalifət dialoqu təşkil edəcəyini, bunun üçün müzakirələr apardıqlarını açıqlayıb. YAP-a belə bir təklif daxil olubmu?

- ATƏT-in Bakı ofisindən belə təklif almamışıq. Müxtəlif dövrlərdə hansısa məsələlərin müzakirəsinin təşkil olunmasına dair söhbətlər olub. Bir dəfə isə konkret olaraq “Siyasi partiyalar haqqında” qanuna dəyişikliklərlə bağlı fikir mübadiləsi aparılması təklifi vardı. Artıq Milli Məclisin Hüquq siyasəti və dövlət quruculuğu komitəsi “Siyasi partiyalar haqqında” qanuna dəyişikliklər layihəsini müzakirə edib. Layihə parlamentə tövsiyə olunub. Hesab edirəm ki, bu, həll olunmuş bir məsələdir. Ona görə də bu məsələ ətrafında dialoq təşkil etmək, diskussiya aparmaq hər hansı məna və əhəmiyyət kəsb etmir.

Dialoq əhval-ruhiyyəsinə gəlincə, Azərbaycan cəmiyyətində bu ovqat var. Bundan ötrü kimlərinsə təşəbbüsü və rəhbərliyi altında yığışıb söhbət etməyə, fikir mübadiləsi aparmağa heç bir ehtiyac yoxdur. Hansısa məsələlərlə bağlı söhbətə ehtiyac yarananda partiyalar özləri bunu etməyə qadirdir. Aprelin 10-da Milli Məclisin Hüquq siyasəti və dövlət quruculuğu komitəsinin iclasında gözəl bir müzakirə baş tutdu. Parlamentdə təmsil olunan müxalifət partiyaları ilə YAP “Siyasi partiyalar haqqında” qanuna ediləcək dəyişikliklər ətrafında çox səmərəli fikir mübadiləsi apardı. Siyasi partiyalar onları maraqlandıran məsələlər ətrafında fikir mübadiləsi aparmağa hazırdırlar və bunu edə bilərlər. Kiminsə yardımına, dəstəyinə elə bir ehtiyac görmürük.

- İctimai Palata aprelin 22-nə mitinq təyin edib. Bunu necə qiymətləndirirsiz?

- Hesab edirəm ki, müxalifətin cidd-cəhdlə və çoxlu sayda partiyanın iştirakı ilə təşkil etdiyi 8 aprel mitinqi iflasa uğrayıb. Mitinqdə iştirak edənlərin sayını təşkilatçı partiyaların sayı ilə müqayisə etsək, məlum olar ki, hər partiya aksiyaya orta hesabla 20-30 nəfər adam gətirib. Bu amil müxalifətin mitinq taktikasının və mitinq həvəsinin növbəti iflasından başqa bir şey deyil.

8 aprel Azərbaycan vətəndaşlarının müxalifətə və onun mitinq istəklərinə tamamilə biganə yanaşmasının ifadəsidir. Cəmiyyətimiz ötən illər ərzində dəfələrlə müxalifəti dəstəkləmədiyini, ondan bir fayda olmadığını açıq formada bəyan edib. Azərbaycan cəmiyyəti və vətəndaşları son mitinqə münasibətdə müxalifəti dəstəkləmədiyini, ondan hər hansı fayda gözləmədiyini daha aydın şəkildə ifadə etdi. Müxalifət bir ay böyük kampaniya aparıb aprelin 8-də mitinq keçirmək istəyini ortaya qoymuşdu. Amma nəticə göz qabağındadır. Min nəfəri güclə yığıblar. Hesab edirəm ki, müxalifətin təşkilatçılığı altında kütləvi mitinqlərin keçirilməsi ehtimalı sıfıra bərabərdir. Azərbaycan vətəndaşları həyatından, güzəranından məmnundur. İnsanlarımız ölkəmizin həyatında, iqtisadiyyatında baş verən dəyişikliklərin faydasını görür. Bunun fonunda müxalifət Azərbaycan vətəndaşlarının diqqətini çəkəcək nəsə vəd edə bilmir. İnsanlar müxalifətin arxasınca getmir və getməyəcək.

- Bakıda keçiriləcək “Eurovision 2012” yarışması müəyyən gərginlik yaradıb. Qərb mətbuatı hər gün Azərbaycan haqda yazır. Bu yazıların əksəriyyəti tənqidi xarakterlidir. Azərbaycan təmsilçilərinin “Eurovision” yarışmasında ötənilki qələbəsi faktdır. Amma bəzi siyasi ekspertlər hesab edir ki, bu qələbə və yarışmanın Bakıya gəlib çıxması təsadüfi deyil, burada Qərbin müəyyən siyasi məqsədləri var. Bunu mümkün hesab edirsinizmi? İndiyə qədər olan mərhələdə hansısa ölkə və qüvvələrin bu yarışmadan Azərbaycana qarşı siyasi məqsədlər üçün istifadə etməsi hallarını müşahidə etmisinizmi?

- Azərbaycanın gənc ifaçılarının Avropanın çox mötəbər mahnı müsabiqəsində qələbə qazanması, sözsüz ki, əhəmiyyətli hadisədir. İlk növbədə mədəni hadisədir. Təbii ki, bu qələbənin qazanılmasında həlledici rolu bizim gənc ifaçılarımız oynayıb. Bunu birmənalı şəkildə etiraf etmək lazımdır.

Eyni zamanda etiraf olunmalı bir cəhət ondan ibarətdir ki, bu qələbə sayəsində Azərbaycan Avropa məkanında, ən azından qitənin mədəni məkanında daha geniş şəkildə tanınmaq, təbliğ olunmaq şansı əldə edib. Azərbaycanın hər bir vətəndaşı ölkəmizin belə bir şans qazanmasından qürur hissi keçirməlidir. Ən azından Azərbaycanı daha yaxşı tanıyıblar, Avropanın sadə vətəndaşlarında, dünyanın bütün guşələrində yaşayan insanlarda Azərbaycana daha isti münasibət formalaşıb. İndi ölkəmizi daha yaxından tanıyırlar. Bu, bütövlükdə dövlətimizin, cəmiyyətimizin, hər birimizin uğuru sayılmalıdır.

Ola bilər ki, Azərbaycanın belə bir qələbə qazanması kimlərdəsə qısqanclıq yaratsın. Qələbəmiz ayrı-ayrı dövlətlərdə, bizi istəməyən qonşularda, bizi istəməyən və qonşu olmayan ölkələrdə müxtəlif hisslər yarada bilər. Avropanın belə mötəbər tədbirində Azərbaycan cəmi dörd dəfə iştirak edib və hər dəfə uğur qazanıb. Dördüncü dəfə isə birinci yerə çıxıb. Çox az sayda, bəlkə də barmaqla sayılacaq qədər ölkə belə yüksək uğur əldə edib. Bu, Azərbaycana xoş münasibəti, obyektiv yanaşması olmayan bəzi insanlarda, qurumlarda qısqanclıq yarada bilər.

Digər tərəfdən isə Azərbaycanın Avropa məkanında, bütövlükdə beynəlxalq aləmdə belə mədəni, inkişaf etmiş bir dövlət kimi tanınmasından narahatlıq keçirən qruplar, təşkilatlar ola bilər. Bunu istisna etmək olmaz.

Azərbaycan yalnız mədəni cəhətdən deyil, həm də iqtisadi baxımdan sürətlə inkişaf edir. Ölkəmizdə müəyyən maraqları olan qurumlar da, təbii ki, Azərbaycanın mövqelərinin möhkəmlənməsini bəzi hallarda həzm edə bilmirlər. Bu da reallıqlardan biridir. Ona görə də bu fürsətdən istifadə edib Azərbaycan əleyhinə kampaniya aparmaq istəyən qruplar, qüvvələr meydana çıxıb. Bunlar real olaraq var və bu fürsətdən faydalanmaq istəyirlər. Bu gün Azərbaycan haqda ölkəmizin həqiqətlərini əks etdirməyən, əksinə, böhtan və şərə əsaslanan yazıların yazılması, anti-Azərbaycan təbliğatının aparılması həm də bunlarla əlaqədardır.

Çox təəssüf hissi ilə qeyd edirəm ki, vacib bir mədəni kampaniyaya kimlərsə siyasi don geydirir, onu siyasiləşdirməyə çalışır və bundan Azərbaycana qarşı bir təsir vasitəsi kimi faydalanmaq istəyirlər. Amma məni, hər bir vətəndaşı bundan da artıq narahat edən amil var. Bu da ondan ibarətdir ki, Azərbaycana qarşı təbliğat kampaniyası aparan bəzi kənar dairələrin hərəkətlərinə ölkənin daxilindən də bəzi siyasi partiyalar, onların təmsilçiləri dəstək verirlər. Təsəvvür edin ki, eyni motivlər əsasında Azərbaycanda keçiriləcək mahnı müsabiqəsi ilə bağlı tənqidlər, böhtanlar və qarayaxmalar ortaya qoyulur. Çox qəribədir ki, burada ciddi sinxronluq müşahidə olunur. Azərbaycanın daxilində bu kampaniyanı aparan bəzi siyasi partiyaların, QHT-lərin təbliğatları, hərəkətləri ilə xaricdə bu məsələdə Azərbaycana böhtan yağdıran qüvvələrin hərəkətlərində, kampaniyalarında çox ciddi oxşarlıq, sinxronluq var. Sanki bunların hamısı bir mərkəzdən idarə olunur. Hesab edirəm ki, bu, xoşagəlməz haldır. Xaricdə olan qüvvələrin Azərbaycana qarşı təbliğat aparması haqsızlıq, ədalətsizlikdir. Amma Azərbaycanda olan bəzi insanların, qrupların, təşkilatlatın ölkəmizə qarşı aparılan və müxtəlif çirkli məqsədlərə hesablanmış kampaniyalarda iştirak etmələri bir vətəndaş olaraq bizi ciddi narahat edir. Bunu təəssüf hissi ilə qeyd edirəm.

- İctimai Palata elan edib ki, 2 aprel məhbusları, digər siyasi dustaqlar azadlığa buraxılmasa, “Eurovision 2012” yarışması keçirilən dövrdə aksiyalar təşkil edəcək. “Eurovision” dövründə beş-on nəfər bir yerə yığılıb aksiya keçirsə, hətta polis buna imkan verməsə də, Bakıya gələn əksər mətbuat orqanının diqqəti buna yönələcək, hamı aksiyanı çəkib göstərəcək. Bunun baş verməməsi və gərginliyi azaltmaq üçün hakimiyyətin siyasi məhbusları azadlığa buraxması mümkündürmü?

- Azərbaycanda siyasi məhbus yoxdur.

- Dağlıq Qarabağ münaqişəsinin həllinə vasitəçilik edən ATƏT-in Minsk qrupunun üzvü Fransada prezident seçkisi yaxınlaşır. Nikola Sarkozinin prezidentliyi dövründə Minsk qrupunun fəaliyətini necə qiymətləndirirsiz? Fransada hakimiyyət dəyişikliyi gözləyirsinizmi?

- Mən Fransanın Minsk qrupunun həmsədri kimi fəaliyyətini nəticədən çıxış edərək qiymətləndirmək istərdim. Fransanın da təmsil olunduğu Minsk qrupunun həmsədrləri Dağlıq Qarabağ münaqişəsinin nizamlanmasında qəti bir hərəkət edib nəticə əldə edə bilməyiblərsə, onda bütövlükdə həmsədrlərin fəaliyyətindən razı qalmaq mümkün deyil. Eyni zamanda bu, həmsədrlərin hər bir üzvünə aiddir. Yalnız Azərbaycana qarşı törədilən ədalətsizliyin aradan qaldırılması, təcavüzə son qoyulması, işğal olunan torpaqların azad edilməsi bizi həmsədr dövlətlərdən, bütövlükdə Minsk qrupundan, beynəlxalq ictimaiyyətdən razı sala bilər. Bunların həyata keçirilməsi Azərbaycan və Ermənistan arasında vasitəçilk edən Minsk qrupunun üzvlərinə və həmsədlərinə həvalə olunub. Amma heç biri edilməyib. Deməli, Azərbaycan vətəndaşlarının bütövlükdə Minsk qrupundan, o cümlədən Fransanın fəaliyyətindən razı qalması üçün əsas yoxdur. Əgər razı deyillərsə, deməli, narazıdırlar. Real həqiqət bundan ibarətdir. Azərbaycan vətəndaşlarının əksəriyyəti belə düşünür. Konkret yanaşmaya gəlincə, Fransa bu müddət ərzində münaqişə tərəflərindən biri olan Ermənistanı açıq şəkildə dəstəklədiyini nümayiş etdirib. Fransa rəhbərliyi bunu heç gizlətməyib də, açıq formada, nümayişkaranə şəkildə Ermənistanı dəstəklədiyini ortaya qoyub. Təbii ki, belə olan halda Azərbaycan vətəndaşlarının həmsədrlərdən biri olan Fransaya münasibəti daha da qara rənglərlə əhatə olunur. Həqiqətən bu belədir. Bütün bunlarda Fransa prezidenti Nikola Sarkozinin nə qədər günahkar olmasına gəlincə, onun xüsusi təşəbbüskarlıq göstərdiyini ayrıca qeyd etmək lazımdır. Ermənistanın birmənalı şəkildə müdafiə olunması, Ermənistana müxtəlif formalarda dəstək verilməsi məsələsində Sarkozi xüsusi canfəşanlıq göstərib. Bu da Azərbaycan vətəndaşlarının diqqətindən yayınmayıb, mən bunu ayrıca qeyd etmək istəyirəm. Nəticə isə bundan ibarətdir ki, Azərbaycan vətəndaşları bizim ölkəyə qarşı belə qeyri-obyektiv və ədalətsiz mövqe tutan bir insanı dəstəkləyə bilməz. Bütün bunlara görə yəqin ki, Azərbaycan vətəndaşlarının mütləq əksəriyyətinin istəyi, mövqeyi Fransadakı seçkidə bu dövlətin siyasətinin daha ədalətli olmasına gətirib çıxaracaq dəyişikliyin baş verməsidir.

Yeni Azərbaycan.- 2012.- 12 aprel.- S.2.