Ümummilli lider Heydər Əliyev müstəqil Azərbaycan dövlətinin qurucusudur

Yasamal rayonunda Ulu öndər Heydər Əliyevin anadan olmasının 89-cu ildönümünə həsr edilmiş silsilə tədbirlər keçirilir

Müasir Azərbaycan tarixinin 30 ildən artıq bir dövrünü əhatə edən mərhələ, ictimai-siyasi, iqtisadi və mədəni həyatımızın bütün sahələrindəki dirçəliş və quruculuq illəri Ulu öndər Heydər Əliyevin adı ilə bağlıdır. Azərbaycanda dövlətçilik ənənələrinin XX əsrin sonlarında bərpa edilib zənginləşdirilməsi, dövlət müstəqilliyinin möhkəmləndirilməsi, onun əbədi, dönməz xarakter alması Ulu öndərin misilsiz fəaliyyəti sayəsində mümkün olub. Heydər Əliyev öz müdrikliyi, siyasi uzaqgörənliyi, qətiyyəti və əzmkarlığı ilə zəmanəmizin görkəmli siyasi xadimi kimi tanınıb, Azərbaycan xalqının Ümummilli lideri adını qazanıb.

Bunu dünən Ulu öndər Heydər Əliyevin anadan olmasının 89-cu ildönümü münasibəti ilə Yasamal rayon Heydər Əliyev Mərkəzində keçirilən tədbirdə Mərkəzin direktoru Sədaqət Seyidzadə deyib. Tədbir iştirakçıları öncə Ulu öndərin Mərkəzdəki büstü önünə gül qoyub, dahi rəhbərin xatirəsini ehtiramla anıblar. Tədbir iştirakçıları qarşısında çıxış edən S.Seyidzadə bildirib ki, Ulu öndər Heydər Əliyevin anadan olmasının 89-cu ildönümü ilə əlaqədar Mərkəz tərəfindən silsilə tədbirlər keçirilir. Yasamal rayon İcra Hakimiyyəti ilə birgə keçirilən bu tədbirlərə aprelin 18-dən start verilib: “18 aprel-10 may tarixləri arasındakı dövrü əhatə edən “Tədbirlər planı” çərçivəsində bu günə kimi 10-dan çox tədbir keçirilib. Belə ki, Azərbaycan Dövlət Pedaqoji Kollecinin tələbə və müəllimləri, Yasamal rayonunun 173, 175, 176, 225 saylı orta məktəblərinin, Zərifə Əliyeva adına liseyin, Avropa liseyinin, Fizika-riyaziyyat-informatika təmayüllü liseyin və İncəsənət gimnaziyasının şagirdləri Mərkəzə ekskursiya ediblər. Ulu öndərin həyatını, zəngin dövlətçilik irsini nümayiş etdirən “Muzey”, “Heydər Əliyev Dövlətçilik İrsi və Salnamə”, “Kitabxana və İnformasiya Texnologiyaları” bölmələri ilə tanış olan gənc nəslin nümayəndələri, eyni zamanda, müvafiq olaraq Mərkəzin əməkdaşları tərəfindən hazırlanmış “Heydər Əliyevin xarici siyasət kursu”, “Heydər Əliyev və Azərbaycan mədəniyyəti”, “Heydər Əliyev və Azərbaycan təhsili” “Heydər Əliyev Azərbaycan mədəniyyətinin hamisidir”, “Heydər Əliyev və Azərbaycan dili”, “Heydər Əliyev və neft strategiyamız”, “Heydər Əliyev və Azərbaycan diasporu” və s. mövzularda məruzələri dinləyiblər”.

Direktorun sözlərinə görə, mayın 10-dək rayon ərazisindəki ali məktəb və kolleclərin tələbələri, həmçinin, digər orta məktəblərin şagirdləri Mərkəzə ekskursiya edəcək, Ulu öndərin həyat və fəaliyyətinə həsr edilmiş müxtəlif tədbirlər keçiriləcək: “Mayın 4-də isə “Heydər Əliyev müstəqil Azərbaycan dövlətinin qurucusudur” mövzusunda keçirilmiş inşa müsabiqəsinin qaliblərinin Fəxri fərman və mükafatlarla təltif olunması mərasimi keçiriləcək. Bu gün keçirilən və “Heydər Əliyev müstəqil Azərbaycan dövlətinin qurucusudur” mövzusuna həsr edilən açıq dərs də “Tədbirlər planı”na daxil edilib. Məlumat üçün bildirim ki, açıq dərsdə Yasamal rayon Arif Huseynzadə adına 20 nömrəli orta məktəbin şagirdləri Ulu öndərin həyat və fəaliyyətinin bütün dövrlərinə aid təqdimat və məruzələrlə çıxış edəcəklər”.

Ümummilli lider Heydər Əliyev Azərbaycan tarixində misilsiz izlər qoyub

Sonra söz məktəblilərə verilib. Ümumilikdə, beş qrup üzrə ixtisaslaşan məktəbli-məruzəçilər Ulu öndərin fəaliyyətinin müxtəlif sahələrini əhatə edən məlumatları tədbir iştirakçılarının diqqətinə çatdırıblar. Xüsusilə qeyd olunub ki, Ümummilli lider Heydər Əliyev Azərbaycan tarixində misilsiz izlər qoymuş dövlət xadimidir. Məhz Onun uzaqgörən, cəsarətli, milli maraqlarımıza xidmət edən siyasəti nəticəsində bu gün biz azad, müstəqil, qüdrətli bir dövlətdə yaşayırıq.

Məktəblilərin çıxışlarından sonra söz qonaqlara verilib. Şagirdlər qarşısında çıxış edən Yasamal rayon İcra Hakimiyyətinin Təhsil, səhiyyə və mədəniyyət şöbəsinin müdiri Rafiq Həmidov “müstəqil Azərbaycan dövlətinin qurucusu kimi milli dövlətçiliyimizin ideya əsasını məhz Heydər Əliyev yaradıb. Bütün mənalı həyatını öz xalqına bəxş etmiş Ulu öndər Heydər Əliyevin siyasi və dövlət xadimi kimi zəngin fəaliyyəti Azərbaycan xalqının tarixində dərin iz buraxıb, əsl dövlət idarəçiliyi məktəbinə çevrilib. Azərbaycan xalqının hələ neçə-neçə nəsli bu böyük məktəbdən, Heydər Əliyevin zəngin siyasi irsindən ölkəmizin inkişafı, xalqımızın rifahı naminə faydalanacaq” deyib.

Çıxış edən Yasamal rayon İcra Hakimiyyətinin İctimai-siyasi şöbəsinin müdiri Vaqif Məmmədov isə bildirib ki, Ulu öndərin quruculuq siyasətinin uğurla davam etdirən Prezident İlham Əliyevin xüsusi diqqət və qayğısı sayəsində son illər rayon ərazisində bir sıra yeni təhsil, səhiyyə, mədəniyyət və digər sahələri əhatə edən obyektlər, istirahət mərkəzləri, yeni məhəllə, park və meydanlar istifadəyə verilib: “Hazırda da bu istiqamətdə qızğın iş gedir. Belə ki, Ulu öndər Heydər Əliyevin anadan olmasının 89-cu ildönümü ərəfəsində Yasamal rayonunda Mətbuat prospekti 29, Şərifzadə küçəsi 75a, Talıblı küçəsi 32 və H.Cavid pr. 577-ci məhəllə-91 saylı evin qarşısında yeni abad məhəllələrin açılışı nəzərdə tutulub. Həmin məhəllələrdə yeni müasir işıqlandırma sistemləri, uşaqlar üçün idman və əyləncə elementləri, yeni oturacaq və günlüklər quraşdırılıb, yaşıllaşdırma işi və bəzək ağacları əkilib, həmçinin, həyətlərə asfalt, tamet və üzlük döşənib. Eyni zamanda, mayın 2-də rayon ərazisində Gül bayramı keçiriləcək”.

Yasamal rayon Heydər Əliyev Mərkəzi öz məhsuldar fəaliyyəti ilə örnək təşkil edir

Çıxış edən 20 nömrəli məktəbin direktoru Sabir Məmişov isə bu cür tədbirlərin təşkilinə görə Yasamal rayon İcra Hakimiyyətinə və Heydər Əliyev Mərkəzinə təşəkkürünü bildirib. Onun sözlərinə görə, Yasamal rayon Heydər Əliyev Mərkəzi öz məhsuldar fəaliyyəti ilə örnək təşkil edir.

Ümumiyyətlə, qeyd etmək yerinə düşər ki, əvvəllər Heydər Əliyev Məktəb-Muzeyi adlanan bu Mərkəz 2008-ci il dekabrın 20-də istifadəyə verilib. Həmin vaxt açılış mərasimində iştirak edən Prezident İlham Əliyevə məlumat verilib ki, Ulu öndər Heydər Əliyevin xatirəsinin əbədiləşdirilməsi baxımından böyük əhəmiyyəti olan Məktəb-Muzeydə Ümummilli liderin həyat və fəaliyyətinin müxtəlif dövrlərini əks etdirən fotoşəkillər və eksponatlar nümayiş etdirilir. Bunlar “Mənim həyat amalım bütün varlığım qədər sevdiyim Azərbaycan xalqına, dövlətçiliyimizə, ölkəmizin iqtisadi, siyasi və mənəvi inkişafına xidmət olub” deyən Ulu öndərin zəngin və çoxcəhətli fəaliyyəti, ümumən, Azərbaycan tarixinin bütöv bir qərinəsi barədə dolğun təsəvvür yaradır.

2012-ci ilin fevral ayının 1-dən Məktəb-Muzeyin Heydər Əliyev Mərkəzi adlandığını deyən direktor S.Seyidzadə əlavə edib ki, dünya tarixinin ən qüdrətli dövlət və siyasət xadimləri, müdrik və dahi şəxsiyyətləri sırasında özünəməxsus yer tutmuş Ümummilli lider Heydər Əliyevin zəngin irsi müstəqil Azərbaycan Respublikasının inkişafı və tərəqqisi yolunda ən etibarlı özül olmaqla bərabər, həm bugünkü, həm də gələcək nəsillər üçün böyük qürur və iftixar mənbəyi, əvəzsiz sərvətdir: “Bu irsin öyrənilməsi və təbliğ edilməsi hər bir Azərbaycan vətəndaşının borcu və şərəf işidir. Təbii ki, hazırda respublikanın müxtəlif guşələrində fəaliyyət göstərən və Ulu öndərin adını daşıyan mərkəzlərin, o cümlədən, Yasamal rayon Heydər Əliyev Mərkəzinin işinin əsas qayəsini bu irsin təbliği, həmçinin, gələcək nəsillərə çatdırılması təşkil edir. Gənc nəsil bilməlidir ki, bütün həyatını və siyasi fəaliyyətini, ömrünü, zəngin mədəni irsi və şərəfli tarixi ilə fəxr etdiyi xalqının və Vətəninin tərəqqisinə həsr etmiş Ulu öndər Heydər Əliyevin rəhbərliyi ilə Azərbaycan müstəqil bir dövlət kimi zamanın ağır və amansız sınaqlarından qalibiyyətlə çıxaraq müqayisəolunmaz uğurlara imza atıb. Bu böyük şəxsiyyət heç kəsə müyəssər olmayan bir iş görüb: Azərbaycan dövlətinin bundan sonra yüz illərlə gedəcəyi inkişaf yolunu müəyyən edib. Bu gün siyasi, iqtisadi sahələrdə qazandığımız möhtəşəm uğurların müəllifi məhz Ümummilli lider Heydər Əliyevdir”.

Direktor deyib ki, Mədəniyyət və Turizm Nazirliyinin tabeliyində fəaliyyət göstərən Mərkəz 3 bölmədən ibarətdir: “Muzey” bölməsi Ümummilli liderin bütün ömür yolunu və fəaliyyətini əks etdirən fotostendlər, eksponatlarla zəngindir. “Kitabxana və informasiya texnologiyaları” bölməsindəki kitabxanada yeniyetmə və gənclər Ulu öndərin siyasi irsini, fəaliyyətini, azərbaycançılıq ideyasını kitabxana fondunda olan və Ümummilli liderə həsr edilmiş kitab, jurnal, broşur, həmçinin, digər çap materiallarından öyrənərək yararlanırlar. Bundan əlavə, kitabxanada dahi şəxsiyyətə həsr olunmuş yeni kitabların təqdimetmə mərasimləri, oxucu konfransları, kitab sərgiləri, görüşlər təşkil olunur. Eyni zamanda, yeniyetmə və gənclərimiz informasiya-kommunikasiya texnologiyalarından istifadə etməklə internet vasitəsilə müvafiq saytlardan dahi şəxsiyyət Heydər Əliyevin siyasi irsi, həyat və fəaliyyəti haqqında əlavə məlumatları öyrənmək, müxtəlif kitabxanalarda olan kitabların elektron variantlarından yararlanmaq imkanı əldə edirlər. “Heydər Əliyev Dövlətçilik İrsi və Salnamə” bölməsində rayonun ali, orta ixtisas, ümumtəhsil məktəblərində təhsil alan yeniyetmə və gənclərin iştirakı ilə Ümummilli liderin fəaliyyətinə, irsinə, eyni zamanda, Azərbaycan Respublikasının tarixi günlərinə həsr olunan, eləcə də, dövlət quruculuğuna, müasir inkişaf istiqamətlərinə dair, həmçinin, ölkədə, regionda və beynəlxalq aləmdə aktual olan müxtəlif mövzularda mühazirələr təşkil edilir, dəyirmi masa, disput, elmi, praktiki və nəzəri konfranslar, seminarlar keçirilir. Mərkəzdə, eyni zamanda, vaxtaşırı olaraq Heydər Əliyevin irsinə, həyat və fəaliyyətinə aid sənədli kinofilmlər nümayiş etdirilir, sərgilər, müsabiqələr və yarışmalar təşkil edilir”.

Gənc nəslin hərtərəfli inkişafı diqqət mərkəzindədir

“Ulu öndər Heydər Əliyev müstəqil Azərbaycanın qurucusudur və xalqımız, ölkəmiz var olduqca Onun ideyaları da yaşayacaq”, - deyən S.Seyidzadənin sözlərinə görə, bunu Mərkəzə olan maraq da təsdiqləyir: “O gün olmaz ki, müxtəlif kateqoriyalardan olan insanlar bu Mərkəzə gəlməsinlər. Xüsusilə də, gənc nəsil və məktəblilər mütəmadi olaraq Mərkəzimizə gəlir, Ulu öndərin zəngin irsini, həyatını, bütün dövrlərdəki fəaliyyətini nümayiş etdirən foto və sənədlərlə tanış olur, bununla da dahi şəxsiyyətin dövlətçilik fəlsəfəsi barədə bilgilər əldə edirlər”.

S.Seyidzadə onu da bildirib ki, Yasamal rayon İcra Hakimiyyətinin rəhbərliyi Heydər Əliyev Mərkəzinə xüsusi diqqət və qayğı ilə yanaşır: “Biz bu diqqəti gündəlik fəaliyyətimizdə, həmçinin, Mərkəzdə keçirilən müxtəlif mövzulu tədbirlərin təşkili prosesində mütəmadi olaraq hiss edirik. Əksər tədbirlərimizi məhz İcra Hakimiyyəti ilə birgə keçiririk”.

Yeri gəlmişkən, Mərkəz şagirdlərə Ulu öndərin irsini çatdırmaqla öz işini bitmiş hesab etmir. Ümummilli liderimizin gənclərimizin ölkənin gələcək idarəçiləri kimi yetişməsinə dair tövsiyələrini əldə rəhbər tutan Mərkəzin rəhbərliyi işini həm də bu istiqamətdə qurub: “Biz mütəmadi olaraq rayon ərazisindəki müxtəlif məktəblərin iştirakı ilə açıq dərslər keçiririk. Bu açıq dərslərdə məktəblərdən birinin şagirdləri müəyyən olunmuş mövzu üzrə təqdimatla çıxış edir, öz rəy və təkliflərini səsləndirirlər. Eyni zamanda, digər məktəblərin təmsilçiləri onlara qiymət verirlər. Bu da şagirdlərimizin, gələcəyin idarəçiləri olan gənclərin Ulu öndərin irsini daha dərindən mənimsəmələrinə kömək etməklə yanaşı, onların müstəqil, qurucu və cəsarətli, həmçinin, öz gücünə, bacarığına inamlı bir fərd kim yetişməsinə yardımçı olur”.

S.Seyidzadə son olaraq onu da vurğulayıb ki, ölkədə həyata keçirilən işlər, əldə edilən nailiyyətlər Ulu öndər Heydər Əliyevin əsasını qoyduğu quruculuq siyasətinin Prezident İlham Əliyev tərəfindən yeni keyfiyyətdə davam etdirilməsinin nəticəsidir: “Məhz dövlət başçısının xüsusi diqqət və qayğısının nəticəsidir ki, ölkəmizin bütün regionları yeni inkişaf və tərəqqi mərhələsinə qədəm qoyub. Təbii ki, bu inkişafdan Yasamal rayonuna da pay düşüb. Dövlət başçısının tapşırıq və göstərişlərini əsas tutan rayon rəhbərliyi Yasamal ərazisində quruculuq-abadlıq işlərinin davamlı olması üçün bütün gücü ilə çalışır”.

Nadir AZƏRİ

Yeni Azərbaycan.- 2012.- 27 aprel.- S.5.