Yeni Azərbaycan Partiyası həm Avropa, həm də Asiyada böyük nüfuza malikdir

Yeni Azərbaycan Partiyasının beynəlxalq əlaqələr şöbəsinin müdiri, Milli Məclisin deputatı Asəf Hacıyev www.yap.org.az saytına müsahibə verib:

- Asəf müəllim, Yeni Azərbaycan Partiyası (YAP) geniş beynəlxalq əlaqələrə malikdir. Bu mənada, partiyamızın 2011-ci il ərzində beynəlxalq əməkdaşlıq istiqamətindəki fəaliyyətini necə xarakterizə edərdiniz?

- Bildiyiniz kimi, Yeni Azərbaycan Partiyası ölkəmizin ən güclü siyasi qüvvəsidir. Partiyamız Azərbaycanın ictimai-siyasi həyatında aparıcı rol oynayır. Bu mənada YAP-ın fəaliyyətində beynəlxalq əlaqələr də xüsusi yer tutur. 2011-ci ildə partiyamızın bu sahədə fəaliyyəti yüksələn xətlə inkişaf edib. Xatırladım ki, ötən il YAP-ın nümayəndə heyəti Rumıniyada, Çin Xalq Respublikasında və başqa ölkələrdə səfərdə olub. Bilirsiniz ki, YAP-ın Çin Kommunist Partiyası və Rumıniyanın Liberal-Demokrat Partiyası ilə geniş əlaqələri var. Həmin səfərlər zamanı bir sıra vacib görüşlər keçirildi və partiyaların iş fəaliyyəti ilə ətraflı tanış olduq. Onu da qeyd edim ki, Rumıniyaya səfər zamanı əldə olunmuş razılıq əsasında hər iki partiyanın gəncləri arasında da əlaqələrin genişləndirilməsi istiqamətində addımlar atılıb. Bunun nəticəsi olaraq isə ötən il gənclərimiz qarşılıqlı səfərlər ediblər. Ümumiyyətlə, 2011-ci ildə digər səfərlər də olub ki, bu səfərlərin də partiyamızın beynəlxalq əlaqələrinin genişlənməsində vacib rolu var.

Ən vacib məsələlərdən biri isə YAP-ın böyük beynəlxalq tədbirlərə ev sahibliyi etməsidir. Bilirsiniz ki, ötən ilin dekabr ayında partiyamızın təşkilatçılığı ilə Bakı şəhərində “Modernləşmə siyasəti: yeni iqtisadi və sosial çağırışlar” mövzusunda beynəlxalq konfrans keçirildi. Dünyanın 30-dan çox ölkəsindən nüfuzlu siyasətçilərin iştirak etdiyi tədbirdə vacib məsələlər müzakirə olundu. Qonaqlar da çıxışlarında bildirdilər ki, qloballaşan dünyada modernləşmə siyasəti və yeni iqtisadi, sosial çağırışların müzakirəsi olduqca əhəmiyyətlidir. Məsələn, Flippinin beş dəfə spikeri olmuş Asiya Siyasi Partiyalarının Beynəlxalq Konfransının (İCAPP) Daimi Komitəsinin həmsədri Xose Venesianın, həmçinin, Avropa Xalqları Partiyasının prezidenti Uilfred Martensin konfransda iştirak və çıxış etməsi bir daha onu göstərir ki, YAP həm Avropada, həm də Asiyada böyük nüfuza malikdir.

Eyni zamanda, 2011-ci ildə YAP ilə Tacikistanın hakim Xalq Demokratik Partiyası, eləcə də, Serbiyanın və Monteneqronun hakim partiyaları arasında əməkdaşlıq haqqında anlaşma memorandumu imzalandı. Bütün bunlar partiyamızın beynəlxalq əlaqələrinin güclənməsi ilə yanaşı, onun dünya miqyasında nüfuzunun da artmasının göstəricisidir.

- YAP-ın Avropa Xalqları Partiyası (AXP) ilə əməkdaşlığının perspektivini necə görürsünüz? Bu əməkdaşlığın əhəmiyyəti nədən ibarətdir?

- Avropa Xalqları Partiyası Avropa İttifaqının qrup partiyasıdır və özündə bu qitənin nüfuzlu siyasi təşkilatlarını birləşdirir. Təşkilatın rəhbəri Uilfrid Martens Belçikanın 8 dəfə baş naziri olub. Belçikanın ağır günlərində ölkənin başında duraraq onu problemlərdən xilas edib. Avropa Xalqları Partiyasına Avropa İttifaqına üzv olan dövlətlərin sağ-mərkəz yönümlü siyasi partiyaları üzvdür. Yəni, bu təşkilat özündə şəxsləri deyil, partiyaları birləşdirir. Bu qrupa Avropanın 39 ölkəsini təmsil edən 70-dən çox partiya daxildir. YAP ilə AXP arasında çox sıx əlaqələr var. Bunu təsdiq etmək üçün deyə bilərəm ki, partiyamızın nümayəndə heyəti 2009-cu ilin dekabr ayında Bonn şəhərində AXP-nin qurultayında iştirak edib. Bundan əlavə, ötən il YAP nümayəndə heyəti Brüsselə səfər edərək AXP-nin rəhbər şəxsləri ilə səmərəli görüşlər keçirib. Eyni zamanda, partiyamızın Gənclər Birliyinin üzvləri də AXP-nin dəvəti ilə Brüsseldə səfərdə olublar. Bu hadisə həm də gənclərimiz üçün böyük məktəb idi. Hər bir səfərin kökündə isə o dayanır ki, buradan Azərbaycanın mənəvi, siyasi dəyərlərini getdiyimiz ölkəyə çatdırır və həmin ölkədən bizə lazım olan dəyərləri gətiririk. Fikir mübadiləsi apararkən həm öz siyasi həyatımızı zənginləşdirir, həm də o ölkəyə Azərbaycanın təcrübəsini apara bilirik.

Məlum olduğu kimi, Ulu öndərimiz Heydər Əliyevin qurucusu olduğu Yeni Azərbaycan Partiyası yarandığı vaxtdan bu günədək böyük inkişaf yolu keçib. Bu gün cənab İlham Əliyevin rəhbərliyi ilə partiyamız yeni-yeni uğurlara imza atır. YAP nəinki ölkəmizin, eyni zamanda, Cənubi Qafqaz bölgəsinin ən böyük siyasi qüvvəsidir. Dünyanın bir sıra nüfuzlu partiyaları ilə ikitərəfli və beynəlxalq tədbirlər çərçivəsində əməkdaşlıq edirik. Bu baxımdan, çox nüfuzlu Avropa Xalqları Partiyası ilə əlaqələr böyük əhəmiyyət kəsb edir. Bu, beynəlxalq əlaqələrin daha da genişləndirilməsi ilə yanaşı, YAP-ın fəaliyyəti haqqında da Avropaya geniş bilgilər verir. Bu fakt onu da sübut edir ki, biz Avropa dəyərlərinə sadiqik. Avropada aparıcı siyasi güc olan qurumla geniş əməkdaşlıq etməklə, biz, Avropa dəyərlərini, insan hüquqlarını, demokratik dəyərləri yüksək tutduğumuzu nümayiş etdiririk. Eyni zamanda, dünyanın aparıcı partiyalarının sıralarına qoşulmaq istiqamətində addımlar atırıq. Eləcə də, AXP partiyamızla əməkdaşlığa əhəmiyyət verir. Bu, artıq siyasi güc tərəfindən YAP-ın siyasətini bəyənmək deməkdir.

- Bəs 2012-ci il ərzində beynəlxalq əlaqələr sahəsində hansı addımların atılması gözlənilir?

- Qeyd etmək istəyirəm ki, YAP-ın beynəlxalq əlaqələri yalnız Avropa məkanı ilə məhdudlaşmır. Azərbaycan Avropa ilə Asiya arasında bir körpüdür. Ona görə də, Asiya qitəsi ilə də əməkdaşlıq məsələlərinə önəm veririk. Asiya Siyasi Partiyalarının Beynəlxalq Konfransı adlı təşkilatla fəal əməkdaşlıq edirik. Bu təşkilata Asiyanın 330-dan çox partiyası daxildir. Təşkilata onun Daimi Komitəsi rəhbərlik edir. Daimi Komitəyə 330 partiya arasından seçilmiş 18 partiyanın nümayəndələri daxildir. Çox təqdirəlayiq haldır ki, YAP da bu komitənin üzvüdür. Bu isə partiyamızın Asiyada da böyük nüfuza sahib olmasının göstəricisidir. YAP ötən il İCAPP-ın bir neçə iclasında iştirak edib. İclaslar Malayziya və Çində keçirilib.

Eyni zamanda, bu il ərzində də beynəlxalq əlaqələrin gücləndirilməsi diqqət mərkəzində olacaq. Belə ki, 2012-ci ilin iyun ayında Azərbaycanda İCAPP-ın Daimi Komitəsinin iclası keçiriləcək. Qeyd edim ki, Daimi Komitənin iclasının harada keçirilməsi müzakirə olunanda ölkənin inkişafı, orada baş verən proseslər nəzərə alınır. Ötən il seçim zamanı bir neçə ölkənin namizədliyi olsa da, Azərbaycana üstünlük verildi. Bu da onu göstərir ki, Azərbaycanda baş verən proseslərə dünya böyük maraq göstərir. Bundan əlavə, bu ilin noyabr ayında ölkəmizdə daha böyük siyasi hadisə baş verəcək. Belə ki, İCAPP-ın Baş Assambleyası Bakıda keçiriləcək. Bu tədbirdə Asiyanın ən aparıcı partiyalarının nümayəndələri, 400-500 siyasi xadim iştirak edəcək. Eləcə də, tədbirə Avropanın nüfuzlu təşkilatlarından da nümayəndələr dəvət olunacaqlar. Bu isə YAP-ın nüfuzunun artması ilə yanaşı, onun dünyanın siyasi qurumlarına inteqrasiyasının nəticəsidir.

Bundan əlavə, partiyamız 2012-ci ildə ikitərəfli əlaqələrini də davam etdirəcək. Məlumat üçün bildirim ki, YAP ilə Vyetnam Kommunist Partiyası arasında əməkdaşlıq haqqında anlaşma memorandumunun imzalanması nəzərdə tutulur. Artıq bu barədə tərəflər arasında razılıq əldə olunub. Qarşı tərəf YAP nümayəndələrini Vyetnama dəvət edib və məhz bu səfər çərçivəsində sənəd imzalanacaq. Yəqin ki, 2012-ci il ərzində bu səfər baş tutacaq.

- Asəf müəllim, bu gün cəmiyyətimizdə əsas müzakirə mövzularından biri Fransa Senatında uydurma “erməni soyqırımı”nı inkar edənlərə qarşı məsuliyyət müəyyən edən qanunun qəbul olunmasıdır. Sizin bu məsələyə münasibətiniz necədir, bu sənəd Avropa dəyərlərinə zidd deyilmi?

- Bu gün Avropada çox maraqlı, qəribə proseslər gedir. Fransa parlamentinin tarixdə baş verməsi bəlli olmayan hadisə haqqında qanun qəbul etməsi demokratiyaya uyğun deyil. Bu sənədi Fransa kimi ölkənin Senatının qəbul etməsi nəinki demokratik prinsiplərə ziddir, eyni zamanda, çox xoşagəlməz misaldır. Çünki artıq dünya Fransanın qəbul etdiyi sənədi müzakirə edir. Bu, seçkiqabağı siyasi alver olmaqla yanaşı, antidemokratik qərardır, Fransa Konstitusiyasına ziddir. Fikrimcə, Fransa Konstitusiya Məhkəməsi qanunun təsdiqinə imkan verməyəcək.

Eyni zamanda, Türkiyə və Azərbaycan bu istiqamətdə işlərini davam etdirməlidir. İkili standartlar yolverilməzdir. Bəzi ölkələr Avropaya inteqrasiya etmək istəyir. Amma belə addımları, qeyri-demokratik qərarların qəbul olunmasını gördükdə ortaya sual çıxacaq ki, əgər Avropa demokratiyadan danışırsa, Fransanın qəbul etdiyi sənədi necə başa düşmək olar? Yaxşı olar ki, BMT-nin hansısa qurumu səviyyəsində tarixdə baş verməsi təsdiqlənməmiş hadisə haqqında qanunların qəbul edilməməsi dövlətlərə tövsiyə olunsun.

Belə bir məsələ haqqında qərar qəbul etmək üçün dəqiq araşdırmalar olmalıdır və tarixi sənədlər ortaya çıxmalıdır. Bu gün Türkiyə dövləti arxivləri açmağı təklif edir. Ermənistan isə buna getmək istəmir, çünki ifşa olunacaqlarını yaxşı bilir. Düşünürəm ki, hansısa mərhələdə bu məsələ dayanacaq. Fransada ermənilərdən çox türk yaşayır. Türkiyə məsələ ilə bağlı mövqeyini ifadə edib. Bilirsiniz ki, Türkiyə yaxın illərdə dünyanın iqtisadi baxımdan ən böyük 10 dövləti sırasında olacaq. Bu qanunun qəbul olunması isə yalnız Fransaya başağrısı verəcək.

Həmin qanunun qəbul olunması, həmçinin, Avropa dəyərlərinə ziddir. Avropa dəyərləri nə coğrafi, nə də fiziki anlayışdır. Avropa dəyərləri bir transformasiya prosesidir. Bunun da kökündə düşüncə tərzi dayanır. Bu da ondan ibarətdir ki, insan sərbəst, azad olmalıdır, demokratik prinsiplər ölkədə inkişaf etməlidir. Bu baxımdan, Fransa Senatının qəbul etdiyi qanun Avropa dəyərlərinə ziddir. Belə çıxır ki, fransızlar bu dəyərlərə qarşı çıxır. Avropanı birləşdirən məhz dəyərlərdir. Bu dəyərlərə qarşı çıxmaq Avropa İttifaqı üçün böyük problemlər yaradacaq. Onsuz da Avropa İttifaqı ciddi iqtisadi böhran yaşayır. Bunun ardınca isə mənəvi böhran gəlir. Hesab edirəm ki, bu məsələlər Avropaya daha ciddi zərbə vuracaq. Çünki bütün bunlar Avropanın gələcəyi üçün xoşagələn hadisələr deyil.

Yeni Azərbaycan.- 2012.- 7 fevral.- S.7.