Nəsimi rayonu: quruculuq və inkişafın ünvanı

Dövlət Proqramının uğurla icrası nəticəsində Nəsimi rayonu günü-gündən abadlaşır, insanların rifahı yüksəlir

2012-ci il yanvarın 16-da Azərbaycan Respublikasının Prezidenti İlham Əliyevin Sədrliyi ilə keçirilən Nazirlər Kabinetinin 2011-ci ilin sosial-iqtisadi inkişafının yekunlarına və 2012-ci ildə qarşıda duran vəzifələrə həsr olunmuş iclasında dövlət başçısının giriş və yekun nitqlərində respublikamızdakı iqtisadi və siyasi vəziyyət dərindən təhlil edilib, əldə edilən uğurlar qiymətləndirilib, qarşıda duran vəzifələr və onların həlli yolları dəqiq müəyyən olunub. Cənab Prezidentin vurğuladığı kimi, ötən il qarşıya qoyulan bütün iqtisadi və sosial vəzifələr öz həllini tapıb, ölkəmizin uğurlu inkişafı davam edib. Ümumilikdə, 2011-ci ilin yekunlarına nəzər saldıqda inamla deyə bilərik ki, Ulu öndərimiz Heydər Əliyev tərəfindən əsası qoyulan sürətli inkişaf, nəhəng quruculuq işləri Azərbaycan Respublikasının Prezidenti İlham Əliyevin rəhbərliyi altında uğurla davam etdirilir, ölkəmizin iqtisadi qüdrəti, siyasi çəkisi və beynəlxalq nüfuzu günbəgün artır, hüquqi, demokratik proseslər daha da inkişaf edir. Sevindirici haldır ki, bu uğurların qazanılmasında Nəsimi rayonunun da öz yeri, öz payı vardır.

PAYTAXTIN MƏRKƏZİ HİSSƏSİ ABADLAŞIR VƏ GÖZƏLLƏŞİR...

2011-ci ildə respublikamızın bütün rayonlarında olduğu kimi, Nəsimi rayonunda da genişmiqyaslı abadlıq, yenidənqurma və yaşıllaşdırma işləri aparılıb. Ötən il rayonda aparılan təmir və yenidənqurma işlərinin gedişi ilə tanış olmaq, başa çatdırılan tikintilərin açılış mərasimlərində iştirak etmək üçün Azərbaycan Respublikasının Prezidenti İlham Əliyev 9 dəfə Nəsimi rayonunda olub, eyni zamanda, rayon ictimaiyyətinin nümayəndələri, ziyalılarla görüşüb, öz dəyərli tövsiyələrini verib.

Qeyd etmək lazımdır ki, hesabat ilində istifadəyə verilən tikililər, salınan park və xiyabanlar paytaxtın mərkəzinə, ümumilikdə isə doğma Bakımızın simasına xüsusi yaraşıq verməkdədir və paytaxt sakinlərinin zövqünü oxşayır.

Azərbaycan Prezidentinin Sərəncamı ilə təsdiq olunmuş “Azərbaycan kinosunun 2008-2018-ci illər üzrə inkişafına dair Dövlət Proqramı” çərçivəsində “Nizami” kinoteatırının binası əsaslı təmir və yenidənqurmadan sonra Azərbaycan Respublikasının Prezidenti İlham Əliyev və xanımı Mehriban Əliyevanın iştirakı ilə açılıb, kinoteatr tamaşaçılar üçün yüksək rahatlığın təmin olunduğu mədəniyyət ocağına çevrilib. Hesabat ilində rayon ərazisində yerləşən ölkə və yerli əhəmiyyətli tarixi və memarlıq abidələri, bağ-park, monumental və xatirə abidələrinin qorunması və təbliği də diqqət mərkəzində olub.

2011-ci ildə dağ yəhudiləri dini icması üçün yeni sinaqoqun tikintisi başa çatdırılaraq istifadəyə verilib, “Əjdərbəy” məscidinin əsaslı təmir və yenidənqurmadan sonra açılışı olub. Bundan əlavə, S.Vurğun küçəsindəki “Zabitlər” və Bülbül prospektindəki parklarda aparılan yenidənqurma və abadlıq işləri başa çatdırılaraq əhalinin istifadəsinə verilib. Görülən işlərin nəticəsində hər iki parkda sakinlərin istirahəti üçün hər cür şərait yaradılıb. Həmçinin, “Bakıelektrikşəbəkə” ASC-nin inzibati binasının və Mərkəzi Dispetçer Xidmətinin, 28 May küçəsi ilə Bülbül prospektinin kəsişməsində yerləşən yeraltı keçidin tikintiləri başa çatdırılıb.

Eyni zamanda, H.Seyidzadə, 20 Yanvar, Cavadxan, S.Vurğun küçələrində, Vaqif, Azadlıq, Tbilisi prospektlərində, rayonun mikrorayon ərazisindəki məhəllələrdə, mövcud park və bağlarda ümumilikdə 10.000 -ə yaxın ağac və gül kolları əkilib, rayon ərazisində yeni-yeni yaşıllıq zolaqları salınıb. Rayon İcra Hakimiyyəti tərəfindən 20 həyət müəyyənləşdirilərək həmin həyətlərdə təmir-abadlıq və yenidənqurma işləri aparılıb, S.Vurğun, R.Behbudov, A.Bakıxanov, H.Ələsgərov, Mərdanov Qardaşları küçələrində, Vaqif və Azadlıq prospektlərində səkilərə tamet plitələr döşənməsi işləri davam etdirilib, ayrı-ayrı ünvanlarda bardürlər dəyişdirilib, yol kənarlarında ağaclar və dekorativ kollar əkilib.

D.Əliyeva küçəsi 241, Cavadxan küçəsi 28 və A.Əliyev küçəsi 9 ünvanlarında abadlıq və quruculuq işləri aparılıb, məhəllədaxili yolların və meydançaların asfalt örtüyü dəyişdirilib, həmin ünvanlarda yeni oturacaqlar qoyulub, uşaq oyun meydançaları quraşdırılıb, yeni yaşıllıq zolaqları salınıb.

Hal-hazırda 2-ci mikrorayonda yerləşən Heydər Parkında, Cavadxan küçəsində (“Moskva” ticarət mərkəzinin qarşısındakı ərazidə) abadlıq və yenidənqurma işləri davam etdirilir, Bakıxanov küçəsindəki və Koroğlunun abidəsi qoyulan parklarda son tamamlanma işləri aparılır.

Bundan əlavə, Nəsimi rayon İcra Hakimiyyətinin Bakıxanov küçəsi 643-cü məhəllədə inşa olunan yeni inzibati binası yaxın günlərdə istifadəyə veriləcək.

4-cü mikrorayon ərazisində 20 Yanvar küçəsi 21 b saylı binanın qarşısında müasir tələblərə cavab verən yeni stadionun tikintisi davam etdirilir və 2012-ci ilin “İdman ili” elan olunması ilə əlaqədar olaraq, tikili yaxın aylarda rayon gənclərinin istifadəsinə veriləcək.

Hesabat ilində, həmçinin, Füzuli küçəsində “Qış parkı”nın salınması ilə əlaqədar ötən ildən başlanılan söküntü işlərinə yaxından köməklik göstərilib, Y.Səfərov və Ə.Quliyev küçələrinin kəsişməsində yeni parkın salınması məqsədilə əhalinin köçürülməsi və digər hazırlıq işləri başa çatdırılıb.

Yuxarıda sadalananlardan əlavə, ötən ildə Azərbaycan Dövlət Neft Akademiyasının əsas binasına Ulu öndər Heydər Əliyevin barelyefi vurulub, ətraf ərazidə abadlıq və yenidənqurma işləri aparılıb. Həmçinin, cənab Prezident İlham Əliyevin tapşırığı ilə Dövlət Neft Şirkəti tərəfindən Azadlıq pr. 25 saylı bina təmir olunub, Nizami küçəsi 111, 118, Azadlıq pr. 18, 80, 89, 91, 95, 97, Vaqif pr. 3 və 5, Bakıxanov küçəsi 31 və S.Rüstəm küçəsi 60/44 saylı binaların fasadlarında isə əsaslı təmir işləri aparılır.

Hesabat dövründə S.Rüstəm küçəsi 55 saylı evin fasadına 4000 m2 aqlay daşı vurulub, 3500 m2 yeni dam örtüyü quraşdırılıb, həmçinin, Bakıxanov küçəsi 23 və 25 saylı binaların fasadlarında təmir-bərpa işləri başa çatdırılıb. İl ərzində rayonun 15 ünvanına bütövlükdə 140045 m2 asfalt vurulub.

ÖTƏN İL RAYONDA 2034 YENİ İŞ YERİ YARADILIB

Azərbaycan Respublikası Prezidentinin 14 aprel 2009-cu il tarixli 80 nömrəli Fərmanı ilə təsdiq edilmiş “Azərbaycan Respublikası regionlarının 2009-2013-cü illərdə sosial-iqtisadi inkişaf Dövlət Proqramı”na uyğun olaraq ötən il ərzində Nəsimi rayonunda 2034 yeni iş yeri açılıb. Bunlardan 101-i yeni yaradılan, 206-sı mövcud müəssisə və təşkilatlar, 16-sı fəaliyyətini bərpa etmiş müəssisə və təşkilatlar, 1711-i isə fiziki şəxslər üzrə olub. 2011-ci ildə rayonda orta aylıq əməkhaqqı ötən illə müqayisədə 8 faiz artaraq 402,1 manat təşkil edib.

Ötən ildə rayonda ümumi məhsul buraxılışının həcmi 1 milyard 132 milyon 228,8 min manat olub ki, bu da 2010-cu ilin müvafiq dövrü ilə müqayisədə 24,8 faiz çoxdur. Hesabat ilində, istehsal olunan sənaye məhsulunun həcmi 4,1 dəfə artaraq, 341 miyon 224,7 min manat, tikinti- quraşdırma işlərinin həcmi isə 8 faiz artaraq 340 milyon 309,2 min manat təşkil edib. Nəqliyyat müəssisələri tərəfindən görülmüş iş və xidmətlərin həcmi 319 milyon 491,1 min manat, rabitə müəssisələri tərəfindən görülmüş iş və xidmətlərin həcmi 49,5 faiz artaraq 25 milyon 203,8 min manata çatıb. Hesabat ilində rayon üzrə pərakəndə əmtəə dövriyyəsi 706 milyon 261,7 min manat olub ki, bu da əvvəlki illə müqayisədə 1,4 faiz artım deməkdir. Əhaliyə göstərilən pullu xidmətlərin həcmi isə 12 faiz artaraq 681 milyon 783,4 min manat olub.

Ötən il Nəsimi rayon Məşğulluq Mərkəzinə iş axtaran vətəndaş kimi müraciət etmiş 6092 nəfərdən 1193 nəfərinin daimi işlə təmin olunmasına köməklik göstərilib, 131 nəfər iş axtaran vətəndaşa işsizlik statusu verilərək, onlardan 102 nəfərə orta aylıq əməkhaqqı, 29 nəfərə isə minimum əməkhaqqı məbləğində müavinət təyin edilib.

TƏHSİLƏ DİQQƏT ARTIR

Azərbaycan Respublikasının Prezidenti cənab İlham Əliyevin Sədrliyi ilə ötən il mart ayının 9-da Bakı şəhər İcra Hakimiyyətində keçirilən şəhərətrafı qəsəbələrin sosial-iqtisadi inkişafına həsr olunan müşavirədən sonra qəbul edilən Dövlət Proqramına Nəsimi rayonu üzrə 41 bənddən ibarət tədbir salınıb, ötən müddət ərzində Dövlət Proqramında nəzərdə tutulan bütün tədbirlər həyata keçirilib. “2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı”na uyğun olaraq rayonun 6 təhsil müəssisəsində əsaslı təmir işləri aparılıb, 35 və 151 saylı tam orta məktəblərdə müvafiq olaraq 250 və 160 yerlik əlavə korpuslar tikilib, 4 körpələr evi-uşaq bağçasında əsaslı təmir işləri aparılıb. 76 saylı körpələr evi-uşaq bağçasında təmir işləri başa çatdırılaraq istifadəyə verilib, 164 saylı tam orta məktəbdə isə işlər başa çatmaq üzrədir. Heydər Əliyev Fondunun prezidenti, UNESCO-nun və İSESCO-nun xoşməramlı səfiri, millət vəkili Mehriban xanım Əliyevanın təşəbbüsü ilə 2011-2012-ci tədris ili ərəfəsində bütün birinci sinif şagirdlərinə məktəbli ləvazimatları hədiyyə edilib, il ərzində rayonda fəaliyyət göstərən yardımçı məktəblərə müntəzəm diqqət və qayğı göstərilib. Qeyd etmək yerinə düşər ki, hesabat ilində rayonda 29 tam orta məktəb, 2 xüsusi məktəb, Heydər Əliyev adına müasir Təhsil Kompleksi, Bakı Slavyan Universitetinin nəzdində məktəb-lisey kompleksi, Atatürk liseyi və 7 məktəbdənkənar tərbiyə müəssisəsi, 47 körpələr evi-uşaq bağçası fəaliyyət göstərib. 2010-2011-ci tədris ilində ümumtəhsil məktəblərini 1936 şagird bitirib, onlardan 1121 nəfəri ali məktəblərə daxil olub. Abituriyentlərdən 49-u 600-dən, o cümlədən, 12-si isə 650-dən yuxarı bal toplayıb, 3 nəfəri isə Prezident təqaüdünə layiq görülüb. 650-dən yuxarı bal toplayan abituriyentlər rayon İcra Hakimiyyətində qəbul edilib, qiymətli hədiyyələrlə mükafatlandırılıb. Fərəhləndirici haldır ki, 2010-2011-ci tədris ilinin nəticələrinə görə Azərbaycan Respublikası Prezidentinin “İlin ən yaxşı ümumtəhsil məktəbi” və “İlin ən yaxşı müəllimi” mükafatlarının təsis edilməsi haqqında Sərəncamı ilə 8, 14, 42, 151 saylı orta məktəblər “İlin ən yaxşı ümumtəhsil məktəbi”, rayon müəllimlərindən 17 nəfər isə “İlin ən yaxşı müəllimi” nominasiyası üzrə müsabiqənin qalibi olub, 2 nəfər “Əməkdar müəllim” adına, 1 nəfər isə “Tərəqqi” medalına layiq görülüb.

XÜSUSİ QAYĞIYA EHTİYACI OLANLARIN SOSİAL MÜDAFİƏSİ GÜCLƏNDİRİLİR

2011-ci ildə Dövlət Sosial Müdafiə Fondunun Nəsimi rayon şöbəsində 25227 nəfər pensiyaçı və müavinət alan vətəndaşlara xidmət göstərilib ki, bunlardan 17641 nəfəri yaşa görə, 5522 nəfəri əlilliyə görə, 2064 nəfəri isə ailə başçısını itirməyə görə pensiya alan pensiyaçılardır. Rayon üzrə əmək pensiyalarının orta aylıq məbləği 174,75 manat təşkil edib. Faşizm üzərində qələbənin ildönümü münasibəti ilə “1941-1945-ci illər müharibəsi iştirakçılarına, həlak olmuş və ya sonradan vəfat etmiş döyüşçülərin dul arvadlarına, arxa cəbhədə fədakar əməyinə görə orden və medallarla təltif edilmiş şəxslərə birdəfəlik maddi yardım edilməsi barədə” Azərbaycan Respublikası Prezidentinin 2011-ci il 3 may tarixli, 148 nömrəli Sərəncamına əsasən 641 nəfərə ümumilikdə 158 min 800 manat məbləğində birdəfəlik maddi yardım ödənilib.

Hesabat dövründə Əhalinin Sosial Müdafiəsi Mərkəzi tərəfindən 4060 nəfər vətəndaşa sosial müavinət və təqaüd verilib, 17 nəfər təqaüdçü müalicə olunmaq üçün sanatoriya-kurort putyovkası ilə təmin edilib, pulsuz minik avtomobilləri almaq üçün növbəyə dayanan 22 Qarabağ müharibəsi və vətən müharibəsi əlillərinə kompensasiya ödənilib. 1912 ailənin 7699 nəfər ailə üzvünə ünvanlı dövlət sosial yardımı verilib və hər ailəyə düşən sosial yardımın orta aylıq məbləği 138,59 manat təşkil edib ki, bu da 2010-cu ilin göstəriciləri ilə müqayisədə 5,1 faiz çoxdur. 2011-ci il ərzində 16 ailə yeni mənzil sahəsi ilə təmin edilib. Onlardan 9 nəfəri Qarabağ müharibəsi əlili, 1 nəfər şəhid ailəsi, 2 nəfər Çernobıl əlili, 3 nəfər Böyük Vətən Müharibəsi əlili, 1 nəfər isə 20 Yanvar əlili olub. Qeyd etmək lazımdır ki, Nəsimi rayonu ərazisində 10872 nəfər məcburi köçkün məskunlaşıb. Rayonda məskunlaşan məcburi köçkün ailələrinin məişət və kommunal xidmətləri, məskunlaşdıqları yerlərdə rastlaşdıqları çətinliklərlə əlaqədar yazılı və şifahi müraciətləri daim rayon İcra Hakimiyyətinin diqqət mərkəzində olub.

ƏHALİ FASİLƏSİZ ELEKTRİK ENERJİSİ, İÇMƏLİ SU VƏ TƏBİİ QAZLA TƏMİN EDİLİB

2011-ci ildə istehlakçıları fasiləsiz və etibarlı enerji ilə təmin etmək məqsədilə “Bakıelektrikşəbəkə” ASC Nəsimi rayonu Enerji Təchizatı və Satışı İdarəsi tərəfindən 3 ədəd yeni Komplekt Transformator Məntəqəsi (KTM), 5 ədəd güc transformatoru quraşdırılıb, 5020 metr 6/10 kv-luq, 363 min 223 metr müxtəlif markalı 0,4 kv-luq kabel xətləri dəyişdirilib. 97, 99, 116 saylı yarımstansiyalarda transformatorlar daha güclüləri ilə əvəz edilib, 2 dövrəli kabel xətləri çəkilərək istifadəyə verilib, hal-hazırda isə 117 saylı yarımstansiyada yenidənqurma işləri aparılır.

Sərf olunan enerji haqlarının yığımı 2011-ci ildə 12,07 mln. manata çatdırılıb ki, bu da 2010-cu illə müqayisədə 7 faiz artıqdır.

Hesabat ilində təbii qazın qəbulu, paylanması və istehlakı zamanı yaranan itkilərin azaldılması, uçotun dəqiq aparılması, qaz təchizatının yaxşılaşdırılması üçün “Azəriqaz” İstehsalat Birliyi tərəfindən H.Əliyev, Cavadxan, H.Seyidzadə, A.Məhərrəmov, 20 Yanvar, S.Rüstəm, A.Səhhət, Kazımovski, A.Mustafayev, Mir Qasımov, Q.Quliyev, F.Qasımzadə, Ə.Topçubaşov, S.Vurğun küçələrində və Azadlıq prospektində mexaniki qaz sayğaclarının “Smart-kart” tipli sayğaclar ilə əvəz olunması işləri davam etdirilib.

Alatava yaşayış massivində və mikrorayonlarda ümumilikdə 9886 ədəd sayğac quraşdırılıb və müxtəlif diametrli 3269 metr qaz kəməri çəkilib.

2011-ci ildə Nəsimi rayon Su Kanal Departamenti tərəfindən əhali sektoru üzrə 38034, qeyri-əhali sektoru üzrə isə 2166 sayğac quraşdırılıb. 2010-cu illə müqayisədə əhali sektoru üzrə 5892, qeyri-əhali sektoru üzrə isə 463 ədəd artıq sayğac quraşdırılıb. İl ərzində rayon ərazisində istismar müddəti başa çatmış 5990,0 p.m magistral su kəmərləri, müxtəlif diametrə malik 582 p.m. kanalizasiya şəbəkəsi, istismara yararsız 45 ədəd quyu və 16 ədəd yağış barmaqlıq dəyişdirilib.

Hesabat ilində “Azəristiliktəchizat” ASC 1 saylı İstilik Sistemlərinin İstismarı Sahəsi tərəfindən 323 yaşayış binasından 215-i (ötən illə müqayisədə 10 yaşayış binası çoxdur) 19 ümumtəhsil tam orta məktəb, 14 körpələr evi-uşaq bağçası, 6 səhiyyə obyekti və 35 digər təyinatlı obyektlər istilik enerjisi ilə təmin olunub.

NƏSİMİ SAKİNLƏRİ TƏRƏQQİNİ VƏ İNKİŞAFI DƏSTƏKLƏYİR

Abadlq-quruculuq, sosial-iqtisadi sahədə əldə edilən inkişaf, eyni zamanda, özünü rayonun ictimai-siyasi həyatında da qabarıq şəkildə büruzə verir. Bunun nəticəsidir ki, Yeni Azərbaycan Partiyası Nəsimi rayon təşkilatının ətrafında çoxminli üzvlər birləşib. Yəni, Ümummilli lider Heydər Əliyevin əsasını qoyduğu və Prezident İlham Əliyev tərəfindən davam etdirilən uğurlu siyasi kursun rayon əhalisi tərəfindən dəstəklənməsini YAP Nəsimi rayon təşkilatının sıralarına daxil olanların sayının artması da təsdiqləyir. YAP Nəsimi rayon təşkilatının sədri, millət vəkili Məlahət İbrahimqızının sözlərinə görə, rayon əhalisi hər zaman Ulu öndər Heydər Əliyevin ideyalarına sadiqliklərini nümayiş etdiriblər: “Rayonun sakinləri bütün siyasi kampaniyalarda fəallıq nümayiş etdirərək dövlətçiliyə bağlılıqlarını dəfələrlə sübut ediblər. Biz bunu prezident və parlament seçkilərində, referendumda, eyni zamanda, bələdiyyə seçkilərində də gördük. Əminəm ki, müşahidə olunan sosial-iqtisadi tərəqqi fonunda rayon əhalisi ictimai-siyasi proseslərdə daha aktiv iştirak edəcək, gələcəkdə də dövlətimizin inkişafı naminə qərarlar verəcək”.

Səlim LOĞMANOĞLU

Yeni Azərbaycan.- 2012.- 7 fevral.- S.6.